ጳዉሎሳ ኤፈሶነ አሱንꬅስ
ጻፍደ ኪታ
ገለ
ጳዉሎሳ ኤፈሶነ የዘ አሱንꬅስ ጻፍደ ኪትተ ኡባፓ አꬂ ብእዳና፥ «ዎደ የልዘ ዎደ ጾዚ ፎሎደስ ቆፕደ ቆፍታ፥ ሳሎን ሳአ የዘ መꬍንትደ ባዝ ኡቡና ክርስቶሳፓ ኦሞራ ማቃደ ፋና» ያጋዘ ቆፍቶ (1:10) ይንላ አፋ ጉጂ የሱሳ ክርስቶሳራ የዘ ፈተትꬅተ፥ አስ ኮች ኡባ ፈቶ ማቃደ ፋና ይና ዳማ ቆፍቶ ኦቻላ ፌሾደ ፋና ጾዘ አሱንꬃና ቆፍዛነ።
ኤፈሶነ ኪታ ቲኖ ክፍልተ ጻፍዘ ኦማ ቆፋ ማቅዘ ፈተትꬅ ባዝ ጻፎደስ አይክዳኖ ዳልግዚ፥ ጾዘ አዳይ ፋ አሱንꬅ ዋይዝ ዶረዛኮ፥ ኡንትን ኤ ናአይ፥ የሱሳ ክርስቶሳ ፋ ናጋርትፓ ማሮትꬅ ደንግ ዋይዝ ዋሎ ኬዘዛኮን፥ ጾዘ ዳማ ኡፋይስ ቃላ ጌሽ አያና ባጋራ ቱሮ ማቅዳኖ ኤርንተዛኮ ኦህነ። ላምእንꬃ ክፍልተ ማህ ጻፍዘ Ꮉና ኪቶ ናባብዘ አሱንꬅ ፋ ፈተትꬅቶ ደእተ ክርስቶሳ ግዳ ኡን የዘ ፈተትꬅታ ቱሮ ማቃደ ጋር ኡን ዋይዝ የሳደስ ቤዝዛኮ ቆፍዛነ።
አሱንꬅ ክርስቶሳ ግዳ የዘ ፈተትꬅቶ ዋይዝ የሳደስ ቤዝዛኮ ዱማ ዱማ አዝዘር ቆንጭዳ። ዎሳ ኬꬂ ጋላ አዝዘ ማቅዘ ዎደ ክርስቶሳ ይና ጋልትስ ኦማ። ዎሳ ኬꬂ ግምበ ኬꬃራ አዝዘ ዎደ ክርስቶሳ ይና ኬꬅትስ ዶቸ ጻጵቶ ምንꬅዘ ዋና ሹች። ዎሳ ኬꬂ ማችራ አዝዘ ዎደ ክርስቶሳ አዝናራ አዝዛነ። ጻፍዘ ክርስቶሳ ባጋራ ቆንጭደ ጾዘ አንጆ ኬሃትꬅቶ ጋማ ናሺ ኦህተራ፥ ጋꬅታ ገንꬍዘ ኦሄ ኦህነ። ኤ ኡባ ባዝ፥ ክርስቶሳ ሲቅቶ፥ ኤ ዣርሽንትዳኖ፥ ኤ እንግደ ናጋራ ማሮትꬅቶ፥ ኤ አꬎ ኬሃትꬅቶን ኤ ጌሻትꬅተ ባጋራ በእነ።
ኣፈ ቆፉንꬅ
ሳር 1:1-2
ክርስቶሳን ዎሳ ኬꬂ 1:3—3:21
ክርስቶሳ ግዳ የዘ ክለ ደኦ 4:1—6:20
ጻꬅ ቆፋ 6:21-24
1
1 ጾዘ ቆፋራ ክርስቶስ የሱሳ ሐዋረ ማቅደ ጳዉሎሳ፥ ኤፈሶነ የዘ ጌሹንꬅስን ክርስቶሳ የሱሳ አማንዙንꬅስ ጻፍንትደ ኪታ።
2 ጾዘ ኑ አደፓን ላꬄ የሱስ ክርስቶሳፓ አꬎ ኬሃትꬅን ሳሮትꬅ ይንትስ ማቀ። ሐዋ. 18:19-21፤ 19:1
ክርስቶሳ ግዳ የዘ አያና አንጆ
3 ሳሎ የዘ አያና አንጆ ኡባ ክርስቶሳ ባጋራ ኑና አንጅዳ፥ ኑ ላꬄ የሱስ ክርስቶሳ አዳይ፥ ጋላትንቶ። 4 ኑኒ ኤ ቲኖ ጌሹንꬃናን ቦረ ባይዙንꬃና ማቆደ ፋና ጾዚ አላመ መꬍንቶዳንፓ ቲኖ ክርስቶሳ ባጋራ ፋ ሲቅተ ኑና ዶርዳ። 5 ጾዘ ፋ ሎኦ ቆፍተ ፋ ካꬍደ ጋር የሱስ ክርስቶሳ ባጋራ ኑና ፋ ናኡንꬃና ማሆደስ ቲኖ ቆፒ ጋድዳ። 6 ጾዘ ፋ ሲቅዘ ናአይ ባጋራ ኑስ Ꮉሪ እንግደ አꬎ ከሃትꬅታ ቦንችንቶደ ፋና ይኖ ኦችዳ።
7 አልኦ ናአይ ኤ አꬎ ኬሃትꬅትን ዳማትꬅት ፋና ኤ ሱꬅተ ዎዝንተ ደንግዳ፥ እዛን ኑ ናጋርት አቶትꬅ። 8 ፋ አꬎ ከሃትꬅታ ጭንጫትꬅን ቆፋ ኑስ ጋንꬅዳ። 9 ክርስቶሳ ባጋራ ኦቾደስ ካꬍደ ኤ ግዳ የዘ ሳዛ ቆፋ ኑና ኤርስዳ። ቆላ. 1:14 10 ዎደ ዉርሱꬅተ ጾዚ ፎሎደስ ቆፕደ ቆፍታ፥ ሳሎን ሳአ የዘ መትꬅ ኡባ ክርስቶሳራ ጻጾደስ።
11 ፋ ቆፋራ ኡባ ኦችዘ፥ ፋ ቆፍት ጋር ቲኒ ፋስ ቆፒ ጋድደ ክርስቶሳራ ማህ እርስተ ኤክዳ። 12 ይናን ክርስቶሳላ ቲኒ ኡፋይስ ጋድደ ኑኒ ኤ ቦንችቶ ጋላቶደ ፋናስ። 13 ይን ማህ ቱሪ ቃላ ይናን አቶትꬅ ዎንገለ፥ ስእደ ማህ ክርስቶሳ አማኒ ጌሽ አያናራ አታምንትዳ። 14 ኤ ቦንችትስ ጋላታ ማቃደ ፋና ጾዚ ፋስ ማቅዱንꬃና ዎዞደ ዎንꬅስ ኤዚ ኑስ ቃብደ ማህ እንግዳ።
ጳዉሎሳ ዎሳ
15 ይኒ ግሾ፥ ላꬂ የሱሳ ይን አማንዛኖን ጌሹንꬅስ ኡባ የዘ ሲቅቶ ታ ስእ 16 ታ ዎስተ ይንታና ቆፕተራ ይን ግሾ ጾዛ ጋላትዛኖ አሽካያ። 17 ቦንቾ አዳይ ላꬄ የሱስ ክርስቶሳ፥ ኤዛ ኤርዘ ጭንጫትꬅን ቆንጭꬅ አያና ይንትስ እንጎደ ጋር ታኒ ዎሳነ። 18-19 ይናን ይን ዎዝና ኣፍታ ፎእዘ ዎደ ይን ጼግስት ኡፋይስታ አኮ ፋና የዛኮን ጌሹንꬅ ካለ የዘ እርስተ ቦንቾ ዱረትꬅታ አኮ የዛኮ አማንዙንꬅስ ኡባ አꬍደ ኤ ዎልቃ ዳማትꬅታ አኮ ጋር የዛኮ ይን ኤሮደ ፋናስ።
20-21 ክርስቶሳ Ꮉይቆፓ ደንꬅደ፥ Ꮉላቃትꬅ፥ አደትꬅ ዎልቃ፥ ዎልቃ፥ ላꬄትꬅ ኡባፓ ꬎቃ፥ Ꮉና አላምተ ጻላላ ባይዝን የኦደ አላምተ ማህ ጼግንቶደ ሱንꬃፓ ꬎቃ፥ ሳሎ ጾዛፓ ምዛቅ ዛላራ በትꬅደ ክርስቶሳ ኦችደ ኤ ምንꬂ ዎልቅቶ ቆንጭዛነ። 22 ጾዚ ኡባኖ ክርስቶሳ ቶህትፓ ኦሞራ Ꮉርዝዳ፤ ማህ ዎሳ ኬꬅስ ኡባ ኦማ ማቃደ ፋና ኤዛ ሹምዳ። 23 ዎሳ ኬꬅታ ክርስቶሳ ኩሙꬅ ኦችዘ ኤ ጋላ። ዎሳ ኬꬅታ ኤ ጋላ፥ ኡባ ባዝ ሙሎ ኩምደ ኤ ኩሙꬅ።ማዝ. 8:6፤ ቆላ. 1:22-23፤ 1:18