1 ኦላን ካች ይን ግዳ አባፓ የኤ? ኡን የእዛና ይን አሽቶ Ꮉሮደስ ኦልንትዘ ይን አሾ አሞፓ ባነ? 2 ይን አሙꬋነ፥ የዝን ደንጎስ፤ ይኒ ግሾ፥ አስ ዎꬋነ። ምንꬂ ኮያነ፥ የዝን ደንጎደስ ዳንዳኦስ፤ ይኒ ግሾ፥ ካጭንታነን ኦልንታነ። ይን ጾዝ ዎሶሰ ግሾ ኮይዘ ባዝ ደንጎስ። 3 ይን ዎሳነ፥ የዝን ደንጎስ። ይን አሾ አሙቶ ፎሎደስ ዎቦ ኦገ ዎስዘ ግሾ ደንጎስ። 4 ይን፥ አማንንቶሱንꬆ! Ꮉና አላምቶ ካዽዘ ጾዛራ ሞርከ ማቅዛኖ ኤሮሳ? Ꮉና አላምትራ እግንꬆደስ ኮይዘ ኦደን ጾዛራ ሞርከ። 5 ጌሽ ማጻፍተ፥ «ጾዚ ኑ ግዳ የሳደ ፋና ጋድደ አያንዘ፥ ኑ ኤስ ቡዞ ማቃደ ፋና ዳማ አሙꬋነ» ጋይዳና ጨር ጋይደባዝ አዛነ? 6 የዝን ጌሽ ማጻፍተ፥ «ጾዚ ኡቱርትዙንꬃና እጻነ፥ የዝን ፋና ቶችዙንꬅስ አꬎ ኬሃትꬅ እንጋነ» ያጋዘ ግሾ ጾዚ አꬎ ኬሃትꬅ ጋንꬂ እንጋነ። አዝዜ 3:34

7 ይኒ ግሾ፥ ጾዝስ አቆተ፤ ጻላሄራ እጽንቶተ፤ ኤ ይንታፓ Ꮉኮዳ። 8 ጾዛጎ ሺቆተ፤ ኤ ይንታጎ ሺቆዳ። ይን፥ ናጋራንቹንꬆ፥ ይን ኩሽቶ ሜጮተ፤ ላምእ ቆፋ የዙንꬆ፥ ይን ዎዝንቶ ጌሾተ። 9 አዛኖተ፥ ዬኮተን አፉጾተ። ይን ሚችታ ዬፎራ፥ ይን ኡፋይስታ አዛኖራ ላምንቶ። 10 ላꬄ ቲኖ ይንታናትꬅቶ ዝቂ ዪዞተ፤ ኤ ይንታና ꬎቅ ꬎቅ ዪሳዳ።

11 ታ እሹንꬆ፥ ፈታይ ፈታያ ጫዥፐን ዝግርፐተ። ፋ እሻ ዝግርዛይ ኤላ አፋ ፍርድዘ ህገ ዝግራነን ህገላ አፋ ፍርዳነ። ነ ህገላ አፋ ፍርድኮ ህገላ አፋ ፍርድዛያ ማቃነፕ አትን ህገ ፎልዛያ ማቆስ። 12 ህገ እንግዘን ፍርድዘ ጾዛ ጻላላ። አሾደስን ꬋብሶደስ ዳንዳእዘ ኤዛ። ዬዝን፥ አሳላ አፋ ፍርድዛይ ነ ኦደ?

13 ይን፥ «ኑ Ꮉይኖ ዎይ ዎንታ ሰኮ ካታማ ዎይ Ꮉንኮ ካታማ ቅቶዳ፤ እዘ ፈቲ በረ ጋምኦዳ፤ ዛልእ ትርፍሳዳ» ያጋእዙንꬆ፥ ስኦተ። አዝዜ 27:1 14 ዎንታ አኮ Ꮉኖድ የዛኮ ይን ኤሮስ። ይን ደእታ ዋያድ የዛኮ ኤርዘ ኦደ? ይን ኤራꬅ ዎደ በንቲ ꬋብዘ ቃይቃዮ ፋና። 15 ይኖ አሺ፥ «ላꬂ ጋይኮ ኑኒ የሳዳ፤ Ꮉኖ ዎይ ይኖ ኦቾዳ» ጋዉደስ ቤዛነ። 16 የዝን ይን Ꮉተ ኡቱራነን ጬቅንታነ። ይኒ ጋርዘ ጬቆ ኡባ ኢታ።

17 ይኒ ግሾ፥ ሎኦ ባዝ ኦቾደስ ኤሪተ ኦቾሰ አꬄስ ይና ናጋራ።