5
ዱሩንꬅስ እንግንትደ ዞረ
1 ይን፥ ዱሩንꬆ፥ ይንታላ አፋ ኢታ ማꬋ የእዘ ግሾ ኡኮተን ዬኮተን። 2 ይን ቆልታ ቡቂዳ፤ ይን አፉልታን ብላራ ሙእንትዳ። ማቶ. 6:19 3 ይን ዎርቅታን ይን ብርታ ብርዳ። ይና ብርዳና ይንታላ አፋ ማርካ ማቃዳ። ኤ ይን አሽቶ ታማ ጋር ምቾዳ። ይን Ꮉና Ꮉልእደ ቃምተ ይንትስ ቆሎ ሺሽዳ። 4 ይን ጋድተ ኦቺ ፌዥደ አሱንꬅ ክራ ብርቶ ጭግካያ። ይና ይንታላ አፋ ኡካነ። የንꬅ ካꬃ ማጽዘ አሱንꬅ ኡክትታ ዎልቃራ የዘ ላꬄ Ꮉይተ ስንትዳ። ማሄ 24:14-15 5 Ꮉና ሳእተ ይን ሳዛ ጻላላስ ቆፒ፥ ጊግን የዝዳ። ሹፎስ ጊግንትደ Ꮉርስፋና ይንታና ꬊክዳ። 6 ይንታራ ኤቅንቶደስ ዳንዳኦሰ ጽሎ አሳላ አፋ ፍርዳነ፤ ኤዛን ዎꬍዳ።
ገንጨን ዎሳን
7 ታ እሹንꬆ፥ ላꬂ ዮኦደ ዎንꬅስ ገንጮተ። ሳአ ኦችዘ ቶርቼ እራን ሴተ እራ ዮኦደ ዎንꬅስ ገንጭ አልኦ ካꬃ ናጊ ዋይዝ የልꬅ ኤክዛኮ ቆፖተ። 8 የ ሳአ ኦችዛይ ፋና ይንትን ገንጮተ። ላꬄ የእታ ኡክደ ግሾ ኡፋይሳራ ናጎተ።
9 ታ እሹንꬆ፥ ጾዚ ይንታላ አፋ ፍርዳመ ጋር ፈታይ ፈተላ አፋ ዙዝንግፐተ። ፍርድዛይ ፉርꬃ ኤቅዳ። 10 ታ እሹንꬆ፥ ላꬄ ሱንꬅተ ኦህደ ናቡንꬅ ማꬋ ዳንዳአራ ኤኪ አዝዘ ማቅዱንꬃና ቦኦተ። 11 ዳንዳአራ ገንጭዱንꬃና ኑኒ አንጅንትዱንꬃና ጋነ። እዮባ ዋይዝ ገንጨዛኮ ይን ስእዳ። ላꬂ ዉርሱꬅተ ኤዛ ዋይዝ ማደዛኮን ብእዳ። ኤ ማሮትꬅን ይቅስሞ ኩምደ ላꬂ ማቅደ ግሾ ይኖ ኦችዳ። ኢዮ. 1:21-22፤ 2:10፤ ማዝ. 103:8
12 የዝን ኡባፓ ቲኖ፥ ታ እሹንꬆ፥ ሳሎራን ማቅን ዎይ ሳአራን ማቅን ዎይ መለ አኮ ባዛራን ጫቂፐተ። ጾዘ ፍርዳ ይን ገላመ ፋና ይን ኦህታ ዬ ማቅኮ፥ «ዬ» ጋኦተ፤ አደ ማቅኮ፥ «አደ» ጋኦተ። ማቶ. 5:34-37
13 ይን ግዳ ማꬋ ኤክዘ ኦደን የዝኮ ጾዝ ዎሶ። ኡፋይትዘ ኦደን የዝኮ ጋላታራ የጾ። 14 ይንታፓ Ꮉርግንትዘ ኦደን የዝኮ ዎሳ ኬꬂ ጭሙንꬃና ጼጎ። ኡን ላꬄ ሱንꬅተ ዛይተ ትዢ ኤስ ጾዝ ዎሶ። ማቶ. 5:34-37 15 አማኖራ ዎስደ ዎስታ Ꮉርግንትዛ ፋꬆዳ። ላꬂ ኤዛ፥ Ꮉርግትፓ ደንꬆዳ፤ ኤ ናጋራ ኦችደባዝ ማቅኮን ላꬂ ኤዛ ማሮዳ። 16 ይኒ ግሾ፥ ይን ፋጾደ ጋር ይን ናጋርቶ ፈታይ ፈተስ ፋጾተን ፈተ ፈተስ ዎሶተ። ጽሎ አስ ዎስታ ዳማን ዎልቃማ ኦቻ ኦቻነ። 17 ኤልያሳ ኑ ፋና አስ። እራ ሳአላ ቡካመ ጋር ምንꬂ ጾዝ ዎስን Ꮉይꬕ በረን እዝፑን አግና ሳአላ እራ ቡክካያ። 1 ካት 17:1፤ 18:1 18 ማህ ኤ ጾዝ ዎስን ሳሎፓ እራ ቡክዳ፤ ሳእታን ካꬃ እንግዳ። 1 ካት 18:42-45
19 ታ እሹንꬆ፥ ይንታፓ ኦደን ቱሪ ኦገፓ ባልንትኮ፥ መለ አስ ኤዛ ቱርጎ ማህኮ፥ 20 ናጋራንችዛ ኤ ኢታ ኦግትፓ ማህዘ ኦደን፥ ኤ ሸምፕቶ Ꮉይቆፓ አሽዛያን ኤ ጋማ ናጋርትስ ማሮትꬅ እንግዛኖ ኤሮ። አዝዜ 10:12፤ 1 ጴጥ. 4:8