1 የሱሳ፥ «ታ ይንትስ ቱሮ ቱሮ ጋነ፤ ዱሮ ካለስ ፉርꬃራ ማቅካይዝን መለ በሳራ ገልዘ ኦደን ካይዞን ፋኖን። 2 የዝን ፉርꬃራ ገልዘ ኤዚ ዱሩንꬃና የንግዛያ። 3 ፉርꬅቶ ናግዘ ኤስ ፉርꬅቶ ቡጋነ፤ ዱሩንꬅን ኤ ቃልቶ ስእነ። ኤ ፋ ዱሩንꬃና ኡን ሱንꬅትራ ሱንꬅትራ ጼጋነ፤ ኡንታና ካልꬅ ባለ ከሳነ። 4 ኤ ፋ ዱሩንꬃና ኡባ ባለ ከስዳንፓ ማቂ ኡንታፕ ቲኖር የꬋነ። ኡን ኤ ቃልቶ ኤርዘ ግሾ ኤዛ ካላነ። 5 መለ ቃላ ኡን ኤሮሰ ግሾ ኤፓ Ꮉካነፕ አትን ኤዛ ካሎስ» ያጋይዳ።

6 የሱሳ ኡንትስ Ꮉና አዝዝቶ ኦህዳ፥ የዝን ኤ አኮ ጋኤዛኮን ኡን ቲሪካያ።

7 ማህ የሱሳ ኡንታጎ፥ «ታ ይንትስ ቱሮ ቱሮ ጋነ፤ ታኒ ዱሩንꬅስ ፉርꬅ። 8 ታፓ ቲኖ የኤዘ ኡባ ካይዞን ፋኖፕ፥ አትን ዱሩንꬅ ኡንታና ስእካያ። 9 ፉርꬅዘ ታና፤ ታ ባጋራ ገልዘ ኦደን አቶዳ። ኤ ታ ባጋራ ገሎዳን ኬሳዳ፤ ሎኦ የንግንትዘ በሲ ደማዳ። 10 ካይዞ ካይስቶደስ፥ ሹኮደስን ꬋብሶደስ የእነፕ አትን መለባዝስ የኦስ። ታ ኡንትስ ደኦ የሳደ ጋራን ጋንጎደ ጋር ይእዳ።

11 «ታ ሎኦ ዉደ አደ፤ ሎኦ ዉደ አዳይ ፋ ዱሩንꬅ ግሾ ፋ ሸምፕቶ አꬂ እንጋነ። 12 ክራ የንግዘ አꬄ ዱሩንꬅስ አደ ማቅካይዘ ግሾ ሱዹመ የእዘ ዎደ ብእ ዱሩንꬃና አሺ ዎጻነ። ይኒ ግሾ፥ ሱዹመ ዱሩንꬃና ቦንቃነ ዱሩንꬅን ላንታነ። 13 ክራ የንግዛይ ሚሸስ የንግዘ ግሾን ዱሩንꬅባዝ ኤስ ስንቶሰ ግሾ ዱሩንꬃና አሺ ዎጻነ።

14-15 «ታ ሎኦ ዉደ አደ። ታ አዳይ ታና ኤርዛን ፋና ታንን ታ አዳያ ኤራነ። ይኒ ፋና፥ ታኒ ታ ዱሩንꬃና ኤራነ፤ ታ ዱሩንꬅን ታና ኤራነ። ታኒ ታ ዱሩንꬅ ግሾ ታ ሸምፕቶ አꬂ እንጋነ። ማቶ. 11:27፤ ሉቃ. 10:22 16 Ꮉና ካልተ ባይዘ መለ ዱሩንꬅ ታስ የነ። ታ ኡንታና ኮኦደስ ቤዛነ። ኡን ታ ቃልቶ ስኦዳ፤ ኡን ፈቲ ዉደ ማቃዳ፤ የንግዛይን ፈቶ።

17 «ታኒ ታ ሸምፕቶ አꬂ እንግ ማህ ኤክዘ ግሾ ታ አዳይ ታና ካꬋነ። 18 ታ ቆፋር ታ ሸምፕቶ አꬂ እንጋነፕ አትን ታፓ ኦደን ኤኮስ። ታ ታ ሸምፕቶ አꬂ እንጎደስን ማህ ኤኮደስ አደትꬅ ዎልቃ ታስ የነ። ታ ኦቾደ ጋር ታ አዳይ ታና ኪተዛና Ꮉኖ» ያጋይዳ።

19 ይና ኤ ጋይደ ቃልት ግሾ አይሁዱንꬅ ግዳ ማህ ዱማትꬅ መꬍንትዳ። 20 ኡንታፓ ጋሙንꬅ፥ «ኤ ግዳ ቱና አያና የነ! ኤ ዣሽታነ! ኤ ጋዛኖ አኮስ ስኤ?» ያጋይዳ።

21 መሉንꬅ ማህ፥ «ጻላሄ አይክደ አስ ኦህንትዘ ፋና ባያ። ጻላሄ ቆቀ ኣፈ ቡጎደስ ዳንዳአነነ?» ያጋይዳ።

22 የሩሳላመ ጾዘ ኬꬅቶ ጌሽደ ቃምቶ ቦንችዘ ባአለ የልዳ፤ ሳእታ ባርጎ። 23 የሱሳ ጾዘ ኬꬃ ሶሎሞነ ፉርꬃራ ጎደን Ꮉንካ Ꮉንታነ። 24 አይሁዱንꬅ የሱሳ ካለ ኤቂ፥ «ነ ኑና አይደ የሎደስ ሶኤራ ጋምእሳደ? ነ ክርስቶሳ ማቅኮ አነ ኑስ ጌሽ ኦሆ» ያጋይዳ።

25 የሱሳ ማህ ኡንታጎ፥ «ታ ይንትስ ኦህዳ፤ የዝን ታና አማናንጽዳ። ታኒ ታ አዳይ ሱንꬅተ ኦችዘ ኦችታ ታ ባዝ ማርክꬋነ። 26 የዝን ታ ይንትስ ኦህዳን ጋራ ይን ታ ዱሮ ማቅካይዘ ግሾ አማናንጽዳ። 27 ታ ዱሩንꬅ ታ ቃልቶ ስእነ። ታ ኡንታና ኤራነ፤ ኡንትን ታና ካላነ። 28 ታ ኡንትስ መዽና ደኦ እንጋነ፤ ኡን ሙሎን ꬋቦስ። ኦደን ታ ኩሽትፓ ኡንታና ቦንቆስ። 29 ኡንታና ታስ እንግደ ታ አዳይ ኡባፓ አꬋነ*ታ አዳይ ኡባፓ አꬋነ፦ ፈቲ ፈቲ ዛጋ ማጻፉንꬅ፥ «ታ አዳይ ታስ እንግደ ኡን ኡባፓ አꬋነ» ያጋይዳ። ኦደን ታ አዳይ ኩሽትፓ ኡንታና ቦንቂ ኤኮደስ ዳንዳኦስ። 30 ታንን ታ አዳይን ፈቶ» ያጋይዳ።

31 አይሁዱንꬅ የሱሳ ꬎጎደስ ማህ ሹች ደንꬅዳ። 32 የሱሳ ኡንታጎ፥ «ታኒ ኦቾደ ጋር ታ አዳይ ታስ እንግደ ጋማ ሎኦ ኦችቶ ይንታና ኦቺ ቤዝዳ። የንሳፓ አየ ግሾ ታና ሹቻራ ꬎጎደስ ኮየ?» ያጋይዳ።

33 አይሁዱንꬅ ማህ፥ «ኑ ነና ነ ሎኦ ኦችት ግሾ ሹቻር ꬎጎደስ ኮዮስ። የዝን ነ ጾዛ ጫዥዘ ግሾን አስ ማቅተራ ነ ነና ጾዝ ማህዘ ግሾ» ያጋይዳ። ሌዌ 24:16

34 የሱሳ ማህ፥ «ይን ህግተ፥ ‹ታ፥ ይን ጾዙንꬃና ጋይዳ› ጋእ ጻፍንትካ?ማዝ. 82:6 35 ጌሽ ማጻፈ መꬍናስ ላምንቶስ። ጾዚ ፋ ቃልቶ እንግደ አሱንꬃና፥ ‹ጾዙንꬃና› ጋእ ጼግኮ፥ 36 አዳይ ዶሪ አንጂ Ꮉና አላምተ ኪትደ ታና ‹ጾዘ ናአ› ጋይደ ግሾ ዋይዝ ‹ጾዝ ጫዣነ› ያጋኤ? 37 ታኒ ታ አዳይ ኦችዛኖ ኦቻንጽኮ ታና አማንፐተ። 38 የዝን ታኒ ኦችዛ ማቅኮ ይን ታና አማናንጽኮን፥ ታ አዳይ ታ ግዳ የዛኖን ታንን ታ አዳይ ግዳ የዛኖ ይን ኤሮደ ጋር ቆፖደ ጋር ታ ኦችቶ አማኖተ» ያጋይዳ።

39 ይኬ ማህ ኡን ኤዛ አይኮደስ ኮይዳ፥ የዝን ኤ ኡን ኩሽትፓ ከዝዳ።

40 ዋሐንሳ ቲኖ ጻማቅዘ በስተ፥ ዮርዳኖሳ ቦርካፓ ሰኮ ፍንꬃ የሱሳ ፊንግ የይጋ የዝዳ። ዋሐ. 1:28 41 ጋማ አሱንꬅ የሱሳጎ ይእ፥ «ዋሐንሳ መለ አቶ የዝን ፈቲ ክለ ባዝን ኦችካያ፥ የዝን ኤ Ꮉይ አꬄባዝ ኦህዳና ኡባ ቱሮ» ያጋይዳ። 42 እዘ ጋማ አሱንꬅ የሱሳ አማንዳ።