1 ብታንያ ጉታ አላዛረ ጋዘ ፈቲ አስ Ꮉርግንትዳ። ብታንያ ማይራምራን እ ምሽታ ማርታ የዘ ሳአ። ሉቃ. 10:38-39 2 ማይራማ ላꬄ ቶህትላ ሽቶ ትዢ ፋ ኦምትራ ኤ ቶህቶ ኡጭዳኖ። Ꮉርግንትዘ እ እሸ አላዛረ። ዋሐ. 12:3 3 ይኒ ግሾ፥ ምሹንꬅ፥ «ላꬆ፥ ነ ካዽዘ ኑ እሸ Ꮉርግንትዳ» ጋእ የሱሳጎ ኪትዳ።

4 የሱሳ ይኖ ስእደ ዎደ «Ꮉና Ꮉርግታ፥ ጾዘ ናአይ ቦንችቶደ ጋራን ጾዘ ቦንቾስፕ አትን Ꮉይቆስ የልꬅዘ Ꮉርገ ባያ» ያጋይዳ።

5 የሱሳ ማርታን፥ እ ምሽቶ ማይራሞን አላዛረን ካꬋነ። 6 የዝን አላዛረ Ꮉርግንትዳኖ የሱሳ ስእ ፋ የዘ በስተ ላምእ ቃማ አቅዳ። 7 ይንፓ ማቂ፥ የሱሳ ፋ ታማሩንꬃጎ፥ «ማቂ ይሁዳ ሳአ የꬎተ» ያጋይዳ።

8 ኤ ታማሩንꬅ ማህ፥ «አስታማርዛዮ፥ ኤራꬅ ዎደፓ ቲኖ አይሁዱንꬅ ነና ሹቻር ꬎጊ ዎꬎደስ ኮይዳ፤ Ꮉተን እዘ Ꮉንጎዳነ?» ያጋይዳ።

9 የሱሳ፥ «ፈቲ አዋ ታጶ ላምእ ሳተ ባነ? አዋራራ የꬍዘ አስ Ꮉና አላመ ፎእቶ በእዘ ግሾ ꬉብንቶስ። 10 የዝን ቃማ የꬍዘ ኦደን ፎኦ ባይዘ ግሾ ꬉብንታነ» ያጋይዳ። 11 የሱሳ ይኖ ጋይዳንፓ ማቂ ኡንታጎ፥ «ኑ ካዽዘ አላዛረ ገንትዳ፥ የዝን ኤዛ ደንꬆደስ ታ Ꮉማዳ» ያጋይዳ።

12 ኤ ታማሩንꬅ ማህ፥ «ላꬆ፥ ኤ ገንተዘባዝ ማቅኮ ደንዶዳ» ያጋይዳ።

13 የሱሳ አላዛረ Ꮉይቂዳኖ ኦህዳ፥ የዝን ኡንትስ ጨር ገንቶ አዝዳ። 14 ይኒ ግሾ፥ የሱሳ ጌሽ ኡንታጎ፥ «አላዛረ Ꮉይቂዳ። 15 ይን አማኖደ ፋና ታ ይና በስተ ባይዛና ይን ግሾ ኡፋይሳነ። አነ የꬎተ፤ ኤጎ Ꮉማዳ» ያጋይዳ።

16 ይንፓ ማቂ፥ ዲዲሞሳ *ዲዲሞሳ፦ ጋዛና መንተ ጋኤ። ጋእንትዘ ቶማሳ ፋ ላገ ታማሩንꬃጎ፥ «ኤራ Ꮉይቆደስ ኑስን የꬎተ» ያጋይዳ።

17 የሱሳ የልዘ ዎደ አላዛረ ሞግንትን ኦይዲ ቃማ ማቅዳ። 18 ብታነይ የሩሳላመፓ Ꮉይꬕ ክሎ ምትረ ጋር Ꮉካነ። 19 ጋማ አይሁዱንꬅ ማርታን ማይራሞን ኡን እሸ Ꮉይቂዳንስ ምንꬅꬆደስ ይእዳ።

20 ማርታ የሱሳ ይእዳኖ ስእ ኤዛ ሞኮደስ ከዝዳ፥ የዝን ማይራማ ኬꬃ አትዳ። 21 ማርታ የሱሳጎ፥ «ላꬆ፥ ነ Ꮉነ የዘ ባዝ ማቅዛኮ ታ እሸ Ꮉይቃምየሻ። 22 የዝን Ꮉተ ማቅኮን ነ ዎስዘ ባዝ ጾዚ ኔስ እንጎዳኖ ታ ኤራነ» ያጋይዳ።

23 የሱሳ፥ «ነ እሸ Ꮉይቆፓ ደንዶዳ» ያጋይዳ።

24 ማርታ ኤጎ፥ «ዉርሱꬅ ቃማ ኤ Ꮉይቆፓ ደንዶዳኖ ኤራነ» ያጋይዳ።

25 የሱሳ ኢጎ፥ «ታኒ ደንዶን ደኦን፤ ታና አማንዘ ኦደን Ꮉይቅኮን ደኦ የሳዳ። 26 ማህ ደኦ ማቅደን ታና አማንዘ ኦደን መꬍናስ Ꮉይቆስ። ይኖ ነ አማናነ?» ያጋይዳ።

27 ማርታ ማህ፥ «ላꬆ፥ ዬ ታ አማናነ! ነ ጾዘ ናአ፥ አላመ ዮኦደስ የዘ ክርስቶሳ ማቅዳኖ ታ አማናነ» ያጋይዳ።

28 ማርታ ይኖ ጋይዳንፓ ማቂ፥ Ꮉንግ ፋ ምሽቶ አችንት ጼጊ፥ «አስታማርዘ ይእ ነና ጼጋነ» ያጋይዳ። 29 ማይራማ ይኖ ስእደ ዎደ ኤልሲ ደንዲ ኤቂ የሱሳጎ Ꮉንግዳ። 30 የ ዎደ የሱሳ ማርታራ የልንትደ በስተ የነ፤ Ꮉጋ ካራ ጋንጨ የልካያ። 31 ማይራሞ ምንꬅꬅተር ኢራ ኬꬃ የዘ አይሁዱንꬅ፥ እዛ ደንዲ ኤቂ ኤልሲ ባለ ኬዝዳኖ ብእ፥ ቦዛ Ꮉንግ ዬኮደስ ይእዛ አዝን እዞ ካሊ ከዝዳ።

32 ማይራማ የሱሳ የዘ በስቶ Ꮉንግ ኤዛ ብእደ ዎደ ኤ ቶህትላ ጎልእ፥ «ላꬆ፥ ነ Ꮉነ የዘ ባዝ ማቀዛኮ ታ እሸ Ꮉይቃም የሻ» ያጋይዳ።

33 የሱሳ ማይራምራን ኢራ የዘ፥ አይሁዱንꬅ ዬክዛኖ ብእ፥ ፋ ዎዝንተ ጋማ ይቅስንቲ፥ 34 «አባ ሞግዶ?» ጋእ ኦጭን፥ «ላꬆ፥ ይእ ቦኦ» ያጋእ ማህዳ።

35 የሱሳ አፉጽዳ። 36 ይኒ ግሾ፥ አይሁዱንꬅ፥ «ኤ አላዛረ አኮ ጋር ካዛኮ ቦኦተ» ያጋይዳ።

37 የዝን ኡንታፓ ፈተ ፈተ፥ «Ꮉይ ቆቅዘ ኣፍቶ ቡግደ Ꮉይ አꬄ Ꮉይቃመ ጋር ይሳደስ ዳንዳኦሶ?» ያጋይዳ።

38 ማህ የሱሳ ይቅስንቲ፥ አላዛረ ሞግንትደ ቦዝትጎ Ꮉንግዳ። ቦዝታን ሹቻራ ጎርድንትደ ዎምኦ። 39 የሱሳ፥ «ሹችቶ ደንꬆተ» ያጋይዳ።

ማርታ፥ «ላꬆ፥ ኤ Ꮉይቂዳንፓ Ꮉይኖ ኦይዲ ቃማ ማቅደ ግሾ Ꮉተ ዜቆዳ» ያጋይዳ።

40 የሱሳ ማርታጎ፥ «ነ አማንዘባዝ ማቅኮ ጾዘ ቦንቾ ቦኦዳኖ ታ ኔስ ኦህካ?» ያጋይዳ። 41 ኡን ቦዝትላ የዘ ሹችቶ ደንꬅን የሱሳ ሳሎ ኡደ ብእ፥ «አዳዮ፥ ታና ነ ስኤዘ ግሾ ነና ጋላታነ። 42 ነ ኡባ ዎደ ታና ስእዛኖ ታ ኤራነ። የዝን Ꮉነ ኤቅደ አሱንꬅ ነ ታና ኪተዛኖ አማኖደ ጋር ታ ኡን ግሾ Ꮉኖ ጋነ» ያጋይዳ። 43 የሱሳ ይኖ ጋይዳንፓ ማቂ፥ ፋ ቃልቶ ꬎቅ ዪዚ፥ «አላዛረ፥ ኡደ ከዞ!» ያጋይዳ። 44 Ꮉይቂደ አꬄ ዚꬍንትዳንራ ኩሽታን ቶህቶ ሻሎራ አጭንቲ የዝን ኤ ኣፍታ ጎዝንትዳንራ ቦዝትፓ ከዝዳ። የሱሳ ኡንታና፥ «ብሎተ! የꬎ ጋኦ!» ያጋይዳ።

45 ይኒ ግሾ፥ ማይራምጎ ይእደ አይሁዱንꬃፓ ጋሙንꬅ የሱሳ ኦችዳኖ ብእ ኤዛ አማንዳ። 46 የዝን ኡንታፓ ፈተ ፈተ ፋርሳዉንꬃጎ Ꮉንግ የሱሳ ኦችዳኖ ኡንትስ ኦህዳ። 47 ይንፓ ማቂ፥ ካህኑንꬅ Ꮉላቁንꬅን ፋርሳዉንꬅ ሻንጎስ ሺሺ፥ «Ꮉይ አꬄ ጋማ ክሌ ባዝ ኦችዘ ግሾ ኑ አኮ ኦቾ? 48 ኑ ኤዛ ጨር አሽኮ አስ ኡባ ኤዛ አማኖዳ። ማህ ሮመ ሳአ አሱንꬅ ይእ ኑ ጾዘ ኬꬅቶን ኑ ባጉንꬃና ꬋብሶዳ» ያጋይዳ።

49 ኡንታፓ ፈተ ቃያፋ ጋዘ፥ ይና በርተ ካህኑንꬅ Ꮉላቃ ማቅደ፥ «ይን አኮን ኤሮስ! 50 ዎርዣ ኡባ ꬋቦዳንፓ ፈቲ አስ ዎርዥት ግሾ Ꮉይቆዳና ሎኦ ማቅዛኖ ኤሮሳ?» ያጋይዳ። 51 ኤ ይኖ ፋፓ ጋይካያ። የዝን ይና በርተ ካህኑንꬅ Ꮉላቃ ማቅደ ግሾ የሱሳ አይሁደ አሱንꬅ ግሾ Ꮉይቆደስ ቤዛኖ ትንቢተ ኦህዳ። 52 ማህ የሱሳ አይሁደ አሱንꬅ ጻላላስ ማቅካይዝን ላልንቲ የዘ ጾዘ አስ ኡባ ፈትላ ሺሾደስን ፈቲ አስ ማሆደስ Ꮉይቆዳ።

53 ይና ቃምትፓ አይኪ ኡን ኤዛ ዎꬎደስ ዞርንትዳ። 54 ይኒ ግሾ፥ የሱሳ አይሁዱንꬅ ግዳ ቆንጨ በሳ Ꮉንትካያ። የዝን አኮ ባይዘ ሳአ ካለ የዘ ኤፍሬመ ጉታ ቅትዳ። ፋ ታማሩንꬃራ ይና በስተ ጋምእዳ።

55 አይሁዱንꬅ ቦንችዘ ፋስጋ ቃማ ኡክዳ። ማህ ጋማ አሱንꬅ ፋና ጌሾደስ ፋስጋ ቦንችዘ ቃማ የሎዳንፓ ቲኖ ይና ሳእትፓ የሩሳላመ ቅትዳ። 56 ኡን ጾዘ ኬꬃ ኤቂ የሱሳ የእቶ ናግዘ ግሾ «አኮ ቆፐ? የሱሳ ባአለ ቦንቾደስ የአም የሳነ?» ያጋእ ፈተ ፈታ ኦጭዳ። 57 ካህነ Ꮉላቁንꬅን ፋርሳዉንꬅ የሱሳ አይኮደስ፥ ኤ የዘ በስቶ ኤርዘ ኦደን ፋስ ማሎደ ፋና ኪትዳ።