4
የሱሳ ፋታንንትዳ
(ማቶ. 4:1-11፤ ማር. 1:12-13)
1 የሱሳ ጌሽ አያናራ ኩሚ ዮርዳኖሳ ቦርካፓ ማቅደ ፋና አያና ኤዛ አኮ ባይዘ ጋናሳ ካንግዳ። 2 እዘ ኦይታም አዋራን ቃማ ጻላሄራ ፋታንንትዳ። የ ዎድተ አኮን ሙእካይዛራ ጋምእደ ግሾ ዉርሱꬅተ ናይꬍዳ።
3 ጻላሄ ኤጎ፥ «ኔኒ ጾዘ ናአ ማቅኮ አነ Ꮉይ ሹችዛ ዳቦ ማቆ ጋእ ኪቶ» ያጋይዳ።
4 የሱሳ ማህ፥ «አስ ዳቦ ጻላላራ የዞስ ጋእንት ጾዘ ቃልተ ጻፍንትዳ» ያጋይዳ። ማሄ 8:3
5 ይንፓ ሱባ፥ ጻላሄ የሱሳ ጳርጎ ደረላ አፋ ኬሲ Ꮉና አላምት ካእቱምቶ ኣፈ ቅጲ ማቃደስ ቤዝዳ። 6 ጻላሄ፥ «Ꮉና ኡባንስ አደትꬅ ዎልቃ ቦንቾን ታስ እንግንትዳ። ታኒ ካዽዘ ኦደስን እንግዘ ግሾ ኔስ እንጎዳ። 7 ይኒ ግሾ፥ ነ ታስ ጎይንዛኮ ኡባ ኔስ ማቃዳ» ያጋይዳ።
8 የሱሳ ማህ፥ «ነ ላꬃ፥ ነ ጾዛ፥ ኤዛ ጻላላ ጎይኖን ኤስ ኦቾ ጋእንት ጾዘ ቃልተ ጻፍንትዳ» ያጋይዳ። ማሄ 6:13
9 ዉርሱꬅተ ጻላሄ የሱሳ የሩሳላመ ካንግ ጾዘ ኬꬅትስ ኩስተላ አፋ ኤስ፥ ኔኒ ጾዘ ናአ ማቅኮ አነ ሱለ ሳአ ነና ኦሎ። 10 አኮስ ጋይኮ፥
« ‹ነና ናግዘ ፋ ኪታንቾ
ነ ግሾ ኪቶዳ ጋእንት ጾዘ ቃልተ ጻፍንትዳ። ማዝ. 91:11-12
11 ኡን ነ ቶህታ ሹቻላ ꬉቡንታመ ጋር፥
ፋ ኩሽተ ꬎቅ ዪዚ ነና ደንꬆዳ› ጋእንት ጾዘ ቃልተ ጻፍንትዳ»
ያጋይዳ።
12 የሱሳ ማህ፥ «ነ ላꬃ ጾዛ ፋታንፐ ጋእንት ጾዘ ቃልተ ጻፍንትዳ» ያጋይዳ። ማሄ 6:16
13 ጻላሄ የሱሳ ፋታንቶ ኡባ Ꮉስዳንፓ ሱባ መለ ዎትዘ ዎደ ደንጎደ ዎንꬅስ ኤፓ ሻክንትዳ።
የሱሳ ጋልላ ኦቻ አይክዳ
(ማቶ. 4:12-17፤ ማር. 1:14-15)
14 የሱሳ ጌሽ አያና ዎልቃራ ኩሚ ጋልላ ማቅዳ። ኤ ሱንꬅታ ካለ የዘ ሳአ ኡባ ከዝዳ። 15 ኤ አይሁደ ዎሳ ኬꬃ ገሊ ታማርስዳ፤ አሱንꬅ ኡቡንꬅ ኤዛ ጋላትዳ።
16 እዝፓ ኤ ድጭደ ካታማ ናዝረተ ይእዳ። ቲኖ ኦችዛን ፋና ሳምባታ ዎደ አይሁደ ዎሳ ኬꬃ ገልዳ። ናባቦደስን ደንዲ ኤቅዳ። 17 ናበ ኢሳያሳ ማጻፍዘ ጻጽንትዳያ ኤስ እንግን፥ ቡጊ፥ Ꮉንጋራ ያጋእ ጻፍንትዳኖ ደንግዳ፦
18 «ላꬄ አያና ታላ አፋ የነ፥
ዳሁንꬅስ ዎንገለ ኦሆደ ፋና
ጾዚ ታና ዶርዳ።
አጭንትዱንꬅስ ብልንተ፥
ቆቅዱንꬅስ በኤ
ኡንእንትዱንꬃና ዋሎ ኬሶደስ፥ ኢሳ. 61:1-2
19 ጾዚ አሾደስ ቆፕደ በርቶ ኦሆደ ፋና ታና ኪትዳ»
ያጋይዳ።
20 ይንፓ ሱባ፥ ማጻፍዛ ጻጺ አይሁደ ዎሳ ኬꬃ እንግዳ። አይሁደ ዎሳ ኬꬃ የዘ አሱንꬅ ኡባ ዳኪ በእነ። 21 ኤ፥ «Ꮉይቼ ይን Ꮉይትራ ይን ስእዘ Ꮉና ማጻፈ ቃልታ Ꮉይኖ ፎልንትዳ» ያጋይዳ።
22 ኡቡንꬅ ኤ ባዝ ሎኦ ባዝ ኦህንታነ። ማህ ኤ ዶንትፓ ከዘ አꬎ ኬሃትꬅ ኩምደ ቃላትፓ ደንድ ጋማ ቆፒ፥ «Ꮉይ ዮሰፋ ናአ ባነ?» ያጋይዳ።
23 ኤ፥ « ‹አክምዛዮ አነ ነና አሾ፥ ቅፍርናሆመ ግዳ ነ ኦችዳኖ ኑ ስእዳኖ ማህ Ꮉነ ነ ካታምተ ኦቾ› ያጋእዘ አዝዘራ ይን ታና ጋውዳንስ ሶኤ ባያ» ያጋይዳ። 24 ማህ፥ «ቱሮ ኦህነ፤ ናበ ፋ የልንትደ ጋድተ ቦንችንቶስ። ዋሐ. 4:44
25 «ታ ይንትስ ቱሮ ኦህነ፤ ሳሎ Ꮉይꬕ በረን ባገ ጎርድንትን ምንꬅ ናየ ሳአላ ኡባ የዘ ኤልያሳ ዎደ ጋማ ቡዳኑንꬅ እስራኤለ ግዳ የነ የሻ። 1 ካት 17:1 26 ኤልያሳ ኡንታፓ ፈትጎን ኪትንትካያ። የዝን ሳራፕታ ግዳ የዘ ፈቲ ቡዳንትጎ ኪትንትዳ። 1 ካት 17:8-16 27 ናበ ኤልሳኤ ዎደ እስራኤለ ግዳ ጋማ ቁርሱማራ Ꮉርግንትዙንꬅ የነ የሻ። የዝን ሶርያ አꬄ ንእማነፕ አትን ኦደን ፋጽካያ» ያጋይዳ። 2 ካት 5:1-14
28 አይሁደ ዎሳ ኬꬃ የዘ አስ ኡቡንꬅ ይኖ ስኤዘ ዎደ ጋማ ዥልꬍዳ። 29 ፋ በትደ በስትፓ ደንዲ ደረላ አፋ ኬጽንትደ ካታምትፓ ጋጻ ኬሲ ኡርቂ ዳኮደስ ጋጋ ዶና ካንግዳ። 30 የዝን ኤ ኡን ግዳራ ካንꬂ አꬍዳ።
የሱሳ ቱና አያና ከስዳ
(ማር. 1:21-28)
31 እዝፓ ጋልላ ሳአ የዘ ቅፍርናሆመ ካታማ ቅትዳ። እዘ ሳምባታ ዎደ አሱንꬃና ታማርስዳ። 32 ኤ ታማርስዛና አደትꬅ ዎልቃራ ማቅደ ግሾ ኡቡንꬅ ኤ ትምርትተ ጋማ ቆፕዳ። ማቶ. 7:28-29፤ ማዝ. 91:11-12
33 አይሁደ ዎሳ ኬꬃ ቱና አያና አይክደ አꬄ የነ። 34 ኤ፥ «ናዝረተ የሱሳ ኑና አኮስ ዋይ ኑፓ Ꮉኮ፤ ነ ይእዳና ኑና ꬋብሶደስነ? ነ ኦና የዛኮ ታ ኤራነ። ኔኒ ጾዘፓ ይእደ ጌሽ» ያጋእ ኡክዳ።
35 የሱሳ ቱና አያንዘጎ፥ «ስእ ጋእ Ꮉይ አꬄፓ ከዞ» ያጋእ ካጭዳ። ቱና አያንዘ አꬃ አስ ኡቡንꬅ ቲኖ ኦሊ አሺ አኮን ቆህካይዛራ ዳኪ ከዝዳ።
36 አሱንꬅ ኡባ ጋማ ቆፕዳ። ዎልጎ፥ «ዬዝን፥ Ꮉና አኮ ትምርተ? ቱና አያኑንꬃና አደትꬅ ዎልቃራ ኪታነ፤ ኡንትን ከዛነ» ያጋይዳ። 37 ኤ ሱንꬅታ ካራ ጋንጨ ኡባ ከዝዳ።
የሱሳ ጋማ Ꮉርግንትዙንꬃና ፋꬅዳ
(ማቶ. 8:14-17፤ ማር. 1:29-34)
38 ይንፓ ሱባ፥ የሱሳ አይሁደ ዎሳ ኬꬃፓ ኬዚ ስሞና ኬꬃ ገልዳ። ስሞና ማችት እንታ ምንꬂ ኦማ ኦꬅን ምቻ Ꮉርግንትዳ። እዞ ፋꬆደ ጋር የሱሳ ዎስዳ። 39 እ ይꬅትጎ ሺቂ ዙጊ እ Ꮉርግዛ ሴርዳ። ምችታ አሽን ኤልሲ ደንዲ ኡንታና ሞክዳ።
40 አዋ ገሎደስ ይአደራ ዱማ ዱማ Ꮉርገራ አይክንትደ አሱንꬃና ኤጎ ክእዳ። ኤ ፈተላ ፈተላ አፋ ፋ ኩሽቶ ጋዲ ፋꬅዳ። 41 ቱና አያኑንꬅ ማህ፥ «ኔኒ፥ ጾዘ ናአ» ጋእ ዉይስተራ ጋማ አሳፓ ከዝዳ። የዝን ኤ ኡንታና ካጭዳ። ኤ ክርስቶሳ ማቅዳኖ ኡን ኤርዘ ግሾ ፈቲ ባዝን ኦሃመ ፋና ካይዳ።
የሱሳ ጋልላ ታማርስዳ
42 Ꮉጋ ዎንትዘ ዎደ የሱሳ ፈቲ አስ ባይዘ በሳ ቅትዳ። አሱንꬅ ኮይተራ ኤ የዘ በስተ ይእዳ። ኡንታፓ ኤ ሻክንት ቅታመ ጋር ካይዳ። 43 የዝን ኤ፥ «ታኒ መለ ካታማ Ꮉንግ ጾዘ ካእቱሞ ዎንገለ ማርክꬋደስ ቤዛነ። ታ ኪትንትዳና ይንስ» ያጋይዳ። 44 ይሁዳ ሳአ የዘ አይሁደ ዎሳ ኬꬃ ሳባክዳ።