5
የሱሳ ዶርደ ቲኖ ታማሩንꬃና
(ማቶ. 4:18-22፤ ማር. 1:16-20)
1 ፈቲ ዎደ የሱሳ ጌንሳሬጠ አባ ካለ ኤቀዝን ጋማ አሱንꬅ ኤ ካንቶ ዉቲ ኤዛ ኡንእꬅ፥ ኤ ታማርስዘ ጾዘ ቃልቶ ስእነ። ማቶ. 13:1-2፤ ማር. 3:9-10፤ 4:1 2 እዘ Ꮉꬅ ጋጻ የዘ ላምእ ጎንጉንꬃና ብእዳ። ሞሎ አይክዘ አሱንꬅ ጎንጉንꬃፓ ዎꬊ ፋ ሞሎ አይክዘ ግትቶ ሜጫነ የሻ። 3 የንꬅ ጎንጉንꬃፓ ስሞናሰ ግዳ ገሊ ሳአፓ ኤራꬅ ግዳ ሺሾደ ፋና ኦጭዳ። የይዝ፥ የ ጎንግዘላ አፋ በቲ አሱንꬃና ታማርስዳ።
4 ፋ ታማርስዛኖ Ꮉስዳንፓ ሱባ ስሞናጎ፥ «ጎደ ጌንትጎ ሺሺ ሞሎ አይኮደስ ይን ግትዛ ኦሎተ» ያጋይዳ።
5 ስሞና ማህ፥ «አስታማርዛዮ፥ ቃማ ኩሙꬅ ላቢ አቂ አኮን አይክካያ፥ የዝን ነ ጋይኮ ግትዛ ኦሎዳ» ያጋይዳ። ዋሐ. 21:3
6 ኡን ግትዛ ኦልደ ዎደ ግትዘ ፈꬍንቶደ ዎንꬅስ ጋማ ሞሎ አይክዳ። ዋሐ. 21:6 7 መለ ጎንገ የዘ ፋ ላጉንꬅ ይእ፥ ፋና ማዶደ ጋር ዉቲ ጼግዳ። ኡን ይእ ላምእ ጎንግታ፥ Ꮉꬅተ ቆꬍንቶደ ዎንꬅስ ሞሎራ ኩንꬅዳ።
8 ስሞን ጴጥሮሳ ይኖ በኤዘ ዎደ የሱሳ ቲንተ ቡንቁንቲ፥ «ላꬆ፥ ታኒ ናጋራር የዘ አስ ማቅደ ግሾ ታፓ Ꮉኮ» ያጋይዳ። 9 ይኖ ኤ ጋእዳና ኤዝን ኤራ የዙንꬅ አይክደ ሞሎ ጋማትꬅተ ጋማ ቆፕደ ግሾ። 10 ማህ ስሞና ዣመ ማቅደ ዛብዶሳ ናኡንꬅ ያይቆባራን ዋሐንሳራን ጋማ ቆፕዳ። የሱሳ ስሞናጎ፥ «ዣሽትፐ! ይኬፓ ኔኒ አስ አይክዘ አስ ማቃዳ» ያጋይዳ። 11 ኡን ጎንግቶ ጋጻ ሺሽዳንፓ ሱባ ኡባኖ አሺ የሱሳ ካልዳ።
የሱሳ ቁርሱማ Ꮉርግንትዛ ፋꬅዳ
(ማቶ. 8:1-4፤ ማር. 1:40-45)
12 የሱሳ ካታሙንꬃፓ ፈተ ግዳ የዝን ፈቲ ቁርሱማ Ꮉርገራ *ቁርሱማ Ꮉርገ፦ ቁርሱማ Ꮉርገ አስ ጋላላ አፋ ከዝዘ Ꮉርገ። እስራኤለ ሳአ ቁርሱማራ Ꮉርግንትዙንꬅ መለ አሳፓ ዱሙꬊ የነፕ አትን አሳራ የልንቶስ። አይክንትደ አስ ይና ካታምተ የነ። የ አꬃይ የሱሳ ብእ ኤ ቲንተ ቡንቁንቲ፥ «ላꬆ፥ ነ ቆፋ ማቅኮ ታና ጌሾደስ ዳንዳአነ» ጋእ ዎስዳ።
13 የሱሳ ፋ ኩሽቶ ዳኪ ቦቺ፥ «ዬ፥ ታ ቆፋ፤ ጌዦ» ያጋይዳ። እዝራ ቁርሱማ Ꮉርግዘ አꬃ ዳክዳ።
14 የሱሳ፥ «Ꮉኖ ኦደስን ኦህፐ፥ የዝን Ꮉንግ ነ ጋልቶ ካህንዘ ቤዞ። ነ ጌዥዳንስ ማርካ ማቃደ ፋና ሙሴ ኪትደ ዣርሽቶ ዣርሾ» ጋእ ኪትዳ። ሌዌ 14:1-32
15 ማቆ የዝን፥ የሱሳ ሱንꬅታ ካሰንፓ አꬊ ዳልግተራ Ꮉንግዳ። ጋማ አሱንꬅ ኤ ኦህዛኖ ስኦደስን ፋ Ꮉርግትፓ ፋጾደስ የእነ። 16 የዝን ኤ ጋማ ዎደ ጌማ በሳ ቅቲ ዎሳነ።
የሱሳ ዎቦ ፋꬅዳ
(ማቶ. 9:1-8፤ ማር. 2:1-12)
17 ፈቲ ዎደ የሱሳ ታማርሶደራ ጋልላፓን ይሁዳ ካራ ጋንጨ ኡባፓ ማህ የሩሳላመፓን የኤዘ ፋርሳዉንꬅን ህገ አስታማሩንꬅ እዘ በትዳ። አስ ፋꬅዘ ላꬄ ዎልቅታን ኤራ የነ። 18 የ ዎደ አሱንꬅ ፈቲ ዎቦ አꬃ አልጋራ ቶኪ ክእዳ። ኬꬃ ገልꬂ ኤ ቲንተ ጋዶደስ ቆፕዳ። 19 የዝን አስ ጋማፓ ደንዲ ኬꬃ ገልꬆደስ ጋምን ኬꬃላ አፋ ኬዚ፥ ኬꬂ ኣፍቶ ቶኪ፥ Ꮉርግንትዛ አልግዘራ የሱሳ ቲኖ ኬꬅዳ።
20 የሱሳ ኡን አማንቶ ብእ፥ «ናተ አꬃዮ፥ ነ ናጋርታ ኡጭንትዳ» ያጋይዳ።
21 ህገ አስታማሩንꬅን ፋርሳዉንꬅ፥ «Ꮉይ ጾዘላ አፋ ያጋእ ኦህዘ ኦደ? ፈቲ ጾዘፕ አትን መለ ናጋራ ኡጮደስ ዳንዳእዘ ኦደ?» ያጋእ ቆፕዳ።
22 የሱሳ ኡን ቆፍቶ ኤርደ ግሾ ኡንታጎ፥ «ይን ዎዝንተ Ꮉኒ ጋር አኮስ ቆፐተ? 23 ‹ነ ናጋርታ ኡጭንትዳ ጋእዛንፓን ደንዲ ቅቶ ጋእዛንፓ አየ ፎለ?› 24 የዝን ታ ይኖ ጋይዳና አስ ናአይ ሳአላ አፋ ናጋራ ኡጮደስ አደትꬅ ዎልቃ የዛኖ ይን ኤሮደ ጋራ።» ይንፓ ካሊ፥ ዎቦ አꬃ፥ «ደንዶ፤ ነ አልግዛ ቶኪ ነ ካራ ቅቶ» ያጋይዳ። 25 ኤ ኢራ ደንዲ ኡን ቲንተ ኤቅዳ፤ ኤ ቶክንት ይእደ አልግዛ ቶኪ ጾዝ ጋላትተራ ፋ ካራ ቅትዳ። 26 የ ዎደ ኡቡንꬅ ጋማ ቆፕዳ። ጾዝ ጋላትተራ፥ «Ꮉይኖ ዳማ ክለ ባዝ ብእዳ» ያጋእ ዣሽትዳ።
የሱሳ ሌወ ጼግዳ
(ማቶ. 9:9-13፤ ማር. 2:13-17)
27 ይንፓ ሱባ፥ የሱሳ የይጋፓ ኬዚ ቅትዳ። ሌወ ጋእንትዘ ፈቲ ቃራጠ ጋችዛይ ቃራጠ ጋችዘ በስተ በትዳያ ብእ፥ «ታና ካሎ» ያጋይዳ። 28 ኤ ኡባ ባዝ አሺ ደንዲ ኤዛ ካልዳ።
29 የ ሌዊዘ ፋ ካራ ዳማ ድግሳ ጊግዝዳ። ጋማ ጊራ ጋችዙንꬅን መለ አሱንꬅ ካꬃ ማአደስ በትዳ። 30 ፋርሳዉንꬅን ህገ አስታማሩንꬅ፥ «ጊራ ጋችዙንꬃራን ናጋራንቹንꬃራ አኮስ መኤ ኡዠ?» ያጋእ የሱሳ ታማሩንꬃላ አፋ ዙዝንግዳ። ሉቃ. 15:1-2
31 የሱሳ ኡንታጎ፥ «Ꮉርግንትዙንꬅስ ፋትን ፋጻስ አክመ ኮሾስ። 32 ታኒ ናጋራንቹንꬃና ማሮትꬃጎ ማሆደስ ፋትን ጌሹንꬃና ጼጎደስ ይእካያ» ያጋእ ማህዳ።
ጾማ ባዝስ ሺቅደ ኦጨ
33 ኡን የሱሳጎ፥ «ዋሐንሳ ታማሩንꬅ ጋማ ዎደ ጾማነ፥ ዎሳነ፤ ማህ ፋርሳዉንꬅ ታማሩንꬅን ይኒ ጋራ ዪዛነ። የዝን ኔሱንꬅ ኡባ ዎደ ሙነ ኡዣነ» ያጋይዳ።
34 የሱሳ ኡንታጎ፥ «ሙሹራ ኡንታራ የዝን ጼግንትደ አሱንꬅ ጾሞደ ጋር ይሳደስ ዳንዳአነተ? 35 የዝን ሙሹርዘ ኡንታፓ ሻክንቶደ ዎደ የኦዳ፥ የ ዎደ ኡን ጾሞዳ።»
36 ማህ ያጋእ አዝዘ ኦህዳ፤ «ክለ ማኦፓ ፌꬊ ጋልአ ማኦላ አፋ ስክዘ ኦደን ባያ። ይኒ ፋና የይዝኮ ክለ ማእዛ ፌꬋነ፥ ክልዘ ጋልእዘስ ጊጎስ። 37 ማልአንቶ ዎይነ ጭማ ስልጰ ጉጅዘ ኦደን ባያ። ይኖ የይዝኮ፥ ማልአንቶ ዎይንዘ ጭማ ስልጵዛ ꬉሳነ፤ ዎይንታን ላንታነ ስልጵዘን ማዶሰ ባዝ ማቃነ። 38 ይኒ ግሾ፥ ማልአንቶ ዎይነ ክለ ስልጰ ጉጁንቶደስ ቤዛነ። 39 ይኬ፥ ጫልዘ ሎኦ ጋዘ ግሾ ጫላ ዎይነ ኡዢ ማቂ ጫልካይዛ ማልአንቶ ኮይዘ ኦደን ባያ» ያጋይዳ።