1 የሱሳ ይኖ ኡባ አሱንꬅ ቲኖ ታማርስ Ꮉስዳንፓ ሱባ፥ ቅፍርናሆመ ካታማ ቅትዳ። 2 ይና በስተ ፈቲ ሮመ ማቶ Ꮉላቃ የነ። ኤ ጋማ ካዽዘ አርዘ Ꮉርግንቲ Ꮉይቆስ የልዳ። 3 ኤ የሱሳ ባዝ ስእደ ዎደ ፋ አርዛ ፋꬆደ ፋና ኤዛ ዎሶ ጋእ ፈቲ ፈቲ አይሁደ ጭሙንꬃና የሱሳጎ ኪትዳ። 4 ኪትንትዱንꬅ፥ የሱሳጎ Ꮉንግ፥ «ነ ኤስ Ꮉኖ ኦቾደስ ቤዛነ። 5 አኮስ ጋይኮ፥ Ꮉይ አꬃይ ኑ አሱንꬃና ካꬋነ፥ አይሁደ ዎሳ ኬꬅን ኬጽዳ» ያጋእ ምንꬂ ዎስዳ 6 የሱሳን ኡንታራ Ꮉንግዳ።

ማቶ Ꮉላቅዘ ካራጎ ኡክደ ዎደ ፋ ላጉንꬃና ኤጎ ኪቲ፥ «ላꬆ፥ ታ ኬꬃ ነ ገሎደስ ቤዞሰ ግሾ ላቢፐ። 7 ታንን ታና ነ ቲንተ ሺቆደስ ቤዘ አስ ጋእ ቆፖስ። የዝን ነ ፈቲ ቃላ ኦሆ፤ ታ አርዘ ፋጾዳ። 8 ታስ ታፓ ካታራ Ꮉላቃ የነ፥ ታፓ ዬካራ ታ ኪትዘ ዎታዳሩንꬅ የነ። ፈታ፥ ‹ቅቶ› ጋይኮ ቅታነ፥ Ꮉንካያ፥ ‹ዮኦ› ጋይኮ የእነ። ታ አርዘጎ፥ ‹Ꮉኖ ዪዞ› ጋይኮ ዪዛነ» ያጋይዳ።

9 የሱሳ ይኖ ስእደ ዎደ ጋማ ቆፕዳ። ሱብ ማቂ ፋና ካልዘ አሱንꬃጎ፥ «ታ ይንትስ ቱሮ ኦህነ፤ መለ አቶ የዝን እስራኤሉንꬃፓን Ꮉኒ ጋር ዳማ አማኖ ደንግካያ» ያጋይዳ። 10 ኪትንትዱንꬅ ካራ ማቅደ ዎደ አርዘ ፋጽን ደንግዳ።

11 ኤራꬅ ዎደፓ ሱባ የሱሳ ናይነ ካታማ ቅትዳ። ኤ ታማሩንꬃራን መለ ጋማ አሱንꬅ ኤራ ቅትዳ። 12 ኤ ካታማ ገሎደስ ይእዘ ዎደ አሀ ቶኪ ጋማ አስ ካታማፓ ከዛነ። Ꮉይቂደ ናአይ ፋ እንትስ ፈቶ፥ እዛን ቡዳኖ ማቂ የነ። ካታማ አሱንꬃፓ ጋሙንꬅ ኢራ የነ። 13 ላꬂ እዞ ብእ ይቅስንቲ፥ «ዬክፐ» ያጋይዳ።

14 ሺቂ ሻንቻፍዛ ቦችን ቶክደ አሱንꬅ ኤቅዳ። የሱሳ፥ «ናተ፥ ናአትꬃዮ ደንዶ» ያጋይዳ። 15 Ꮉይቂዳይ ደንዲ በቲ ኦሄ አይክዳ። የሱሳ ናአያ ደንꬂ እንትስ እንግዳ።

16 አሱንꬅ ኡቡንꬅ ዣሽቲ፥ «ዳማ ናበ ኑ ግዳ ደንድዳ፤ ጾዚ ፋ አሱንꬃና ብእዳ» ያጋእ ጾዝ ጋላትዳ። 17 ኤ ሱንꬅታ ይሁዳን ይና ካራ ጋንጨ የዘ ሳእተ ኡባነ ስንትዳ።

18 ጻማቅዘ ዋሐንሳ ታማሩንꬅ ይኖ ኡባኖ ዋሐንሳስ ኦህዳ። ኤ ኡን ግዳፓ ላምኡንꬃና ጼጊ፥ 19 «ዮኦዳ ጋእንትደ ነናነ? ዎይ መለ ናጎደ?» ያጋእ ኦጮተ ጋእ ላꬃጎ ኪትዳ።

20 አሱንꬅ የሱሳጎ Ꮉንግ፥ ጻማቅዘ ዋሐንሳ፥ «ዮኦዳ ጋእንትደ ነናነ? ዎይ መለ ናጎደ?» ጋኦተ ጋእ ኑና ኔጎ ኪትዳ ያጋይዳ።

21 ይና ሳተ የሱሳ ጋማ አሱንꬃና Ꮉርገፓ ፋꬅዳ። ጋማ ቱና አያኑንꬃና ከስዳ፥ ቆቅደ ኣፈን ብእዝዳ። 22 ዋሐንሳ ካለፓ ኪትንቲ የኤዙንꬃጎ፥ «Ꮉንግ ይን ብእዳኖን ስእዳኖን ዋሐንሳስ ኦሆተ። ኣፈ ቆቁንꬅ በአዳ፥ ቶሄ ጉንዱንꬅ ብልንቲ የꬎዳ፥ ቁርሱማራ Ꮉርግንትዙንꬂ ፋጾዳ፥ ቱሉንꬅ ስኦዳ፥ Ꮉይቂዱንꬅ Ꮉይቆፓ ደንዶዳ፥ ዳሁንꬅስ ዎንገለ ሳባክንቶዳ። ኢሳ. 35:5-6፤ 61:1 23 ታ ግዳ ꬉቡንቶሰ ኦደን አንጅንትዳያ።»

24 ዋሐንሳ ኪትዱንꬅ ቅትዳንፓ ሱባ የሱሳ አሱንꬅስ ዋሐንሳ ባዝ ያጋእ ኦህዳ፦ «ይን አኮ በአደስ አኮ ባይዘ ጋናሳ ከዝዶ? ባቆ ኤንእስዘ ሾምቦቆ በአደስነ? 25 ዬዝን፥ አኮ በአደስ ከዝዶ? ቦንቾ ማኦ ማእደ አሱንꬃና በአደስነ? ቦንቾ ማኦ ማእዱንꬅን ሳአ ሎእደ አሱንꬅ ካት ኬꬃ የነ። 26 ዬዝን፥ አኮ በአደስ ከዝዶ? ናበ በአደስነ? ዬ፥ ታ ያጋነ፦ ይን በአደስ ኬዝዳና ናበፓ ኣꬍዛያ።

29 መለ አቶ የዝን፥ ጊራ ጋችዙንꬂ ኡቡንꬅ ዋሐንሳ ኩሽተ ጻማቅንትዱንꬅ የሱሳ ቃልቶ ስእ ጾዚ ጽሎ ማቅዳኖ ቆንጭዝዳ። ማቶ. 21:32፤ ሉቃ. 3:12 30 የዝን ፋርሳዉንꬅን ህገ አስታማሩንꬅ ዋሐንሳ ኩሽተ ጻምቅንታንጽ ጾዘ ዞርቶ ለቂዳ።

31 የሱሳ ካሊ Ꮉንጋራ ያጋይዳ፦ «ይኬ፥ Ꮉና ዎደ የለቱንꬃና አኮራ አዝዞ? ኡንትን ኦና አዛነ የሳ? 32 ጋበ ግዳ በቲ ዎል ጼጊ፥ ‹ኑ ይንትስ ሱሉንቀ ፉግን፥ ይን የጾስ። ኑ ናሺ ጋይርን፥ ይን ዬኮስ› ያጋዘ ናኡንꬃና አዛነ። 33 ጻማቅዘ ዋሐንሳ ሙእካይዛራን ኡዥካይዛራ ይእን፥ ‹ኢታ አያናራ የነ ጋይዳ።› 34 አስ ናአይ ሙእተራን ዎይነ ኡዥተራ ይእን፥ Ꮉይ አꬄ ‹ሙስ ዥምባራን ኡሽ አስ፥ ጊራ ጋቹዙንꬅስን ናጋራንቹንꬅ ዣመ› ጋይዳ። 35 ይኬ፥ ጾዘ ጭንጫትꬅ ኦቻራ ቆንጭዳ»።

36 ፈቲ ፋርሳውዘ የሱሳ ካꬃ ሙሳደስ ፋ ካራ ጼግዳ። ኤ ፋርሳውዘ ካራ Ꮉንግ ሌማተ ካለ በትዳ። 37 ይና ካታምተ ፈቲ ናጋራንቾ ማቻ የዛና የሱሳ ፋርሳውዘ ካራ ሙሳላ አፋ የዛኖ ስእደ ዎደ ጋማ አልኦ አልባስጥሮሰ ብልቃጠ ሽቶ ኤኪ ይእዳ። ማቶ. 26:7፤ ማር. 14:3፤ ዋሐ. 12:3 38 የሱሳስ ሱባ ዛላራ፥ እዛ ቶህት ካለ ኤቂ ዬክተራ እዛ ቶህቶ ፋ አፉꬅትራ ላክꬃነ። ፋ ኦምትራ እዛ ቶህቶ ኡጭተራን ዬሪቴ ሽቶ ትዥዳ።

39 ሙእዘ ባዝቶ ጊግዝደ ፋርሳውዘ ይኖ በኤዘ ዎደ ፋ ዎዝንተ፥ «Ꮉይን ናበ የዛኮ Ꮉና ማችታ ኤዛ ቦችዛና ኦና የዛኮ ማህ እዛ ናጋራ ደኦር ማቅዳኖ ኤ ኤሮድ የሻ» ያጋይዳ።

40 የሱሳ፥ «ስሞና፥ ታ ኔስ ኦህዘ ባዝ የነ» ያጋይዳ።

ኤዝን፥ «አስታማርዛዮ፥ ታስ ኦሆ» ያጋይዳ።

41 የሱሳ ኤጎ፥ «ላምእ አሱንꬅ ፈቲ አꬄፓ ብራ ታልእዳ። ፈተ እችን ጼት ብራ Ꮉንካይ ማህ እሽንታም ብራ ታልእዳ። 42 ላምኡንꬅን ታልእቶ ጭጎደስ ጋምን፥ ላምኡንꬅስን ታልእቶ ማርዳ። ይኬ፥ Ꮉንꬅ ላምኡንꬃፓ የ አꬃ ጋማ ካꬎደ ኔስ አያ አዘ» ያጋይዳ።

43 ስሞና፥ «ጋማ ጋለ አቶ ጋእንትደ አꬄ ጋማ ካꬎዳ አዛነ» ያጋይዳ። የሱሳ፥ «ነ ቱሮ ፍርድዳ» ያጋይዳ። 44 ይንፓ ሱባ፥ የሱሳ ማችትጎ ማቂ ብእ፥ ስሞናጎ፥ «Ꮉኖ ማችቶ በእነ? ታኒ ነ ካራ ገልን መለ አትን ነ ታስ ቶሄ Ꮉꬅ እንግካያ፥ የዝን እዛ ታ ቶህቶ ፋ አፉꬅትራ ላክꬂ ፋ ኦምትራ ኡጭዳ። 45 ነ ታና ዬሪ ቢካያ፥ የዝን እዛ ታ ነ ካራ ገልዳንፓ አይኪ ታ ቶህቶ ዬረ አሽካያ። 46 ነ ታ ኦምተ ዛይተ ትዥካያ፥ የዝን እዛ ታ ቶህቶ ሽቶ ትዣነ። 47 እዛ ታና ጋማ ካꬍደ ግሾ እ ጋማ ናጋርታ አቶ ጋእንትዳ። ኤ ኤራꬅ ናጋርታ አቶ ጋእንትደ ኤራꬅ ካꬋነ።»

48 የሱሳ ማችትጎ፥ «ነ ናጋርታ አቶ ጋእንትዳ» ያጋይዳ።

49 ኤዛራ ዎላ ሌማተ በቲ ሙእዘ ዛቁንꬅ፥ «ናጋራ አቶ ጋይደ፥ ኤ Ꮉይኒ ኦደ?» ያጋእ ፋ ዎዝንተ ቆፕዳ።

50 የሱሳ ማችትጎ፥ «ነ አማንታ ነና አሽዳ፤ ሳሮ ቅቶ» ያጋይዳ።