18
ሚንግ ዎሶደ ፋና ታማርስዳ
1 የሱሳ ፋ ታማሩንꬃና አዛልእካይዛር ኡባ ዎደ ዎሶደ ፋና ታማርሶደስ ኮይ ያጋእ አዝዘ ኦህዳ፦ 2 «ፈቲ ካታማ ጾዝስ ዣሽቶሰ አስን ዬልꬎሴ ፈቲ ዳኛ የነ 3 ይና ካታምተ ፈቲ ቡዳንታ የነ። እዛን፥ ‹ታስን ታ ሞርክዘስ ግዳ የዘ ሞቶ ፍርዶ› ያጋእ ኡባ ዎደ የ ዳይንዘጎ ማህ ማህ ይእነ። 4 ዳይንዘ ኤራꬅ ዎደስ እ ኦህቶ ስአንጽ እጽዳ፥ የዝን ሱባፓ ፋ ዎዝንተ፥ ‹ታኒ ጾዝስ ዣሽቶሳ፥ አስስ ዬልꬋንጽ እጽኮን፥ 5 Ꮉና ቡዳንታ ታና ዋየꬅዘ ግሾ ኢስ ፍርዶዳ፤ የይዛንጽኮ ኡባ ዎደ ይእ ታና ላቢሳዳ› ያጋእ ቆፕዳ» ያጋይዳ።
6 ላꬅን፥ «ኢታ ዳይንዘ ጋእዳኖ ስእዳ፤ 7 ጾዚ ቃማን አዋራ ኤጎ ኡክዘ ፋ ዶርዱንꬅስ ፍርዶሳነ? ኡንታና ማዶደስ ጋምኦዳነ? 8 ታ ይንትስ ኦህዛኖ ስኦተ፥ ኤልሲ ፍርዶዳ። ማቅኮን፥ አስ ናአይ የእዘ ዎደ ሳአላ አፋ አማኖ ደማድየሳነ?» ያጋይዳ።
ፋርሳዉዛን ቃራጠ ጋችዛን
9 ማህ፥ የሱሳ፥ ፋና ጽሎ አስ ፋና ማህ ጬቅንትዙንꬅስን መሉንꬃና ለቂዙንꬅስ Ꮉንጋራ ያጋእ አዝዘ ኦህዳ፦ 10 «ላምእ አሱንꬅ ዎሶደስ ጾዘ ኬꬃ Ꮉንግዳ። ፈተ ፋርሳወ Ꮉንካይ ማህ ቃራጠ ጋችዝዘ አስ። 11 ፋርሳዉዘ ኤቂ ፋስ ዎስተራ፥ ‹ጾዛዮ ታኒ መሉንꬅ ፋና ቦንቅዘ አስ፥ ኢታን ኦላለ አስ፥ አꬊ ማህ Ꮉይ ቃራጠ ጋችዝዘ አꬄ ፋና ማቅካይዘ ግሾ ነና ጋላታነ። 12 ሳምንታፓ ላምእ ቶሄ ጾማነ፥ ታ ደንግዘባዝ ኡባንፓ አስራታ ከሳነ› ያጋይዳ።
13 «የዝን ቃራጠ ጋችዝዘ ማህ Ꮉኮራ ኤቂ መለ አቶ የዝን ሳሎ ꬎቅ ጋእ በአደስን ዣሽቲ ፋ ዳዳብቶ ቆጽተራ ‹ጾዛዮ፥ ታና ናጋራንችዛ ማሮያ› ጋእ ዎስዳ። ማቶ. 23:12፤ ሉቃ. 14:11 14 ታ ይንትስ ኦህዛኖ ስኦተ፤ ፋርሳውዘፓ Ꮉይኒ ቃራጠ ጋችዝዘ ጾዘ ቲኖ ጽሎ ማቂ ፋ ካራ ማቅዳ። አኮስ ጋይኮ፥ ፋና ꬎቅ ꬎቅ ዪዘ አስ ቶችንቶዳ፥ ፋና ቶችዘ አስ ꬎቅ ꬎቅ ጋኦዳ» ያጋይዳ።
የሱሳን ዦጋ ናኡንꬃና
(ማቶ. 19:13-30፤ ማር. 10:13-31)
15 የሱሳ ዦጋ ናኡንꬃላ አፋ ፋ ኩሽቶ ጋዲ አንጆደ ፋና አሱንꬅ ኤጎ ከእነ። የሱሳ ታማሩንꬅ ይኖ ብእ አኮስ የሱሳጎ ኬኤ ያጋእ ካጭዳ። 16 የዝን የሱሳ ናኡንꬃና ፋጎ ጼጊ፥ «ናኡንꬅ ታጎ ዮኦዳኖ ካይፐተ፤ ዮኦ ጋኦተ። አኮስ ጋይኮ፥ ጾዘ ካእቱሞ ኡን ፋና ይእዱንꬅስ። 17 ታኒ ይንትስ ቱሮ ኦህነ፤ ጾዘ ካእቱሞ ዦጋ ናኡንꬅ ፋና ኤኮሰ ኦደን የይጋ ገሎስ» ያጋይዳ።
ዱረ አꬄ ኦጨ
(ማቶ. 19:16-30፤ ማር. 10:17-31)
18 አይሁደ Ꮉላቁንꬃፓ ፈተ፥ «ኬሃ አስታማርዛዮ፥ መዽና ደኦ ደንጎደስ አኮ ኦቾ?» ያጋእ ኦጭዳ።
19 የሱሳ ኤጎ፥ «አኮስ ታና ኬህዛዮ ያጋእ ጼገ? ፈቲ ጾዘፓ አትን መለ ኬሃ ባያ። 20 ኦላልፐ፥ ዎꬍፐ፥ ካይስትፐ፥ ዎርዶ ማርክꬍፐ፥ ነ አዳያን ነ እንቶን ቦንቾ ያጋዘ ኪቶ ኤራነ» ያጋእ ኦጭዳ። ከዘ 20:12-16፤ ማሄ 5:16-20
21 አꬃይን፥ «የንሳና ኡባ ታኒ ናአትꬃፓ አይኪ ናግተራ ጋምእዳ» ያጋይዳ።
22 የሱሳ ይኖ ስኤዘ ዎደ «ይኬ፥ ኔስ ፈትባዝ ፋጫነ፤ ኔስ የዘ ባዝ ሙሎ ባይዝ ዳሁንꬅስ እንጎ፤ ሳሎ ነና ቆልታ ናጋነ። የይዝ ማቂ ታና ካሎ» ያጋይዳ። 23 የዝን አꬄ ይኖ ስእደ ዎደ ኤስ ጋማ ቆሎ የዘ ግሾ ጋማ ዥልꬍዳ።
24 የሱሳ አꬃ ብእ፥ «ዱረ አስስ ጾዘ ካእቱሞ ገልዛና ዋይዝ ኡንኦደ! 25 ዱረ ጾዘ ካእቱሞ ገሎዳንፓ ግማለ ማርፐ ኡሩንꬃራ አꬍዛና ላፋነ» ያጋይዳ።
26 ይኖ ስእደ አሱንꬅ፥ «የዛኮ ኦደ አቶደ?» ያጋይዳ።
27 የሱሳ፥ «አስስ ዳንዳእንቶሰ ጾዝስ ዳንዳእንታነ» ያጋይዳ።
28 ጴጥሮሳ፥ «ይኬ ኑኒ ኑ ባዝ ሙሎ አሺ ነና ካላነ» ያጋይዳ።
29 «የሱሳ ቱሮ ታ ይንትስ ኦህነ፤ ጾዘ ካእቱሞስ ጋእ ፋ ኬꬅቶ ዎይ ፋ ማችቶ ዎይ ፋ እሹንꬃና ዎይ ፋ አዳያን ፋ እንቶን ዎይ ፋ ናኡንꬃና አሽደ፤ 30 Ꮉና ዎድተ ጋማ ዳኮ፥ የኦደ አላምተ መዽና ደኦ ኤኮሰ ኦደን ባያ» ያጋይዳ።
የሱሳ ፋ Ꮉይቅትባዝ ማህ ኦህዳ
(ማቶ. 20:17-19፤ ማር. 10:32-34)
31 የሱሳ ታጶ ላምኡንꬃና ፋጎ ጼጊ፥ «አነ የሩሳላመ የꬎተ፥ ናቡንꬅ አስ ናአይ ባዝ ጻፍዳና ኡባና የይጋ ፎልንቶዳ። 32 ኤ አይሁደ ማቆሰ አስስ አꬊ እንግንቶዳ። ኡን ኤዛ ለቆዳ፥ ጫዦዳ ኤላ አፋ ጩቶዳ። 33 ኤዛ ጋራፍዳንፓ ሱባ ዎꬎዳ፥ የዝን Ꮉይꬓንꬆ ቃማ ኤ Ꮉይቆፓ ደንዶዳ» ያጋይዳ።
34 የዝን ኤ ታማሩንꬅ ይና ኡባንፓ ፈትባዝን ቲሪካያ። ኤ ቆፍታ ኡንትስ አችንትደ ግሾ ኤ ዋጋኤዛኮ ኤርካያ።
ቆቀ አꬄ ብእዳ
(ማቶ. 20:29-34፤ ማር. 10:46-52)
35 የሱሳ እያርኮ ኡክዘ ዎደ ፈቲ ቆቀ አꬄ ኦገ ጋጻ በቲ ዎሳነ። 36 ቆቀ አꬄ አሱንꬅ ይና በስትራ አꬎደራ ስእ፥ «ይና አኮ?» ጋእ ኦጭዳ። 37 ኡን፥ «ናዝረተ የሱሳ Ꮉንራ አꬋነ» ያጋይዳ።
38 ኤ፥ «ዳዉተ ናአይ፥ የሱሳ፥ ታና ማሮያ» ያጋእ ኡክዳ።
39 ቲኖ ቲኖ Ꮉንግዘ አሱንꬅ፥ «ስእ ጋኦ» ጋእ ካጭዳ። የዝን ኤ፥ «ዳዉተ ናአዮ፥ ታና ማሮ» ያጋእ ጋንꬅ ኡክዳ።
40 የሱሳ ኤቂ አꬃ ፋጎ ኮኦደ ፋና ኪትዳ። አꬃይን፥ ኤጎ ሺቅን፥ 41 «ታ ኔስ አኮ ኦቾደ ፋና ኮየ?» ያጋእ ኦጭዳ።
ቆቅዘ፥ «ላꬆ ታ ቦኦደስ ኮያነ» ያጋይዳ።
42 የሱሳ፥ «ቦኦ፥ ነ አማንታ ነና ፋꬅዳ» ያጋይዳ። 43 አꬃይ ኢራ ብእ አሽዳ። ጾዝ ቦንችተራ የሱሳ ካልዳ። አስ ኡቡንꬅ ይኖ ብእ ጾዝ ጋላትዳ።