19
ቃራጠ ጋችዝዘ ዛክዮሳ
1 የሱሳ እያርኮ ካታማ ገሊ አꬋነ። 2 የይጋ ዛክዮሳ ጋእንትዘ ቃራጠ ጋችዙንꬅ Ꮉላቅዘ የነ። ኤ ጋማ ዱረ። 3 ኤ የሱሳ ኦደ የዛኮ በአደስ ኮይዳ። ኤ Ꮉታ ማቅደ ግሾ አስ ጋማፓ ደንዲ የሱሳ በአደስ ዳንዳእካያ። 4 የሱሳ በአደስ ኮይ ኤ Ꮉንግዘ ኦግትስ ቲኖ ዎጺ Ꮉንግ ፈቲ ቦባ ምንጻላ አፋ ከዝዳ።
5 የሱሳ ይና በስተ የሊተራ ꬎቅ ጋእ ብእ፥ «ዛክዮሳ፥ Ꮉይኖ ታ ነ ካራ ፌሻደስ ቤዘ ግሾ ኤለ ዎꬎ» ያጋይዳ። 6 ኤ ኤልሲ ዎꬊ ኡፋይሳራ የሱሳ ሞክዳ።
7 ይና በስተ የዘ አሱንꬅ ኡባና ይኖ ብእ፥ «ናጋራንችዘ ኬꬃ ገሊ ሞክንቶደስ ይአነ» ያጋእ ዙዝንግዳ። 8 ማቆ የዝን፥ ዛክዮሳ ኤቂ ላꬃጎ፥ «ላꬆ፥ ይኬ ታስ የዘ ቆሎ ኡባንፓ ባግቶ ዳሁንꬅስ እንጎዳ። አሳፓ አኮ ባዝን ዎርዶራ ባልꬂ ኤክደባዝ ማቅኮ ኦይዲ ኩሸ ማሆዳ» ያጋይዳ።
9 የሱሳ ማህ፥ «Ꮉይ አꬄ አብራሃማ ኮች ማቅደ ግሾ Ꮉይኖ አቶትꬅ Ꮉና ካርተ ይእዳ። 10 አስ ናአይ ይእዳና ꬋብዱንꬃና ኮዮደስን አሾደስ» ያጋይዳ። ማቶ. 18:10
ታጵ ምናኑንꬅ አዝዘ
(ማቶ. 25:14-30)
11 አሱንꬅ ይኖ ስእዘ ዎደ የሱሳ የሩሳላመ ኡክደ ግሾን ጾዘ ካእቱሞ Ꮉተ ኡከራ ቆንጮደ ፋና ይእዘ ግሾ ኡንትስ አዝዘ ኦህዳ። ማቶ. 25:14-30 12 ይኒ ግሾ፥ የሱሳ፥ «ፈቲ ኤርንትደ አስ የዘ ፋስ ካተትꬅ ኤኪ ዮኦደስ መለ ሳአ ቅትዳ። 13 ኤስ ኦችዘ አሩንꬃፓ ታጱንꬃና ጼጊ ፈተስ ፈተስ ፈቲ ምናነ *ምናነ፦ ምናነ ግርኬ ዶና። ፈቲ ምናነ ፈቲ ኦቻ አስስ እንግንትዘ Ꮉይꬕ አግና ዳሞዘ ማቃነ። እንግ ‹ታ ማቂ የኦደ ዎንꬅስ Ꮉና ሚሽትራ ዛልኦተ› ያጋይዳ።
14 «ይና ሳእተ የዘ አሱንꬅ ኤዛ እጽዘ ግሾ Ꮉይ አꬄ ኑላ አፋ ካእቶደ ፋና ኑ ኮዮስ ያጋእ አስ ኤ ሱባራ ኪትዳ።
15 «ማቅኮን፥ የ አꬄ ካት ማቂ ፋ ሳአ ማቅዳ። የንꬅ ታጵ አሩንꬂ ኤ እንግደ ሚሽቶ አኮ ጋር ዛልእ ትርፍዘዛኮ ኤሮደስ ኮይ ኡንታና ጼግዝዳ።
16 «ቲኖሰ ይእ፥ ‹ላꬆ፥ ነ ታስ እንግደ ምናንዘ መለ ታጶ ትርፍዳ› ያጋይዳ።
17 «ኤዛ ላꬄ፥ ‹ናተ አማንንትደ አርዛዮ ሎኦ ኦችዳ። ነ ኤራꬅ ባዛ አማንንትደ ግሾ ኔስ ታጵ ካታማላ አፋ አደትꬅ ዎልቃ እንግዳ› ያጋይዳ።
18 «ላምአንꬅዛይ ይእ፥ ‹ላꬆ፥ ነ ታስ እንግደ ምናንዘ መለ እችን ትርፍዳ› ያጋይዳ።
19 «ላꬂ ኤጎ፥ ‹ኔስን ማህ እችን ካታማላ አፋ አደትꬅ ዎልቃ እንግዳ› ያጋይዳ።
20 «ይኬ Ꮉይꬓንꬅዘ ይእ፥ ‹ላꬆ፥ ታ ጩርቃራ ጻጺ ናግደ ነ ሚሽታ Ꮉናሸ። 21 አኮስ ጋይኮ፥ ኔኒ ነባዝ ማቆሰ ባዝ ኤክዛኖን ነ ቡድካይዘባዝ ማጽዘ ኢታ ዎዝና ምንꬂ አስ ማቅደ ግሾ ኔስ ዣሽትዳ› ያጋይዳ።
22 «ኤዛ ላꬄ ማህ፥ ‹ናተ ኢታ አርዛዮ ነ ዶንቲ ጋር ታ ነና ፍርዶዳ። ታ ጋድካይዘባዝ ኤክዛኖን ቡድካይዘባዝ ማጽዘ አስ ማቅዛኖ ነ ኤርዛኮ፥ 23 ታ ይእ ታ ምናንዛ ትርፈራ ኤኮደ ፋና ዛልእዘ አስስ አኮስ እንግካ?›
24 «ኤዛ ላꬄ ይና በስተ ኤቅዱንꬃጎ፥ ‹ኤራ የዘ ምናንዛ ኤኪ ታጶ ትርፍዝዳይስ እንጎተ› ያጋይዳ።
25 «ኡን፥ ‹ላꬆ፥ ኤስ ቲኖን ታጵ ምናነ የነ› ያጋይዳ።
26 «ላꬂ፥ ታ ይንትስ ኦህነ፤ ‹የዘ ኡቡንꬅስ መለ ጉጁንቶዳ፥ የዝን ባዘፓ መለ አቶ ኤስ የዛናን ኤክንቶዳ። ማቶ. 13:12፤ ማር. 4:25፤ ሉቃ. 8:18 27 ማቆ የዝን፥ ታ ኡንታላ አፋ ካእታመ ፋና ኮይዱንꬅ የንꬅ ታ ሞርኩንꬃና Ꮉንካ ታ ቲንተ ክእ ዎꬎተ› ጋይዳ» ያጋይዳ። ማቶ. 25:14-30
የሱሳ ዳማ ቦንቾራ የሩሳላመ ገልዳ
(ማቶ. 21:1-11፤ ማር. 11:1-11፤ ዋሐ. 12:12-19)
28 የሱሳ ይኖ ኦህዳንፓ ሱባ ኡንታፓ ቲኖ አꬊ የꬊ የሩሳላመ ቅትዳ። 29 ሻማሄ ደርዘላ †ሻማሄ ደረ፦ ሻማሄ ጋማ ዶልዘ ደረ ጋእንታነ። አፋ የዘ ቤተፋገን ብታንያ ኡክደ ዎደ ፋ ታማሩንꬃፓ ላምኡንꬃና ያጋእ ኪትዳ፦ 30 «ይን ቲኖ የዘ ካራ ጋንጨ ቅቶተ፥ ይን የይጋ የልዘ ዎደ ኦደን ቶግካይዘ አጭንቲ የዘ Ꮉረ ናአ ደማዳ። ኤዛ ብሊ Ꮉይጋ ኤኪ ዮኦተ። 31 ኦደን፥ ‹አኮስ ብለ?› ጋእ ኦጭኮ፥ ‹ላꬂ ኤዛ ኮያነ› ያጋኦተ» ያጋይዳ።
32 ኪትንትዱንꬅ Ꮉንግ ኤ ጋይዳን ፋና ይእን ብእዳ። 33 ኡን Ꮉረ ናአያ ብሎደራ ላꬁንꬅ ብእ፥ «Ꮉረ ናአያ አኮስ ብለ?» ያጋይዳ።
34 ኡን ማህ፥ «ላꬂ ኤዛ ኮያነ» ያጋይዳ።
35 የይጋፓ Ꮉረ ናአያ የሱሳጎ ክእዳ። ፋ ማእቶ Ꮉረ ናአይ ባንተ ጋዲ የሱሳ Ꮉረ ናአይላ በትꬅዳ። 36 አሱንꬅን ኤ የꬍዘ ኦግትላ ፋ ማእቶ ዪጽዳ።
37 ሻማሄ ደረ ሱለ ዎꬍዘ ኦግዘጎ ኡክዘ ዎደ ፋይዶራ ሎይꬂ ጋማ አሱንꬃና ኡን ብእ ክለ ባዝተ ኡፋይት ፋ ቃልቶ ꬎቅ ዪዚ፥
38 «ላꬄ ሱንꬅተ የእዘ ካትዘ አንጅንትዳያ
ሳሎ ግዳ ሳሮ
ኡባፓ ꬎቃ ሳሎ ቦንቾ
ጾዝስ ማቀ።»
ያጋእ ጾዝ ጋላትዳ። ማዝ. 118:26
39 አሱንꬅ ግዳፓ ፈቲ ፈቲ ፋርሳዉንꬅ የሱሳጎ፥ «አስታማርዛዮ፥ ነ ታማሩንꬃና Ꮉይዞተ ጋእ ካጮ» ያጋይዳ።
40 ኤ ኡንታጎ፥ «ኡን ስእ ጋይኮ ሹቹንꬅ ኡኮዳ» ያጋይዳ።
41 የሱሳ የሩሳላመ ኡክተ ካታምቶ ብእ ኢስ ዬክዳ። 42 «ኔስ ሳሮ ማቃዳኖ Ꮉይኖ ነ ኤርዘባዝ ማቅዛኮ የዝን፥ Ꮉተ ነ ኣፍትፓ ገንግዳ። 43 ነ ሞርኩንꬅ ነ ካንቶ ጋሲ ዱማ ዱማ ኦገራ ነና ተቂ ኡንእꬅዘ ዎደ የኦዳ። 44 ነናን ነ ጋስት ግዳ የዘ ነ ናኡንꬃና ꬋብሶዳ። ፈቲ ፈቲ ሹች ደንꬂ ዉልኦዳ፥ አኮስ ጋይኮ ጾዚ ነና አሾደስ የእዘ ዎድቶ ኤርካያ» ያጋእ ኢስ ዬክዳ።
የሱሳ ጾዘ ኬꬃ ዛልእዙንꬃና ከስዳ
45 ይንፓ ሱባ፥ የሱሳ ጾዘ ኬꬃ ገሊ ዛልእዙንꬃና የይጋፓ ባይእዳ። 46 ማህ፥ «‹ታ ኬꬅታ ጾዝ ዎስዘ ኬꬂ ማቃዳ› ጋእ ጻፍንትዳ፥ የዝን ይን ታ ኬꬅቶ ፋኑንꬅ ዎምኦ ማህዳ» ያጋይዳ። ኢሳ. 56:7፤ ኤር. 7:11
47 አዋራ አዋራ ጾዘ ኬꬅተ ታማርሳነ። ካህኑንꬅ Ꮉላቁንꬅ፥ ህገ አስታማሩንꬅን ጋደ ጭሙንꬅ ኤዛ ዎꬎደስ ኦገ ኮያነ። ሉቃ. 21:37 48 ማቆ የዝን፥ አሱንꬅ ኡባና ኤ ትምርትቶ ፋ ዎዝንቶ ኦሊ ስእዘ ግሾ ኡንትስ ኦቾደ ባዝ ꬋብዳ።