14
ጻማቅዘ ዋሐንሳ Ꮉይቅቶ
(ማር. 6:14-29፤ ሉቃ. 9:7-9)
1 የ ዎደ አህዘ ሄሮድሳ *ሄሮድሳ፦ Ꮉይኒ ካት ሄሮድሳ አንትጳሳ። ኤ ይሁዳን ፔርያን ክርስቶሳ የልንቶዳንፓ ቲኖ 4-39 ማ. ላ. የሎደስ አህዳ። ኤ ካት ሄሮድሳስ ናአ። የሱሳ ባዝ ስእዳ። 2 ፋ አሩንꬃጎ፥ «ይኬ ጻማቅዘ ዋሐንሳ፤ ኤ Ꮉይቆፓ ደንድዳ። ይኒ ግሾ Ꮉኖ ኡባ ክለ ባዝቶ ኤ ኦቻነ» ጋይዳ።
3 ኤ ይኖ ጋይዳና ሄሮድሳ ፋ እሸ ፍልጶሳ ማችት ሄሮድያዳ ምክናተራ ዋሐንሳ አች ኬꬃ ገልꬅደ ግሾ። 4 ዋሐንሳ ሄሮድሳጎ፥ «ነ እዞ ኤኮደስ ቤዞስ» ያጋይዳ። 5 ሄሮድሳ ዋሐንሳ ዎꬎደስ ኮይዳ፥ የዝን ዎርዥታ ዋሐንሳ ናበ ማህ በእዘ ግሾ ዣሽትዳ። ሉቃ. 3:19-20፤ ሌዌ 18:16፤ 20:21
6 ሄሮድሳ ፋ የልንትደ ቃምቶ ቦንችዘ ዎደ ሄሮድያዳ ናእታ አሱንꬅ ቲኖ የጽተራ ዶሊ ኤዛ ኡፋይስዳ። 7 ዬዝን፥ ኤ፥ «እዛ ኮይዘ ባዝ ኡባ እንጎዳ ጋእ» ጫቅዳ። 8 ናእታ ፋ እንቲ ዞረ ስእ ሄሮድሳጎ፥ «ጻማቅዘ ዋሐንሳ ኦምቶ ጋባተ ጋዲ ታስ እንጎ» ያጋይዳ። 9 እዛ ያጋእን ካትዘ ቆፒ አዛንዳ፥ የዝን ፋ ጫቅት ግሾን ፋራ የዘ ዛቁንꬅ ግሾ ጋእ እዛ ኦጭዳኖ ፎሎደ ፋና ኪትዳ። 10 ካትዘ አስ ኪቲ ዋሐንሳ አች ኬꬃ የዝን ኤ አፉርቶ ጋችዳ። 11 ኦምቶ ጋባተ ጋዲ ክእ ናእትስ እንግዳ፤ ናእታን ኤኪ ፋ እንትስ ካንግዳ። 12 ዋሐንሳ ታማሩንꬅ ይእ ኤ አህቶ ካንግ ሞግዳ። ይንፓ ሱባ Ꮉንደ ባዝ ኡባ Ꮉንግ የሱሳስ ኦህዳ።
የሱሳ እችን ሙኩል አሱንꬃና ሙዝዳ
(ማር. 6:30-44፤ ሉቃ. 9:10-17፤ ዋሐ. 6:1-14)
13 የሱሳ Ꮉንደ ባዝቶ ስእደ ዎደ ጎንገ ገሊ ይና በስትፓ ፈቲ ጌማ በሳ ፋስ ቅትዳ። አሱንꬅ ይኖ ስእ ካታማፓ ደንዲ ቶሄራ ኤዛ ካልዳ። 14 የሱሳ ጎንገፓ ዎꬊ ጋማ አሱንꬃና ብእ ኡንትስ ይቅስንትዳ። ኡን ግዳ የዘ Ꮉርግንትዙንꬃና ፋꬅዳ።
15 ሳእታ ኡጉሮደራ የሱሳ ታማሩንꬅ ኤጎ ሺቂ፥ «Ꮉና በስታ አኮ ባይዘ ጋናስ በሲ፥ ሳእታን ቃምዳ። ይኒ ግሾ፥ ካለ የዘ ካራ ጋንጨ Ꮉንግ ፋስ ካꬃ ዎንጎደ ፋና አሱንꬃና ዳኮ» ያጋይዳ።
16 የዝን የሱሳ ኡንታጎ፥ «አሱንꬅ ቅቶደስ ቤዞስ፤ ኡን ሞኦደባዝ ይን እንጎተ» ያጋይዳ።
17 ኡን ማህ፥ «ኑራ Ꮉነ እችን ቦራፓን ላምእ ሞሎፓ መለ ባያ» ያጋይዳ።
18 ኤዝን፥ «አነ የዛኖ Ꮉንካ ኮኦተ» ያጋይዳ። 19 ማህ፥ ዎርዥቶ ማታላ በቶደ ፋና ኦህዳ። እችን ቦርቶን ላምእ ሞልቶ ኤኪ፥ ሳሎ ብእ ጋላቲ ማቂ፥ ቦርትፓ ባጽ ፋ ታማሩንꬅስ እንግዳ፤ ኡን ማህ አሱንꬅስ እንግዳ። 20 ኡቡንꬅ ሙእ ምዥዳ። ኡንትን ሙእን አትደ ታጶ ላምእ ሌማተ ደንꬅዳ። 21 ካꬅቶ ሙይደ አሱንꬅ ማቹንꬅን ናኡንꬅን አትን እችን ሙኩል ማቃነ።
የሱሳ Ꮉꬃላ አፋ የꬍዳ
(ማር. 6:45-52፤ ዋሐ. 6:15-21)
22 ኤልሲ የሱሳ ታማሩንꬅ ጎንገ ገሊ ፋፓ ቲኒ አባፓ ሰኮ ፍንꬅ ፊንጎደ ፋና ኪቲ ፋስ አሱንꬃና ሞይዞደስ ሱብ አትዳ። 23 አሱንꬃና ሞይዚ ማቂ ፋስ ዎሶደስ ፈቲ ደረላ አፋ ከዝዳ። ሳእታ ቃምን ኤ ፋስ የይጋ ጋምእዳ። 24 የ ዎደ ጎንግዘ አባላ ሳአፓ ኤራꬅ ክሎ ምትረ Ꮉንግዝን ቲኖ ዛላራ ጎተ ደንዲ ዙሉንታ ጎንግዛ ኡንእꬅዳ።
25 ዎንትማላ የሱሳ አባላ የꬍተራ ፋ ታማሩንꬃጎ ይእዳ። 26 ኤ ታማሩንꬅ፥ ኤ አባላ የꬍተራ ኡንታጎ ይእዛኖ ብእ ዣሽትዳ። ኡንትን፥ «Ꮉይ ሜሸ» ጋእ ዣሽቲ ኡክዳ።
27 የዝን የሱሳ ኤልሲ፥ «አኮን ባያ! ዣሽትፐተ! ታና» ያጋይዳ።
28 ጴጥሮሳ ኤጎ፥ «ላꬆ፥ ነና ማቅኮ፥ ታኒ Ꮉꬅትላ አፋ የꬊ ኔጎ Ꮉንጎደ ፋና ታና ኪቶ» ያጋይዳ።
29 የሱሳ ጴጥሮሳጎ፥ «Ꮉንካ ዮኦ» ያጋይዳ።
ጴጥሮሳን ጎንግዘፓ ዎꬊ Ꮉꬅትላ አፋ የꬍተራ የሱሳጎ Ꮉንገ አይክዳ። 30 የዝን ዎልቃማ ጎተ ብእ ዣሽትዳ። Ꮉꬅታን ቆ አይክደ ዎደ «ላꬆ፥ ታና አሾያ» ያጋእ ኡክዳ።
31 የሱሳ ኤልሲ ፋ ኩሽቶ ዳኪ ኤዛ አይኪ፥ «ናተ፥ አማኖ ፋጭዳዮ አኮስ ሶኤ» ያጋይዳ።
32 የሱሳራን ጴጥሮሳራ ጎንገ ገልደ ዎደ ጎቱታ ስእ ጋይዳ። 33 ጎንግተ የዘ ኤ ታማሩንꬅ፥ «ነ ቱሪ ጾዝ ናአ» ጋእ ጎይንዳ።
34 ኡን አባ ፊንግ ጌንሳሬጠ ጋደ የልዳ። 35 ይና ጋድተ የዘ አሱንꬅ የሱሳ ኤርደ ዎደ ፋ ካራ ጋንጨ የዘ ጉቱተ ኡባነ ኪታ ዳክዳ። አሱንꬅ Ꮉርግንትዙንꬃና ኡባ ኤጎ ክእዳ። 36 Ꮉርግንትዙንꬅ ኤ አፉላ ጋጽቶ ጻላላ ቦቾደ ፋና ዎስዳ። ቦችደ ኡቡንꬅ ፋጽዳ።