1 «ሳሎ ካእቱሞ ፋ ዎይነ ግዳ ኦችዙንꬅስ ክራ እንጎደስ ዎንታ ጎዳ ከዝደ ካርቲ አዳያ አዛነ። 2 ኤ ኦችዙንꬅስ Ꮉይኖ Ꮉይኖ ፈቲ ድናረ *ድናረ፦ ፈቲ አስ ፈቲ ቃማ ኦቺ ፌዢ ኤክዘ ሚሸ። እንጎደስ ኡንታራ ጊጊ፥ ኡንታና ፋ ዎይነ ግዳ ዳክዳ።

3 «ማህ ዎንታፓ Ꮉይꬕ ሳተ ማቅዝን ኬዚ ኦቻ ꬋብን ጋበ በሳ ኤቅደ መለ አሱንꬃና ደንግዳ። 4 ኤ ኡንታጎ፥ ‹ይንትን ታ ዎይነ ግዳ Ꮉንግ ኦቾተ፥ ታኒ ይንትስ ታና ሎእደ ሚሸ እንጎዳ› ያጋይዳ። 5 ኡንትን Ꮉንግዳ። ማህ ኤ እዝፑን ሳተራን ኡዱፉን ሳተራ ኬዚ ይኒ ፋና ኦችዳ። 6 ታጶ ፈቲ ሳተ ማቅዝን ኤ ከዝዘ ዎደ መሉንꬃና የይጋ ኤቅዱንꬃና ደንግ፥ ‹ይን ኦቻ ብሊ አዋራ ፌሾ Ꮉነ አኮስ ኤቂ ፌዥዶተ? ያጋይዳ።

7 «ኡን ማህ፥ ‹ኑና ክራ ኦጭዘ አስ ꬋብደ ግሾ› ያጋይዳ።

«ኤዝን፥ ‹ይንትን ታ ዎይነ ግዳ Ꮉንግ ኦቾተ› ያጋይዳ።

8 «ሳታ ኡጉርን፥ ዎይነ አዳይ ኦችዙንꬅ Ꮉላቅዘጎ፥ ‹ኦችዙንꬃና ጼጊ ላሳ ኦቻ ገልዱንꬃፓ ደንꬂ ቲኖ ገልዱንꬃና የሎደስ ኡን ሚሽቶ እንጎ› ያጋይዳ። 9 ታጶ ፈቲ ሳተር ኦቻ አይክዱንꬅን ይእ፥ ኦማ ኦማ ፈቲ ፈቲ ድናረ ኤክዳ። ሌዌ 19:13፤ ማሄ 24:15 10 ቲኖ ኦቻ አይክዱንꬅ ይእ፥ ፋስ ጋማ እንግንቶዳ ጋእ ቆፕዳ። የዝን ኡንትን ኦማ ኦማ ፈቲ ፈቲ ድናረ ኤክዳ። 11 ፋ ሚሽቶ ኤኪ ማቂ ካርቲ አዳይላ አፋ ዙዝንግዳ። 12 ‹Ꮉንስ ሱባፓ ይእ ፈቲ ሳተ ጻላላ ኦችዳ። የዝን አዋራ ፌሾ ላቢ ፌዥደ ኑራ ኡን ዋይዝ ፈቶ ማቀ› ያጋይዳ።

13 «ዎይነ አታክልተ አዳይ ኦችዙንꬃፓ ፈታይጎ፥ ‹ታ እሻዮ፥ ታ ነና ቆህካያ፤ ነ ታራ ዉልꬍዳና ፈቲ ድናረስ ባነ? 14 ነ ሚሽቶ ኤኪ ነ ካራ ቅቶ። ታ ኡጉረ ይእደስን ኔኒ ፋና እንጎደስ ኮያነ። 15 ታኒ ታ ሚሽትራ ኮይደባዝ ኦቾደስ ታስ አደትꬅ ዎልቃ ባነ? ዎይ ታ ዳልጋ ማቅደ ግሾ ነ ቅናታነ?› ያጋይዳ።

16 «ይኒ ጋራን Ꮉተ ደእተ ሱብ ማቅዱንꬅ ቲኖዳ፥ ቲንዱንꬅ ማህ ሱቦዳ» ያጋይዳ። ማቶ. 19:30፤ ማር. 10:31፤ ሉቃ. 13:30

17 የሱሳ የሩሳላመ Ꮉንግተራ፥ ታጶ ላምእ ታማሩንꬃና ዱማ ጋጻ ኬሲ ኡንታጎ ያጋይዳ፦ 18 «ይኬ፥ ኑኒ Ꮉተ የሩሳላመ Ꮉንገላ አፋ የነ። እዘ አስ ናአ ካህኑንꬅ Ꮉላቁንꬅስን ህገ አስታማሩንꬅስ አꬂ እንግንቶዳ። ኡንትን ኤላ አፋ Ꮉይቆ ፍርዳ ፍርዶዳ። 19 ኤዛ አይሁደ ማቆሰ ዎርዣስ አꬂ እንጎዳ። ኡን ኤዛ ካዉሾዳ፥ ጋራፎዳ፥ የይዝ ኤዛ ማስቅላላ አፋ ሱጾዳ። የዝን ኤ Ꮉይꬒንꬃ ቃማ Ꮉይቆፓ ደንዶዳ» ያጋይዳ።

20 የ ዎደ ዛብዶሳ ማችታ ፋ ላምእ ꬊራꬅ ናኡንꬃራ የሱሳጎ ይእ፥ ኤ ቲኖ ቡንቁንቲ ፈቲ ባዝ ኤዛ ዎስዳ።

21 የሱሳ ኢጎ፥ «ነ አኮ ኮየ?» ጋይዳ።

እዛ ማህ፥ «ነ ካእቱምተ Ꮉንꬅ ታ ላምእ ናኡንꬅ ፈታያ ኔስ ምዛቅ ዛላ ፈታያ ኔስ ዎርክታ ዛላ በቶ ጋኦያ!» ያጋይዳ።

22 የዝን የሱሳ ኡንታጎ ማህ፥ «ይን አኮ ዎስዛኮ ኤሮስ፤ ታኒ ኡሻደስ የዘ ማꬋ ጹኡቶ ኡሻደስ ዳንዳኦደ?» ያጋይዳ።

ኡንትን፥ «ዬ ዳንዳኦዳ» ያጋይዳ።

23 የሱሳ፥ «ቱሮ ታኒ ኡሻደስ የዘ ጹኡቶ ይን ኡሻዳ። የዝን ታ ምዛቅተን ዎርክተ በቶዱንꬃና ዶርዘ ታና ባያ። ይና በስታ እንግንትዘ፥ ታ አዳይ እንጎደስ ጊግዝደ አሱንꬅስ» ያጋይዳ።

24 አትደ ታጵ ኤ ታማሩንꬅ ይኖ ስእደ ዎደ ላምእ እሹንꬃና ካጭዳ። 25 የዝን የሱሳ ኡንታና ኡባ ጼጊ Ꮉኒ ጋር ያጋይዳ። «አይሁደ ማቆሰ አሱንꬃና አህዙንꬂ ፋ አሱንꬃላ ላꬅꬍዛኖን ኡንታና ካልꬅዙንꬅ ማህ ኡንታና አደትꬅ ዎልቃራ አህዛኖ ይን ኤራነ። 26 የዝን ይን ግዳ ይኒ ጋር ማቅፐ። ይንታፓ ꬎቆደስ ኮይዘ ኦደን ይንትስ አሮ ማቀ። 27 ይን ግዳ ኡባፓ ꬎቃ ማቆደስ ኮይዘ ኦደን ይንትስ አሮ ማቆደስ ቤዛነ። ማቶ. 23:11፤ ማር. 9:35፤ ሉቃ. 22:26 28 ይኒ ፋናን፥ አስ ናአ አስ ማዶደስን ጋማ አሱንꬃና ዎዞደስ ፋ ሸምፕቶ እንጎደስ ይእዳፕ አትን አሳራ ማድንቶደስ ይእካያ» ያጋይዳ።

29 ይንፓ ሱባ፥ የሱሳ ፋ ታማሩንꬃራ እያርኮፓ ኬዚ Ꮉንግዝን፥ ጋማ አሱንꬅ ኡንታና ካልዳ። 30 ኦገ ጋጻ በትደ ላምእ ቆቁንꬅ የሱሳ የይጋራ አዽዛኖ ስእ፥ «ላꬆ፥ ዳዉተ ናአዮ፥ ኑና ማሮያ» ያጋእ ኡክዳ። 31 ጋማ አሱንꬅ ኡንታና፥ «Ꮉይዞተ» ያጋእ ካጭዳ። የዝን ኡን፥ «ላꬆ፥ ዳዉተ ናአዮ፥ ኑና ማሮያ» ጋእ ጉጂ ኡክዳ።

32 የሱሳ ኤቂ፥ ኡንታና ጼጊ፥ «ታ ይንትስ አክ ይሳደ ፋና ኮየተ?» ያጋእ ኦጭዳ።

33 ኡንትን፥ «ላꬆ፥ ኑ ኣፍታ በአደ ጋር ኮየተ?» ያጋይዳ። 34 የሱሳ ኡንትስ ይቅስንቲ፥ ኡን ኣፍቶ ቦችዳ። ኤልሲ ኡን ኣፍታ ብእዳ፤ ኡንትን ኤዛ ካልዳ።