2
የሱሳ ዎቦ አꬃ ፋꬅዳ
(ማቶ. 9:1-8፤ ሉቃ. 5:17-26)
1 ኤራꬅ ቃማፓ ሱባ የሱሳ ቅፍርናሆመ ማቂ፥ ኬꬃ የነ ጋዘ ዎረ ስንትዳ። 2 አሱንꬃና ኬꬅታ ኤካንጽ እጽን፥ መለ አቶ የዝን ባልታን ኡንኦደ ዎንꬅስ ጋማ አሱንꬅ ሺቅን፥ የሱሳ ቃላ ታማርሳነ። 3 ኦይዲ አሱንꬅ ፈቲ ዎቦ አꬃ ቶኪ ኤጎ ክእዳ። 4 አሱንꬅ ጋንግደ ግሾ አꬃ የሱሳጎ ሺሾደስ ኡንትስ ዳንዳእንታንጽ እጽን፥ የሱሳ የዘ ዛላራ ኬꬂ ኣፍቶ ቶኪ አꬃ ኤ ዎይእደ አልግዘራ ሱለ ኬꬂ የሱሳ ቲንተ ጋድዳ። 5 የሱሳ ኡን አማንቶ ብእ፥ የ ዎቦ አꬃ፥ «ታ ናአዮ፥ ነ ናጋርታ አቶ ጋእንትዳ» ያጋይዳ።
6 ህገ አስታማሩንꬃፓ ይና በስተ በትደ ፈተ ፈተ ፋ ዎዝንተ፥ 7 «ናተ Ꮉይ አꬄ Ꮉኒ ጋር ኢታ ባዝ ጾዛላ አኮስ ኦሄ? ጾዛ ጻላላፕ አትን መለ ኦደ ናጋራ አቶ ጋኦደስ ዳንዳእዘ?» ጋእ ቆፕዳ።
8 ኡንቲ ፋ ዎዝንተ ይኒ ጋራ ቆፕዳኖ የሱሳ ኢራ ፋ አያንተ ኤሪ፥ ኡንታጎ፥ «ይንቲ ይን ዎዝንተ አኮስ Ꮉንጋራ ቆፐተ? 9 ዎቦ አꬃ፥ ‹ነ ናጋርታ አቶ ጋእንትዳ› ጋዛና ኡኬነ? ዎይ፥ ‹ደንዲ ኤቂ ነ አልግዛ ቶኪ ቅቶ› ጋዛና ኡከ? 10 የዝን ታስ፥ አስ ናአይስ፥ ሳአላ አፋ ናጋራ አቶ ጋኦደስ አደትꬅ ዎልቃ የዛኖ ይን ኤሮደ ጋር» ጋእ የ ዎቦ አꬃ፥ 11 «ነና ጋነ፥ ደንዲ ኤቂ ነ አልግዛ ቶኪ ነ ካራ ቅቶ» ያጋይዳ።
12 አꬄ ኤልሲ ደንዲ ኤቂ፥ ፋ አልግዛ ቶኪ አስ ኡባ በእዝን ቅትዳ። አሱንꬅ ኡባ ጋማ ቆፒ፥ «ኑኒ Ꮉኒ ጋር ጋማ ቆፍዘ ባዝ ብእ ኤሮስ» ያጋእ ጾዝ ጋላትዳ።
የሱሳ ሌወ ጼግዳ
(ማቶ. 9:9-13፤ ሉቃ. 5:27-32)
13 የሱሳ ማህ ጋልላ አባ ጋጻ Ꮉንግ፥ ፋጎ ይእደ አሱንꬃና ኡባ ታማርስዳ። 14 ኢራ አꬍተራ፥ እልፍዮሳ ናአይ ሌወ ጋእንትዘ ቃራጠ ጋችዘ በስተ በትዳያ ብእ፥ «ታና ካሎ» ያጋይዳ። ሌዊዘ ደንዲ ኤቂ ኤዛ ካልዳ።
15 የሱሳ ካꬃ ማደስ ሌዊ ኬꬃ በትዳ። ኤዛ ካልዘ አሱንꬅ ጋማ ማቅደ ግሾ ቃራጠ ጋችዘ ጋማ አሱንꬅን ናጋራንቹንꬅ ኤራን ኤ ታማሩንꬃራ ዎላ በትዳ። 16 ህገ አስታማረ ማቅደ ፈቲ ፈቲ ፋርሳዉንꬅ የሱሳ ናጋራንቹንꬃራን ቃራጠ ጋችዙንꬃራ ካꬃ ማአደራ ብእ፥ «ኤ አኮስ ናጋራንቹንꬃራን ቃራጠ ጋችዙንꬃራ ካꬃ መኤ?» ያጋእ፥ ኤ ታማሩንꬃና ኦጭዳ።
17 የሱሳ ኡን ጋዛኖ ስእ፥ «Ꮉርግንትዘስ ፋትን ፋጻስ አክመ ኮሾስ። ታኒ ናጋራንቹንꬃና ጼጎደስ ዪዳፕ አትን ጽሉንꬃና ጼጎደስ ይእካያ» ያጋእ ኡንትስ ማህዳ።
ጾማ ባዝ ኤሮደስ ሺቅደ ኦጨ
(ማቶ. 9:14-17፤ ሉቃ. 5:33-39)
18 ጻማቅዘ ዋሐንሳ ታማሩንꬅን ፋርሳዉንꬅ ጾማነ። ፈቲ ፈቲ አሱንꬅ የሱሳጎ ይእ፥ «ዋሐንሳ ታማሩንꬅን ፋርሳዉንꬅ ታማሩንꬅ ጾማነ፥ የዝን ነ ታማሩንꬅ አኮስ ጾሞሶ?» ያጋይዳ።
19 የሱሳ ኡንታጎ፥ «ሳርገ ይእደ አሱንꬅ ማቾ ኤክዘ ኡንታራ የዝን፥ ጾሞደስ ዳንዳአነ? ማቾ ኤክዘ ኡንታራ የዝን፥ ጾሞደስ ዳንዳኦስ። 20 የዝን ማቾ ኤክዘ ኡን ካለፓ ኤክንቶደስ ዎደ የኦዳ፥ ኡን የ ዎደ ጾሞዳ።
21 «ጋልአ ማኦላ ክለ ጫርቀ ጋዲ ስክዘ አስ ባያ። ጋዲ ስክኮን፥ ክልዘ ጋልአ ማእዛ ፌꬋነ፤ ፌዽꬅታን ካሰንፓ አꬋነ። 22 ማህ ማልአንቶ ዎይነ ጋልአ ስልጰ ጉጅዘ አስ ባያ። ማህ ጉጅኮን፥ የ ዎይንዘ ስልጵዛ ፌꬋነ፥ ፋስን ላንታነ፥ ስልጵዘን ኢታነ። የዝን ማልአንቶ ዎይነ ክለ ስልጰ ጉጅንታነ» ያጋይዳ።
ሳምባታ ባዝ ኤሮደስ ሺቅደ ኦጨ
(ማቶ. 12:1-8፤ ሉቃ. 6:1-5)
23 የሱሳ ፈቲ ሳምባታ ቃማ ባንጋ ጋደ ግዳራ አꬎደራ፥ ኤ ታማሩንꬅ ኤራ Ꮉንግተራ ባንጋ ትዣ ሽጪ ꬋአነ።ማሄ 23:25 24 ፋርሳዉንꬅ የሱሳጎ፥ «ይኬ፥ ነ ታማሩንꬅ ሳምባታ ቃማ ዎጋ ባይዘ ባዝ አኮስ ኦቼ?» ያጋይዳ።
25 የሱሳ ኡንታጎ፥ «ዳዉተ ናይꬊ፥ ሙእዘ ባዝ ኮይደ ዎደ ፋራ የዙንꬃራ ኦችዳኖ ነ ናባብካ?1 ሳመ. 21:1-6 26 አብያታር ካህኑንꬅ Ꮉላቃ ማቂ የዘ ዎደ ዳዉተ ጾዘ ኬꬃ ገሊ፥ ካህኑንꬅ ጻላላ ማአደፕ አትን ኦደን ማአደስ ዎጋ ባይዛኖ ላꬄ ቲኖ ጋድደ ዳቡቶ ሙእዳ፥ ፋራ የዙንꬅስን እንግዳ» ያጋይዳ። ሌዌ 24:9
27 ማህን የሱሳ ኡንታጎ፥ «ሳምባታ አስ ናአ ማደስ ጋእ መꬍንትዳፕ አትን አስ ሳምባታስ መꬍንትካያ። 28 ይኒ ግሾ፥ አስ ናአይ፥ መለ አቶ የዝን ሳምባታስን ላꬂ» ያጋይዳ።