3
የሱሳ ኩሸ ጉንዳ አꬃ ፋꬅዳ
(ማቶ. 12:9-14፤ ሉቃ. 6:6-11)
1 የሱሳ አይሁደ ዎሳ ኬꬃ ማቂ ገልዳ። እዘ ኩሸ ጉንድደ ፈቲ አስ የነ። 2 ፈቲ ፈቲ አሱንꬅ የሱሳ ሞቶደስ ኬዚ፥ ኩሸ ጉንድደ አꬃ ሳምባታ ዎደ ኤ ፋꬅኮን አሽኮ ጋእ በአደስ ኮይ ምንꬂ ናጋነ። 3 የሱሳ ኩሸ ጉንድደ አꬃ፥ «ደንዲ ኤቂ Ꮉንካ ግዳ ዮኦ» ያጋይዳ። 4 ይንፓ ሱባ፥ አሱንꬃጎ፥ «ሳምባታ ዎደ ሎኦ ባዝ ኦችዛና ዎጋነ ኢታ ባዝ ኦችዛና ዎጋ? አስ ሸምፖ አሽዛኖነ ዎይ ዎꬍዛኖ?» ያጋእ ኦጭዳ።
የዝን አሱንꬅ ስእ ጋይዳ። 5 የሱሳ አንꬅንቲ፥ ኡንታና ዉቱꬂ ዳኪ ብእ፥ ኡን ኦህን ስኦሱንꬃና ማቅደ ግሾ ኡንታላ አፋ ጋማ ዥልꬍዳ። የ አꬄጎ፥ «ነ ኩጭዛ ፍዲ ዪዞ» ያጋይዳ። ኤዚ ፍዲ ዪዝን ኤ ኩጭዘን ፋጽዳ። 6 ኤልሲ ፋርሳዉንꬅ አይሁደ ዎሳ ኬꬃፓ ባለ ኬዚ፥ የሱሳ ዋይዝ ዎꬎድ የዛኮ ዞርንቶደስ ሄሮድሳ ባጉንꬃራ ፈቲ በሳ ሺቅዳ።
አሱንꬅ የሱሳጎ ሺቅዳ
7 የሱሳ ፋ ታማሩንꬃራ ጋልላ አባጎ Ꮉንግዳ። ጋልላፓን ይሁዳፓ ይእደ ጋማ አሱንꬅ ኤዛ ካልዳ። 8 ማህን የሩሳላመፓ፥ ኤዱምያሳፓ፥ ዮርዳኖሳ ቦርካ ፍንꬃፓ፥ ጢሮሳ ካታማፓን ስዶና ካታማፓ የሱሳ ኦችዳኖ ስእ፥ ጋማ አሱንꬅ ኤጎ ይእዳ። 9 አስ ጋንግዳንፓ ደንዲ ኤዛ ኡንእꬃመ ፋና ኤ ታማሩንꬅ ጎንገ ኤስ ጊግሳደ ጋር ኪትዳ። ማር. 4:1፤ ሉቃ. 5:1-3 10 ጋማ አሱንꬃና ኤ ፋꬅደ ግሾ Ꮉርግንትዘ አሱንꬅ ኡባ ኤዛ ቦቾደስ ኡርቂንታነ። 11 ቱና አያና አይክደ አሱንꬅ ኤዛ ብእደ ዎደ ኤ ቲንተ ቡንቅቲ፥ ፋ ቃልቶ ꬎቅ ዪዚ፥ «ኔኒ ጾዘ ናአ ባነ?» ያጋይዳ።
12 የሱሳ ጋማ ዎደ ቱና አያኑንꬅ ፋ ኦናትꬅቶ ቆንጭዛመ ፋና ኡንታና ምንꬂ ኪትዳ።
የሱሳ ታጶ ላምእ ሐዋሩንꬃና ዶርዳ
(ማቶ. 10:1-4፤ ሉቃ. 6:12-16)
13 የሱሳ ደረላ አፋ ኬዚ፥ ፋ ኮይዘ አሱንꬃና ፋጎ ጼግዳ፤ ኡንትን ኤጎ ሺቅዳ። 14 ኡን ፋራ የሳደ ጋራን ቃላ ታማርሶደ ጋር ታጶ ላምኡንꬃና ዶሪ፥ ኡንታና፥ «ሐዋረ»*ሐዋረ፦ ሐዋረ ጋዛና ኪትንትዱንꬃና ጋኤ። ጋእ ሱንꬅዳ። 15 ቱና አያና ከሶደ ጋር ኡንትስ አደትꬅ ዎልቃ እንግዳ።
16 ኤ ዶርደ ታጶ ላምኡንꬅ Ꮉንሳና፦ ጴጥሮሳ ጋእ ሱንꬅደ ስሞና፥ 17 ቦአነርገስ (ዳዳ አዝዘ አሱንꬃና) ያጋእ ሱንꬅዱንꬃና፥ ዛብዶሳ ናኡንꬅ ያይቆባራን ያይቆባ እሸ ዋሐንሳ፥ 18 እንድራሰ፥ ፍልጶሳ፥ ባርቶሎምዮሳ፥ ማቶሳ፥ ቶማሳ፥ እልፍዮሳ ናአ ያይቆባ፥ ታድዮሳ፥ ካናነፓ ይእደ ስሞናራ፥ 19 የሱሳ አꬂ እንግደ አስቆሮቱ ይሁዳ።
የሱሳን ብኤልዘቡላን
(ማቶ. 12:22-32፤ ሉቃ. 11:14-23፤ 12:10)
20 ይንፓ ሱባ፥ የሱሳ ካራ Ꮉንግዳ። ማህ ጋማ አሱንꬅ ሺቅን፥ ኤዝን ኤ ታማሩንꬅ መለ አቶ የዝን ካꬃ ማአደስን ኡን ዳንዳእካያ። 21 አሱንꬅ ኤዛ፥ «ዣሽታነ» ጋዘ ግሾ ኤ እግኑንꬅ ይኖ ስእ ኤዛ ኤኮደስ Ꮉንግዳ።
22 ህገ አስታማሩንꬃፓ ፈተ ፈተ የሩሳላመፓ ይእ፥ «ኤላ አፋ ብኤልዘቡላ የነ»፥ ኤ፥ «ጻላሄ ዎልቃራ ቱና አያና ከሳነ» ያጋእ ዎላ ኦህንትዳ። ማቶ. 9:34፤ 10:25
23 የሱሳ አሱንꬃና ፋጎ ጼጊ አዝዘር ኦህዳ። «ጻላሄ ጻላሄ ዋይዝ ኬሶደስ ዳንዳኤ? 24 ፈቲ ካእቱሞ ፋ ግዳ ሻክንትኮ ይና ካእቱምታ ኤቆደስ ዳንዳኦስ። 25 ይኒ ጋራ፥ ፈቲ ኬꬃ አሱንꬅ ፋ ግዳ ሻክንትኮ ꬋቦዳፕ አትን የሳደስ ዳንዳኦስ። 26 ይኬ፥ ጻላሄ ፋራ ካጭንቲ ሻክንትኮ ꬋቦዳፕ አትን የሳደስ ዳንዳኦስ።
27 «ይኒ ጋራ ቲኖ ዎልቃር የዘ አꬃ አጭካይዛራ ኤ ኬꬃ ገሊ፥ ኤ ቆልቶ ቦንቆደስ ዳንዳእዘ አስ ባያ። አጪ ማቂ ኤ ኬꬅቶ ቦንቆደስ ዳንዳአነ።
28 «ታኒ ይንትስ ቱሮ ኦህነ፤ ጾዚ አስ ናኡንꬅስ ናጋራ ኡባኖን ኡን ጫዥዘ ጫሽቶ ኡባ አቶ ጋኦዳ። 29 የዝን ጌሽ አያናላ ኢታ ባዝ ኦህዘ መꬍናስ ናጋራ ጋለ ማቃደፕ አትን ጾዚ ሙሎን ኤዛ ማሮስ» ያጋይዳ። ሉቃ. 12:10 30 የሱሳ ይኖ ጋእዳና፥ ፈቲ ፈቲ አሱንꬅ፥ «ኤላ አፋ ቱና አያና የነ» ያጋይደ ግሾ።
የሱሳ እንቶን ኤ እሹንꬃናን
(ማቶ. 12:46-50፤ ሉቃ. 8:19-21)
31 ኤ እንታን ኤ እሹንꬅን ይእ ባለ ኤቂ፥ ኤጎ አስ ኪቲ ኤዛ ጼግዳ። 32 ኤ ካለ በትደ ጋማ አሱንꬅ፥ «ይኬ፥ ነ እንታን ነ እሹንꬅን ባለ ኤቂ ነና ኮያነ» ያጋይዳ።
33 የሱሳ ማህ፥ «ታ እንታ ኦደ? ማህ ታ እሹንꬅን አኑንꬃና?» ያጋይዳ። 34 ፋ ካልተ በትደ አሱንꬃና ዉቱꬂ ዳኪ ብእ፥ «ይኬ፥ ታ እንታን ታ እሹንꬅን Ꮉንሳና። 35 ጾዘ ቆፋ ኦችዘ ኡቡንꬅ ታስ እሸን፥ ታስ ምሾን ታስ እንዶ» ያጋይዳ።