4
ቡዱꬅ ቡድዘ አꬄ አዝዘ
(ማቶ. 13:1-9፤ ሉቃ. 8:4-8)
1 የሱሳ ማህ ጋልላ አባ ካለ ታማርሳነ። ጋማ አሱንꬅ ኤ ካንተ ዉቲ ሺቅን፥ አባላ የዘ ጎንግተ ገሊ በትዳ፥ አሱንꬅ ኡባ አባ ካለ የነ። 2 ኤ ኡንታና ጋማ ባዝ አዝዘራ ታማርስዳ። ታማርስተራ Ꮉንጋራ ያጋይዳ፦
3 «ይኬ! ፈቲ አꬄ ቡዱꬂ ቡዶደስ ከዝዳ። 4 ኤ ቡዶደራ፥ ፈቲ ፈቲ ቡዱꬅታ ኦገ ጋጻ ዎꬍዳ፤ ላንዳ ይእ ሙእዳ። 5 ፈቲ ፈቲ ቡዱꬅታ ፎርቾ ሳአላ ዎꬍዳ። ጋማ ሳአ ባይዘ ግሾ ይና ቡዱꬅታ ኤልሲ ዶልዳ። 6 የዝን አዋ ከዘ ዎደ ሹልዳ። ሎይꬂ ጻጶ ዳክካይዘ ግሾ ኤልሲ መልዳ። 7 ፈቲ ፈቲ ቡዱꬅታ አንጋꬅ ግዳ ዎꬍዳ። ዶልዳኖ አንጋꬅታ ድጪ ጩልደ ግሾ ኣፈ አፍካይዛራ አትዳ። 8 ፈቲ ፈቲ ቡዱꬅታ አራዳ ሳአ ዎꬊ ዶልዳ። ድጪ ፈተ Ꮉስታም፥ ፈተ እዝፑን ታም ፈተ ጼት ኣፍዳ» ያጋይዳ። 9 «ስእዘ Ꮉየ የዘ ኦደን ስኦ» ያጋይዳ።
የሱሳ አዝዘራ አኮ ኦሄዛኮ
(ማቶ. 13:10-17፤ ሉቃ. 8:9-10)
10 የሱሳ ኦህዳኖ ስእደ ፈቲ ፈቲ አሱንꬅ ታጶ ላምእ ታማሩንꬃራ የዙንꬅ የሱሳ ፋ ጻላላ የሳደራ፥ ኤጎ ሺቂ ይና አዝዝትስ ብልꬅቶ ኦጭዳ። 11 የሱሳ ኡንታጎ Ꮉኒ ጋር ያጋይዳ፦ «ይንትስ ጾዘ ካእቱሞ ጋꬅ ቆፋ ኤሮደስ እንግንትዳ። የዝን መሉንꬅስ ካእቱሞፓ ባለራ የዙንꬅስ ኡባ ባዝ አዝዘራ ኦህንታነ። 12 Ꮉና Ꮉንዳና፥
«ኡንቲ በእነ፥ የዝን ደንጎስ።
ስእነ፥ የዝን ቲሮስ።
ኡንቲ ደንግዛኮን ቲርዛኮ፥
ጾዛጎ ማቃዳ
ኤዝን ኡንታና ማሮዳ የሻ»
ያጋይዳ።ኢሳ. 6:9
ቡዱꬅ አዝዘ ብልꬅቶ
(ማቶ. 13:18-23፤ ሉቃ. 8:11-15)
13 የሱሳ ኡንታጎ፥ «Ꮉና አዝዝታ ይንትስ ገሎሶ? ዬዝን፥ አዝዘ ኡባ ይን ዋይዝ ቲሮደ? 14 ቡድዛይ ጾዘ ቃላ ቡዳነ። 15 ቃላ ቡድንትዘ ዎደ ኦገ ጋጻ ዎꬍዱንꬅ ቃላ ስእዙንꬃና። የዝን ጻላሄ ኢራ ይእ፥ ኡን ዎዝንተ ቡድንትደ ቃልቶ ማጺ Ꮉሳነ። 16 ይኒ ጋራ፥ ፎርቾ ሳአ ቡድንትደ ቃላ ስእ፥ ኤልሲ ኡፋይት ኤክዙንꬃና። 17 የዝን ኡንትስ ምንꬂ ጻጶ ባይዘ ግሾ Ꮉተስ ፋትን ጋምኦስ። ኤራꬅ ዎደፓ ሱባ ቃላ ግሾ ማꬋን ዎይ ባይꬂ የልደ ዎደ ኤልሲ ꬉቡንታነ። 18 አንጋꬅ ግዳ ቡድንትደ ቃላ ስእዙንꬃና። 19 የዝን Ꮉና ሳአ የሲስ ይርጋን፥ ዱርቱሞ ካን ዱማ ዱማ አሞትꬅ ኡን ዎዝንተ ገሊ ቃልቶ ጩልዘ ግሾ ኣፈ አፍካይዛራ አትዳ። 20 የዝን አራዳ ሳአ ቡዱንተዙንꬅ ቃላ ስእ ኤክዙንꬃና። ኡንቲ ፈተ Ꮉስታም፥ ፈተ እዝፑንታም ፈተ ጼት ኣፍዳ» ያጋይዳ።
አችቻ የዘ ጾምፐ
(ሉቃ. 8:16-18)
21 የሱሳ ጉጂ፥ «ጾምፐ ኤኪ፥ ጋባተ ግዳ ዎይ አልጋ ኦሞ ጋድዘ አስ የነ? ꬎቃ በሳ ጋዶሳነ?ማቶ. 5:15፤ ሉቃ. 11:33 22 ይኬ፥ አችንትደ ባዝ ኡባ ቆንጨ ኬሳዳ፤ አችንትደ ባዝ ኡባ ኤርንትካይዛራ አታማ። ማቶ. 10:26፤ ሉቃ. 12:2 23 ስእዘ Ꮉየ የዘ ኦደን ስኦ» ያጋይዳ።
24 ማህ ኡንታጎ፥ «ይን ስእዘ ባዝ ቆፋር ስኦተ! ጾዘ ቃላ ይን ስእዛን ፋና ኤ ይንትስ ቆፋ እንጎዳ። ይንትስ ማክዛነ ጋንꬅ እንጎዳ። 25 የዘ አꬄስ ጋንꬅ እንግንቶዳ፥ ባይዘ አꬄፓ መለ አቶ የዝን፥ ኤስ የዘ ይና ኤራꬅታን ኤክንቶዳ» ያጋይዳ። ማቶ. 13:12፤ 25:29፤ ሉቃ. 19:26
ድጭዘ ቡዱꬅቲ አዝዘ
26 የሱሳ ማህ፥ «ጾዘ ካእቱሞ ፋ ጋድተ ቡዱꬂ ቡድዘ አꬄ ፋና። 27 የ አꬄ ቃማ ገንታነ ዎንታ ደንዳነ። ኤ ፋ ኦምተ ዋይዛኮን ኤርካይዛራ የሳደራ ይና ቡዱꬅታ ዶሊ ድጫነ። 28 ጋድታን ካꬃ ፋ ፋስ እንጋነ። ቲኖ ዶሊ ድጫነ፥ ሱብተ አፎደስ ጋምቡጻነ፥ ዉርሱꬅተ ኩሙꬅ ኣፈ አፋነ። 29 የዝን ካꬅታ የልደ ዎደ አꬄ ማጻነ» ያጋይዳ። ኢዩ. 3:13
ኣፈ ኤራꬅ ምንጻ አዝዘ
(ማቶ. 13:31-34፤ ሉቃ. 13:18-19)
30 የሱሳ፥ «ኑኒ ጾዘ ካእቱሞ አኮ ፋና ጋኦደ? ዎይ አኮራ አዝሳደ? 31 ጾዘ ካእቱሞ ኣፈ ኤራꬅ ምንጻ አዛነ። የ ምንጻ ኣፍዘ ቡድዘ ዎደ ሳአላ የዘ ምንጻ ኣፈ ኡባፓ ላፋነ። 32 ቡድን ዶሊ ምንጻ ኡባፓ ዳማነ፤ ዳማ ዳሽ ዳዣነ። ላንዱንꬅ ኤ ትርሽትላ አፋ ኬጺ በቶደ ዎንꬅስ ዳዣነ» ያጋይዳ።
33 የሱሳ Ꮉኒ ጋር ጋማ አዝዘራ አሱንꬅ ቲሮደስ ዳንዳኦደ ጋር ቃላ ኦህዳ። 34 አሱንꬅስ አዝዘ ባይꬅ ኦሆስ። የዝን የሱሳ ፋ ታማሩንꬃራ ጻላላ የዘ ዎደ ኡንትስ ኡባባዝቶ ብሊ ኦህዳ።
የሱሳ አባ ዙሉንቶ ስእ ዪዝዳ
(ማቶ. 8:23-27፤ ሉቃ. 8:22-25)
35 የ ዎደ ሳእታ ኡጉርን፥ የሱሳ ፋ ታማሩንꬃጎ፥ «አባፓ ሰኮ ጋጻ ፊንጎዳ» ያጋይዳ። 36 ኤ ታማሩንꬅ ጋማ አሱንꬃና ኦሊ አሺ አሺ፥ የሱሳ ቲኖ ገሊ በትደ ጎንግዘ ግዳ ገሊ የሱሳ ፋራ ኤኪ ቅትዳ። መለ ጎንጉንꬅን እዘ የነ። 37 ዳማ ጎተ ደንዲ፥ ዙሉንታ ጎንግዛ ጉድን፥ Ꮉꬅታ ኩሞደ ዎንꬅስ ጎንግዘ ግዳ ገልዳ። 38 የ ዎደ የሱሳ ጎንግዘስ ሱባ ዛላራ ቦርኮꬅ ጋዲ ገንትዳ። ኤ ታማሩንꬅ ኤዛ ባርክዚ፥ «አስታማዛዮ፥ ኑ ꬋብዘ ዎደ ነና ይቅሶሳነ?» ያጋይዳ።
39 የዝን፥ ኤ ባርክ ዙሉንቶ፥ «ሴሪ»፥ አብዛን፥ «ስእ ጋኦ» ያጋይዳ። ዙሉንታን ስእ ጋእን ኡባ ባዝ ዎፑ ጋይዳ። 40 የሱሳ ፋ ታማሩንꬃጎ፥ «አኮስ Ꮉንጋራ ዣሽተተ? ይንትስ አማኖ ዋይዝ ꬋብዶ?» ያጋይዳ።
41 ኡንቲ ጋማ ዣሽቲ ፋ ግዳ፥ «Ꮉይ መለ አቶ የዝን፥ ጎተን አባን ኪትንትዘ ኦደ?» ያጋይዳ።