1 የሱሳ እዝፓ ኬዚ፥ ፋ ታማሩንꬃና ካልꬅ፥ ፋ ካታማ ናዝረተ ይእዳ። 2 ሳምባታ ዎደ አይሁደ ዎሳ ኬꬃ ታማርሰ አይክዳ። ኤ ታማርስዛኖ ስእደ ጋማ አሱንꬅ ጋማ ቆፒ፥ «Ꮉይ Ꮉኖ ኡባ አባፓ ደንግዶ? Ꮉና ጭንጫትꬅታ ኤስ አናፕ እንግንትዶ? Ꮉና ኤ ኩሽተ ኦችንትዘ ክለ ባዝቶ ኦችዘ ዎልቃ ኤስ ኦኒ እንግዶ? 3 Ꮉይ አናጸ ናአ ባነ? ማይራም ናአ፥ ያይቆባ፥ ዮሳ፥ ይሁዳን ስሞና እሸ ባነ? ኤ ምሹንꬅ ኑራ Ꮉነ የዙንꬃና ባነ?» ያጋእ፥ ኤ ጋዛኖ ስአንጽ እጽዳ።

4 የሱሳ የንꬅ አሱንꬃጎ፥ «ናበ ፋ ጋደ፥ ፋ እግኑንꬅ ግዳን ፋ ካራ አሱንꬅ ግዳ ቦንችንቶስ ፋትን መሉንꬅ ካለ ቦንችንታነ» ያጋይዳ። ዋሐ. 4:43 5 ኤ ይና በስተ ፋ ኩሽቶ ኤራꬅ አሱንꬃላ አፋ ጋዲ ፋꬅዳንፕ መለ ጋማ ቆፍዘ ባዝ ኦቾደስ ዳንዳእካያ። 6 አሱንꬅ አማንካይዘ ግሾ ጋማ ቆፕዳ። ይንፓ ሱባ የሱሳ ይና ጉቱተ የዘ አሱንꬃና ታማርሳነ።

7 የሱሳ ታጶ ላምእ ታማሩንꬃና ፋጎ ጼጊ፥ ላምእ ላምእ ማህ ኪትዳ። ኡንትስ ቱና አያናላ አደትꬅ ዎልቃ እንግዳ። 8 ኡንታና፥ «ኦገስ ጉፈፕ አትን ካꬃ፥ ካርጥተ፥ ይን ኪስተ ብራ አኮ ባዝን አይክፐተ። ሉቃ. 10:4-11 9 ይን ቶህተ ጫማ ኣꬆተ፥ ፋትን ላምእ አፉላ አይክፐተ» ያጋይዳ። 10 ማህን፥ «ይንታና አስ ሞክዘ ኬꬃ አባ ማቅኮን ይና በስትፓ ኬዚ ቅቶደ ዎንꬅስ ይና ኬꬅተ ጋምኦተ። 11 ይንታና አስ ሞኮሰ በሳ ዎይ ይን ኦህዛኖ ስኦሰ በሳ አባን ማቅኮ፥ ይና ሳእተ የዘ አሱንꬅስ ይን ማርካ ማቃደ ጋር ይና በስትፓ ከዝተራ፥ ይን ቶህተ የዘ ጹርቶ ፍጾተ» ያጋይዳ። ሐዋ. 13:51

12 ታጶ ላምእ ታማሩንꬅ Ꮉንግ፥ አሱንꬅ ፋ ናጋርትፓ ማቃደ ጋር ቃላ ኦህዳ። 13 ኡንቲ አሳፓ ጋማ ቱና አያና ከስዳ። ጋማ Ꮉርግንትዙንꬃና ዛይተ ትዢ ፋꬅዳ።ያይ. 5:14

14 የሱሳ ሱንꬅታ ኡባ በሳ ከዝደ ግሾ ካት ሄሮድሳ ኤ ባዝ ስእዳ። ፈቲ ፈቲ አሱንꬅ፥ «ጻማቅዘ ዋሐንሳ Ꮉይቆፓ ደንድዳ፥ ይኒ ግሾ Ꮉና ክለ ባዝቶ ኦችዘ ኤዛ» ያጋይዳ። ማቶ. 16:14፤ ማር. 8:28፤ ሉቃ. 9:19

15 ባጉንꬅ፥ «Ꮉይ ኤልያሳ» ያጋይዳ።

መሉንꬅ ማህ፥ «Ꮉይ ዛጋ ዎደ ናቡንꬃፓ ፈታያ» ያጋይዳ።

16 የዝን ሄሮድሳ ይኖ ስእደ ዎደ «Ꮉይ ታኒ አፉርቶ ጋችዝደ ጻማቅዘ ዋሐንሳ። ኤ Ꮉይቆፓ ደንድዳ» ያጋይዳ።

17 ሄሮድሳ ፋ እሸ ፍልጶሳ ማችቶ ሄሮድያዳ ኤክደ ግሾ እ ምክናትስ ዋሐንሳ አይꬂ አጭዝዳ። 18 ዋሐንሳ ሄሮድሳጎ፥ «ኔኒ ነ እሸ ማችቶ ኤኮደስ ቤዞስ» ያጋይዳ። ሉቃ. 3:19-20

19 ሄሮድያዳ ዋሐንሳ ፋ ዎዝንተ እጺ ኤዛ ዎዽሳደስ ኮይዳ፥ የዝን ዳንዳእካያ። 20 ዋሐንሳ ጽሎን ጌሽ አስ ማቅዳኖ ሄሮድሳ ኤርደ ግሾ ኤስ ዣሽቲ ሎይꬂ ናግዛነ። ሄሮድሳ ዋሐንሳ ጋዘ ባዝ ስእዘ ዎደ ታናነ። የዝን ኡፋይት ስእነ።

21 ሄሮድሳ ፋ የልንትደ ቃምቶ ቦንቾደስ ጋደ አህዙንꬃና፥ ሻላቁንꬅስን ጋልላ የዘ ዳማ አሱንꬅስ ድግሳ ጊግዝዳ። ይና ሄሮድያዳስ ዎትዘ ዎደ ማቅዳ። 22 ሄሮድያዳ ናእታ ዛቁንꬅ ሞኩንትዘ ኬꬃ ገሊ ዱሪ፥ ሄሮድሳን ኤ ዛቁንꬃና ኡፋይስዳ። ካትዘ ናትጎ፥ «ነ ኮይዘ አኮ ማቅኮን ታና ኦጮ፥ ታ ኔስ እንጎዳ» ያጋይዳ። 23 ማህ ኢስ ጫቂ፥ «ኔኒ ኦጭዘ አኮ ማቅኮን፥ ታኒ ኔስ እንጎዳ። መለ አቶ የዝን፥ ታ ካእቱምት ባግቶ ማቅኮን ታ ኔስ እንጎዳ» ያጋይዳ።

24 ናታ ባለ ኬዚ ፋ እንትጎ፥ «አኮ እንጎ ጋዉነ?» ጋእ ኦጭዳ።

እ እንታ፥ «ጻማቅዘ ዋሐንሳ ኦምቶ እንጎ ጋኦ» ያጋይዳ።

25 ናታ ኤልሲ ካትዘጎ Ꮉንግ፥ «ጻማቅዘ ዋሐንሳ ኦምቶ ሳነ ግዳ ጋዲ Ꮉተ ታስ እማደ ጋር ኮያነ» ያጋይዳ።

26 ያጋእን ካትዘ ጋማ ዥልꬍዳ፥ የዝን ፋ ዛቁንꬅ ግሾ ኢስ ጫቂደ ፋ ጫቅቶ አሾደስ ኮይካያ። 27 ይኒ ግሾ፥ ኤልሲ ናግዘጎ ዋሐንሳ ኦምቶ ኮኦደ ጋር ኪትዳ። ናግዘን አች ኬꬃ Ꮉንግ ዋሐንሳ አፉርቶ ጋችዳ። 28 የ ጋችንትደ ኦምዛ ሳነ ግዳ ጋዲ ክእ ናትስ እንግዳ። ናታ ማህ ፋ እንትስ እንግዳ። 29 ዋሐንሳ ታማሩንꬅ ይኖ ስእደ ዎደ Ꮉንግ ኤ አህቶ ኤኪ ካንግ ሞግዳ።

30 ታጶ ላምእ ሐዋሩንꬅ ማቂ ይእ ኡን ኦችዳኖን ታማርስዳኖ ኡባ የሱሳስ ኦህዳ። 31 ኡንታጎ ይእዘ አሱንꬅን ቅትዘ አሱንꬅ ጋንግደ ግሾ የሱሳራን ኤ ታማሩንꬃራ፥ መለ አቶ የዝን ካꬃ ማደስን ኡንታና የልꬃንጽ እጽዳ። የይን፥ የሱሳ ኡንታጎ፥ «የኦተ ዎላ ኤራꬅ ሸምፖደስ አስ ባይዘ በሳ የꬎተ» ያጋይዳ። 32 ይኒ ግሾ፥ ኡንቲ ፋ ፋስ ጎንገ ገሊ አስ ባይዘ በሳ ቅትዳ።

33 ኡንቲ Ꮉማደራ ጋማ አሱንꬅ ኡንታና ብእ ኤርዳ። የዝን፥ ካታማ ኡባፓ አሱንꬅ ቶሄራ ዎጺ Ꮉንግ ኡን ቅትዘ በስቶ ኡንታፓ ቲኒ የልዳ። 34 የሱሳ ጎንግዘፓ ዎꬊ ጋማ አሱንꬃና ብእዳ። አሱንꬅ የንግዘ አስ ባይዘ ዱሮ ፋና ማቅዳኖ ብእ ኡንትስ ይቅስንቲ ኡንታና ጋማ ባዝ ታማርስዳ። ፋይዶ 27:17፤ 1 ካት 22:17፤ ሕዝ. 34:5፤ ማቶ. 9:36

35 ሳእታ ኡጉርዘ ዎደ የሱሳ ታማሩንꬅ ኤጎ ይእ፥ «Ꮉና በስታ አስ ባይዘ በሲ፤ Ꮉተ ሳእታን ቃምዳ። 36 አሱንꬅ ካራ ጋንጨን ካታማ Ꮉንግ ፋስ ሙእዘ ባዝ ዎንጎደ ጋር አሱንꬃና ዳኮ» ያጋይዳ።

37 የዝን የሱሳ ማህ ኡንታጎ፥ «አሱንꬅስ ሙእዘ ባዝ ይን እንጎተ» ያጋይዳ።

ኡን፥ «ኑኒ Ꮉንግ ላምእ ጼት ድናረር *ድናረ ጋዘ ፈቲ አስስ ኦቺ ፌዥዳንስ እንግንትዘ ብራ ቦራ ዎንግ አሱንꬃና ሙዞደ ጋር ኮያነ?» ያጋእ ኦጭዳ።

38 የሱሳ ኡንታጎ፥ «ይንትስ ዋንꬅ ቦራ የዘ? አነ Ꮉንግ ቦኦተ» ያጋይዳ።

ኡንቲ ብእ፥ «እችን ቦራን ላምእ ሞሎን» ያጋይዳ።

39 የሱሳ ፋ ታማሩንꬃጎ አሱንꬃና ኡባ ጋቾ ጋቾ ታጊ በትꬆደ ጋር ኪትዳ። 40 አሱንꬅ ባግታ ጼት፥ ባግታ እችንታም ማቂ ልከራ ልከራ ታግንት በትዳ። 41 የሱሳ እችን ቦርቶን ላምእ ሞሉንꬃና ኤኪ፥ ኡደ ሳሎ ብእ ጾዝ ጋላትዳ። ቦርቶ ባጽ አሱንꬅስ የልꬆደ ጋር ታማሩንꬅስ እንግዳ። ማህ ላምእ ሞሉንꬃና ኡን ኡቡንꬅስ ግሽዳ። 42 አሱንꬅ ኡባ ሙእ ምዥዳ። 43 አትደ ቦራ ጉፋን ሞሎ ጉፋን፥ ኤ ታማሩንꬅ ታጶ ላምእ ሌማተ ኩሙꬅ ደንꬅዳ። 44 ቦርቶ ሙእደ ꬊራꬅ አሱንꬅ ጻላላ እችን ሙኩል ማቃዳ።

45 ኤልሲ የሱሳ ፋ ታማሩንꬅ ጎንገ ገሊ፥ አባፓ ሰኮ ፍንꬃ የዘ ቤተሳይዳ ፋፓ ቲኒ ቅቶደ ጋር ኪትዳ። የዝን ፋስ አሱንꬃና ሞይዞደስ ሱብ አትዳ። 46 አሱንꬃና ሞይዝዳንፓ ሱባ ጾዝ ዎሶደስ ደረላ አፋ ከዝዳ።

47 ሳእታ ቃምዘ ዎደ ጎንግዘ አባ ግዳ የነ፥ የዝን የሱሳ አባፓ ጋጻ ፋስ የነ። 48 ባቆ ኤ ታማሩንꬃጎ ባቅዘ ግሾ አባ ፍዽዛና ዋይስዛኖ የሱሳ ብእዳ። ዎንት ማ ሉኩለ ኦሎደስ ይእዘ ዎደ ኤ አባላ አፋ የꬍተራ ኡንታጎ ይእ፥ ኡንታና ኦሊ አꬋደስ ኮይዳ። 49 የዝን ኤ አባላ አፋ የꬋደራ፥ ኡን ብእ፥ ኡንትስ ሜሸ አዝን ዉይስዳ። 50 ኡን ኡቡንꬅ ኤዛ ብእ፥ ዣሽሞራ ታንዳ።

የዝን የሱሳ ኤልሲ ኡንታጎ፥ «ታና፥ አኮን ባያ፤ ዣሽትፐተ» ያጋይዳ። 51 ኤ ጎንገ ገሊ ኡንታራ ዎላ በትን ባቅታ ዎፑ ጋይዳ። ኡንቲ ጋማ ቆፕዳ። 52 ኡን ዎዝንታ ዶጭደ ግሾ ኡን ቦርቲ ባዝ ቲሪካያ።

53 ኡንቲ አባ ፊንግ፥ ጌንሳሬጠ ሳአ የሊ፥ ጎንግዛ ጋጻላ ሺሺ አጭዳ። 54 ኡንቲ ጎንግዘፓ ዎꬍዘ ዎደ አሱንꬅ ኤልሲ የሱሳ ኤርዳ። 55 ኡንቲ ካራ ጋንጨ የዘ ሳአ ኡባ ዎጺ የሊ Ꮉርግንትዙንꬃና ሻንቻፋራ ቶኪ፥ «የሱሳ የነ» ጋእን ስእደ በስተ ክእዳ። 56 አሱንꬅ ኤ Ꮉንግደ ኬꬃ ኡባ፥ ጋጻረ ማቅኮን፥ ካታማ፥ የዘ Ꮉርግንትዙንꬃና አስ ሺቅዘ በሳ ካንጋነ። Ꮉርጋንቹንꬂ ኤ አፉላ ማጫርቶ ማቅኮን ቦቾደ ጋር አሱንꬅ ኤዛ ዎስዳ። ቦችደ ኡቡንꬅ ፋጽዳ።