13
የሱሳ ጾዘ ኬꬅታ ዉልእንቶዳኖ ቲኒ ኦህዳ
(ማቶ. 24:1-2፤ ሉቃ. 21:5-6)
1 የሱሳ ጾዘ ኬꬃፓ ከሳደራ፥ ኤ ታማሩንꬃፓ ፈተ፥ «አስታማርዛዮ፥ Ꮉና ሎኦ ሹችቶን Ꮉና ሎኦ ሹች ኬꬅቶ በእነ!» ያጋይዳ።
2 የሱሳ ማህ፥ «Ꮉና ዳማ ሹች ኬꬅቶ በእነ? Ꮉና ኬꬅታ ሹች ሹቻላ አፋ ግምቢንትደ ፋና ዉልእንትካይዛራ አቶስ፤ ፈቲ ሹችን አትካይዛራ ኡባ ዉልእንቶዳ» ያጋይዳ።
ላꬂ ዮኦዳንፓ ቲኖ የሎደ ባይꬅን ማꬋን
(ማቶ. 24:3-14፤ ሉቃ. 21:7-19)
3 የሱሳ ጾዘ ኬꬃፓ ሰኮ ዛላራ ሻማሄ ደርዘላ አፋ በቴዝን፥ ጴጥሮሳ፥ ያይቆባ፥ ዋሐንሳን እንድርያሰ ኤጎ ይእ፥ 4 «Ꮉና አይደ ይአድየዛኮ፥ ኑስ ኦሆ፤ Ꮉና ኡባ ፎልንቶደስ ዎድቶ ኤርስዘ ማልታ አኮ?» ያጋእ ኦጭዳ።
5 የሱሳ ማህ ኡንታጎ Ꮉንጋራ ያጋእ ኦህዳ፦ «ይንታና ኦደን ባልꬃመ ፋና ናግንቶተ። 6 ጋማ አሱንꬅ ታ ሱንꬅተ፥ ‹ታኒ ክርስቶሳ› ጋእ ጋማ አሱንꬃና ባልꬆዳ። 7 ኦላን ኦላ ዎረ ስእዘ ዎደ ይርግፐተ። ይኒ ጋርዘ Ꮉኖደስ ቤዛነ፥ የዝን ዉርሱꬅታ Ꮉጋ። 8 ፈቲ ጋደ አሱንꬅ መለ ጋደ አሱንꬃራ ኦልንቶዳ፤ ማህ ፈቲ ካእቱሞ መለ ካእቱሞራ ኦልንቶዳ፤ ሳአ ኤንኤ ኡባ በሳ Ꮉኖዳ፤ ናየ የሳዳ፥ የዝን ይና ኡባና የሎ ዞቀ ፋና።
9 «የዝን ይንቲ፥ ይን ኦምተ ናግንቶተ። አኮስ ጋይኮ፥ አስ ይንታና አይኪ፥ ፍርዳ ኬꬅስ አꬂ እንጎዳ፤ ማህ አይሁደ ዎሳ ኬꬅተን ይንታና አላንጋራ ጋራፎዳ፤ ጋደ አህዙንꬅ ቲኖን ካቱንꬅ ቲኖ ታ ግሾ ይን ማርክꬋደስ ኤቆዳ። ማቶ. 10:17-20፤ ሉቃ. 12:11-12 10 ዉርሱꬅታ የሎዳንፓ ቲኖ ዎንገለ አስ ኡባስ ኦህንቶደስ ቤዛነ። 11 ኡንቲ ይንታና ፍርዳ ኬꬃ ክእዘ ዎደን አꬂ እንግዘ ዎደ ዋጊ ኦሆድየዛኮ ቲኖ ይርግፐተ፤ ይና ሳተ ጾዚ ይንትስ እንግደባዝ ኦሆተ። ይን ግዳ ጌሽ አያና ኦህነፕ አትን ይንታና ባያ።
12 «እሸ ፋ እሻ፥ አዳይ ፋ ናአያ ዎꬍሳዳ። ናኡንꬅ ፋና የልዱንꬃላ ደንዲ፥ ኡንታና ዎꬎዳ። 13 አስ ኡባ ይንታና ታ ሱንꬅት ግሾ እጾዳ፥ የዝን ዉርሱꬅ የሎደስ ሚንግደ አቶዳ። ማቶ. 10:22
የሩሳላመ የሎደ ኢታ ማꬋ
(ማቶ. 24:15-28፤ ሉቃ. 21:20-24)
14 «የዝን ꬋብስዘ ቱንዘ ኤቆደስ ቤዞሰ በሳ ኤቀዝን ይን በአዳ።» ይና አኮ ጋእንትዛኮ ናባብዘ አካኮ! «ይሁዳ ሳአ የ ዎደ የዙንꬅ ደረጎ ዎጺ አችንቶ። ማሄ 9:27፤ 11:31፤ 12:11 15 ባለ የዘ ኬꬃ ገሊ ኬꬃፓ ፈትባዝ ኤኮደስ ጎደ፥ ፋ ኬꬃ ገልፐ። ሉቃ. 17:31 16 ጋደ የዘ ፋ ማእቶ ኤኮደስ ሱባ ማቅፐ። 17 የ ዎደ ዎዳꬅ ማቹንꬅስን ꬋንꬅዘ ማቹንꬅስ ጋማ ማꬋ ማቃዳ። 18 የዝን Ꮉና ኡባ Ꮉንዘ ዎድታ ሴተ ማቃመ ጋር፥ ጾዝ ዎሶተ። 19 አኮስ ጋይኮ፥ ጾዚ አላምቶ መꬍደ ዎድትፓ አይኪ፥ Ꮉይኖ የሎደስ Ꮉንካይዘ ማꬋን ቲኖስን Ꮉኖሰ ክለ ማꬋ አሳላ አፋ የ ዎደ Ꮉኖዳ። ማሄ 12:1፤ ቆን. 7:14 20 ላꬂ ይና ቃምት ፋይድቶ ኤርꬅካይዛኮ፥ አስ ማቅደ ኦደን አቶስ። የዝን ኤ ፋ ዶርደ አሱንꬅ ግሾ ይና ፋይድቶ ኤርꬃነ።
21 «የ ዎደ ኦደን ይንታና፥ ‹ይኬ፥ ክርስቶሳ Ꮉነ የነ ዎይ ክርስቶሳ ሰካ የነ› ያጋይኮ፥ ይኖ አማንፐተ። 22 ዎርዶ ክርስቶሳን ዎርዶ ናቡንꬅ ደንዲ ፋስ ዳንዳእንትኮ፥ መለ አቶ የዝን ጾዚ ዶርዱንꬃፓ ባልꬆደ ዎንꬅስ ክለ ባዝን ጋማ ቆፍዘ ባዝ ቤሳዳ። 23 የዝን ይንቲ ናግንቶተ፥ ታኒ ይንትስ ኡባ ባዝ ቲንꬍ ኦህዳ።
ክርስቶሳ ላምእንꬃ የኤ
(ማቶ. 24:29-31፤ ሉቃ. 21:25-28)
24 «የዝን የ ዎደ ይና ማꬍትፓ ሱባ፥
«አዋ ꬉሞዳ፤
አግና ፎእቶ አሾዳ፤ ኢሳ. 13:10፤ ኤር. 2:10
25 ጾልንቱንꬅ ሳሎፓ ጎልኦዳ፤
ማህ ሳሎ የዘ ዎልቅታን ኤንኦዳ። ኢሳ. 34:4፤ ቆን. 6:13፤ ኤር. 2:10
26 የ ዎደ አስ ናአይ፥ ዳማ ዎልቃራን ቦንቾራ ꬎነ ግዳራ የኦደራ ኡን በአዳ። ዳነ. 7:13፤ ቆን. 1:7 27 የ ዎደ ኤ ኪታንቹንꬃና ኪቶዳ። ኦይዲ ዛላ ሳአ ጋጻፓ ሳሎ ጋጻ የሎደስ፥ ጾዘ ዶርደ አሱንꬃና ሺሾዳ።
ዎደ የልዳኖ ኤርስዘ በለሰ ምንጽቶ
(ማቶ. 24:32-35፤ ሉቃ. 21:29-33)
28 «አዝዝቶ በለሰ ምንጻፓ ቲሮተ፤ በለስታ አጭዘ ዎደ እ Ꮉይታ ጭልኤ አይክደ ዎደ ቶርቼ የልዳኖ ይን ኤራነ። 29 ይኒ ጋር፥ ይንቲ ይና ኡባ ባዝታ Ꮉንዛኖ በእዘ ዎደ ኡክ ፉርꬃ የልዳኖ ኤሮተ። 30 ታኒ ይንትስ ቱሮ ኦህነ፤ Ꮉና ኡባ ባዝታ Ꮉኖደ ዎንꬅስ Ꮉነ የዘ አሱንꬅ ኡባ Ꮉይቆስ። 31 ሳሎን ሳአን አꬎዳ፥ የዝን ታ ቃልታ ሙሎን አꬎስ።
ላꬂ የኦደ ቃምቶን ሳቶ ኦደን ኤሮስ
(ማቶ. 24:36-44)
32 «የዝን ይና ቃምቶን ይና ሳቶ አዳይ ጻላላፕ አትን መለ አቶ የዝን ሳሎ የዘ ኪታንቹንꬃና ማቅኮን ዎይ ናአያ ማቅኮን ኦደን ኤርዘ ባያ። ማቶ. 24:36 33 ይና ዎድታ አይደ ማቅዛኮ፥ ይን ኤሮሰ ግሾ ናግንቶተን ምንጎተ። 34 ታ የእታ ፋ ኬꬅቶ አሺ፥ ኦገ ቅትደ አꬄ ጋራ። አꬃይ ፋ አሩንꬅስ ኦማር ኦማር ኦቻ እንግ ኡንታና ኦችትስ አደ ማህዳ፤ ማህ ናግዘን ምንꬂ ናጎደ ጋር ኪትዳ። ሉቃ. 12:36
35 «ይኒ ግሾ፥ ምንጎተ። አኮስ ጋይኮ፥ ካርቲ አዳይ ኡጉረ ማቅኮ ዎይ ቃማ ብላሄ ማቅን ዎይ ሉኩለ ኦልዘ ዎደ ማቅን ዎይ ዎንታ ጎዳ ማቅን አይደ የኦደ የዛኮ፥ ይን ኤሮስ። 36 ይን ቲርካይዝን ኤ ይእ ይንታና ገንቶ የዝን ደንጋመ ጋር ምንጎተ። 37 ታኒ ይንትስ ኦህዛኖ አስ ኡቡንꬅስ ኦህነ፤ ምንጎተ» ያጋይዳ።