15
የሱሳ ጵላጦሳጎ ካንግዳ
(ማቶ. 27:1-2፥ 11-14፤ ሉቃ. 23:1-5፤ ዋሐ. 18:28-38)
1 ዎንታ ጎዳ ኤልሲ ካህኑንꬅ Ꮉላቁንꬅ፥ ጭሙንꬅ፥ ህገ አስታማሩንꬅን ፍርዳ ሻንጉንꬅ ኡባ ሺቂ ዞርንትዳ። ኡንቲ የሱሳ አጪ ካንግ ጵላጦሳስ አꬂ እንግዳ።
2 ጵላጦሳ ኤጎ፥ «ኔኒ አይሁዱንꬅ ካት?» ያጋእ ኦጭዳ።
የሱሳ ማህ፥ «ነ ጋይዳ» ያጋይዳ።
3 ካህኑንꬅ Ꮉላቁንꬅ የሱሳ ጋማ ባዛራ ሞትዳ። 4 የዝን ጵላጦሳ ማህ የሱሳጎ፥ «ኔስ ማህዘባዝ ባ? ኡንቲ ኔላ አኮ ሞቶ ኬእዛኮ ቦኦሶ?» ያጋይዳ።
5 የዝን የሱሳ መለባዝ ማሀንጽ እጽን፥ ጵላጦሳ ጋማ ቆፕዳ።
የሱሳ Ꮉይቆ ጋእ ፍርድዳ
(ማቶ. 27:15-26፤ ሉቃ. 23:13-25፤ ዋሐ. 18:39-40፤ 19:1-16)
6 ጵላጦሳስ ፋስጋ ባአለ ቦንችዘ ቃምተ አሱንꬅ ኮይዘ ፈቲ አስ አቻፓ ብልዘ ዎጋ የነ። 7 የ ዎደ ፈቲ ባርባና ጋዘ አꬄ ካች ደንꬂ ሸምፖ ዎꬍደ አሱንꬃራ ዎላ አች ኬꬃ የነ። 8 ጋማ አሱንꬅ ጵላጦሳጎ ይእ ቲኖፓ ዪዝተራ ጋምእደ ፋና ኦቾደ ጋር ኤዛ ኦጭዳ። 9 ጵላጦሳ አሱንꬃና ማህ፥ «ታኒ ይንትስ አይሁዱንꬅ ካትዛ ብሎደ ጋር ኮያነ?» ያጋእ ኦጭዳ። 10 ይኖ ኤ ጋእዳና፥ ካህኑንꬅ Ꮉላቁንꬅ የሱሳ ቃናቲ አꬂ እንግዳኖ ኤርዘ ግሾ።
11 የዝን ካህኑንꬅ Ꮉላቁንꬅ ኤ ግሾ ባርባና ብሎደ ጋር፥ የንꬅ ሺቅደ አሱንꬅ ጵላጦሳ ዎሶደ ጋር አሱንꬃና ዞርዳ። 12 ጵላጦሳ ማህ፥ «ዬዝን፥ ይን አይሁደ ካት ጋዛያ ዋይሳ?» ያጋይዳ።
13 አሱንꬅ ጵላጦሳላ አፋ ኡክ፥ «ማስቃላላ አፋ ኤዛ ሱጾ» ያጋይዳ።
14 ጵላጦሳ አሱንꬃጎ፥ «አኮሶ? ኤ አኮ ኢታ ባዝ ኦችዶ?» ያጋይዳ።
የዝን አሱንꬅ ቲኖስትፓ ጉጂ ኡክ፥ «ማስቃላላ ኤዛ ሱጾ» ያጋይዳ።
15 ጵላጦሳ አሱንꬃና ኡፋይሶደስ ኮይ፥ ባርባና አሱንꬅስ ብልዳ፤ የይዝ አላንጋራ የሱሳ ጋራፊ፥ ማስቃላላ አፋ ሱጾደ ጋር አꬂ እንግዳ።
ዎታዳሩንꬅ የሱሳ ለቂዳ
(ማቶ. 27:27-31፤ ዋሐ. 19:2-3)
16 ይንፓ ማቂ፥ ዎታዳሩንꬅ የሱሳ ኤኪ ፕራቶርያ ጋዘ ፖሊስ ጻባ ካንግ፥ መለ ዎታዳሩንꬃና ኡባ ፈትላ ጼግዳ። 17 ማህ ዞቆ አፉላ ኤዛ ማይዝዳ፤ አንጋꬅ ዛዉደ ጊግዚ፥ ኤ ኦምተ ጋድዳ። 18 ይንፓ ማቂ፥ ኤጎ፥ «አይሁዱንꬅ ካትዛዮ ሳሮ» ያጋእ፥ ኩሸ ደንꬅዳ። 19 ኤ ኦምተ ጉፈራ ጉድዳ፤ ማህ ኤላ ጩትዳ፤ ቡንቁንቲ ኤስ ጎይንዳ። 20 ኤዛ ቶችዳንፓ ማቂ ዞቆ አፉላ ኤፓ ቃሪ ኤኪ፥ ኤ አፉልቶ ኤዛ ማእሲ ማስቃላላ አፋ ኤዛ ሱጾደስ ኤኪ ካንግዳ።
የሱሳ ሱጽዳ
(ማቶ. 27:32-44፤ ሉቃ. 23:26-43፤ ዋሐ. 19:17-27)
21 ኡን Ꮉንግተራ፥ እስክንድረነን ሩፎሳ አዳይ፥ ስሞና ጋዘ ቀሬና ሳአ አስ፥ ጋጻረፓ ካታማ የእዘራ የልንት፥ የሱሳ ማስቃላ ዎልቃራ ቶስዳ። ሮመ 16:13 22 የይዝ ጎልጎታ ጋዘ በሳ የሱሳ ካንግዳ። «ጎልጎታ» ጋዛና «ኦማ ኦታ» ጋኤ። 23 Ꮉርጋመ ፋና ካርበ ጋዘ ጋላ ዎርቂንትደ ዎይነ ኡዦ ጋእ ኤስ እንግዳ። የዝን ኤ ኡዣንጽ እጽዳ። 24 ኡንቲ ማስቃላላ አፋ ኤዛ ሱጽዳ። ኦና አኮ የሎድየዛኮን ጋእ ኤ አፉልቶ ሻጊ እጻ ኦልዳ።
25 ኡን ማስቃላላ አፋ ኤዛ ሱጽዘ ዎደ ዎንታፓ Ꮉይꬕ ሳተ። 26 ኡን፥ «አይሁዱንꬅ ካት» ያጋእ ኤዛ ሞትዘ ጹፈ ጻፊ ጋድዳ። 27 የሱሳራ ላምእ ፋኑንꬃና ፈታ ኤፓ ምዛቅ ዛላራ Ꮉንካያ ኤፓ ዎርክታ ዛላራ ማስቃላላ አፋ ሱጽዳ። 28 ጌሽ ማጻፍተ፥ «ኢታ ባዝ ኦችደ አሱንꬃራ ኤ ፋይድንትዳ» ጋእንትዳና ፎልንትዳ። ኢሳ. 53:12
29 ኦገራ አꬍዘ አሱንꬅ የሱሳ ለቂ፥ ፋ ኦምቶ ኤንእዝ ጫዥዳ፤ «ዛንባይ! ጾዘ ኬꬅቶ ላሊ Ꮉይꬕ ቃማ ግዳ ኬጽዛዮ፥ ነ ኦምቶ አሾ፤ ማዝ. 22:7፤ 109:25፤ ማር. 14:58፤ ዋሐ. 2:19 30 አነ ማስቃልዘፓ ዎꬊ ነና አሾ» ያጋይዳ።
31 ይኒ ጋራ፥ ካህኑንꬅ Ꮉላቁንꬅ ህገ ታማርስዙንꬃራ ፈትላ የሱሳ ለቂ፥ «መሉንꬃና አሽዳ፥ የዝን ፋና አሾደስ ዳንዳኦስ፤ 32 ኑኒ ብእ አማኖደ ጋር ክርስቶሳ፥ እስራኤለ ካት፥ አነ ማስቃላፓ Ꮉተ ዎꬎ» ያጋይዳ። ማህ መለ አቶ የዝን፥ ኤራ ማስቃላላ አፋ ሱጹንትዱንꬃፓ ኤዛ ለቂዳ።
የሱሳ Ꮉይቂዳ
(ማቶ. 27:45-56፤ ሉቃ. 23:44-49፤ ዋሐ. 19:28-30)
33 እዝፑን ሳተፓ ደንꬂ፥ ኡዱፉን ሳተ የሎደስ ሳእታ ኡባ ꬉምዳ። 34 ኡዱፉን ሳተ የሱሳ ፋ ቃልቶ ꬎቅ ዪዚ፥ «ኤሎሄ፥ ኤሎሄ፥ ላማ ሳባቅታን?» ያጋይዳ። ይኒ ብልꬅታ፥ «ታ ጾዛዮ፥ ታ ጾዛዮ፥ ታና አኮስ አሽዶ?» ጋኤ። ማዝ. 22:1
35 እዘ ኤቅደ አሳፓ ፈተ ፈተ ይኖ ስእ፥ «ይኬ፥ ኤልያሳ ጼጋነ» ያጋይዳ። 36 የንꬅ አሱንꬃፓ ፈተ ዎጺ፥ ጉርባ ፉዛራ ጫላ ዎይነ ባዢ፤ ጉፈ በርꬃላ ጋዲ፥ «ናጎተ፤ ኤልያሳ ማስቃላፓ ኤዛ ኬꬆደስ የኦድየዛኮ አነ ቦኦዳ» ያጋእ የሱሳ ዶናጎ ኡሾደስ ሺሽዳ። ማዝ. 69:21
37 የሱሳ ፋ ቃልቶ ꬎቅ ዪዚ ዉይሲ፥ Ꮉይቂዳ።
38 ጾዘ ኬꬃ ሱጹንትደ ማጋራጅታ ዎካፓ ሱለ ጋጻ የሎደስ፥ ላምእ ኬዚ ፌꬍንቲ ዎꬍዳ።ከዘ 26:31 39 ማስቃልዘፓ ቲኖ ዛላራ እዘ ኤቅደ ፈቲ ማቶ Ꮉላቅዘ፥ የሱሳ ዋይዝ Ꮉይቀዛኮ ብእደ ዎደ «Ꮉይ አꬄ ቱሮ ጾዘ ናአ» ያጋይዳ።
40 ይኖ Ꮉኮራ ኤቂ በእዘ ኤራꬅ ማቹንꬅ የነ። ኡን ግዳ ማግደላ ማይራማ፥ ጌዘ ያይቆባን ዮሳ እንታ ማይራምራን ሳሎማ የነ። 41 የንꬅ ማቹንꬅ የሱሳ ጋልላ የዘ ዎደ ኤዛ ካልዱንꬃናን ኤዛ ሞክዱንꬃና ማህ የሱሳራ ዎላ የሩሳላመ Ꮉንግደ መለ ጋማ ማቹንꬅ እዘ የነ። ሉቃ. 8:2-3
የሱሳ ሞግንትዳ
(ማቶ. 27:57-61፤ ሉቃ. 23:50-56፤ ዋሐ. 19:38-42)
42-43 ሳእታ ኡጉርደ ዎደ ሺቅደ አሱንꬅ ግዳ ቦንችንትደ አይሁደ ሻንጉንꬃፓ ፈተ፥ ዮሰፋ ጋዘ አꬄ፥ ጾዘ ካእቱሞ ዮኦዳኖ ናግተራ የዘ፥ አርማትያሳ ካታማ አስ የዛይ ይእዳ። ዎንትስተ ሳምባታስ ጊግንትዘ ቃማ ማቅደ ግሾ ዮሰፋ ሚንግ ጵላጦሳጎ Ꮉንግ፥ የሱሳ አህቶ ኤኮደስ ዎስዳ። 44 ጵላጦሳ የሱሳ Ꮉይቂዳኖ ስእደ ዎደ ጋማ ቆፕዳ፤ ማቶ Ꮉላቅዛ ጼጊ፥ «ኤ Ꮉይቂ ጋምእዳ?» ያጋእ ኦጭዳ። 45 ጵላጦሳ የሱሳ Ꮉይቂዳኖ ማቶ Ꮉላቅዘፓ ስእ ኤ አህቶ ዮሰፋስ እንግዳ። 46 ዮሰፋ ሞጎ አፉላ ዎንግ፤ የሱሳ አህቶ ማስቃላፓ ኬꬂ፥ አፉላራ ጻጺ፥ ሹቻፓ ዎጭንትደ ቦዛ ግዳ ኤ አህቶ ሞግዳ። ማህ ይና ቦዝት ዶንተ ዳማ ሹች ጎልእዝ ጋድዳ። 47 ማግደላ ማይራምራን ዮሳ እንታ ማይራማ የሱሳ አህቶ ኡን አባ ጋድዛኮ በእነ።