16
የሱሳ Ꮉይቆፓ ደንድዳ
(ማቶ. 28:1-8፤ ሉቃ. 24:1-12፤ ዋሐ. 20:1-10)
1 ሳምባታ አꬍዳንፓ ሱባ ማግደላ ማይራሞ፥ ያይቆባ እንታ ማይራምራን ሳሎማ Ꮉንግ፥ የሱሳ አህቶ ትሻደስ ሽቶ ዎንግዳ። 2 ዎጋ ዎደ ዎንታ ጎዳ ጻልቀ ከሳደራ፥ ቦዛ Ꮉንግዳ። 3 ኡን ፋ ግዳ ፈታይ ፈታይራ፥ «ቦዝት ዶንትፓ ኑስ ሹችቶ ኦደ ጎልእዝ Ꮉሶደ?» ያጋእ ኦህንትዳ።
4 ኡን በእዘ ዎደ የ አንድር ዳማ ሹችዘ ቡንቡሉንቲ Ꮉልእዳኖ ብእዳ። 5 የሱሳ ሞግንትደ ቦዝት ግዳ ገልዘ ዎደ ፈቲ ይꬎ ꬊራꬃይ ቦꬅ ማኦ ማእ፥ ምዛቅ ዛላራ በትዳይ ብእ ታንዳ።
6 የዝን ኤ ኡንታጎ፥ «ታንፐተ፤ ማስቃላላ አፋ ሱጹንትደ፥ ናዝረተ የሱሳ ይን ኮይዛኖ ታኒ ኤራነ። ኤ Ꮉነ ባያ፥ Ꮉይቆፓ ደንድዳ። ኡን ኤዛ ሞግደ በስቶ Ꮉኖ ቦኦተ። 7 Ꮉተ Ꮉንግ የሱሳ ታማሩንꬅስን ጴጥሮሳስ፥ ‹የሱሳ ይንታፓ ቲንꬊ ጋልላ አꬍዳ። ኤ ይንትስ ኦህዳን ፋና ይን ኤዛ የይጋ በአዳ› ጋእ ኦሆተ» ያጋይዳ። ማቶ. 26:32፤ ማር. 14:28
8 ማቹንꬅ ዣሽሞራ ጎቂ ቦዝትፓ ኬዚ አችንትዳ። ማህ ኡን ዣሽትዘ ግሾ ይኖ ኦደስን አኮን ኦህካያ። *ፈቲ ፈቲ ዛጋ ማጻፉንꬅ ማርቆሳ ዎንገለ ፋይዶ 8 ላ አፋ ኤሳነ። ማህ ፈቲ ፈቲ ማጻፉንꬅ ፋይዶ 9-20 የሎደስ የዘ ቆፍቶ ጉጆስ። ማቅኮን መሉንꬅ፥ ፋይዶ 8 ካሊ የዛኖ ጉጃነ። ይናን [ማቹንꬅ Ꮉንግ፥ ኪታንቾ ኦህዳኖ ኡባ ጴጥሮሳን ኤራ የዙንꬅስ Ꮉታራ ኦህዳ። ይንፓ ሱባ፥ የሱሳ ፋ ታማሩንꬃና ጌሽን መዽና አቶትꬅ ዎንገለ ኪቶ አዋ ከሳፓ አዋ ገሎ የሎደስ ኪትዳ]
የሱሳ ማግደላ ማይራምስ በንትዳ
(ማቶ. 28:9-10፤ ዋሐ. 20:11-18)
9 የሱሳ Ꮉይቆፓ ደንድዳንፓ ማቂ ዎጋ ዎደ ዎንታ፥ ላፑን ቱና አያኑንꬃና ኬስደ ማግደላ ማይራምስ ቲንꬊ በንትዳ። 10 እዛ Ꮉንግ ኤራ ቲኖ የዙንꬅስ፥ ኡን አዛንተራን ዬክተራ የዝን ኦህዳ። 11 የዝን የሱሳ ፋጻ የዛኖን ኢስ በንትዳኖ ኡን ስእደ ዎደ እዛ ጋዛኖ አማንካያ።
የሱሳ ላምእ ፋ ታማሩንꬅስ በንትዳ
(ሉቃ. 24:13-35)
12 ይንፓ ሱባ፥ ኡንታፓ ላምኡንꬅ ካታማፓ ኬዚ Ꮉማደራ፥ ኦገላ አፋ የሱሳ ቲኖፓ ዱሙꬊ ኡንትስ በንትዳ። 13 ኡን ሱብ ማቂ፥ መሉንꬅስ ኦህዳፕ፥ አትን መሉንꬅን ኡን ኦህቶ ቱሮ ጋይካያ።
የሱሳ ታጶ ፈቲ ፋ ታማሩንꬅስ በንትዳ
(ማቶ. 28:16-20፤ ሉቃ. 24:36-49፤ ዋሐ. 20:19-23፤ ሐዋ. 1:6-8)
14 ሱባፓ ታጶ ፈቲ ኤ ታማሩንꬅ ካꬃ ማአደራ፥ የሱሳ ኡንትስ በንትዳ። ኡንትስ አማኖ ባይዘ ግሾን Ꮉይቆፓ ኤ ደንድዳኖ ብእደ አሱንꬅ ኦህን ኡን አማናንጺ እጽደ ግሾ ኤ ኡንታና ቦርዳ።
15 ኤ ኡንታጎ፥ «ሳአ ኡባ ቅቲ አስ ኡቡንꬅስ ዎንገለ ኦሆተ። ሐዋ. 1:8 16 አማንዳይን ጻማቅንትዳይ አቶዳ፥ የዝን አማኖሰ ፍርድንቶዳ። 17 አማንዙንꬅስ Ꮉና ማልታ እንግንቶዳ። ኡን ታ ሱንꬅተ ቱና አያና ከሶዳ፥ ክለ ዶናራ ኦህንቶዳ። 18 ኡን ሾሽ አይክኮን ዎይ ዎꬍዘባዝ ኡዥኮን ኡንታና ቆሀማ። ማህ ኡን ፋ ኩሽቶ Ꮉርግንትዙንꬃላ አፋ ጋዲ ኡንታና ፋꬆዳ» ያጋይዳ።
የሱሳ ኡደ ሳሎ ከዝዳ
(ሉቃ. 24:50-53፤ ሐዋ. 1:9-11)
19 ላꬂ የሱሳ ታማሩንꬃራ ኦህንትዳንፓ ሱባ ኡደ ሳሎ ከዝዳ፤ ጾዘፓ ምዛቅ ዛላራ በትዳ። ሐዋ. 1:9 20 ኤ ታማሩንꬅ ቅትደ በሳ ኡባ ቃላ ኦህዳ። ላꬅን ኡንታራ ዎላ ኦቻነ። ኡንቲ ኦህዘ ቃልታ ቱሮ ማቅዳኖ ጾዚ ኡንትስ እንግደ ማልተ ሚንꬃነ።