3
Ahi rie lati keke Iesu vi hetetamen imok mulin avu Mosis telamu
1 Tuak ka ahinkuli keil, Ahi koa mul en out nesa vise ir keke rovapil vituai rovahi meatin votut keil onen. Tahos keke mihendem usil Iesu Kristo, koa Ahi sila suval eiloheh onen min ir, ka koa mum suval asuv houlu onen pris keil en usite ten demkatien orer en meten Ahi. ✡Hib 4:14; 6:20; 7:26; 8:1; 9:11 2 Ka Iesu mum vasin tounah koa Ahi rie lati keke voumoni. Kei mum suval Mosis etin, koa “mum revi tounah vasi ten eim onen Ahi,” Namba 12:7 koa aneite ten eim vi meatin keil onen. 3 Ka meatin koa muti eim, asan houhouen mini mulin houhouen koa arie lati min eim sasen enges. En vati sise enek, mal keke asan houhouen min Iesu mulin Mosis. 4 Anatin keke eim vasi keil, meatin tai mumoni. Ka Ahi, kei varei mumon tounah vasi keil. 5 Mosis, kei mumon tounah vasi tahos musil asa koa Ahi mundemi suval more meatin toumien tai en eim onen Ahi. Ka kei vit usil tounah keil koa ihit usili en avong veite veah. 6 Kristo emun mumon tounah vasi tahos musil asa koa Ahi mundemi. Ka kei mum suval Natnali koa vi houlu en eim onen Ahi. Ka ir varei, rovi eim onen enek munak rormetautei, ka rendemien orer keih en tounah koa roling desien orer eni. ✡Kol 1:23; Hib 3:14
Selkatien keke ronaseseintei ren Ahi ka asa en vati voumoni en moulien orer
7 Tahos rehelong selkatien onen Ninin Votut navong viteni vit,
“Kosa, munak milong ren Ahi,
8 minalong seseintei nasuval avu onami keil telamu amumoni navong aviles eisile rani.
Ka suval amumoni en out volvol keke avasak visi.✡Eks 17:7; Nam 20:2-5
9 Ahi selus usil keil vit,
‘En out enek, avu keil onami avit avasak vis inau avalesi keke naro ral min keil vuo narrotei,
avaseini keil ales tounah vasi koa namumoni en mete sua hanumau elu (40) tuai.
10 Sakini, tinok kat koakeil vasi ten avong enek.
Lises, keil amumon vatie keih kat inau,
ka e rovattei availea sise keil koa ek vati malamun keil eni.
11 Sakini, navuroh kat keil ka navit kati keke
12 Tuak ka ahinkuli keil, mihelei kati keke tetai en kami nakurtei rendemien tatisa tai koa nasakin demkatien onami namot ka minahilestei ran Ahi koa moul. 13 Sakini, navong vi ‘kosa’ koa ahho teni mul, tetai en kami hesel kat kami sav en avong vasi keke minamaentei rendemien keil ten tisaen analuvos kami ka anasakin vatumi namai nakeih. 14 Veni munak rehelomal hekeih en demkatien orer heha hetokol keite ten moulien orer, rorie lati keke rokapil vituai ral min Kristo. ✡Hib 3:6 15 Koanik suval asa koa Tus Votut viteni vit,
“Kosa, munak milong ren Ahi,
minalong seseintei nasuval avu onami keil telamu amumoni navong aviles eisile rani.” Sam keil 95:7✡Hib 3:7-8
16 ?Vi isei keil varei koa along ren Ahi ka aviles eisile rani? Vi koakeil vasi amul en hen Mosis koa Ahi lah lat keil amemea ran out Isip. ✡Nam 14:1-35 17 ?Ka Ahi tin kat isei keil sua hanumau elu (40)? Tin kat meatin keil koa amumon tisaen, koa umot retai ka umatmat en out volvol. ✡Nam 14:29; 1Kor 10:10 18 ?Ka Ahi vat kati min isei keil keke irkurtei sehien koa kilea vasani min keil? Vat kati min koakeil along sesein ren. ✡Nam 14:22-23; Sam 95:11; Hib 3:11 19 Sakini, rolesi keke keil asakras avaha en atan enek veni e rovattei avaling demkatien one eni.