1 Navong Iesu visein meatin keil evus, kei mita netan ran hou enek, ka mari vangi meatin keil amusili. 2 Evus, amutimanin, meatin tai koa mesaien ten leprosi mul ien mai luhu en keil, retengeiril en meten Iesu, ka viteni mini vit, “Asuv, munak keik em vati li, kokilea kovasak revi hilivek vamai vato eris.”

3 Sakini, Iesu mutelan hen rokoli ka viteni mini vit, “Tahos, ek vat moumoni. !Kito ris!” Hatte tas, meatin enek, mesaien onen evus ka hiliven mai mutolas. 4 Evus, Iesu viteni mini vit, “!Kitaengonau! Konahitentei min meatin etai asa koa kur out.✡Mat 9:30; 12:16; Mak 7:36 Kihas ka kihothot enuk min pris tai en Eim Votut, ka kisan min Ahi sanien koa Mosis meng kati.✡Lev 14:1-32; Luk 17:14 Tounah enek vatie lati min keil keke avem tahos tuai ka komuto eris.”

5 Iesu mual va en taon ten out Kapaniam. Ka navong kistal ien, avat tavaeen tai ten out Rom mai veni ka visi vakatauni✡Sion 4:46-47 vit, 6 “Asuv, eiloheh onak mules teim ka longe tisa houlu, usi aven mat ka ro nges en vulin.”

7 Iesu viteni mini vit, “Niha veni ka nisak revi.”

8 Ka avat enek vit kesi vit, “O asuv, konandemvu ramattei venau veni narvinvintei keke kovaha teim onak. Ka munak kihitenis, nakilea keke eiloheh onak helonge hetahos eris. 9 Veni masta onak mul, ka inau mun navi avat onen meatin tavaeen keil. Sakini, navong naviteni min tai en keil navit, ‘Ha.’ Kei va. Ka navong navit, ‘Amai.’ Kei mai. Ka navong naviteni min eiloheh onak navit, ‘Umon koanik.’ Kei mumoni.”

10 Navong Iesu raengon selusien onen, kei mutimanin ka viteni min koakeil amul amusili vit, “Anatin eli naviteni min kami, en me-Isrel keil, narvotintei veah etai meatin koa demkatien onen keih imok vasuval meatin ekek.✡Mat 15:28 11 Navong Kristo onen Ahi hemai ka umon mari anien en out koa Ahi vi asuv houlu eni, meatin keil koa arvitei Siu ika en out sav keil en out netan ka imai ianian vituai hetal min Ebraham, Aesak ka Siekob, vati avu keil orer telamu.✡Luk 13:28-29 12 Ka houlu en me-Isrel keil kati koa Ahi vit vahi Asuv Houlu one, heso lat keil iha hae en out koa mankoli, ka keil il is ka il ihal lohe ven mahien one.”✡Mat 13:42,50; 22:13; 24:51; 25:30; Luk 13:28

13 Evus, Iesu viles ka viteni min avat enek vit, “Kiha. Asa koa komundesini kovit hekur out,✡Mat 9:29; 15:28; Sion 4:50-51 hekistal hehi anatin keke eiloheh onom helonge hetahos.” Ka en hati avong enek varei, eiloheh onen avat enek, aven mai ris tahos.

14 Navong Iesu va rokol teim sen Pita, va neim ka les avu tisa onen Pita✡1Kor 9:5 mul matil en vulin ka aven mutin. 15 Navong lesi mukok, Iesu mutelan hen ka rokol hen tovuli enek. Ka navong rokoli, mesaien va rani ka kei mea. Evus, tovuli enek kur hati anien tai, ka sani min Iesu.

16 Navong meteiai munu, meatin keil alah koakeil ninin tisa mul en keil, ka Iesu vile lat ninin tisa keil avaha ran keil ral min selusien enges onen. Ka meatin vasi keil amesai, kei sak revi keil. 17 Kei mumon tounah enek vasakin asa koa Ahi viteni ka en provet Aesea hemai hehi anatin koa vit,

18 Ka navong Iesu lesi keke marmari vangi meatin keil amules rahiti, kei meng kat meatin keil onen keke avasak mesein vot tai keke avaha en usi Mari Oai ten out Kaleli. 19 Ka navong Iesu ka onen keil amul uva, tiser tai ten mengkatien onen Mosis mai veni ka viteni vit, “Tiser, out kave kiha ien, inau nusil katuk.”

20 Ka Iesu vit kesi mini vit, “Asu keil,*Selusien kati teni vit, “fokis” koa asuval huli rendan keil koa amumon out tamatilien one en atan suval asu keil amumoni. vai ome mul, ka aman keil, anu ome mul. Ka Natin Meatin, teim kati onen tovuol tamatil ien.”✡2Kor 8:9

21 Ka meatin tamun koa mul musil Iesu vit, “Asuv, ek vati mousiluk. Ka helamu, kimaen nau niha ris teim ka nilei kat tata onak hetokol avong koa hemat ka nitahini.”

22 Ka Iesu viteni mini vit, “Kusil kat nau kosa,✡Mat 9:9; Sion 1:43; 21:19 ka kilokovein koakeil umat en demkatien one keke itahin koakeil one umat.”

23 Navong Iesu selus evus, kei vut va en vot ka meatin keil onen amusil kati keke uva en usi oai. 24 Ka navong amulis uva, Iesu matil usae. Ka rovitei tuetin, amutimanin en mari angu tai koa mea ka muhuh keih. Kei sakin oai langlango, mul rasil va neim en vot, ka vesesal avamarindu. Ka Iesu, kei matil ravobong. 25 Ka keil uva veni ka asisil eni avit, “!Asuv, kataun komai li! !Rovamat enga ke!”

26 Iesu vit kesi vit, “?Mimetau vensa? !Demkatien onami havivi ramat!”✡Mat 14:31 Evus, kei mea ka meng kat eang ka oai luvahati keilu, ka out mai mutaeng ka vi tasioh.

27 Navong meatin keil onen alesi mukok, amutimanin ka avis keil eris avit, “?Meatin ekek vi vati meatin sa? !Avaseini eang ka oai, keilu mun lulong kat ren!”

28 Navong arokol usi oai, Iesu emai en atan ten out Kadara. Ka hatte tas, meatin elu luka en out ten valengeihat keil koa amul arahin meatin keil ien, ka lumai vesesal ven Iesu. Meatin keilu enek, ninin tisa mul en keilu ka asakin keilu lumuas meatin vasi keil koa lulesi umai vesesal en out enek. 29 Navong lumai vesesal ven Iesu, luvisohiso keih luvit, “!Natin Ahi! ?Kovoumon sa vatal komai? ?Kumai ekok keke kovasan mahien min komai kosa?✡Mak 1:24; Luk 4:34 ?Kirtosintei avong kati teni koa hemai veah?”

30 Rovitei soutin, tali vuas otetai koa marite amul akanian. 31 Sakini ninin tisa keil apeah Iesu avit, “Munak keik kihile lat komai, kisila lat komai meheha en vuas keil ke va ekek.”

32  Sakini Iesu viteni min keil vit, “!Alva!” Ka keil uva ka uva neim en vuas keil. Ka hatte tas, tali vuas keil vasi enek amuloh avita en veisil, ka uva avamarindu en Mari Oai ten out Kaleli, ka keil vasi umatmat. 33 Ka meatin keil koa alei kat vuas keil enek ametau ka amuloh uva en taon. Ekonek, keil avit vasi tunien teni ka aviteni mun usil asa koa kur out en meatin keilu koa ninin tisa keil amul en keilu. 34 Sakini, meatin vasi keil ten taon enek uva keke avales Iesu. Ka navong keil alesi, apeah Iesu keke heha ran atan one.