4
Iesu viten tatavolien usil utite keil koa amoul en atan tateisav keil Mat 13:1-23; Luk 8:4-15
En avong sav tai, Iesu mul visein meatin onen keil en vali Mari Oai ten out Kaleli. Meatin keil houlu aso ruai rahiti, ka keil avi houlu vis avi houlu mok. Sakini, Iesu vut va en vot ka ario lati vita en oai, ka meatin keil aro enges ut. Mak 3:7-9; Luk 5:1-3
Evus, Iesu ra usil tatavolien houlu keke vahisein meatin keil. Viteni vit, Mat 13:34; Mak 4:33-34 “!Mihelong revi! En avong tai, meatin tai va nah vativin utite keil. Navong va rivini, vahis umotmot en sise ka aman keil umai akan vasi. Ka vahis umotmot en atan koa vilah, atan romaritetei. Ka keil aviteh kalah ven atan mahinhin enges. Ka navong meteiai keih, amaleles ka umatmat ven lite keil arretalitei vatahos. Sakini, rovitei tuetin, amukou varei. Vahis emun umotmot va en out koa oumunai tatisa mul ien ka amusar koe. Sakini, armoultei vatahos ka arsontei heite. Ka havivi en utite keil enek umot en atan tetahos, ka amoul, ason heite: keil koa ason heite houlu neli, ka keil koa mun araleha, ka teisav en keil araleh vini keil en heite.”* Selusien kati teni vit, “… utite keil enek ason heite koa avi 30, 60 ka 100.”
Tatavolien vus, Iesu selus vit, “Munak ralingom mul, kitaengon asa namul naviteni.” Mat 11:15; 13:43; Mak 4:23; Luk 14:35; Rev 2:7,11,17,29; 3:6,13,22
10 Navong Iesu ro sasen, teindan elu (12) onen ral min meatin sav keil uva avis aneite ten tatavolien enek. Mat 15:15; Mak 7:17 11 Sakini, kei vit, “Ahi mul vothot en rendemien suai usil hiasuvien onen min kami enges. Ka meatin sav keil koa Ahi rovitei asuv houlu one, keil araengon selusien onen Ahi ka en tatavolien keil enges koa arlong kileatei. 12 Ahi vit usil keil vit,
‘Keil ilonge heha vio … ka irlong kileatei.
Ilele heha vio … ka irlei kileatei.
Veni munak armumontei vamukonek,
keil ihiles moulien one ka inau nilele hetahos eris en keil.’ ” Aesea 6:9-10 Sion 12:40; Umen 28:26-27
13 Ka Iesu viteni min keil, “?Mirlong kileatei tatavolien koanik? ?Hemukave miheilea tateisav esuk? 14 En tatavolien enek, utite keil koa meatin ten ah mul revin keil vi selusien onen Ahi. 15 Meatin keil koa asuval sise koa utite keil umot amul ien. Navong araengon selusien, hatte tas Temat mai ka kulati ran keil. 16 Keil koa asuval atan koa vilah. Navong araengon selusien onen Ahi, akuri mul en keil ka asi keil veni. 17 Ka veni lite keil ten demkatien one arretalitei vatahos, keil amulomal en demkatien one ten avong havivis. Ka navong sakvisien mai ven selusien enek, umot en demkatien one. Mat 26:31; Mak 14:27 18 Meatin keil koa asuval atan koa oumunai tatisa mul ien. Araengon selusien onen Ahi, 19 ka amundemko usil tounah keil ten out netan ka envatien one mul en mani mulin selusien onen Ahi. Hesakini, selusien enek hersontei heite en moulien one. Mat 19:23-24; Mak 10:23-24; Luk 12:15-21; 18:24-25 20 Ka meatin keil koa mun asuval atan koa tetahos. Navong araengon selusien onen Ahi, akur kati mul en keil, ka selusien enek son heite houlu en moulien one. En moulien onen meatin keil koa heson heite houlu, en koa mun hetaleha, ka en teisav en keil hetaleh vini en heite.” Selusien kati teni vit, “… utite keil enek ason heite koa avi 30, 60 ka 100.”
Iesu viten tatavolien usil laet ten anatinien onen Ahi koa mul ritin en moulien onen meatin keil onen Luk 8:16-18
21 Iesu viten tatavolien tamun vit, “Meatin tovuol koa vanit laet onen, evus, ling suaini en pesin tai, vuo ling suaini en hehen avet tamatilien onen. !Vuo! Meatin keil arekein laet one nesa keke koakeil umai neim akilea avalei kilea titinien teni. Mat 5:15; Luk 11:33 22 Anatinien koa mul suai, Ahi hekuri hemai en mesai. Ka selusien koa avit suai eni mulamu, ihitehiteni en meten meatin keil keke availea eni. Mat 10:26; Luk 12:2 23 !Munak ralingomi mul, mihetaengon revi asa koa namul naviteni!” Mat 11:15; 13:43; Mak 4:9; Luk 14:35; Rev 2:7,11,17,29; 3:6,13,22
24 Ka Iesu viteni mun min keil vit, “Mihetaengon revi asa koa naviteni min kami. Veni Ahi hesan ileilien teni min kami housil longkatien onami. Sakini, munak mihelong kati, hesan ileilien hemarite mok min kami. Mat 7:2; Luk 6:38 25 Meatin koa kilea revi selusien onak, Ahi houmoni heilea revi mok, ka meatin koa rokilea revitei aneite teni, havivi koa mundemi vit kilea eni tuai, Ahi hekulati rani.” Mat 13:12; 25:29; Luk 19:26
Iesu viten tatavolien usil utiai keil koa amoul
26 Ka evus, Iesu viten risi vit, “Hiasuvien onen Ahi suval avong tai, meatin tai va revin utite keil en ah sen. 27 En vongien, kei matil ka en meneai, mules mual vasi out. Ka mukos, utite keil enek amules aviteh, alekat sise one avamoul, ka meatin enek rokileatei keke amoul mukave. Tiem 5:7 28 Atan enges, kei sasen mumon utite keil amoul. Anatin, keil avitehiteh, amumon vatte, ka ason heite. 29 Ka navong heite emen, meatin ten ah va musuhuti ka lahi va ris teim.” Soel 3:13; Rev 14:15
Iesu viten tatavolien usil mukave hiasuvien onen Ahi suval uti avek tai Selusien kati teni vit, “uti mastard.” Mat 13:31-32,34; Luk 13:18-19
30 Ka Iesu vit risi vit, “?Hiasuvien onen Ahi suval asa? ?Nihit kilea eni heka en tatavolien sa? 31 Kei suval uti avek koa mot vita en vatiai tai. Kei havivi mok en utiai vasi keil. Mat 17:20; Luk 17:6 32 Ka navong moul mai mariso, mulin ai sav keil. Son angoite keil amariso ka atahos, ka aman keil umai amumon anu ome keil en nimal teni.” Esek 17:23; 31:6; Dan 4:12,21
33 Ka Iesu viten selusien onen Ahi en tatavolien keil enek, mal en asa keil availea avakuri. 34 Selus min keil en tatavolien enges. Ka navong kei ro ral min teindan elu (12) onen, kei vit lat aneite teni min keil.
Iesu meng kat eang keilu oai keke luvahati keilu, ka lulong kat ren Mat 8:23-27; Luk 8:22-25
35 En mendilah enek, Iesu viteni min meatin keil onen vit, “Rovaha en usi oai.” 36 Sakini, keil aling meatin sav keil amules, uvut uva en vot koa Iesu mul rondan ien, ka amu koteh oai ten out Kaleli uva. Ka meatin sav keil emun amusil Iesu en vot savsav keil one. 37-38 Ka navong amul uva, Iesu mul matil usae en oulung tai en valengei vot. Rovitei tuetin, amutimanin, eang takeih tai muhuh keih. Sakini, oai langlango ka mul rasil va neim en vot, vesesal keil avamarindu. Navong meatin keil onen ales asa koa mul kur out, ametau houlu ka uva asilasil en Iesu avit, “!Tiser, rovamat ke! ?Keik kormundemtei usil moulien orer?”
39 Ka Iesu mea ka selus keih min eang ka oai vit, “!Luhat kamil!” Hatte tas, lumuseh ka out vi tasioh. 40 Evus, viteni min meatin onen keil, “?Vensa mimetau? ?Demkatien onami tovuol veah?”
41 Ka keil amutimanin ka ametau houlu. Amul aviteni min keil eris avit, “?Isei keinek? Mukos eang ka oai, keilu mun lulong ren.”

^ Mat 13:1-23; Luk 8:4-15

4:1: Mak 3:7-9; Luk 5:1-3

4:2: Mat 13:34; Mak 4:33-34

*4:8: Selusien kati teni vit, “… utite keil enek ason heite koa avi 30, 60 ka 100.”

4:9: Mat 11:15; 13:43; Mak 4:23; Luk 14:35; Rev 2:7,11,17,29; 3:6,13,22

4:10: Mat 15:15; Mak 7:17

4:12: Sion 12:40; Umen 28:26-27

4:17: Mat 26:31; Mak 14:27

4:19: Mat 19:23-24; Mak 10:23-24; Luk 12:15-21; 18:24-25

4:20: Selusien kati teni vit, “… utite keil enek ason heite koa avi 30, 60 ka 100.”

4:20: Luk 8:16-18

4:21: Mat 5:15; Luk 11:33

4:22: Mat 10:26; Luk 12:2

4:23: Mat 11:15; 13:43; Mak 4:9; Luk 14:35; Rev 2:7,11,17,29; 3:6,13,22

4:24: Mat 7:2; Luk 6:38

4:25: Mat 13:12; 25:29; Luk 19:26

4:27: Tiem 5:7

4:29: Soel 3:13; Rev 14:15

4:29: Selusien kati teni vit, “uti mastard.”

4:29: Mat 13:31-32,34; Luk 13:18-19

4:31: Mat 17:20; Luk 17:6

4:32: Esek 17:23; 31:6; Dan 4:12,21

4:34: Mat 8:23-27; Luk 8:22-25