12
Pê Pawrô Pahpãm Carõ Pejti to me cumã hahkre
1 Corinti 12.1-31
Roman 12.6-8; 1 Petrô 4.10-11; 1 Jowãw 4.1-2
Ỹhỹ Jeju kam me ikjêjê, imã me apê Pahpãm Carõ Pejti te me amã ampo jõr xà ata jahkre kêatre na me ato prãm nare. Na wa ha ita caxuw me amã to hahkre, ne ihcunea na ihkôt me amã harẽ. Xà cormã mam me apê Pahpãm jahkre kêatre ata to mã, ca ame amji japackre? Por pê pahpãm cahàc krekà tĩr nare, kam ampo hamreare ata to meamji mã ahêj, pê ihtỳj ajco meato ihhimpej to ipa, na pê ca ajco atỳj ihkôt me apa, ata to amji japackre.
Ne ita kam nee cute hajỹr nare. Quêt Pahpãm Carõ Pejti tĩar ata, ihtỳj me ato ihhimpej to ipa, ne taa mã ri me pamã Jeju pê me pajõPahhiti na harẽ. Cwỳrjapê quê ha jũm te harẽn to:
— Jeju ita kêanre — hajỹr na, quê ha ramã Xatanaj carõ kên ata, ihcakôc xà ata na to ihhimpej, quê ha to ihcakôc. Ne nee quê Pahpãm CarõPejti jũm ata jũm to ihhimpej to hajỹr nare. Ne quê ha jũm te Jeju jarẽn to:
— Jeju pê Pahhiti — hajỹr na, quê ha ramã Pahpãm Carõ Pejti ata toihhimpej, quê ha harkwa kôt harẽn to hane. He nee quê ampo carõ kên ata hũjarẽn xà te hajỹr na jũm to ihhimpej nare.
Pahpãm Carõ Pejti ajteare mã me pamã cute amji jahkre pej xà gõ
He Pahpãm Carõ pyxit peaj cakrô, ihtỳj me pamã ahpỹanre na ajteare mã, me pahte amji kam me pajapac xà te amji jahkre pej xà atajê jõr to ipa. Me pajõ Pahhiti pyxit peaj cakrô, cu ahpỹanre na ajteare mã, cumãme pajàpên xà pihho jàhtôa to me apê. Ne Pahpãm pyxit peaj cakrô, mã ahpỹanre na cute me pamã ajteare mã, me pahte amji kam me pajapac xà te amji jahkre pej jõr par, mãr cuahpỹanre na, ajteare mã cumã to me apê.
Ne Pahpãm te me pahcunea to impej prãmte ahpỹanre na, ajteare mã, hirãa pê me pahcunea mã Carõ Pejti te amji jahkre pej xà atajê jõr par. Pahpãm Carõ Pejti hãn ne mehkwỳ mã ahpỹanre na, me hàpên xà pihho jõr to ipa. Ne taa, mehkwỳ kwỳ mã, ihcakôc xà te amji jahkre pej krã kreti jõr to ipa. Ne taa, mehkwỳ kwỳ mã, ihcakôcxà to cute me hapackre xà jõr to ipa.
Ne taa, mehkwỳ kwỳ mã, cute amji mã me Jeju to ihhimpej xà tỳjti jõr to ipa. Ne taa, mehkwỳ kwỳ mã cute me hà catêjê caprãr xà caxuw me cumã carôt jõr to ipa.
10 Ne taa, mehkwỳ kwỳ mã, cute amjia kôt me hàpên xà pihhoti ton xà nare atajê ton xà caxuw me cumã carôt jõr to ipa. Ne taa, mehkwỳ kwỳ mã, cute me Pahpãm jarkwa tomehcakôc xà caxuw me cumã amji jahkre pej jõr to ipa. Ne taa, mehkwỳ kwỳ mã, cute me Pahpãm Carõ te amji kam hapac xà pejti me, ajteare mãjũm te amji kam hapac xà kêanre jahkre pej xà jõr to ipa. Ne taa, mehkwỳ kwỳ mã, ajteare mã cute mehcakôc xà pihho to mehcakôc xà jõr to ipa. Ne taa, mehkwỳ kwỳ mã, cute mehcakôc xà pihho tomehcakôc xà ata kôt harẽn to capô xà jõr to ipa.
11 Ne por Pahpãm Carõ pyxit peaj ata ri, ampo itajê cunea to. Ne taa, ahpỹanre na cute me cumã amji kam hapac xà jõr to prãmti atajê jõr to ipa.
Jeju na mehkwỳ pê hĩ kam cukrã xà pyràac
Roman 12.3-8; Epet 1.22-23; 4.11-16
12 Me pajĩ pyxit peaj, ne ampeaj kam, kam me pahcukrã xà jàhtô, ne me pahcukrã xà ita te amji to cuprõn, ne amji to me pajĩ pyxit peaj. Itajĩkjê na mã, me pajàhtôa cakrô me papê Jeju na mehkwỳ pê hĩ kam cukrã xà atajê pyràac. 13 Pê mam me pahkwỳ kwỳ pê Juta catêjê, ne me pahkwỳ kwỳ pê krĩxàre cahkrit, ne me pahkwỳ kwỳ pê amjia kôt amji mã mehàpên catêjê, ne me pahkwỳ kwỳ pê cama jũm mã me hàpên catêjê. Ne ahpỹanre naajpẽn caxuw ajco me papa cakrô, pê Pahpãm Carõ pyxit peaj, ne me pahto cuprõ, ne me pahto Jeju na mehkwỳ. Ne me papê Jeju jĩ pyxit peaj ata pyràac. Ne hanea ne pê Pahpãm Carõ Pejti me pahcunea mã amji gõ.
Me pahcukrã xà itajê ajpẽn pê ajteare mã cakrô, me pamã ihcunea na prãm
14 Ne me pajĩ pyxit peaj kam, ahpỹanre na me pahcukrã xà, hàpên xà caxuw, me pahkam ihcuhhê. Ne nee mã me pahkam me pahcukrã xà nõ pyxit nare. 15 Quê ihhêaj to me pajĩ par amji jarẽn to:
— Nee ipê gũhkra nare, na rinee ipê gĩ kam acukrã xà nare — hajỹr cakrô, quê ha cormã cupê me pajĩ kam me pahcukrã xà ata na. 16 Ne quê ihhêaj to me pajapac amji jarẽn to:
— Ipê gapac ne nee ipê ato nare, na rinee ipê gĩ kam acukrã xà nare — hajỹr cakrô, quê ha ihtỳj cupê pajĩ kam pahcukrã xà ata na. 17 Ne quê me pajĩ cunea pê me panto pit, jũ mã cu ha me, ne ame awpa? Nare quê me pajĩ cunea pê me pajapac pit, jũ mã cu ha me, ne me ampo pã? 18 Mẽr hõhõ, pê Pahpãm me pajĩ kam ahpỹanre na, cute me pajĩ kam me pahcukrã xà pyxwỳr prãmti ata na pê kam hũxwỳ. 19 Quê ha me pahkam pahcukrã xà nõ pyxit na mã, quê ha nee cupê me pajĩ nare. 20 Ne nee cute hajỹr nare, ne me pajĩ pyxit peaj kam, ampeaj kam me pahcukrã xà jàhtô.
21 Cwỳrjapê quê nee me panto me pajũhkra mã harkwa to:
— Imãa icaxuw akôt hamreare, nare, nee imã ana ihprãm nare — hajỹr nare. Nare, quê nee me pahkrã me pahpar mã harkwa to:
— Nee imã ana ihprãm nare — hajỹr nare. 22 Ne me pahcukrã xà kwỳ peacre cakrô, mã ihtỳj cumã ihkwỳ na ihprãm. 23 Ne nee me pahcukrã xà kwỳ kwỳ impejti nare cakrô, cu ha pahtỳj me hamãr to impeaj ne. Ne me pahcukrã xà kwỳ kwỳ to, nee jũmjêmã me papipẽ xà nare, ne to papipẽ na me pahpahàm, na cu ha ihpro ne ame to papa. 24-25 Ne me pahcukrã xà impejti kam me pahpahàm nare atajê ri, nee ihpro xà nare, cu ha pahtỳj põ pê ame to papa. Ne Pahpãm mã me pahcukrã xà atajê pyxit peaj, na quê nee apu ajpẽn japu nare, ne quêt cumã ihcunea te ajpẽn jamãr na to prãm. Cwỳrjapê ri cute me pajĩ kam me pahcukrã xà itajê cunea pyxwỳr, ne to cuprõn. Ne ihkwỳ impej nare atajê ri, Pahpãm te ihkwỳ jirôa pê to impej. 26 Ne quê ha me pahcukrã xà nõ pyxit ne hà, quê ha ihcahhur cunea ihkàj xà ata cajpẽ, ne hũ na ihpeacre ne. Ne quê ha ihnõ pyxit ne impej mã ihpỳm, quê ha ihkôt ihcahhur cunea impej mã ihpỳm, ne hũ na hakry.
Pê Pahpãm, cute mehkwỳ to impej xà caxuw mehkwỳ pyxwỳ
27 Jĩkjê na mã me papê Jeju Crixtô na mehkwỳ atajê cunea pê hĩ pyràac, ne ahpỹanre na me papê cukrã xà. 28 Pê Pahpãm ahpỹanre na cute mehkwỳ jamãr ne to impej xà caxuw, mehkwỳ to ôjtô ne me hũxwỳ.
Ne mam cati mã itajê pê ihkra pê Jeju jarkwa na memprar catêjê.
Ne ihcote na itajê pê, Pahpãm jarkwa to cute me cumã mehcakôc catêjê.
Ne ihkôt itajê pê, Jeju te amji kam hapac xà to me cumã hahkre catêjê.
Ne ihkôt itajêpê, Pahpãm carôt kôt cute amjia kôt me hàpênxà pihhoti ton xà nare atajê ton catêjê.
Ne ihkôt itajê pê, Pahpãm carôt kôt cute me hà caprãr catêjê.
Ne ihkôt itajê pê, mehkwỳtehcajpar catêjê.
Ne mehkôt itajê pê, mehkwỳ to mehhimpej catêjê.
Ne hanea ne mehkwỳ pê mehcakôc xà pihho to mehcakôc catêjê.
29 Xà ajkĩ mehcunea pê Jeju jarkwa na memprar catêjê? Hãpà! Nare mõrmõ, mehcunea pê Pahpãm jarkwa to me hapackre catêjê? Hãpà. Nare, mõrmõ, mehcunea pê Jeju te amji kam hapac xà to me cumã hahkre catêjê? Hãpà. Xà mehcunea Pahpãm carôt kôt amji kôt me hàpên xà pihhoti, ton xà nare atajê ton to me ipa? Hãpà. 30 Nare, mehcunea Pahpãm carôt kôt me hà caprãr to me ipa? Nare, xà mehcunea Pahpãm carôt kôt me harkwa pihho to mehcakôc to me ipa? Nare, xàmehcunea mehcakôc xà pihhoti atajê kôt harẽn to me capô to me ipa? Hãpà. He ahpỹanre na cute me hàpên xà ton xà pit. 31 Ne ihtỳj me amã, Pahpãm te mam cati mã me amã me gàpên xà impejti jõr atajê juwahi to prãm. Ne hàpên xà ata pê Pahpãm jarkwa pejti to cute me hapackre xà. Ne ampo itajê cunea jirôa pê cute amji kam hapac xà impej ata, wa ha cormã me amã harẽn to hane he.