2
Me pahte amji kam me pajapac xà pyxit peaj kôt, cu ha me amji kampa
Roman 15.5-6; Epet 4.1-6
Imã me acunea te cuprõn ne amji na me ahônco tu na, me ato prãm. Ca ramã Jeju Crixtô to amji mã me ahimpej, cwỳrjapê ri ampo cunea caxuw meamã me acarôt tỳj. He ramã Jeju mã me akĩn na ri cumã me acaprĩ. He ramã Pahpãm Carõ Pejti te amji mã me ato cuprõn, ne ate amji kam me gapac xà to me amã pyxit peaj. Cwỳrjapê ri me acaxwãm pê me amã ajpẽnkĩn, na ca atỳj me ajpẽn caprĩ to me apa. Pom wa ramã me apyrên ijakryti na amji cajpẽ ita na, wa ha hipêr me ana ahwỳ, ca me imã ijakryti ita to ajcamẽ. Ne imã me ate amji kam megapac xà pyxit peaj to, ate amji kam me gapac na me ato prãm. Ne mam me amã ajpẽn kĩn ita jirôa pê, quê me amã ajpẽn kĩn, ne quê meacaxwỳn cunea ajpẽn kam pyxit peaj. Ne nee ca me gàpên xà to me amji cajpuaw prãmte ame gàpên nare, ne nee amji pejti na me amji jarẽn nare, ne nee amji to me acati to me apa prãmnare. Ne quêt cama me amji mã:
— Mõrmõ ijirôa pê mehcunea cati — hane. Ne nee apyxit peaj ne ate amji kam me gapac xà ata toamji mã me ahimpej to me apa nare, ne quêt atỳj me akwỳ te amji kam hapac xà to me hanea, ne me amji mã me ahimpej to me apa.
Pê Jeju me hirôa pê cati cakrô, nee amji to cati prãm nare
Jowãw 13.12-17; Epet 1.20-23; Ipipẽn Xà 5.1-14
Ne quê ate amji kam me gapac xà pê, Jeju Crixtô te amji kam hapac xàa. Ne Jeju jarẽn xà ita ca ha me kampa, ne ihkôat me ton to me mõ.
 
6-7 Ne Jeju me Pahpãm pipẽan,
ne catia to cati cakrô,
pê nee cumã amji jarẽn to:
“Wa papipẽan rohnỳtti mã na amji to prãm” hajỹr nare.
Ne quêt cama cumã amji cuprãr tu,
ne côjkwa jicu, ne pjê wỳr wrỳ,
ne me paxũmrea na amji to,
ne cama amji to me pamã hàpên catê.
Ne nee amji to cati prãm nare,
ne quêt pjê kam Hũm jarkwa kôt apu ipa,
ita kam ahnaa pĩ kam ihtyc.
Cwỳrjapê pê Pahpãm hipêr to ajcamẽ,
ne to catia to cati,
ne mehcunea jõ Pahhiti na hãm.
10 Ne cute Jeju japrỳ to me cati prãm to,
quê ha côjkwa kam me ipa catêjê me,
pjê kam me ipa catêjê me,
pjê krac ri cute me harêt catêjê me,
Jejucuna mã mehkõn krã na me jỹ,
mehcunea kam mare mã,
ne me harẽn to hane he:
11 “Jeju Crixtô pê ri quêt mehcunea jirô pê Pahhiti cati” hane.
Ita na quê ha mehcunea Pahpãm pê Jeju Pãm peaj na me hahkre pej,
ne mehkwỳmã harẽ.
Pê Pahpãm ri me pamã me pahcarôt to ihtỳj
12-13 Pê ca atỳj, imã me ijõ ikwỳ nõ kĩnti catêjê atajê, ajco me ikampa, ne wa ha ita caxuw ite ame acahê na imõr nare cakrô, ca haatỳj ampỳa mã amji mã me ikam gapac to me prãm. Ne Pahpãm mã catyt kam me apa, ne ajpẽn na me ahônco tu na, cumã me ato prãm. Cwỳrjapêri me acaxwãm pê me ato ihhimpej, ne ate mempar prãmti na me atehcajpa, ne ate ihkôt me amji ton na me atehcajpa. Ne me gĩkjê kam me ato ihhimpej, ca me gĩkjê kam, hanea ne me kampa ne amji mã me hũpa, me gàpên xà me, me ate amji kam me gapac xà kam. Hõhõ, ca ha me hane, ne me gĩ cunea kam me apejti ne.
Cu ha catyt kam me papa, mãr quê me pahkôt hanea ne catyt kam me ipa
14 Ca ha ate amji kam me gapac xà cunea kam, nee ajpẽn mã me gàhcahhõnnare, ne nee ajpẽn krac ri me acakôc nare. 15 Ca ha ate me hajỹr na, ca ha ampo kên cunea na me gamreare ne, ne nee me ate amji kam me gapac xà tũm nare, ne quêt ihtetetti ne. Ne me apêPahpãm kra impejti cwỳrjapê ca ha me hane. Ca atỳj mehkên me, cute me amji kam hapac xà kêanre tũm, kam awcapàtkôti atajê jipôc ri ameakrĩ. Ne atỳj me cumã Pahpãm te amji kam hapac xà kôt harẽn to me akrĩ. Mãr quê hanea ne me acuxà, ate amji kam me gapac xà itajê mã me acjêj. Ca me gàpên xà ita kam, me apê ihhêj rũm côjkwa kam awcapàtkôti kam caxêre prà tetetti atajê pyràac, ne me apràti ne. 16 Wa ha me apyrên ijakryti ne, por jũ caxuw Jeju Crixtô te amji jaxàr xàjõ amcro ata kam. Ampo na? Nee mã ampo na nare. Curi quê ha mehcunea me ijahkre pej, por pê wa ramã me amã ijàpên xà tỳaj to, ata na, ne neeme apê kôt hamreare nare na. Pawrô mã hakryti ita to, me hakryti na me to prãm
17 Pê ca ramã Pahpãm mã me gàpên to catia to cati, ne kam me amji pupun xà kêanre to me amji pupu. Ne me apê gàhcukrêj crêre cakrô, caatỳj me imã ampo gõ, ate Pahpãm mã ijàpên xà ita tehcajpar prãmte. Ne ate itehcajpar prãmita pê ihhêj rũm ate Pahpãm mã me ampo jõr. Ne Pahpãm to ate amji to me ahimpej prãmte, ca ame itajê to hane. Ne ate me ampo itajê ton xà kam, ajco ampeaj kam me gakry. Wa ha hanea ne ipê meapyràac, ne itỳj amji pupun xà kêanre to amji pupun to ipa, Pahpãm jàpên xà ita cwỳrjapê. Ne quê ha ihtỳj jũ caxuw amcro nõ na me icura, wa ha ipê me apyràac ne Pahpãm mã icaprô gõ ne ty. Ne wa ha ipê meapyràac ne ampeaj kam ita pyrên ijakry to hanea, pom quê ca mam ame gakry ita na he. 18 Quê ha jũ caxuw me ito hane, wa ha ijakrya ne nõ. Ca ha me ca xwỳjê icuxà atỳj me gakrya to me gakry.
Quê ha Pawrô Timot te me hõmpun prãmte, ihtỳj me hỹrmã ihkujate
19 Quê ha ihhêaj to me pajõ Pahhiti pê Jeju mã me amã Timot kujahêc pyrentu to prãm na, wa ha me amã ihkujahêc pyrentu. Quê me apupu ne me gahkre pej, ne hacpỹ ne amji jaxà ne imã me garẽ, mãr wa me garẽn pejti impar xà kôt, ma amji mã icarôt to ihtỳj. 20 Ne Timot pê ipyràac ne pyxit peaj, ne ihtỳj me ato amji kam hapac to ipa. Ne ihtỳj me ate Jeju kôt amji to me apicamẽn na cumã me ato prãm. 21 Ne ihkĩnte mehkwỳ cunea te nee me hajỹr nare, ne cute me amji kam hapac xà topit mã me amji kam hapac to me ipa, ne nee Jeju Crixtô te amji kam hapac xà to me amji kam hapac nare. 22 Ne nee Timot te hajỹr nare, ne ihhêj rũm cupê ikraa, ne ihtỳj icahê na mehcunea mã Jeju jarẽn pejti jarẽn to ipa na, ramã mehcunea te me hahkre pej. 23 Wa ha ita ri cute ame ito amji kam hapac xà na me hahkre pejjirô pê mã, wa ha amũ me awỳr ihkujahêc pyrentu. 24 Ne wa hanea ne itỳj me awỳr ikràr. Na wa itỳj me pajõ Pahhiti pê Jeju te me awỳr itẽm na ijamãr na, amji mã to hane.
Quê ha Pawrô ma hacpỹ mã me cumã Epaprôti kujate
25 Ne pê ca me imã me pahtõ pê Epaprôti kujate, cute ite amji mã ampo na prãmti xà itajê na itehcajpar prãmte. Ne ramã cute icahê na hàpênxà ita me, ajpẽn cujtên crire nare. Na wa itỳj hacpỹmã me amã ihkujahêc prãm. 26 Ne ampeaj kam ri ramã Epaprôti mã me apupun prãamto me apupun prãm. Ne ihtỳj hà na ate me hahkre pej na amji mã me ato hane. Ne hà itana, ate amji mã me to põmã quê na, amji mã me ato hane. 27 Ne ampeaj kam pê hàa to hà, ne ajmãr ty. Pê Pahpãm mã caprĩ pê caprã, pê hacpỹa mã impej. Ne hanea ne Pahpãm mã ramã ite me to ijapac xàhti ita na icaprĩ, na wa nee hipêr kam icwỳr nare to prãm. 28 Cwỳrjapê wa itỳj hacpỹa mã me amã ihkujahêc to prãm, ate me hĩa pupun ne hacpỹ mã me amã amji kĩn prãmte. Wa ha pa xwỳjê imãamji kĩn nõti ita jũa kam ipê tẽ. 29 Na ca ha Epaprôti pê Jeju kam me pahto ihkjê ita to me gakrya kam me amji pytà. Ca ha atỳj amji mã me hũmre atajê cupa. 30 Ne cute Jeju Crixtô jàpên xà kam amji mã ihtyc cupa nare, cwỳrjapê ri ihkên mã hàr, ne ajmãr ihtyc. Ampo na? Ca ampỳa mã ipê ame apa, ne jũ wỳr ca me itehcajpa, mã me gaxà kam cute itehcajpar. Na ca ha atỳj amji mã me hũmre ata cupa, ne catia na amji mã me to hane.