Ramatua Yesus Tutui Malole Na
tuka
Mateos susura na
1
Ramatua Yesus bei-baꞌin nade nara
(Lukas 3:23-38)
1-2 Susuraꞌ ia tui laꞌe-neuꞌ Yesus Kristus, Lahenda fo riꞌ nemeꞌ uluꞌ mai Manetualain helu memaꞌ nau fee Ni mai. Ria nana, mane Daud ma baꞌi Abraham tititi-nonosin.
Mulai neme baꞌi Abraham losa mane Daud a, nana tititi-nonosiꞌ sanahulu haa. Ria bei-baꞌin nade nara siꞌ:
Abraham boki Isak,
Isak boki Yakob,
Yakob boki Yahuda no aꞌa-fadi nara,
3 Yahuda boki Peres no Sera (sira mama na, nade Tamar),
Peres boki Herson,
Herson boki Ram,
4 Ram boki Aminadab,
Aminadab boki Nahason,
Nahason boki Salmon,
5 Salmon boki Boas (ria mama na, nade Rahab),
Boas boki Obet (ria mama na, nade Rut),
Obet boki Isai,
6 Isai boki Daud.
Neme Daud losa tepoꞌ fo lahenda nusa Israel nanatuꞌu leo Babel reu, nana tititi-nonosiꞌ sanahulu haa bali, siꞌ:
Daud boki Soleman (ria mama na, riꞌ maulu na Uria sao na).
7 Soleman boki Rehabeam,
Rehabeam boki Abia,
Abia boki Asaf,
8 Asaf*Dudui dedea Yunani masososaꞌ a ma malole inaꞌ a, duiꞌ Asaf. Hapu susuraꞌ ruma bali manaduiꞌ nae, Asa. Lahenda ia sama no lahenda fo toda nai 1 Israel no Yahuda Tutui na 3:10. boki Yosafat,
Yosafat boki Yoram,
Yoram boki Usia,
9 Usia boki Yotam,
Yotam boki Ahas,
Ahas boki Heskia,
10 Heskia boki Manase,
Manase boki Amos,†Dudui dedea Yunani ruma duiꞌ Amos, ma ruma bali duiꞌ Amon.
Amos boki Yosias,
11 Yosias boki Yekonya no fadi nara tepoꞌ fo sira nanatuꞌu leo Babel reu.✡2 Maneꞌ ara 24:14-15; 2 Israel no Yahuda Tutui na 36:10; Yeremia 27:20
12 Tepoꞌ fo sira nanatuꞌu leo Babel reu losa Yesus, nana tititi-nonosiꞌ sanahulu haa bali, siꞌ:
Yekonya boki Saltiel,
Saltiel boki Serubabel,
13 Serubabel boki Abihut,
Abihut boki Elyakim,
Elyakim boki Asor,
14 Asor boki Sadok,
Sadok boki Akim,
Akim boki Eliut,
15 Eliut boki Eliasar,
Eliasar boki Matan,
Matan boki Yakob,
16 boe ma Yakob boki Yusuf.
Yusuf, sao Maria. Maria, riꞌ boki Yesus Kristus.
17 De, mulai neme Abraham losa Daud, nana tititi-nonosiꞌ sanahulu haa; neme Daud losa sira nanatuꞌu leo Babel reu tititi-nonosiꞌ sanahulu haa; ma neme Babel mai losa boki Kristus, nana tititi-nonosiꞌ sanahulu haa.
Maria boki Ramatua Yesus
(Lukas 2:1-7)
18 Maria boki Yesus a, tutui na leo iaꞌ:
Maria no Yusuf rahihii aoꞌ so. Dua si bei ta parnaa suku rabua sama leoꞌ sao touꞌ no sao inaꞌ, matetuꞌ na Maria nairu neme Manetualain Dula-dale Malalao-malalafu Na mai.✡Lukas 1:27 19 Tepoꞌ fo Yusuf nalelaꞌ nae Maria nairu leo naꞌ, boe ma ana nau namaetuꞌ noo ni. Tehuu ana ta nau tao namamaeꞌ Maria nai lahenda dodouꞌ matan, nana huu ria nanuu dale lalao-lalafuꞌ. De ana nau namaetuꞌ namanininoꞌ.
20 Ana bei afi neu-mai, hatuꞌ esa boe ma ana nala mei. Nai meis ria, ana nita Manetualain eilaꞌo-limalopen nai nusatetu-ikutemaꞌ a mai nafada ni nae, “Ae, Yusuf! O ia, mane Daud a tititi-nonosin. O dale ma bosoꞌ dodaꞌ sao Maria. Huu fo ana nairu anaꞌ ria, nana huu Manetualain Dula-dale Na kuasan. 21 Neuꞌ ko Maria boki naa ana touꞌ esa. Boe ma o muste foi Ni, nade Yesus, huu fo Ria riꞌ neuꞌ ko poꞌi-tata naa Manetualain lahenda nara reme sala-siko nara mai.”‡Nadeꞌ Yesus, sosoa na nae, “Ramatuaꞌ a poꞌi-tata naa lahenda”. ✡Lukas 1:31
22 Hihii-nanauꞌ ia neuꞌ ko dadi leoꞌ na, nana huu Manetualain nafada memaꞌ neme uluꞌ mai so. Ana parnaa pake mana nesi matan Yesaya fo duiꞌ nae,
23 “Emi nenene! Neuꞌ ko ana feto esa bei ao-tema,
tehuu nairu so.
Boe ma boki naa Ana touꞌ esa.
Ara foi Ni nade, Imanuel.”
(Nai dedea Ibrani, ‘Imanuel’ sosoa na:
Manetualain sama-sama noo ita.)✡Yesaya 7:14
24 Yusuf nala mei basa, boe ma ana foa. Ana tuka memaꞌ Manetualain nafada Na. Ana sao na Maria, 25 tehuu ta suku noꞌ ana sama leoꞌ saotou-saoinaꞌ losaꞌ Maria boki heni Anaꞌ ria. Boki Anaꞌ ria, boe ma Yusuf foi Ni nade Yesus.✡Lukas 2:21
*1:8 Dudui dedea Yunani masososaꞌ a ma malole inaꞌ a, duiꞌ Asaf. Hapu susuraꞌ ruma bali manaduiꞌ nae, Asa. Lahenda ia sama no lahenda fo toda nai 1 Israel no Yahuda Tutui na 3:10.
†1:10 Dudui dedea Yunani ruma duiꞌ Amos, ma ruma bali duiꞌ Amon.
✡1:11 2 Maneꞌ ara 24:14-15; 2 Israel no Yahuda Tutui na 36:10; Yeremia 27:20
‡1:21 Nadeꞌ Yesus, sosoa na nae, “Ramatuaꞌ a poꞌi-tata naa lahenda”.
✡1:23 Yesaya 7:14