١ أَ إِمْعِيزّنْ إِنُو، ثَا ذ ثَابْرَاثْ وِيسّْ ثْنَاينْ إِ ذ أَومْ د-ؤُرِيغْ ڒخُّو، ؤُ ذِي ثْنَاينْ ن ثبْرَاثِينْ-أَ أَرزُّوغْ أَذْ سّْفَاقغْ نّيّثْ نْومْ إِصْفَانْ أَمْ كنِّيوْ سّْعقْڒغْ، ◘3:‏1 2 بُط. 1‏:‏13. ٢ حِيمَا أَذْ ثقِّيمنْ ثتّْفكَّارمْ ذڭْ وَاوَاڒنْ نِّي ثُوغَا إِنَّانْ إِنَابِييّنْ إِقدّْسنْ زِيشْ، ؤُڒَا ذِي ثوْصيَّاثْ ن سِيذِيثْنغْ ذ أَمْسنْجمْ نّغْ، ثِينِّي غَارْنغْ د-يِيوْضنْ س رُّوسُولْ. ٣ مَانْ أَيَا إِتّْخصَّا أَذْ ثسّْنمْ ذ أَمزْوَارُو، أَقَا ذڭْ وُوسَّانْ إِنڭُّورَا أَذْ د-أَسنْ إِمسْثهْزَاينْ إِنِّي إِسْثهْزَانْ أَمْ ؤُيُورنْ غَارْ نّشْوَاثْ نْسنْ، ◘3:‏3 1 تِيم. 4‏:‏1؛ 2 تِيم. 3‏:‏1؛ يَاه. 18. ٤ أَذْ إِنِينْ: ”مَانِي إِدْجَا لْوَاعْذْ ن ثْوَاسِيثْ نّسْ؟ زڭْ وَامِي طّْصنْ ڒجْذُوذْ نّغْ، أَمُّو إِ يقِّيمْ كُوڒْشِي أَمْ ثُوغَا إِدْجَا زڭْ ؤُمزْوَارْ ڒَْامِي ثتّْوَاڭّْ دُّونشْثْ.“ ◘3:‏4 حِز. 12‏:‏22. ٥ معْلِيكْ ؤُفِينْ أَذْ تُّونْ بلِّي س وَاوَاڒْ ن أَربِّي أَقَا إِجنْوَانْ إِزْوَارنْ أَذْ إِڒِينْ، ؤُ أَقَا ڒْْبَارّْ إِڭعّذْ زڭْ وَامَانْ ؤُ س ؤُفُوسْ ن وَامَانْ س وَاوَاڒْ ن أَربِّي، ◘3:‏5 أَمز. 1‏:‏9؛ إِزهد. 24‏:‏2. ٦ أَمَانْ إِ زِي ثتّْوَاهلّكْ دُّونشْثْ ن ڒْْوقْثْ نِّي ؤُمِي د خَاسْ سّفْينْ وَامَانْ ن ڒْْحمْڒثْ ذڭْ وُوسَّانْ ن نُوحْ، ؤُشَا ثتّْوَامْحَا. ◘3:‏6 أَمز. 7‏:‏10، 21. ٧ مَاشَا إِجنْوَانْ ذ ثمُّورْثْ ن يِيضَا أَقَا تّْوَاحفْضنْ س وَاوَاڒْ نّسْ، خمّْڒنْ إِ ثْمسِّي أَڒْ أَسّْ ن لْحِيسَابْ ذ ؤُودَّارْ ن لْكُوفَّارْ. ◘3:‏7 إِزهد. 102‏:‏27؛ إِشا. 51‏:‏6؛ 2 تس. 1‏:‏8؛ عبر. 1‏:‏11؛ 2 بُط. 3‏:‏10.

٨ مَاشَا إِتّْخصَّا كنِّيوْ وَارْ ثتّتُّومْ إِشْثْ ن ڒْْحَاجّثْ، أَ إِمْعِيزّنْ، أَقَا-ت ذ ثَا: غَارْ سِيذِي إِجّْ ن وَاسّْ أَمْ أَڒفْ ن إِسڭّْوُوسَا ؤُشَا أَڒفْ ن إِسڭّْوُوسَا أَمْ يِيجّْ ن وَاسّْ. ◘3:‏8 إِزهد. 90‏:‏4. ٩ أَقَا سِيذِي وَارْ إِسّْعِيزِّي ذڭْ ؤُسُوفّغْ ن ڒْْوُوعُوذْ نّسْ أَمْ مَامّشْ ذ أَسنْ إِتّْغِيڒْ إِ شَا ن إِوْذَانْ، مَاشَا نتَّا إِڭُّورْ أَكِيذْومْ س تَّاسِيعْ ن ڒْْخَاضَارْ، مِينْزِي نتَّا وَارْ إِتّخْسْ شَا أَذْ يَاريّبْ ؤُڒَا ذ إِجّْ، مَاشَا مَاحنْذْ أَذْ ثُوبنْ مَارَّا. ◘3:‏9 حِز. 18‏:‏32؛ 33‏:‏11؛ إِشا. 30‏:‏18؛ حَاب. 2‏:‏3؛ رُوم. 2‏:‏4؛ 1 تِيم. 2‏:‏4؛ 1 بُط. 3‏:‏20؛ 2 بُط. 3‏:‏15.

١٠ مَاشَا أَسّْ ن سِيذِي أَذْ د-يَاسْ أَمْ ؤُخوَّانْ س دْجِيڒثْ. ذڭْ وَاسّْ نِّي أَذْ ودَّارنْ إِجنْوَانْ س ڒْْغفْڒثْ ؤُ ثِيمسْڒَايِينْ ثِيمزْوُورَا ن دُّونشْثْ أَذْ فسْينْثْ ذِي ثْمسِّي ؤُشَا ثَامُّورْثْ ذ ڒخْذَايمْ إِ خَاسْ إِدْجَانْ أَذْ تّْوَافنْثْ. ◘3:‏10 مت. 24‏:‏43،44؛ 1 تس. 5‏:‏2؛ أَسَا. 3‏:‏3؛ 16‏:‏15.

١١ أَمْ مَارَّا ثِيمسْڒَايِينْ-أَ أَذْ فسْينْثْ أَمُّو، مَامّشْ إِتّْشُووَّارْ أَذْ ثُويُورمْ كنِّيوْ س ثْقدَّاسْثْ ذ ثِيڭّْوُوذِي زِي أَربِّي، ١٢ أَمْ ثتّْرَاجَامْ ثَاوَاسِيثْ ن وَاسّْ ن أَربِّي، أَمْ ثتّْمژْرمْ ذَايسْ، خْمِي غَا فْنَانْ إِجنْوَانْ أَمْ تّْوَاقدْجْبنْ س ثْمسِّي ؤُشَا أَذْ فسْينْثْ ثِيمسْڒَايِينْ ثِيمزْوُورَا ن دُّونشْثْ س ڒْْعابُوقْ نّسْ. ◘3:‏12 إِزهد. 50‏:‏3؛ 2 تس. 1‏:‏8. ١٣ مَاشَا نشِّينْ أَقَا نتّْرَاجَا إِجنْوَانْ ن جْذِيذْ ذ ثمُّورْثْ ن جْذِيذْ مَانِي غَا ثزْذغْ ثْسڭْذَا عْلَاحْسَابْ لْوَاعْذْ نّسْ. ◘3:‏13 إِشا. 65‏:‏17؛ 66‏:‏22؛ أَسَا. 21‏:‏1.

١٤ س ؤُينِّي، أَ إِمْعِيزّنْ إِنُو، ؤُمِي كنِّيوْ ثتّْرَاجَامْ مَانْ أَيَا، شْضَارمْ مَاحنْذْ أَذْ ثتّْوَافمْ بْڒَا ڒخْمجْ ؤُ بْڒَا ڒْْعِيبْ زَّاثسْ ذِي ڒهْنَا. ١٥ حسْبمْ تَّاسِيعْ ن ڒْْخَاضَارْ ن سِيذِي ذ ثَاوَّارْثْ إِ وصْڒَاحْ، أَمْ مَامّشْ ؤُڒَا ذ ؤُمَاثْنغْ إِعِيزّنْ بُولُوسْ ذ أَومْ د-يُورَا عْلَاحْسَابْ ثِيغِيثْ إِ ذ أَسْ إِمّوْشنْ، ◘3:‏15 رُوم. 2‏:‏4. ١٦ أَمْ مَامّشْ خَاسْ إِسِّيوڒْ نتَّا ذِي مَارَّا ثِيبْرَاثِينْ نّسْ. أَقَا ذِينْ شَا ن ثْمسْڒَايِينْ إِوْعَارنْ إِ ڒفْهَامثْ، ثِينِّي إِ سّْفَارَّاغنْ ڒْْجُوهَّاڒْ ذ يوْذَانْ وَارْ إِمْثِيننْ ذڭْ وُوڒْ نْسنْ، أَمْ مَامّشْ ڭِّينْ ؤُڒَا إِ ثِيرَا إِقدّْسنْ نّغْنِي إِ وَاريّبْ ن يِيخفْ نْسنْ. ◘3:‏16 رُوم. 8‏:‏19؛ 1 كُور. 15‏:‏24؛ 1 تس. 4‏:‏15.

١٧ س ؤُينِّي كنِّيوْ أَ إِمْعِيزّنْ إِنُو، أَمْ ثسّْنمْ مَانْ أَيَا قْبڒْ، حْضَامْ إِخفْ نْومْ، حِيمَا وَارْ ثْضفَّارَامْ أَوَارْنِي إِ ؤُودَّارْ ن يِينِّي إِدْجَانْ بْڒَا شَّارِيعَا ؤُشَا أَذْ ثوْضَامْ وَاخَّا ثُوغَا ثتّْبدَّامْ نِيشَانْ، ١٨ مَاشَا س ڒْْعكْسْ حْضَامْ أَذْ ثيْممْ ذڭْ أَرْضَا ذ ثُوسّْنَا ن سِيذِيثْنغْ ذ أَمْسنْجمْ نّغْ، يَاسُوع لْمَاسِيحْ، ؤُ ن أَربِّي، بَابَاسْ، إِ ونِّي ؤُمِي غَا يِيڒِي ؤُعُودْجِي، أَمْ ڒخُّو أَمْ ڒبْذَا، أَڒْ ذڭْ وُوسَّانْ ن ڒبْذَا! أَمِينْ.