أَذْلِيسْ إِقدّْسنْ إِفَاسُوسِييّنْ ٤

إِشْثْ ن أَرِّيمثْ ذ إِجّْ ن أَرُّوحْ س لْمَاسِيحْ

١ أَمْ ؤُمحْبُوسْ ذِي سِيذِيثْنغْ، زِييَّارغْ خَاومْ، حِيمَا أَذْ ثُويُورمْ أَمْ مَامّشْ د-ثُوسَا أَكْ-ذ ثْڒَاغِيثْ إِ زِي ثتّْوَاڒَاغَامْ، ◘ ٢ س مَارَّا أَوَاضعْ ن بُوحْبڒْ، س ثمْهِينْثْ ؤُ س تَّاسِيعْ ن ڒْْخَاضَارْ، أَقَا أَذْ ثْقبّْڒمْ إِجّْ ونّغْنِي ذِي ثَايْرِي، ◘ ٣ أَذْ ثشْضَارمْ مَاحنْذْ أَذْ ثقِّيممْ ثْمُونمْ ذ إِجّْ ذِي أَرُّوحْ س ثْسغْوِينْ ن ڒهْنَا، ٤ مَاحنْذْ أَذْ ثِيڒِيمْ ذڭْ إِشْثْ ن أَرِّيمثْ ؤُ ذڭْ إِجّْ ن أَرُّوحْ أَمْ مَامّشْ ؤُمِي ثتّْوَاڒَاغَامْ ذڭْ ؤُسِيثمْ ن ثْڒَاغِيثْ نْومْ ذ إِجّنْ. ٥ مَاغَارْ سِيذِي ذ إِجّنْ، ذ لْ-إِيمَانْ ذ إِجّنْ ؤُڒَا ذ أَسغْضصْ ذ إِجّنْ، ◘ ٦ ؤُ أَربِّي ذ إِجّنْ، بَابَاثْنغْ مَارَّا ؤُ خْ مَارَّا ؤُ س مَارَّا ؤُ ذَايْنغْ مَارَّا. ٧ مَاشَا أَرْضَا إِمّوْشْ أَنغْ مَارَّا إِذْنغْ عْلَاحْسَابْ ڒْْمِيجَاڒْ ن مِينْ ذ أَنغْ إِوْشَا لْمَاسِيحْ. ◘ ٨ س ؤُينِّي قَّارنْ:

”إِڭعّذْ غَارْ ڒُْوعْڒَا،

يِيوْيِي أَكِيذسْ إِمحْبَاسْ ذِي ثْمحْبَاسْثْ،

إِوْشَا ثِيرْزِيفِينْ إِ إِوْذَانْ.“ ◘

٩ مَاشَا مِينْ إِعْنَا عَاوذْ وَاوَاڒْ-أَ، أَقَا نتَّا إِڭعّذْ سنّجْ، مْغِيرْ أَقَا نتَّا غَارْ ؤُمزْوَارْ عَاوذْ ثُوغَا إِهْوَا-د غَارْ طّْرُوفَا ن ثمُّورْثْ ن وَادَّايْ قَاعْ؟! ◘ ١٠ ونِّي ثُوغَا د-إِهْوَانْ، نتَّا عَاوذْ ذ ونِّي ثُوغَا إِڭعّْذنْ سنّجْ إِ مَارَّا إِجنْوَانْ، حِيمَا أَذْ إِسِّيوضْ مَارَّا غَارْ ڒكْمَاڒثْ. ◘

١١ نتَّا يَارَّا شَا ذ رُّوسُولْ، شَا ذ إِنَابِييّنْ، شَا ذ إِمْبشَّارنْ، شَا ذ إِمكْسَاونْ ؤُ شَا ذ إِمْسڒْمَاذنْ، ◘ ١٢ حِيمَا أَذْ زَّايْسنْ تّْوَاكمّْڒنْ إِمْقدَّاسنْ إِ ڒْْخذْمثْ ن ثْسخَّارْثْ، إِ ڒبْنِي ن أَرِّيمثْ ن لْمَاسِيحْ، ◘ ١٣ أَڒْ إِ غَا نَاوضْ مَارَّا غَارْ ؤُمُونِي ذ إِجّنْ ذِي لْ-إِيمَانْ ؤُ ذِي ثُوسّْنَا ن مِّيسْ ن أَربِّي، أَذْ نِيڒِي ذ إِجّْ ن بْنَاذمْ إِكْمڒْ س ڒعْبَارْ ن صِّيفثْ ثْمُونْ ن لْمَاسِيحْ. ١٤ إِتّْخصَّا وَارْ نتِّيڒِي أَمْ إِحنْجِيرنْ إِنِّي إِتّْوَاعَارَّانْ زِي طَّارْفْ غَارْ ونّغْنِي ؤُشَا ذوْڒنْ إِڭّْوْجنْ زِي كُوڒْ أَسمِّيضْ ن ؤُسڒْمذْ ذ أَحْرَايْمِي زڭْ إِوْذَانْ نِّي يَارزُّونْ أَذْ أَنغْ غَارّنْ س ثحْرَايْمشْثْ نْسنْ، ◘ ١٥ مَاشَا إِتّْخصَّا أَذْ نْبدّْ نِيشَانْ ذِي ثَايْرِي نّغْ، مَاحنْذْ مَارَّا مِينْ غَارْنغْ إِدْجَانْ أَذْ إِڭْمَا ذِي لْمَاسِيحْ ونِّي ذ أَزدْجِيفْ. ◘ ١٦ زَّايسْ ثنّجْرُو ؤُ ثتّْوَاسّْمُونْ أَرِّيمثْ مَارَّا س مَارَّا ڒمْفَاصڒْ، عْلَاحْسَابْ مِينْ إِمّوْشنْ س ڒعْبَارْ إِ مْكُوڒْ أَغزْذِيسْ إِ ثْيُومِي ن أَرِّيمثْ، أَڒْ غَا إِتّْوَاكمّڒْ ڒبْنِي نّسْ ذِي ثَايْرِي. ◘

بْنَاذمْ ن جْذِيذْ

١٧ مَاشَا نشّْ قَّارغْ ؤُ شهّْذغْ مَانْ أَيَا ذِي سِيذِي، حِيمَا وَارْ ثڭُّورمْ عَاذْ أَمْ مَامّشْ ؤُيُورنْ ڒڭْنُوسْ إِنّغْنِي، إِنِّي إِدَّارنْ ذِي ڒْْبَاطڒْ ن إِخَارِّيصنْ نْسنْ، ◘ ١٨ بَارْشْننْ ذِي ڒعْقڒْ نْسنْ ؤُ أَڭّْوجنْ خْ ثُوذَارْثْ ن أَربِّي، مِينْزِي وَارْ ذَايْسنْ بُو ثُوسّْنَا، ؤُ خْ سِّيبّثْ ن ثْقُوبَّانشْثْ إِ ذَايْسنْ إِدْجَانْ، ؤُ خْ سِّيبّثْ ن ڒقْسَاحثْ ن وُوڒْ نْسنْ. ◘ ١٩ نِيثْنِي قضْعنْ إِخفْ نْسنْ زڭْ ؤُسِيثمْ، سلّْمنْ إِخفْ نْسنْ إِ ؤُفُوشّحْ ؤُ إِ وضْفَارْ ن مَارَّا مَارْكَاثْ ن ڒخْمجْ عْلَاحْصَابْ مژْرِي نْسنْ. ٢٠ مَاشَا وَارْ إِدْجِي أَمُّو إِ ثسّْنمْ لْمَاسِيحْ، ٢١ ڒَْامِي زعْمَا كنِّيوْ ثُوغَا ثسْڒَامْ غَارسْ نِيشَانْ ؤُشَا ثْڒمْذمْ زَّايسْ عْلَاحْسَابْ ثِيذتّْ إِ إِدْجَانْ ذِي يَاسُوع. ٢٢ مَاشَا س ڒْْعكْسْ إِتّْخصَّا كنِّيوْ أَذْ ثنْضَارمْ ثِيشْڒِي نْومْ ن زِيشْ، أَذْ ثجّمْ بْنَاذمْ أَقْذِيمْ إِ إِتّْوَاسّخْسَارنْ س نّشْوَاثْ إِغشّنْ. ◘ ٢٣ تّْوَاعذْڒمْ زِي جْذِيذْ س نّيّثْ ن ڒعْقڒْ نْومْ. ٢٤ أَرْضمْ بْنَاذمْ ن جْذِيذْ إِ د-إِتّْوَاخڒْقنْ ذِي أَربِّي ذِي ثْسڭْذَا ؤُ ذِي ثَاقدَّاسْثْ ذ ثِيذتّْ. ◘

٢٥ س ؤُينِّي جّمْ إِخَارِّيقنْ، سِيوْڒمْ ثِيذتّْ كُوڒْ إِجّْ أَكْ-ذ جَّارْ نّسْ، مِينْزِي نشِّينْ ذ إِخْفَاونْ إِجّنْ إِ ونّغْنِي. ◘ ٢٦ خيّْقمْ، مَاشَا وَارْ تّڭّمْ شَا دّْنُوبْ، وَارْ تّجِّي أَذْ ثغْرِي ثْفُوشْثْ خْ إِجّْ ن ؤُذُوقّزْ ن ؤُخيّقْ نْومْ. ◘ ٢٧ وَارْ تِّيشمْ شَا أَمْشَانْ إِ إِبْڒِيسْ. ◘ ٢٨ وَارْ ثجِّي ونِّي إِتَّاشَارنْ أَذْ يَاشَارْ عَاذْ، مَاشَا حْسنْ أَذْ يَارْبرْ س إِفَاسّنْ نّسْ مَاحنْذْ أَذْ إِسُّوفّغْ إِشْثْ ذ ڒْْحَاجّثْ ذ ثَاصبْحَانْثْ، مَاحنْذْ أَذْ ت إِوْشْ إِ يِينِّي إِحْذَاجنْ. ◘ ٢٩ وَارْ د-إِتّكّْ شَا وَاوَاڒْ ن وشْرَاهْ زڭْ ؤُقمُّومْ نْومْ، مَاشَا مِينْ إِصبْحنْ ؤُ مِينْ إِنفّْعنْ إِ ڒبْنِي، حِيمَا أَذْ ثسِّيوْضمْ أَرْضَا إِ يِينِّي إِ غَا إِسْڒَانْ. ◘ ٣٠ وَارْ تّسّْفُّوڭْممْ شَا أَرُّوحْ إِقدّْسنْ ن أَربِّي إِ زِي ثتّْوَاشمّْعمْ أَڒْ أَسّْ ن ؤُسنْجمْ. ◘ ٣١ جّمْ أَذْ زَّايْومْ ثتّْوَاكّسْ مَارَّا ثَارْزُوڭِي ذ ثفْقحْثْ ذ وغْضَابْ ذ ؤُصدّعْ ذ ؤُشقّفْ أَكْ-ذ مَارَّا ثُوعفّْنَا إِ د-إِتَّاسنْ أَكْ-ذ مَانْ أَيَا. ◘ ٣٢ إِڒِيمْ ثْضَارْفمْ ؤُ ڭّمْ ڒحْنُونشْثْ ذڭْ وَايَاوَا. سَامْحمْ إِ وَايَاوْيَا أَمْ أَربِّي عَاوذْ أَقَا إِغْفَارْ أَنغْ ذِي لْمَاسِيحْ. ◘

◘٤:١ 4:‏1 أَمز. 17‏:‏1؛ 1 كُور. 7‏:‏20؛ فِيل. 1‏:‏27؛ كُول. 1‏:‏10؛ 1 تس. 2‏:‏12.

◘٤:٢ 4:‏2 كُول. 1‏:‏11؛ 3‏:‏12؛ 1 تس. 5‏:‏14.

◘٤:٥ 4:‏5 أَعَوذ. 4‏:‏39؛ مـَال. 2‏:‏10؛ 1 كُور. 8‏:‏4، 6.

◘٤:٧ 4:‏7 رُوم. 12‏:‏6؛ 1 كُور. 12‏:‏11؛ 2 كُور. 10‏:‏13؛ 1 بُط. 4‏:‏10.

◘٤:٨ 4:‏8 إِزهد. 68‏:‏19.

◘٤:٩ 4:‏9 يُوح. 3‏:‏13؛ 6‏:‏62؛ 1 بُط. 3‏:‏18‏-‏19

◘٤:١٠ 4:‏10 عبر. 1‏:‏1‏-‏3

◘٤:١١ 4:‏11 1 كُور. 12‏:‏28.

◘٤:١٢ 4:‏12 رُوم. 12‏:‏5؛ 1 كُور. 12‏:‏27؛ أَفا. 1‏:‏23؛ 5‏:‏23؛ كُول. 1‏:‏24.

◘٤:١٤ 4:‏14 مت. 11‏:‏7؛ 1 كُور. 14‏:‏2.

◘٤:١٥ 4:‏15 أَفا. 5‏:‏23؛ كُول. 1‏:‏18.

◘٤:١٦ 4:‏16 رُوم. 12‏:‏5؛ 1 كُور. 12‏:‏27؛ أَفا. 2‏:‏21.

◘٤:١٧ 4:‏17 رُوم. 1‏:‏9، 18؛ 1 بُط. 4‏:‏3.

◘٤:١٨ 4:‏18 1 تس. 4‏:‏5.

◘٤:٢٢ 4:‏22 كُول. 3‏:‏9؛ عبر. 12‏:‏1؛ 1 بُط. 2‏:‏1.

◘٤:٢٤ 4:‏24 رُوم. 6‏:‏4؛ كُول. 3‏:‏10؛ 1 بُط. 4‏:‏2.

◘٤:٢٥ 4:‏25 زَاك. 8‏:‏16.

◘٤:٢٦ 4:‏26 إِزهد. 4‏:‏5.

◘٤:٢٧ 4:‏27 يَاع. 4‏:‏7؛ 1 بُط. 5‏:‏9.

◘٤:٢٨ 4:‏28 ڒخ. 20‏:‏35؛ 1 تس. 4‏:‏11؛ 2 تس. 3‏:‏8، 12.

◘٤:٢٩ 4:‏29 مت. 12‏:‏36؛ أَفا. 5‏:‏3، 4.

◘٤:٣٠ 4:‏30 لك. 21‏:‏28؛ رُوم. 8‏:‏16، 23؛ 2 كُور. 1‏:‏22؛ 5‏:‏5؛ أَفا. 1‏:‏13، 14.

◘٤:٣١ 4:‏31 كُول. 3‏:‏19.

◘٤:٣٢ 4:‏32 مت. 6‏:‏14؛ مك. 11‏:‏25؛ فِيل. 2‏:‏1؛ كُول. 3‏:‏12، 13.