أَذْلِيسْ إِقدّْسنْ إِفَاسُوسِييّنْ ٥

١ س ؤُيَا إِڒِيمْ ذ إِمضْفَارنْ ن أَربِّي أَمْ إِحنْجِيرنْ إِعِيزّنْ، ٢ ؤُيُورمْ ذِي ثَايْرِي أَمْ مَامّشْ ؤُڒَا ذ لْمَاسِيحْ ثُوغَا إِتّخْسْ أَنغْ، إِوْشَا إِخفْ نّسْ خَانغْ ذ ثَاوْهِيبْثْ ذ ثْغَارْصْثْ إِ أَربِّي، أَقَا-ت ذ إِشْثْ ن ڒفْوَاحثْ ثَاصبْحَانْثْ. ◘

٣ مَاشَا خْ فَارْقْ-شّْغڒْ ذ مَارَّا ڒخْمجْ ذ طّْمعْ، وَارْ خَاسْ إِتِّيڒِي بُو وَاوَاڒْ جَارْ أَومْ أَمْ مَامّشْ إِشُووَّارْ إِ إِمْقدَّاسنْ، ◘ ٤ ؤُڒَا خْ ڒْْهَارْذْ إِسّْبهْذْڒنْ نِيغْ خْ وَاوَاڒنْ إِخْوَانْ نِيغْ خْ ثْقصَّارْثْ نِيغْ خْ ڒفْضِيحثْ، ثِيمسْڒَايِينْ إِ وَارْ نفّْعنْثْ ذِي وَالُو، مَاشَا مَامّشْ نّغْنِي إِتّْخصَّا أَقَاذِي. ٥ مِينْزِي ثسّْنمْ أَقَا كُوڒْ إِجّْ ونِّي إِتّڭّنْ فَارْقْ-شّْغڒْ، نِيغْ ونِّي ذَايسْ ڒخْمجْ نِيغْ طّْمعْ، أَقَا وَانِيثَا إِعبّذْ لْ-أَصْنَامْ، وَارْ غَارسْ بُو ثسْغَارْثْ ذِي ثْڭلْذِيثْ ن لْمَاسِيحْ ؤُ ن أَربِّي. ◘

٦ وَارْ تّجِّيمْ ؤُڒَا ذ إِجّنْ أَذْ كنِّيوْ إِغكّْوِي س وَاوَاڒنْ إِخْوَانْ، أَقَا زِي مَانْ أَيَا د-إِهكّْوَا وغْضَابْ ن أَربِّي خْ ثَارْوَا ن ڒْْمُوعْصِييّثْ. ◘ ٧ وَارْ شَارّْشمْ شَا أَكِيذْسنْ! ٨ مِينْزِي زِيشْ ثُوغَا كنِّيوْ ذ ثَادْجسْثْ، مَاشَا أَقَا ڒخُّو كنِّيوْ ذ ثَافَاوْثْ ذِي سِيذِيثْنغْ. س ؤُينِّي ؤُيُورمْ أَمْ ثَارْوَا ن ثْفَاوْثْ، ◘ ٩ مِينْزِي ڒْْغِيدْجثْ ن ثْفَاوْثْ ثتِّيڒِي ذِي مَارَّا ثْشُونِي ذ ثْسڭْذَا ذ ثِيذتّْ. ◘ ١٠ فَارْزمْ مِينْ غَا يَارْضَانْ سِيذِيثْنغْ. ١١ وَارْ شَارّْشمْ شَا ذِي ڒخْذَايمْ ثِيبَارْشَانِينْ إِ وَارْ د-إِتِّيوْينْ ڒْْغِيدْجثْ، مَاشَا وبّْخمْ ثنْثْ. ◘ ١٢ مِينْزِي مِينْ تّڭّنْ ذِي ثْنُوفّْرَا، أَقَا-ث ذ نّْعِي إِ وَارْ ثْزمَّارذْ ؤُڒَا أَذْ ث ثْعَاوْذذْ. ١٣ مِينْزِي مَارَّا أَذْ إِتّْوَاسڭّذْ س ثْفَاوْثْ ؤُ أَذْ إِتّْوَاسَّارْڭبْ س ثْفَاوْثْ ؤُ مَارَّا مِينْ إِسَّارْڭَابنْ ذ ثِيفَاوْثْ إِ يدْجَا. ◘ ١٤ س ؤُينِّي قَّارنْ:

”فَاقْ شكْ، أَ بُو يِيضصْ.

كَّارْ-د زِي ثَادَّارْثْ ن إِمتِّيننْ،

ؤُشَا أَذْ خَاكْ إِڭّْ لْمَاسِيحْ ثَافَاوْثْ.“ ◘

١٥ حْضَامْ أَذْ ثُويُورمْ س ؤُوقَّارْ، وَارْ إِدْجِي أَمْ إِبُوهَاڒِييّنْ، مَاشَا أَمْ إِمِيغِيسنْ، ◘ ١٦ إِنِّي إِ غَا يَاوْينْ أَرِيقِّي إِ ڒْْوقْثْ نْسنْ، مِينْزِي ؤُسَّانْ-أَ ذ إِعفَّاننْ. ◘ ١٧ خْ ؤُينِّي وَارْ تِّيڒِيمْ ذ إِبُوهَاڒِييّنْ، مَاشَا فهْممْ مِينْ إِخْسْ أَربِّي. ◘ ١٨ وَارْ سشَّارَامْ شَا س بِينُو إِ إِتَّاوْينْ غَارْ ڒقْجَاحثْ، مَاشَا إِڒِيمْ ثْعمَّارمْ س أَرُّوحْ. ◘ ١٩ سِيوْڒمْ ذِي ڒعْمُورْ نْومْ س إِزهِّيذنْ ذ إِزْڒَانْ ن ؤُصبّحْ ذ إِزْڒَانْ ن أَرُّوحْ،غنّْجمْ ذڭْ وُوڒَاونْ نْومْ إِ سِيذِي. ◘ ٢٠ قَاذَامْ ڒبْذَا أَربِّي بَابَاثْنغْ خْ كُوڒْ إِجّنْ ذڭْ يِيسمْ ن سِيذِيثْنغْ يَاسُوع لْمَاسِيحْ. ◘ ٢١ وَاضْضْعمْ إِخفْ نْومْ إِ وَايَاوْيَا ذِي ثَايْرِي ن لْمَاسِيحْ.

ڒمْڒَاشْ ذ صِّيفثْ ن لْمَاسِيحْ ذ ثْمسْمُونْثْ

٢٢ أَ ثِيمْغَارِينْ، وَاضْضْعنْثْ إِ يرْيَازنْ نْكنْثْ أَمْ ثتّْوَاضْضْعنْثْ إِ سِيذِيثْنغْ، ◘ ٢٣ مِينْزِي أَرْيَازْ أَقَا ذ أَزدْجِيفْ ن ثمْغَارْثْ أَمْ ؤُڒَا ذ لْمَاسِيحْ إِ يدْجَانْ ذ أَزدْجِيفْ ن ثْمسْمُونْثْ ذ ونِّي إِتِّيشنْ ثُوذَارْثْ إِ أَرِّيمثْ. ◘ ٢٤ أَمْ ثْمسْمُونْثْ ثتّْوَاضّعْ إِخفْ نّسْ إِ لْمَاسِيحْ، أَمنِّي عَاوذْ ثِيمْغَارِينْ أَذْ وَاضْضْعنْثْ إِخفْ نْسنْثْ إِ يرْيَازنْ نْسنْثْ ذِي مَارَّا.

٢٥ أَ إِرْيَازنْ، خْسمْ ثِيمْغَارِينْ نْومْ أَمْ مَامّشْ ثُوغَا إِخْسْ لْمَاسِيحْ ثَامسْمُونْثْ ؤُشَا إِسلّمْ إِخفْ نّسْ ذِي طّْوعْ نّسْ، ◘ ٢٦ حِيمَا أَذْ ت يَارّْ ذ ثَامْقدَّاسْثْ ؤُ أَذْ أَسْ إِسِّيزْذڭْ س ؤُسِيرْذْ ن وَامَانْ إِدَّارنْ ؤُ س وَاوَاڒْ. ◘ ٢٧ نتَّا أَذْ إِڭّْ ثَامسْمُونْثْ قِيبَاتْشْ إِ يِيخفْ نّسْ س ؤُعُودْجِي، بْڒَا أَبقِّيضْ نِيغْ أَشبْرِيقْ، بْڒَا ؤُڒَا ذ إِشْثْ ن ڒْْحَاجّثْ زِي مَارَّا مَانْ أَيَا، مَاشَا أَذْ ثِيڒِي ذ ثَامْقدَّاسْثْ ؤُ بْڒَا ڒْْعِيبْ. ◘

٢٨ أَمُّو إِتّْخصَّا أَذْ خْسنْ يرْيَازنْ ثِيمْغَارِينْ نْسنْ أَمْ أَرِّيمثْ نْسنْ. أَقَا ونِّي إِتّخْسنْ ثَامْغَارْثْ نّسْ، أَقَا إِتّخْسْ إِخفْ نّسْ. ٢٩ ؤُڒَا ذ إِجّْ وَارْ إِشَارْهْعمَّارْصْ أَرِّيمثْ نّسْ، مَاشَا إِسّشَّا إِ-ث، إِتّْحَاوَاڒْ خَاسْ أَمْ مَامّشْ إِتّْحَاوَاڒْ عَاوذْ لْمَاسِيحْ خْ ثْمسْمُونْثْ، ٣٠ مِينْزِي نشِّينْ ذ إِخْفَاونْ ن أَرِّيمثْ نّسْ، ن ويْسُومْ نّسْ ؤُ ن إِغْسَانْ نّسْ. ◘

٣١ س ؤُينِّي أَرْيَازْ أَذْ يجّْ بَابَاسْ ذ يمَّاسْ مَاحنْذْ أَذْ إِقّنْ غَارْ ثمْغَارْثْ نّسْ، أَذْ إِڒِينْ س ثْنَاينْ إِذْسنْ ذ إِجّْ ن ويْسُومْ. ◘ ٣٢ سِّيرّْ-أَ ذ أَمقّْرَانْ، مَاشَا نشّْ قَّارغْ ث زِي جِّيهثْ ن لْمَاسِيحْ ذ ثْمسْمُونْثْ. ٣٣ مَاشَا إِتّْخصَّا عَاوذْ إِ كُوڒْ إِجّْ زَّايْومْ مَاحنْذْ أَذْ إِخْسْ أَمنِّي ثَامْغَارْثْ نّسْ أَمْ يِيخفْ نّسْ، مَاشَا ثَامْغَارْثْ أَذْ ثْوقَّارْ أَرْيَازْ.

◘٥:٢ 5:‏2 يُوح. 13‏:‏34؛ 15‏:‏12؛ ڭال. 2‏:‏20؛ 1 تس. 4‏:‏9؛ ثِيث. 2‏:‏14؛ 1 بُط. 3‏:‏18؛ عبر. 8‏:‏3؛ 9‏:‏14؛ 1 يُوح. 3‏:‏23؛ 4‏:‏21

◘٥:٣ 5:‏3 مك. 7‏:‏21؛ أَفا. 4‏:‏29؛ كُول. 3‏:‏5.

◘٥:٥ 5:‏5 1 كُور. 6‏:‏10؛ ڭال. 5‏:‏19؛ كُول. 3‏:‏5؛ أَسَا. 22‏:‏15.

◘٥:٦ 5:‏6 إِرْم. 29‏:‏8؛ مت. 24‏:‏4؛ مك. 13‏:‏5؛ لك. 21‏:‏8؛ كُول. 2‏:‏4، 18؛ 2 تس. 2‏:‏3؛ 1 يُوح. 4‏:‏1.

◘٥:٨ 5:‏8 1 تس. 5‏:‏4.

◘٥:٩ 5:‏9 ڭال. 5‏:‏22.

◘٥:١١ 5:‏11 مت. 18‏:‏17؛ 1 كُور. 5‏:‏8؛ 10‏:‏20؛ 2 كُور. 6‏:‏14؛ 2 تس. 3‏:‏14.

◘٥:١٣ 5:‏13 يُوح. 3‏:‏20، 21.

◘٥:١٤ 5:‏14 رُوم. 13‏:‏11؛ 1 تس. 5‏:‏6.

◘٥:١٥ 5:‏15 كُول. 4‏:‏5.

◘٥:١٦ 5:‏16 رُوم. 13‏:‏11.

◘٥:١٧ 5:‏17 رُوم. 12‏:‏2؛ 1 تس. 4‏:‏3.

◘٥:١٨ 5:‏18 أَوڒن. 23‏:‏29؛ إِشا. 5‏:‏11، 22؛ لك. 21‏:‏34.

◘٥:١٩ 5:‏19 كُول. 3‏:‏16.

◘٥:٢٠ 5:‏20 كُول. 3‏:‏17؛ 1 تس. 5‏:‏18.

◘٥:٢٢ 5:‏22 أَمز. 3‏:‏16؛ 1 كُور. 14‏:‏34؛ كُول. 3‏:‏18؛ ثِيث. 2‏:‏5؛ 1 بُط. 3‏:‏1.

◘٥:٢٣ 5:‏23 رُوم. 12‏:‏5؛ 1 كُور. 11‏:‏3؛ 12‏:‏27؛ أَفا. 1‏:‏22، 23؛ 4‏:‏12، 15؛ كُول. 1‏:‏18، 24.

◘٥:٢٥ 5:‏25 ڭال. 1‏:‏4؛ أَفا. 5‏:‏2؛ كُول. 3‏:‏19.

◘٥:٢٦ 5:‏26 ثِيث. 3‏:‏5؛ 1 بُط. 3‏:‏21.

◘٥:٢٧ 5:‏27 كُول. 1‏:‏22.

◘٥:٣٠ 5:‏30 رُوم. 12‏:‏5؛ 1 كُور. 12‏:‏27.

◘٥:٣١ 5:‏31 أَمز. 2‏:‏24؛ مت. 19‏:‏5، 6؛ مك. 10‏:‏8؛ 1 كُور. 6‏:‏16.