١ أَوَارْنِي مَانْ أَيَا ثمْسَارْ، أَقَا إِجَارّبْ أَربِّي إِبْرَاهِيمْ، إِنَّا أَسْ: ”إِبْرَاهِيمْ!“ ؤُشَا إِنَّا أَسْ: ”خْزَارْ، نشّْ أَقَا أَيِي ذَا!“ ٢ إِنَّا أَسْ نتَّا: ”كْسِي أَينِّي ن مِّيشْ، ونِّي ثخْسذْ، إِسْحَاقْ، ؤُشَا رُوحْ غَارْ ثمُّورْثْ ن مُورِييَا ؤُشَا ثْقدّْمذْ ث ذِينْ ذ ثَاغْرَاصْثْ خْ يِيجّْ ن وذْرَارْ جَارْ إِذُورَارْ إِ ذ أَشْ غَا إِنِيغْ.“ ◘22:‏2 عبر. 11‏:‏17. ٣ إِكَّارْ إِبْرَاهِيمْ زِيشْ، إِحزّمْ إِ وغْيُوڒْ نّسْ ؤُشَا إِكْسِي أَكِيذسْ ثْنَاينْ ن إِمْسخَّارنْ نّسْ ذ مِّيسْ إِسْحَاقْ. إِقسّْ أَكشُّوضْ إِ ثوْهِيبْثْ ن ثْغَارْصْثْ، إِكَّارْ، إِرُوحْ ذڭْ وبْرِيذْ غَارْ ومْشَانْ إِ ذ أَسْ إِنَّا أَربِّي. ٤ ذڭْ وَاسّْ وِيسّْ ثْڒَاثَا إِسّْڭعّذْ إِبْرَاهِيمْ ثَامُوغْڒِي نّسْ ؤُشَا إِژْرَا أَمْشَانْ زِي ڒَْاڭّْوَاجْ. ٥ إِنَّا إِبْرَاهِيمْ إِ إِمْسخَّارنْ نّسْ: ”رَاجَامْ ذَا أَكْ-ذ وغْيُوڒْ، نشّْ ذ ؤُحنْجِيرْ أَذْ نْرَاحْ ذِيهَا، أَذْ نسْجذْ. أَوَارْنِي أَسْ أَذْ غَارْومْ د-نعْقبْ.“ ٦ إِكْسِي إِبْرَاهِيمْ أَكشُّوضْ إِ وشْمَاضْ ن ثْغَارْصْثْ، إِسَّارْسْ إِ-ث خْ مِّيسْ إِسْحَاقْ ؤُ نتَّا س يِيخفْ نّسْ إِكْسِي س ؤُفُوسْ نّسْ ثِيمسِّي ذ ثْخذْمشْثْ، ؤُشَا أَمُّو إِ رُوحنْ نِيثْنِي س ثْنَاينْ إِذْسنْ. ٧ خنِّي إِسِّيوڒْ إِسْحَاقْ أَكْ-ذ إِبْرَاهِيمْ بَابَاسْ، إِنَّا: ”بَابَا إِنُو!“ إِنَّا نتَّا: ”خْزَارْ، نشّْ أَقَا أَيِي ذَا، مِّي!“ ؤُشَا إِنَّا نتَّا: ”خْزَارْ، أَقَا ذَا ثِيمسِّي ذ ؤُكشُّوضْ، مَاشَا مَانِي إِدْجَا إِزْمَارْ إِ ثْغَارْصْثْ؟“ ◘22:‏7 يُوح. 1‏:‏29، 36 ٨ إِنَّا إِبْرَاهِيمْ: ”أَربِّي سِيمَانْثْ نّسْ أَذْ إِسَّارْزقْ س يزْمَارْ إِ ثْغَارْصْثْ، أَ مِّي!“ ؤُشَا أَمُّو إِ رُوحنْ س ثْنَاينْ إِذْسنْ ٩ ؤُشَا إِوْضنْ غَارْ ومْشَانْ نِّي إِ ذ أَسْ إِنَّا أَربِّي. ذِينْ إِ إِبْنَا إِبْرَاهِيمْ إِجّْ ن ؤُعَالْطَارْ ؤُشَا إِعْذڒْ أَكشُّوضْ، إِشَارْفْ مِّيسْ إِسْحَاقْ ؤُشَا إِسَّارْسْ إِ-ث خْ ؤُعَالْطَارْ خْ إِكشْوَاضْ. ◘22:‏9 يَاع. 2‏:‏21. ١٠ خَاسْ ؤُشَا إِسّْوِيژّضْ إِبْرَاهِيمْ أَفُوسْ نّسْ ؤُشَا إِكْسِي-د ثَاخذْمشْثْ، حِيمَا أَذْ إِغَارْصْ إِ مِّيسْ. ١١ مَاشَا لْمَالَاكْ ن سِيذِي إِڒَاغَا أَسْ-د زڭْ ؤُجنَّا، إِنَّا أَسْ: ”إِبْرَاهِيمْ، إِبْرَاهِيمْ!“ نتَّا إِنَّا: ”نشّْ أَقَا أَيِي ذَا!“ ١٢ خنِّي إِنَّا أَسْ: ”وَارْ سْوِيژِّيضْ أَفُوسْ نّشْ غَارْ ؤُحنْجِيرْ. وَارْ ذ تّڭّْ شَا، مِينْزِي ڒخُّو أَقَا سّْنغْ بلِّي ثتّڭّْوذذْ أَربِّي ؤُ وَارْ خَافِي ثسّْعِيزّذْ أَينِّي ن مِّيشْ.“ ١٣ إِسّْڭعّذْ إِبْرَاهِيمْ ثِيطَّاوِينْ نّسْ، ؤُ خْزَارْ، أَقَا أَوَارْنِي أَسْ ثُوغَا إِجّْ ن إِشَارِّي إِقّنْ غَارْ شْبَارْقْ زڭْ وَاشَّاونْ نّسْ. يُويُورْ إِبْرَاهِيمْ ذِينِّي، إِطّفْ إِشَارِّي ؤُشَا إِڭَّا-إِ-ث ذ ثَاغَارْصْثْ ذڭْ ومْشَانْ ن مِّيسْ. ◼22:‏13 ’أَشَّاونْ‘ - نِيغْ ’إِقِيشَّاونْ‘. ١٤ إِڒَاغَا إِبْرَاهِيمْ إِسمْ ن ومْشَانْ نِّي: ”سِيذِي أَذْ إِسَّارْزقْ!“ س ؤُينِّي إِقَّارْ بْنَاذمْ أَڒْ أَسّْ-أَ: ”ذڭْ وذْرَارْ ن سِيذِي أَذْ يِيڒِي يَارْزقْ!“ ◼22:‏14 ’أَذْ إِسَّارْزقْ ... أَذْ إِتّْوَاسَّارْزقْ‘ - س ثْعِيبْرَانِيثْ ’أَذْ إِژَارْ ... أَذْ إِتّْوَاژَارْ‘. أَفسَّارْ - وَا ذ أَذْرَارْ ’مُورِي-يَاهْ‘، أَمْشَانْ نِّي إِ غَا إِسّْشنْ أَربِّي (أَعَوذ. 12:11) ذ أَمْشَانْ ن زَّاوشْثْ إِقدّْسنْ نِّي ثُوغَا ذِينْ ذڭْ وُوسَّانْ أَوَارْنِي مَانْ أَيَا. أَذْ ثَاغْ ثُوغَا أَمْشَانْ-أَ ؤُڒَا ذ أَمْشَانْ مَانِي ثُوغَا إِزدّغْ مَالْكِيصَاذِيقْ، أَجدْجِيذْ ن سَالِيمْ، إِخْسْ أَذْ يِينِي ثَاسْغَارْثْ ن وذْرَارْ نِّي إِدْجَانْ غَارْ شَّامَالْ، ثنِّي إِذوْڒنْ ذ أَذْرَارْ ن زَّاوشْثْ إِقدّْسنْ. ثَاسْغَارْثْ ن لْجَانُوبْ ن وذْرَارْ ثُوغَا ذ ثَانْذِينْثْ ن ذَاوُوذْ. ذَاوُوذْ إِطّفْ لْپُورْجْ ن أَيْثْ ن يَاپُوسْ نِّي إِدْجَانْ خْ وذْرَارْ-أَ (1 إِج. 8:1، 1 إِم. 11:5، 2 صم. 5:6، 7، 9). أَوَارْنِي أَسْ إِسْغَا ذَاوُوذْ ثَاسْغَارْثْ ن شَّامَالْ ن وذْرَارْ 'مُورِي-يَاهْ' زِي أَرَاوْنَا، ونِّي غَارْ إِدْجْ إِجّْ ن ونْذْرَارْ خْ وذْرَارْ-أَ مَانِي ثُوغَا د-إِسّهْوَا لْمَالَاكْ ن سِيذِي أَفُوسْ نّسْ أَڒَامِي ثْبدّْ جّْرِيحشْثْ نِّي إِسِّيوضْ لْمَالَاكْ ن سِيذِي خْ إِسْرَائِيل نِّي د يُوسِينْ زِي سِّيبّثْ ن ڒحْسَابْ نْ ڒْڭنْسْ نِّي إِڭَّا ذَاوُوذْ س يِيخفْ نّسْ، بْڒَا مَا إِتَّارْ سِيذِي (خْزَارْ 2 صم. 24). خْمِي إِ غَا نْغَارْ 2 صم. 5:7، 1 إِج. 8:1 ؤُ إِزهد. 2:6 نتَّافْ أَقَا نْزمَّارْ أَذْ نحْسبْ أَذْرَارْ-أَ 'مُورِي-يَاهْ' ذ أَذْرَارْ 'سِيحْيُونْ'، أَذْرَارْ إِقدّْسنْ، مَانِي سَّارْسنْ تَّاپُوثْ ذڭْ وُوسَّانْ ن ذَاوُوذْ (2 صم. 6:17). إِذْوڒْ سِيحْيُونْ ذ إِسمْ أَنڭَّارْ ن مَارَّا أَذْرَارْ، ؤُڒَا ذ إِسمْ إِ ثنْذِينْثْ ن ؤُرْشَالِيمْ مَارَّا. خْزَارْ عَاوذْ أَفسَّارْ غَارْ 2 إِج. 19:31. ١٥ إِڒَاغَا-د لْمَالَاكْ ن سِيذِي وِيسّْ مَارْثَاينْ زڭْ ؤُجنَّا خْ إِبْرَاهِيمْ، ١٦ إِنَّا: ”مِينْزِي ثڭِّيذْ مَانْ أَيَا ؤُشَا وَارْ خَافِي ثطِّيفذْ أَينِّي ن مِّيشْ، أَذْ جَّادْجغْ خْ سِيمَانْثْ إِنُو، إِقَّارْ سِيذِي، ◘22:‏16 لك. 1‏:‏73؛ عبر. 6‏:‏13. ١٧ أَقَا أَذْ شكْ بَارْكغْ أَطَّاسْ ؤُشَا أَذْ كتَّارغْ زَّارِيعثْ نّشْ أَطَّاسْ أَمْ يِيثْرَانْ ن ؤُجنَّا ؤُ أَمْ يِيجْذِي خْ ثْمَا ن ڒبْحَارْ. زَّارِيعثْ نّشْ أَذْ ثطّفْ ثَاوَّارْثْ ن ڒْْعذْيَانْ نّسْ ذ ڒْْوَارْثْ ◘22:‏17 أَمز. 24‏:‏60. ١٨ ؤُ ذِي زَّارِيعثْ نّشْ أَذْ تّْوَابَارْكنْ مَارَّا ڒڭْنُوسْ ن ثمُّورْثْ، مِينْزِي ثسْڒِيذْ إِ ثْمِيجَّا إِنُو.“ ◘22:‏18 أَمز. 12‏:‏3؛ 18‏:‏18؛ 26‏:‏4؛ ڒخ. 3‏:‏25؛ ڭال. 3‏:‏8. ١٩ خنِّي إِعْقبْ-د إِبْرَاهِيمْ غَارْ إِمْسخَّارنْ نّسْ. نِيثْنِي كَّارنْ ؤُشَا رُوحنْ جْمِيعْ ذڭْ وبْرِيذْ غَارْ بِئرْ-سبْعَا، ؤُشَا إِڭَّا إِبْرَاهِيمْ أَذْ إِزْذغْ ذِي بِئرْ-سبْعَا.

٢٠ أَوَارْنِي مَانْ أَيَا إِمْسَارْ أَقَا خبَّارنْ إِبْرَاهِيمْ، نَّانْ أَسْ: ”خْزَارْ، عَاوذْ مِيلْكَا ثُورُووْ-د إِحنْجِيرنْ إِ نَاحُورْ ؤُمَاشْ: ٢١ عُوصْ، أَمنْزُو نّسْ، ذ بُوزْ ؤُمَاسْ، ذ قَامُووِيلْ ونِّي ذ بَابَاسْ ن أَرَامْ، ٢٢ ذ كَاسَاذْ ذ حَازُو ذ فِيلْذَاشْ ذ يِيذْلَافْ ذ بِيثُووِيلْ.“ ٢٣ بِيثُووِيلْ إِجَّا-د رِيفْقَا. ثْمنْيَا أَيَا إِ د-ثُورُووْ مِيلْكَا إِ نَاحُورْ، ؤُمَاسْ ن إِبْرَاهِيمْ. ٢٤ ؤُ ثَايَّا نّسْ، ثنِّي ؤُمِي قَّارنْ رِيعُومَا، ثُورُووْ أَسْ-د عَاوذْ طَابَاحْ ذ جَاحَامْ ذ ثَاحَاشْ ذ مَاعْكَا. ◼22:‏24 ’ثَايَّا نّسْ‘ - إِخْسْ أَذْ يِينِي ’ثَايَّا ن نَاحُورْ‘.