2
1 مَايمِّي تّْهَاجنْ ڒڭْنُوسْ،
تّْخَارِّيصنْ شُّوعُوبْ ذِي ڒْبَاطرْ؟ ◘2:1 ڒخ. 4:25
2 كَّارنْ إِجدْجِيذنْ ن ثمُّورْثْ،
أَيْثْ ن بُو-صُّولْطَا مْشَاوَارنْ
ضِيدّْ إِ سِيذِي ؤُ ضِيدّْ إِ لْمَاسِيحْ نّسْ:
3 ’أجّْ أَنغْ أَذْ نْقسّْ إِشذِّييّنْ نْسنْ،
أَذْ خَانغْ نسّْبعّذْ ثِيسغْوِينْ نْسنْ!‘
4 ونِّي إِزدّْغنْ ذڭْ ؤُجنَّا إِضحّشْ،
سِيذِي إِنُو أَذْ زَّايْسنْ إِسّْثهْزَا.
5 خنِّي أَذْ كِيذْسنْ إِسِّيوڒْ س وغْضَابْ نّسْ،
س ڒْحَاذُوقْ ن وغْضَابْ نّسْ أَذْ ثنْ إِسِّيڭّْوذْ.
6 ”نشّْ أَقَا ذهْنغْ أَجدْجِيذْ إِنُو،
خْ صِيهْيُونْ، أَذْرَارْ إِنُو إِقدّْسنْ!“
7 نشّْ أَذْ بَارّْحغْ ثِيكّسْثْ ن وَاوَاڒْ!
سِيذِي إِنَّا أَيِي:
”شكْ ذ مِّي، أَسّْ-أَ جِّيغْ-د شكْ! ◘2:7 ڒخ. 13:33؛ عبر. 1:5؛ 5:5
8 تَّارْ زَّايِي
ؤُ نشّْ أَذْ أَشْ وْشغْ ڒڭْنُوسْ ذ ڒْوَارْثْ،
ثِينڭُّورَا ن ثمُّورْثْ
أَذْ غَاركْ إِڒِينْثْ
ذ أَڭْڒَا إِ شكْ. ◘2:8 إِزهد. 22:28؛ 72:8
9 أَذْ ثنْ ثْڒبْزذْ س يِيجّْ ن وقْضِيبْ ن وُوزَّاڒْ،
أَذْ ثنْ ثَارْژِيذْ ذ ثَارژِّيثْ
أَمْ يِيجّْ ن ؤُغَارَّافْ ن ثْڒَاخْثْ.“◘2:9 أَسَا. 2:27؛ 19:15
10 ڒخُّو خنِّي، أَ إِجدْجِيذنْ،
إِڒِيمْ ذ إِفهَّامنْ،
ثبّْثمْ إِخفْ نْومْ،
أَ ڒْقُوضَاثْ ن ثمُّورْثْ! ◼2:10 ’ڒْقُوضَاثْ‘ - نِيغْ ’إِمزُورْفَا‘.
11 سخَّارمْ إِ سِيذِي س ثڭّْوُوذِي،
فَارْحمْ س ثَارْجِيجثْ.
12 سُوذْممْ مِّيسْ، حِيمَا نتَّا وَارْ إِسعَّارْ
ؤُ أَذْ ثتّْوَاهلّْكمْ ذڭْ وبْرِيذْ،
وَاخَّا إِتّْوَاسَّارْغْ وغْضَابْ نّسْ
مْغِيرْ ذْرُوسْ وَاهَا.
سّعْذْ نْسنْ إِ يِينِّي غَارسْ يَاركّْوَاڒنْ. ◘2:12 إِزهد. 34:9؛ أَوڒن. 16:20؛ إِشا. 30:18؛ إِرْم. 17:7؛ رُوم. 9:33؛ 10:11؛ 1 بُط. 2:6