١ س ؤُينِّي إِتّْخصَّا أَنغْ أَذْ نوْشْ ثَايْنِيثْ كْثَارْ إِ مِينْ نسْڒَا، حِيمَا وَارْ نتّفّغْ زڭْ وبْرِيذْ. ٢ مِينْزِي، مَاڒَا أَوَاڒْ إِ إِنَّانْ لْمَالَاكَاثْ ثُوغَا ثْبدّْ ؤُ مَارَّا وِي ث إِسْڒِينْ، مَاشَا إِعْذُو خَاسْ، أَقَا إِتّْوَاخدْجصْ س ڒْْحقّْ، ◘2:‏2 أَمز. 19‏:‏17، 26؛ أَعَوذ. 27‏:‏26؛ ڒخ. 7‏:‏53؛ ڭال. 3‏:‏19. ٣ مَامّشْ إِ غَا نڭّْ أَذْ نَارْوڒْ نشِّينْ، مَاڒَا نسّحْقَارَا ثِيمسْڒَايِينْ إِ إِدْجَانْ ذ ثُوذَارْثْ إِ نشِّينْ، ثِيمسْڒَايِينْ إِ خفْ ثُوغَا إِسَّاوَاڒْ سِيذِيثْنغْ غَارْ ؤُمزْوَارُو، ؤُشَا خنِّي تّْوَاضمْننْثْ أَنغْ زڭْ يِينِّي جَارَانغْ إِ ثُوغَا ثنْثْ زَّايسْ إِسْڒِينْ، ◘2:‏3 مت. 4‏:‏17؛ مك. 1‏:‏14؛ عبر. 12‏:‏25. ٤ ؤُمِي أَربِّي إِشْهذْ أَكِيذْسنْ س ڒعْڒَامَاثْ ذ لْمُوعْجِيزَاثْ ذ ڒعْجَايبْ إِفَارْزنْ ؤُ س ثْموْشِي ن أَرُّوحْ إِقدّْسنْ، ثِينِّي إِمّوْشنْ أَمْ مَامّشْ إِخْسْ نتَّا. ◘2:‏4 مك. 16‏:‏20؛ ڒخ. 14‏:‏3؛ 19‏:‏11. ٥ مِينْزِي وَارْ إِسَّارْسْ شَا زّْمَانْ إِ د غَا يَاسنْ خْ ثنِّي نسِّيوڒْ، سَاذُو ڒُْومُورْ ن لْمَالَاكَاثْ، ٦ مَاشَا أَمْ مَامّشْ شهّْذنْثْ ؤُ قَّارنْثْ ثِيرَا إِقدّْسنْ:

”مِينْ إِعْنَا بْنَاذمْ،

أَقَا شكْ إِ ذَايسْ إِتّْخَارَّاصنْ،

ؤُ مِينْ إِعْنَا مِّيسْ ن بْنَاذمْ،

أَقَا شكْ إِ ذَايسْ إِتّْهِيلَّانْ؟ ◘2:‏6 إِزهد. 8‏:‏5.

٧ شكْ ثڭِّيذْ ث شْوَايْثْ سَاذُو لْمَالَاكَاثْ،

ثڭِّيذْ أَسْ أَعُودْجِي ذ شَّانْ خْ ؤُخدْجِيفْ نّسْ،

ثوْشِيذْ أَسْ صُّولْطَا خْ ڒخْذَايمْ ن إِفَاسّنْ نّشْ. ◘2:‏7 إِزهد. 8‏:‏7

٨ أَقَا مَارَّا ثِيمسْڒَايِينْ ثڭِّيذْ ثنْثْ

سَاذُو إِضَارنْ نّسْ.“

ؤُمِي إِڭَّا مَارَّا ثِيمسْڒَايِينْ سَاذُو نتَّا، أَقَا وَارْ إِجِّي وَالُو وَارْ ث إِڭِّي سَاذُو نتَّا. مَاشَا ڒخُّو وَارْ نْژَارْ عَاذْ مَارَّا إِتّْوَاڭّْ سَاذُو نتَّا، ◘2:‏8 إِزهد. 8‏:‏7؛ مت. 28‏:‏18؛ 1 كُور. 15‏:‏27؛ أَفا. 1‏:‏22. ٩ مَاشَا نتّْوَاڒَا بلِّي نتَّا، أَقَا-ث ذ يَاسُوع، ثُوغَا إِتّْوَاڭّْ شْوَايْثْ سَاذُو لْمَالَاكَاثْ ذِي سِّيبّثْ ن ؤُودّبْ ن ڒْْموْثْ نّسْ، نتّْوَاڒَا إِ-ث س تَّاجْ ن ؤُعُودْجِي ذ شَّانْ خْ ؤُزدْجِيفْ نّسْ، مَاغَارْ أَربِّي إِقَّاسْ ڒْْموْثْ إِ مَارَّا إِوْذَانْ عْلَاحْسَابْ أَرْضَا نّسْ. ◘2:‏9 ڒخ. 2‏:‏33؛ فِيل. 2‏:‏7، 8.

١٠ مِينْزِي ثُوغَا إِتّْڒِيقْ أَسْ إِ نتَّا س ونِّي ؤُ إِ ونِّي دْجَانْثْ مَارَّا ثْمسْڒَايِينْ - نتَّا ذ ونِّي إِ د-إِتَّاوْينْ أَطَّاسْ ن إِحنْجِيرنْ غَارْ ؤُعُودْجِي - مَاحنْذْ أَذْ إِكمّڒْ ؤُزدْجِيفْ ن ثُوذَارْثْ نْسنْ س ؤُودّبْ نّسْ. ١١ مِينْزِي ذ ونِّي إِسّْقدّْسنْ ذ يِينِّي إِتّْوَاقدّْسنْ، نِيثْنِي مَارَّا ذ إِجّنْ. س ؤُينِّي نتَّا وَارْ إِسضْحِي شَا أَذْ أَسنْ إِڒَاغَا أَوْمَاثنْ نّسْ، ◘2:‏11 ڒخ. 17‏:‏26. ١٢ ؤُمِي إِنَّا:

”أَذْ بَارّْحغْ إِ وَاوْمَاثنْ إِنُو س يِيسمْ نّشْ،

ذِي ڒْْوسْطْ ن ثْمسْمُونْثْ أَذْ شكْ صبّْحغْ.“ ◘2:‏12 إِزهد. 22‏:‏23.

١٣ ؤُشَا عَاوذْ:

”نشّْ أَذْ ذَايسْ تِّيقّغْ!“

ؤُشَا عَاوذْ:

”أَقَا ذَا، نشّْ ذ ثَارْوَا إِ ذ أَيِي إِوْشَا أَربِّي.“ ◘2:‏13 إِشا. 8‏:‏17، 18.

١٤ مِينْزِي ثَارْوَا شَارْشنْ ذڭْ ويْسُومْ ذ إِذَامّنْ، ؤُڒَا ذ نتَّا إِشَارْشْ أَمُّو كِيفْكِيفْ ذِي مَانْ أَيَا، حِيمَا أَذْ إِبطّڒْ س ڒْْموْثْ نّسْ ونِّي غَارْ ثدْجَا صُّولْطَا خْ ڒْْموْثْ، أَقَا نتَّا ذ شِّيطَانْ، ◘2:‏14 إِشا. 25‏:‏8؛ حُوش. 13‏:‏14؛ يُوح. 1‏:‏14؛ 1 كُور. 15‏:‏54؛ فِيل. 2‏:‏7؛ 2 تِيم. 1‏:‏10. ١٥ ؤُشَا خنِّي أَذْ إِفكّْ إِنِّي إِسّعْدُّونْ قَاعْ ثُوذَارْثْ نْسنْ أَمْ إِسمْغَانْ زِي ثِيڭّْوُوذِي ن ڒْْموْثْ. ◘2:‏15 رُوم. 8‏:‏15. ١٦ مِينْزِي ڒْْموْثْ وَارْ غَارسْ ثدْجِي صُّولْطَا خْ لْمَالَاكَاثْ، مَاشَا ڒْْموْثْ غَارسْ صُّولْطَا خْ زَّارِيعثْ ن إِبْرَاهِيمْ. ١٧ س ؤُينِّي ثُوغَا إِتّْخصَّا أَسْ أَذْ إِذْوڒْ أَمْ وَاوْمَاثنْ نّسْ زِي مَارَّا إِغزْذِيسنْ، حِيمَا أَذْ إِذْوڒْ ذ أَرَّايْسْ ن إِكهَّاننْ أَرْحِيمْ ذ أَمْثِيقِّي ذِي مِينْ إِدْجَانْ إِ أَربِّي، ؤُشَا أَذْ يِيڒِي بْڒَا ڒْْعِيبْ زِي جِّيهثْ ن دّْنُوبْ ن ڒْْڭنْسْ. ◘2:‏17 فِيل. 2‏:‏7؛ عبر. 4‏:‏15. ١٨ مِينْزِي مِينْ ذِي ثُوغَا نتَّا سِيمَانْثْ نّسْ إِودّبْ ؤُ إِتّْوَاجَارّبْ، أَقَا إِزمَّارْ أَذْ إِعَاونْ إِنِّي إِتّْوَاجَارّْبنْ. ◘2:‏18 عبر. 4‏:‏15، 16.