أَذْلِيسْ إِقدّْسنْ مَاتَّا ٣

أَبَارّحْ ن يُوحَانَّا أَمْسغْضَاصْ

١ ذڭْ وُوسَّانْ نِّي يُوسَا-د يُوحَانَّا أَمْسغْضَاصْ، ثُوغَا إِتّْبَارّحْ ذِي ڒخْڒَا ن يَاهُوذِييَّا، ◘ ٢ إِنَّا:

”ثُوبمْ، مِينْزِي ثَاڭلْذِيثْ ن إِجنْوَانْ.

أَقَا ثُوذسْ-د.“

٣ مِينْزِي نتَّا ذ ونِّي خفْ إِتّْوَانَّانْ زڭْ ؤُنَابِي إِشَاعْيَا أَمْ إِنَّا:

”ثْمِيجَّا إِ إِتّْڒَاغَانْ ذِي ڒخْڒَا:

’سْوجْذمْ أَبْرِيذْ ن سِيذِي،

سڭّمْ إِمسْرَاقْ نّسْ.‘ “ ◘

٤ يُوحَانَّا وَانِيثَا ثُوغَا يَارّضْ أَرُّوضْ ن ثَاضُوفْثْ ن إِڒغْمَانْ، إِبكّسْ إِجّْ ن وبْيَاسْ ن يِيڒمْ. ؤُشَا مَاشَّا نّسْ ثُوغَا ذ إِبُورخْسنْ ذ ثَامّنْثْ ثَاحُورّشْثْ. ◘ ٥ ڒخْذنِّي ثفّغْ-د غَارسْ ؤُرْشَالِيمْ ذ قَاعْ يَاهُوذِييَّا ذ مَارَّا جّْوَايهْ إِ ذ أَسْ د-إِنّْضنْ إِ لْ-ؤُرْذُونْ، ٦ ؤُشَا تّْوَاسّْغضْصنْ زَّايسْ ذڭْ إِغْزَارْ ن لْ-ؤُرْذُونْ، نعْمنْ س دّْنُوبْ نْسنْ. ◘

٧ ڒَْامِي إِژْرَا أَطَّاسْ ن إِفَارِيسِييّنْ ذ إِصَاذُوقِييّنْ تَّاسنْ-د مَاحنْذْ أَذْ تّْوَاسّْغضْصنْ، إِنَّا أَسنْ: ”أَ ثَارْوَا ن إِفِيغْرَانْ، وِي ذ أَومْ إِمْڒنْ، أَقَا ثْزمَّارمْ أَذْ ثَاروْڒمْ زڭْ وغْضَابْ إِ د غَا يَاسنْ؟ ◘ ٨ ڭّمْ ڒْْغِيدْجثْ إِ غَا إِڒِيقّنْ إِ تُّوبثْ. ◘ ٩ وَارْ تّْغِيڒمْ شَا أَذْ ثِينِيمْ ذڭْ إِخفْ نْومْ: ’إِبْرَاهِيمْ ذ جذِّيثْنغْ!‘، مِينْزِي نشّْ أَذْ أَومْ إِنِيغْ بلِّي أَربِّي إِزمَّارْ أَذْ إِسّْنكَّارْ زڭْ إِژْرَا-يَا ثَارْوَا إِ إِبْرَاهِيمْ. ◘ ١٠ خْزَارْ، ثَاشَاقُورْثْ ثتّْوَاسَّارْسْ غَارْ إِژوْرَانْ ن ثْشجِّيرَا. س ؤُيَا كُوڒْ ثَاشجَّارْثْ إِ وَارْ إِتِّيشنْ ڒْْغِيدْجثْ ثشْنَا، أَذْ ثتّْوَاقسّْ ؤُشَا أَذْ ثوْضَا ذِي ثْمسِّي. ◼ ◘ ١١ نشّْ أَذْ كنِّيوْ سّْغضْصغْ ذڭْ وَامَانْ إِ تُّوبثْ، مَاشَا ونِّي إِ د غَا يَاسنْ أَوَارْنِي أَيِي، نتَّا إِجْهذْ خَافِي، نشّْ وَارْ سْذِيهِيدْجغْ أَذْ كْسِيغْ سَانْذَالِييَاثْ نّسْ. أَقَا نتَّا أَذْ كنِّيوْ إِسّغْضصْ ذِي أَرُّوحْ إِقدّْسنْ ذ ثْمسِّي. ◘ ١٢ ثَازَّارْثْ نّسْ ذڭْ ؤُفُوسْ نّسْ، أَذْ إِزُّوزَارْ أَنْذْرَارْ نّسْ قَاعْ، أَذْ إِيْرُو إِرْذنْ غَارْ ڒمْرَاسِي نّسْ، مَاشَا إِشَارْفَا أَذْ ثنْ إِسّشْمضْ س ثْمسِّي إِ وَارْ إِخسّْينْ.“

أَسغْضصْ ن يَاسُوع

١٣ ڒخْذنِّي يُوسَا-د يَاسُوع زِي لْجَالِيلْ غَارْ لْ-ؤُرْذُونْ، غَارْ يُوحَانَّا، حِيمَا أَذْ إِتّْوَاسغْضصْ زَّايسْ. ◼ ◘ ١٤ مَاشَا يُوحَانَّا يُوڭِي أَسْ، إِنَّا: ”نشّْ حْذَاجغْ أَذْ تّْوَاسّْغضْصغْ زَّايكْ. مَا أَقَا ذ شكْ إِ غَارِي إِ د غَا يَاسنْ؟“

١٥ مَاشَا يَاسُوع يَارَّا-د، إِنَّا أَسْ: ”أوْشْ ڒخُّو تّسْرِيحْ، مِينْزِي أَمُّو إِ ذ أَنغْ إِتّْڒِيقْ حِيمَا أَذْ نْكمّڒْ مَارَّا ثَاسڭْذَا.“ ڒخْذنِّي إِسَامْحْ أَسْ. ١٦ أَوَارْنِي ڒَامِي إِتّْوَاسّغْضصْ يَاسُوع، يُوڒِي-د زڭْ وَامَانْ ذغْيَا، ؤُ تّْوَارْزْمنْ أَسْ إِجنْوَانْ، ؤُشَا إِژْرَا أَرُّوحْ ن أَربِّي إِهْوَا-د أَمْ ثَاذْبِيرْثْ، ثَارْسَا خَاسْ. ◘ ١٧ خْزَارْ، ثُوسَا-د إِشْثْ ن ثْمِيجَّا زڭْ إِجنْوَانْ، ثنَّا: ”ذ وَا ذ مِّي إِعِيزّنْ، ذَايسْ ؤُفِيغْ أَرْضَا إِنُو.“ ◘ *

◘٣:١ 3:‏1 [مك. 1‏:‏1‏-‏8؛ لك. 3‏:‏1‏-‏9، 15‏-‏17؛ يُوح. 1‏:‏19‏-‏28] — مك. 1‏:‏4؛ لك. 3‏:‏3.

◘٣:٣ 3:‏3 إِشا. 40‏:‏3؛ مك. 1‏:‏3؛ لك. 3‏:‏4؛ يُوح. 1‏:‏23.

◘٣:٤ 3:‏4 مك. 1‏:‏6.

◘٣:٦ 3:‏6 مك. 1‏:‏5.

◘٣:٧ 3:‏7 مت. 12‏:‏34؛ 23‏:‏33؛ لك. 3‏:‏7.

◘٣:٨ 3:‏8 لك. 3‏:‏8.

◘٣:٩ 3:‏9 يُوح. 8‏:‏39.

◼٣:١٠ 3:‏10 ’ثَاشجَّارْثْ‘ - نِيغْ ’أَدَّاڭْ‘ (’إِدَّاڭنْ‘).

◘٣:١٠ 3:‏10 مت. 7‏:‏19؛ يُوح. 15‏:‏6.

◘٣:١١ 3:‏11 مك. 1‏:‏7؛ لك. 3‏:‏16؛ يُوح. 1‏:‏15، 26؛ ڒخ. 1‏:‏5؛ 11‏:‏16؛ 19‏:‏4.

◼٣:١٣ 3:‏13 ’إِتّْوَاسغْضصْ‘ - نْزمَّارْ أَذْ نسّمْقُودَّا أَسغْضسْ أَكْ-ذ ونْضڒْ ن بْنَاذمْ ذِي ڒبْحَارْ، ذڭْ وَامَانْ، خنِّي أَوَارْنِي أَسْ إِتّْوَاسّْنكَّارْ-د زَّايْسنْ. ذ مَانْ أَيَا ذ إِجّْ ن ؤُمذْيَا ن ونْضڒْ ن بْنَاذمْ أَقْذِيمْ ذ ثْنُوكّْرَا ن بْنَاذمْ ن جْذِيذْ س لْ-إِيمَانْ ذِي يَاسُوع لْمَاسِيحْ. أَسغْضصْ ذِي يَاسُوع وَارْ إِدْجِي ذ إِشْثْ ن ڒعْڒَامثْ ن طْهَارثْ وَاهَا، مَاشَا غَارْ ؤُمزْوَارْ أَقَا أَسغْضصْ ڒعْڒَامثْ ن ؤُمنْضَارْ ن بْنَاذمْ أَقْذِيمْ ذڭْ وَامَانْ ؤُ ن ثْنُوكّْرَا نّسْ زڭْ وَامَانْ أَمْ بْنَاذمْ ذ جْذِيذْ س لِيمَانْ ذِي يَاسُوع لْمَاسِيحْ. خْزَارْ رُوم. 6:1-14.

◘٣:١٣ 3:‏13 [مك. 1‏:‏9‏-‏11؛ لك. 3‏:‏21‏-‏22] — مك. 1‏:‏9؛ لك. 3‏:‏21.

◘٣:١٦ 3:‏16 إِشا. 11‏:‏2؛ 42‏:‏1؛ يُوح. 1‏:‏32.

◘٣:١٧ 3:‏17 إِشا. 42‏:‏1؛ مت. 12‏:‏18؛ 17‏:‏5؛ مك. 1‏:‏11؛ لك. 9‏:‏35؛ كُول. 1‏:‏13؛ 2 بُط. 1‏:‏17.