أَذْلِيسْ إِقدّْسنْ مَاتَّا ٤

إِبْڒِيسْ إِتّْجَارّبْ يَاسُوع ذِي ڒخْڒَا

١ ڒخْذنِّي إِتّْوَانْذهْ يَاسُوع غَارْ ڒخْڒَا زِي أَرُّوحْ إِقدّْسنْ، حِيمَا أَذْ إِتّْوَاجَارّبْ زڭْ إِبْڒِيسْ. ◼ ◘ ٢ أَوَارْنِي ڒَْامِي ثُوغَا إِژُومّْ أَربْعِينْ ن وُوسَّانْ ذ أَربْعِينْ ن دْجْيَاڒِي، يُوسَا أَسْ-د جُّوعْ غَارْ ؤُنڭَّارْ. ٣ يُوسَا-د غَارسْ ؤُمْجَارَّابْ، إِنَّا أَسْ: ”مَاڒَا شكْ ذ مِّيسْ ن أَربِّي، إِنِي إِ إِژْرَا-يَا أَذْ ذوْڒنْ ذ أَغْرُومْ!“ ٤ يَارَّا-د خَاسْ إِنَّا: ”أَقَا ثُورَا:

’بْنَاذمْ وَارْ إِدَّارْ س وغْرُومْ وَاهَا،

مَاشَا زِي كُوڒْ أَوَاڒْ

إِ د-إِتّكّنْ زڭْ ؤُقمُّومْ ن أَربِّي.‘ “ ◘

٥ ڒخْذنِّي يِيوْيِي ث إِبْڒِيسْ غَارْ ثنْذِينْثْ إِقدّْسنْ ؤُشَا إِسّْبدّْ إِ-ث غَارْ طَّارْفْ ن ثْزقَّا ن زَّاوشْثْ ثَامقّْرَانْثْ، ٦ إِنَّا أَسْ: ”مَاڒَا شكْ ذ مِّيسْ ن أَربِّي، إِوَا، نْضَارْ إِخفْ نّشْ غَارْ وَادَّايْ، مِينْزِي أَقَا ثُورَا:

’أَذْ يُومُورْ لْمَالَاكَاثْ نّسْ خَاكْ،

أَذْ شكْ كْسِينْثْ خْ إِفَاسّنْ نْسنْثْ،

حِيمَا أَضَارْ نّشْ وَارْ إِنڭّحْ شَا أَژْرُو.‘ “ ◘

٧ يَاسُوع إِنَّا أَسْ: ”ثُورَا عَاوذْ:

’وَارْ تّْجَارَّابْ سِيذِي، أَربِّي نّشْ!‘ “ ◘

٨ يِيوْيِي ث عَاوذْ إِبْڒِيسْ غَارْ وذْرَارْ يُوعْڒَانْ أَطَّاسْ، إِسّْشنْ أَسْ مَارَّا ثِيڭلْذِيوِينْ ن دُّونشْثْ ذ ؤُعُودْجِي نْسنْثْ، ٩ إِنَّا أَسْ: ”أَذْ أَشْ وْشغْ مَارَّا مَانْ أَيَا، مَاڒَا ثوْضِيذْ أَيِي غَارْ إِضَارنْ، أَذْ أَيِي ثْسجْذذْ!“ ١٠ إِنَّا أَسْ يَاسُوع: ”رُوحْ، أَ شِّيطَانْ، مِينْزِي ثُورَا:

’سِيذِي، أَربِّي نّشْ، ؤُمِي غَا ثْسجْذذْ

ؤُ إِ نتَّا وحّْذسْ ؤُمِي غَا ثْسخَّارذْ.‘ “ ◼ ◘

١١ ڒخْذنِّي إِجَّا إِ-ث إِبْڒِيسْ، ؤُ خْزَارْ، لْمَالَاكَاثْ ؤُسِينْثْ-إِ-د، ثُوغَا سخَّارنْثْ أَسْ.

أَمزْوَارُو ن ثْسخَّارْثْ ن يَاسُوع ذِي لْجَالِيلْ

١٢ ڒَْامِي إِسْڒَا يَاسُوع بلِّي يُوحَانَّا ثُوغَا إِتّْوَاسلّمْ، إِرُوحْ غَارْ لْجَالِيلْ. ◘ ١٣ إِجَّا نَّاصِيرَا ؤُشَا يُوسَا-د غَارْ كَافَارْنَاحُومْ، ثنِّي غَارْ طَّارْفْ ن ڒبْحَارْ، ذِي ثمُّورْثْ ن زِيبُولُونْ ذ نَافْثَالِي ؤُشَا إِزْذغْ ذِينْ ١٤ حِيمَا أَذْ إِتّْوَاكمّڒْ مِينْ إِتّْوَانَّانْ زڭْ ؤُنَابِي إِشَاعْيَا ؤُمِي إِنَّا:

١٥ ”ثَامُّورْثْ ن زِيبُولُونْ ذ ثمُّورْثْ ن نَافْثَالِي

ذڭْ وبْرِيذْ ن ڒبْحَارْ،

غَارْ ؤُجمَّاضْ ن لْ-ؤُرْذُونْ، لْجَالِيلْ ن ڒڭْنُوسْ. ◘

١٦ ڒْْڭنْسْ إِ إِقِّيمنْ ذِي ثَادْجسْثْ

إِژْرَا ثَافَاوْثْ ثَامقّْرَانْثْ،

ؤُ خْ يِينِّي إِزذْغنْ

ذِي ثمُّورْثْ ذ ثِيڒِي ن ڒْْموْثْ،

أَقَا ثنْقَارْ-د خَاسنْ ثْفَاوْثْ.“ ◘

١٧ زِي سِّينْ إِبْذَا يَاسُوع إِتّْبَارّحْ، إِنَّا: ”ثُوبمْ مِينْزِي ثَاڭلْذِيثْ ن إِجنْوَانْ أَقَا ثُوذسْ-د.“ ◘

١٨ ڒَْامِي ثُوغَا نتَّا إِڭُّورْ خْ ثْمَا ن ڒبْحَارْ ن لْجَالِيلْ، إِژْرَا ثْنَاينْ ن وَاوْمَاثنْ، شِيمْعُونْ ؤُمِي قَّارنْ بُوطْرُوسْ، إِسمْ وَانِيثَا إِخْسْ أَذْ يِينِي ’ذ أَژْرُو‘، ذ أَنْذْرَاوُوسْ ؤُمَاسْ، ثُوغَا نطَّارنْ ثْرَاشَّاوِينْ ذِي ڒبْحَارْ مِينْزِي نِيثْنِي ذ إِنيْمَارنْ ن إِسڒْمَانْ. ◘ ١٩ إِنَّا أَسنْ يَاسُوع: ”ضْفَارمْ أَيِي-د، أَذْ كنِّيوْ أَرّغْ ذ إِنيْمَارنْ ن إِوْذَانْ.“ ٢٠ سَّارْسنْ ذغْيَا ثِيرَاشِّيوِينْ نْسنْ، ضْفَارنْ ث.

٢١ ڒَْامِي يعْذُو سّنِّي، إِژْرَا ثْنَاينْ ن وَاوْمَاثنْ نّغْنِي، يَاعْقُوبْ مِّيسْ ن زَابْذِي ذ ؤُمَاسْ يُوحَانَّا، ثُوغَا أَثنْ أَكْ-ذ بَابَاثْسنْ زَابْذِي ذڭْ ؤُغَارَّابُو،عدّْڒنْ ثِيرَاشِّيوِينْ نْسنْ ؤُشَا نتَّا إِڒَاغَا خَاسنْ. ٢٢ ذغْيَا سمْحنْ ذڭْ ؤُغَارَّابُو ؤُ ذِي بَابَاثْسنْ، ضْفَارنْ ث.

٢٣ ثُوغَا يَاسُوع إِتّنّضْ ذِي ثمُّورْثْ ن لْجَالِيلْ مَارَّا، إِسّڒْمَاذْ ذِي ثمْزِيذَاوِينْ نْسنْ، إِتّْبَارّحْ س ڒخْبَارْ أَصبْحَانْ ن ثْڭلْذِيثْ ؤُشَا إِسّْڭنْفَا كُوڒْ ڒهْڒَاشْ ذ كُوڒْ ڒعْيُوبَاثْ إِ إِدْجَانْ ذِي ڒْْڭنْسْ. ◘ ٢٤ إِفّغْ ڒخْبَارْ خَاسْ ذِي سُورِييَا مَارَّا، ؤُشَا إِوْينْ-د غَارسْ مَارَّا إِمهْڒَاشْ إِنِّي غَارْ إِدْجَا عْڒَامْ كُوڒْ ڒهْڒَاشْ ڒَْا ذ يِينِّي ذَايْسنْ ڒحْرِيقْ ڒَْا ذ إِنِّي ذَايْسنْ شّْوَاطنْ ڒَْا ذ يِينِّي إِتّْبَارْكِيكِّيضنْ ؤُڒَا ذ إِنعْضَابنْ، ؤُشَا إِسّْڭنْفَا إِ-ثنْ. ٢٥ ضْفَارنْ ث-إِ-د أَطَّاسْ ن ڒْْغَاشِي زِي لْجَالِيلْ، زِي ذِيكاپُولِيسْ، زِي ؤُرْشَالِيمْ، زِي يَاهُوذِييَّا ؤُ زڭْ ؤُجمَّاضْ ن لْ-ؤُرْذُونْ.

◼٤:١ 4:‏1 ’إِبْڒِيسْ‘ - إِسمْ-أَ وَانِيثَا إِخْسْ أَذْ يِينِي ’ونِّي إِعيّْبنْ‘. إِبْڒِيسْ نتَّا ذ شِّيطَانْ أَمقّْرَانْ.

◘٤:١ 4:‏1 [مك. 1‏:‏12‏-‏13؛ لك. 4‏:‏1‏-‏13] — مك. 1‏:‏12؛ لك. 4‏:‏1.

◘٤:٤ 4:‏4 أَعَوذ. 8‏:‏3

◘٤:٦ 4:‏6 إِزهد. 91‏:‏11، 12.

◘٤:٧ 4:‏7 أَعَوذ. 6‏:‏16.

◼٤:١٠ 4:‏10 ’شِّيطَانْ‘ - أَقَا-ث ذ شِّيطَانْ أَمقّْرَانْ ونِّي إِدْجَانْ خْ مَارَّا شّْوَاطنْ.

◘٤:١٠ 4:‏10 أَعَوذ. 6‏:‏13؛ 10‏:‏20.

◘٤:١٢ 4:‏12 [مك. 1‏:‏14‏-‏20؛ لك. 4‏:‏14‏-‏15؛ لك. 5‏:‏1‏-‏11؛ 6‏:‏17‏-‏19؛ 16، 31؛ يُوح. 4‏:‏43] — مك. 1‏:‏14؛ لك. 4‏:‏14؛ 16‏:‏31؛ يُوح. 4‏:‏43.

◘٤:١٥ 4:‏15 إِشا. 8‏:‏23؛ 9‏:‏1.

◘٤:١٦ 4:‏16 إِشا. 9‏:‏1

◘٤:١٧ 4:‏17 مك. 1‏:‏15.

◘٤:١٨ 4:‏18 [مك. 1‏:‏16‏-‏20؛ لك. 5‏:‏1‏-‏11] — مك. 1‏:‏16.

◘٤:٢٣ 4:‏23 [لك. 6‏:‏17‏-‏19]