أَذْلِيسْ إِقدّْسنْ مَاتَّا ٥

أَبَارّحْ خْ وذْرَارْ

١ ڒَْامِي إِژْرَا يَاسُوع ڒْْغَاشِي، يُوڒِي غَارْ وذْرَارْ، ؤُشَا أَوَارْنِي ڒَْامِي ذِينْ إِقِّيمْ، ؤُسِينْ-د غَارسْ إِمحْضَارنْ نّسْ. ◘ ٢ ؤُشَا يَارْزمْ أَقمُّومْ نّسْ، إِسّڒْمذْ إِ-ثنْ، إِنَّا:

٣ سّعْذْ ن يِينِّي أَرُّوحْ نْسنْ إِزْڒضْ،

مِينْزِي ثَاڭلْذِيثْ ن إِجنْوَانْ أَقَا-ت إِ نِيثْنِي. ◘

٤ سّعْذْ ن يِينِّي إِتّشْضِيننْ،

مِينْزِي نِيثْنِي أَذْ تّْوَاعزَّانْ. ◘

٥ سّعْذْ ن إِمْوَاضْعنْ،

مِينْزِي نِيثْنِي أَذْ وَارْثنْ ثَامُّورْثْ. ◘

٦ سّعْذْ ن يِينِّي إِتّْڒَاژَانْ

ذ يِينِّي إِتّْفَاذنْ غَارْ ثْسڭْذَا،

مِينْزِي نِيثْنِي أَذْ جِّيوْننْ. ◘

٧ سّعْذْ ن يِينِّي يَارحّْمنْ،

مِينْزِي أَذْ غَارْسنْ ثِيڒِي أَرّحْمثْ.

٨ سّعْذْ ن يِينِّي إِ غَارْ إِدْجَا ؤُڒْ إِزْذِيڭْ،

مِينْزِي نِيثْنِي أَذْ ژَترنْ أَربِّي. ◘

٩ سّعْذْ ن يِينِّي إِتّڭّنْ ڒهْنَا،

مِينْزِي نِيثْنِي أَذْ تّْوَاسمَّانْ أَرَّاونْ ن أَربِّي.

١٠ سّعْذْ ن يِينِّي إِنّحْصَارنْ

خْ سِّيبّثْ ن ثْسڭْذَا،

مِينْزِي ثَاڭلْذِيثْ ن إِجنْوَانْ أَذْ غَارْسنْ ثِيڒِي. ◘

١١ سّعْذْ إِ كنِّيوْ مَاڒَا تّْعَايَارنْ

ؤُ تّْذَارَّاشنْ خَاومْ

ؤُشَا أَذْ خَاومْ إِنِينْ

عْڒَامْ كُوڒْ أَوَاڒنْ إِعفَّاننْ خْ سِّيبّثْ إِنُو،

وَاخَّا سّْخَارِّيقنْ. ◘

١٢ فَارْحمْ، سْڒِيوڒْومْ،

مِينْزِي ڒْْمُونثْ نْومْ ذ ثَامقّْرَانْثْ ذڭْ إِجنْوَانْ،

مِينْزِي أَمُّو إِ ثُوغَا تّْذَارَّاشنْ إِنَابِييّنْ،

إِنِّي قْبڒْ نْومْ.“ ◘

١٣ ”كنِّيوْ ذ ثَامدْجَاحْثْ ن ثمُّورْثْ. مَاشَا مَاڒَا ثَامدْجَاحْثْ إِخْسَارْ ؤُڒذِّي نّسْ، مَامّشْ غَا نڭّْ أَذْ ت نَارّْ ذ ثَامدْجَاحْثْ؟ وَارْ ثْنفّعْ عَاذْ إِ وَالُو، حَاشَا أَذْ ثمّنْضَارْ غَارْ بَارَّا، أَذْ خَاسْعفْسنْ إِوْذَانْ.“

١٤ ”كنِّيوْ ذ ثَافَاوْثْ ن دُّونشْثْ. ثَانْذِينْثْ إِ إِتّْوَابْنَانْ خْ وذْرَارْ، وَارْ ثْزمَّارْ أَذْ ثنُّوفَّارْ. ١٥ وَارْ سّْرقِّينْ ڒفْنَارْ ؤُشَا أَذْ ث سَّارْسنْ سَاذُو ڒْْمُوذْ، مَاشَا أَذْ ث سَّارْسنْ خْ ڒْْمرْفعْ، مَاحنْذْ أَذْ يَارْغْ إِ مَارَّا إِنِّي إِدْجَانْ ذِي ثَادَّارْثْ. ◘ ١٦ جّمْ ثَافَاوْثْ نْومْ أَذْ ثَارْغْ إِ إِوْذَانْ، حِيمَا أَذْ ژَترنْ ڒخْذَايمْ نْومْ إِشْنَانْ، أَذْ سُّوعْڒَانْ بَابَاثْومْ إِ إِدْجَانْ ذڭْ إِجنْوَانْ.“ ◘

١٧ ”أَقَا أَذْ أَومْ إِتّْغِيڒْ أَقَا ؤُسِيغْ-د حِيمَا أَذْ سّْبطّْڒغْ شَّارِيعَا نِيغْ إِنَابِييّنْ. نشّْ وَارْ د-ؤُسِيغْ شَا حِيمَا أَذْ سّْبطّْڒغْ، مَاشَا حِيمَا أَذْ كمّْڒغْ. ◼ ١٨ س ثِيذتّْ، نشّْ أَذْ أَومْ إِنِيغْ: أَڒْ إِ غَا إِعْذُو ؤُجنَّا ذ ثمُّورْثْ، وَارْ إِبطّڒْ ؤُڒَا ذ إِجّنْ ڒْْحَارْفْ نِيغْ ذ إِشْثنْ ثَانقِّيطْ زِي شَّارِيعَا أَڒْ غَا يِيڒِي كُوڒْشِي. ◘ ١٩ س ؤُيَا ونِّي إِ غَا إِسّْبطّْڒنْ زِي ثْوصَّا-يَا إِشْثنْ، وَاخَّا ذ ثَامژْيَانْثْ، ؤُشَا إِسّڒْمَاذْ إِوْذَانْ أَمُّو، أَذْ إِتّْوَاسمَّا ذ أَمژْيَانْ ذِي ثْڭلْذِيثْ ن إِجنْوَانْ، مَاشَا ونِّي زَّايْسنْثْ إِڭِّينْ ؤُ إِسّڒْمَاذْ إِ-ثنْثْ، نتَّا أَذْ إِتّْوَاسمَّا ذ أَمقّْرَانْ ذِي ثْڭلْذِيثْ ن إِجنْوَانْ. ◘ ٢٠ مِينْزِي نشّْ أَذْ أَومْ إِنِيغْ: مَاڒَا ثَاسڭْذَا نْومْ وَارْ ثْمقَّارْ شَا خْ ثنِّي ن إِمْسڒْمَاذنْ ن إِذْلِيسنْ ذ ثنِّي ن إِفَارِيسِييّنْ، س ثِيذتّْ وَارْ ثتِّيذْفمْ شَا غَارْ ثْڭلْذِيثْ ن إِجنْوَانْ!“

٢١ ”أَقَا ثسْڒِيمْ بلِّي إِتّْوَانَّا إِ ڒجْذُوذْ: ’وَارْ نقّْ!‘، ؤُ: ’ونِّي إِنقّنْ، أَذْ إِتّْوَاحَاسبْ!‘ ◘ ٢٢ مَاشَا نشّْ أَذْ أَومْ إِنِيغْ: مَارَّا ونِّي إِتّْخيَّاقنْ خْ ؤُمَاسْ بْڒَا سِّيبّثْ، نْهْڒَا مَا أَذْ خَاسْ إِتّْوَاحَاكمْ، ؤُ مَارَّا ونِّي إِقَّارنْ إِ ؤُمَاسْ: ’أَذْ خَاكْ سُّوسْفغْ!‘، أَذْ إِتّْوَاحْكمْ خَاسْ زَّاثْ إِ جْمَاعثْ ثَامقّْرَانْثْ، ؤُ ونِّي إِقَّارنْ: ’أَ أَبُوهَاڒِي!‘ أَذْ إِتّْوَاحَاكمْ، أَذْ يَاذفْ غَارْ ثْمسِّي ن جهنَّامَا. ◼ ٢٣ مَاڒَا ثْقدّْمذْ ثَاوْهِيبْثْ نّشْ خْ ؤُعَالْطَارْ مِينْ خفْ سَّارْسنْ ثِيغَارْصَا ذ ثوْهِيبِينْ، ؤُشَا ذِينِّي ثْعقْڒذْ بلِّي ؤُمَاشْ أَقَا-ث شَا خَاكْ، ٢٤ أجّْ ثَاوْهِيبْثْ نّشْ ذِينْ زَّاثْ إِ ؤُعَالْطَارْ، رُوحْ أَمزْوَارُو، ثْصڒْحذْ أَكْ-ذ ؤُمَاشْ، خنِّي ذْوڒْ-د، ؤُشَا أوْشْ ثَاوْهِيبْثْ نّشْ. ٢٥ إِڒِي ثْوجْذذْ إِ وصْڒَاحْ أَكْ-ذ وغْرِيمْ نّشْ ؤُمِي شكْ عَاذْ أَكِيذسْ ذڭْ وبْرِيذْ، حِيمَا أَغْرِيمْ نّشْ وَارْ شكْ إِتِّيوِي غَارْ ڒْْقَاضِي، خنِّي ڒْْقَاضِي أَذْ شكْ يَاوِي غَارْ ؤُمْخَازْنِي ؤُشَا أَذْ ثمّنْضَارذْ ذِي ڒحْبسْ. ◘ ٢٦ س ثِيذتّْ، نشّْ أَذْ أَشْ إِنِيغْ: وَارْ د-ثفّْغذْ سّنِّي، أَڒْ غَا ثْخدْجْصذْ أَصُولْذِي أَنڭَّارُو.“

٢٧ أَقَا ثسْڒِيمْ بلِّي إِتّْوَانَّا: ’وَارْ زنِّي شَا!‘، ◘ ٢٨ مَاشَا نشّْ أَذْ أَومْ إِنِيغْ، مَارَّا ونِّي إِ غَا إِخْزَارنْ غَارْ ثمْغَارْثْ س نّشْوثْ، أَقَا إِزْنَا ذغْيَا أَكِيذسْ ذڭْ وُوڒْ نّسْ. ◘ ٢٩ مَاڒَا ثسّنْقَارْضْ شكْ ثِيطّْ نّشْ ثَافُوسشْثْ، قسّْ إِ-ت، نْضَارْ إِ-ت خَاكْ. إِحْڒَا أَشْ مَاڒَا إِودَّارْ إِجّْ ن طَّارْفْ ن أَرِّيمثْ نّشْ خْ ؤُوطُّو ن أَرِّيمثْ نّشْ مَارَّا ذِي جهنَّامَا. ◘ ٣٠ مَاڒَا ثسّنْقَارْضْ شكْ أَفُوسْ نّشْ أَفُوسِي، قسّْ إِ-ث، نْضَارْ إِ-ث خَاكْ، مِينْزِي إِحْڒَا أَشْ مَاڒَا إِودَّارْ إِجّْ ن طَّارْفْ ن أَرِّيمثْ نّشْ وَاهَا خْ ؤُوطُّو ن أَرِّيمثْ نّشْ مَارَّا ذِي جهنَّامَا.“

٣١ ”أَقَا إِتّْوَانَّا عَاوذْ: ’ونِّي إِ غَا إِدْجْفنْ إِ ثمْغَارْثْ نّسْ، أَذْ أَسْ إِوْشْ ثَابْرَاثْ ن وَادْجَافْ!‘ ◘ ٣٢ مَاشَا نشّْ أَذْ أَومْ إِنِيغْ: مَارَّا ونِّي إِ غَا إِدْجْفنْ إِ ثمْغَارْثْ نّسْ، وَارْ إِدْجِي زِي سِّيبّثْ ن فَارْقْ-شّْغڒْ، إِتَّارَّا إِ-ت أَذْ ثزْنَا، ؤُشَا ونِّي إِ غَا إِمڒْشنْ ثنِّي ؤُمِي إِدْجْفنْ، أَقَا نتَّا إِزْنَا.“ ◘

٣٣ ”أَقَا ثسْڒِيمْ عَاوذْ بلِّي إِتّْوَانَّا إِ ڒجْذُوذْ: ’وَارْ ثجَّادْجِيذْ ژُورْ، مَاشَا أڭّْ مِينْ ثجِّيدْجذْ إِ سِيذِي!‘ ◘ ٣٤ مَاشَا نشّْ أَذْ أَومْ إِنِيغْ: وَارْ ثجَّادْجَامْعمَّارْصْ، ؤُڒَا غَارْ ؤُجنَّا مِينْزِي نتَّا ذ ڒْْعَارْشْ ن أَربِّي، ◘ ٣٥ ؤُڒَا غَارْ ثمُّورْثْ، مِينْزِي نتَّاثْ ذ ثَانبْذَاثْ سَاذُو إِضَارنْ نّسْ، ؤُڒَا غَارْ ثنْذِينْثْ ن ؤُرْشَالِيمْ، مِينْزِي نتَّاثْ ذ ثَانْذِينْثْ ن ؤُجدْجِيذْ ذ أَمقّْرَانْ، ◘ ٣٦ ؤُشَا وَارْ ثجَّادْجَامْ ؤُڒَا غَارْ ؤُزدْجِيفْ نّشْ، مِينْزِي وَارْ ثْزمَّارذْ أَذْ ثَارّذْ ؤُڒَا ذ إِجّْ ن ؤُژطُّو ن ؤُشُووَّافْ ذ أَشمْڒَاڒْ نِيغْ ذ أَبَارْشَانْ. ٣٧ أَذْ إِقِّيمْ وَاوَاڒْ نْومْ ’وَاهْ!‘ ذ ’وَاهْ!‘، ’لَّ!‘ ذ ’لَّ!‘. مَانَا كْثَارْ زِي مَانْ أَيَا، أَقَا نتَّا زڭْ ؤُمْعفَّانْ.“

٣٨ ”أَقَا ثسْڒِيمْ بلِّي إِتّْوَانَّا: ’ثِيطّْ س ثِيطّْ ذ ثِيغْمسْثْ س ثغْمسْثْ!‘، ◘ ٣٩ مَاشَا نشّْ أَذْ أَومْ إِنِيغْ، وَارْ ثتّمْعَاڒَامْ شَا أَكْ-ذ إِجّْ ن ؤُعفَّانْ، مَاشَا ونِّي إِ غَا إِسّقّْڒنْ أَمڭِّيزْ نّشْ أَفُوسِي، سڒْقَا يَاسْ ؤُڒَا ذ أَمڭِّيزْ نّغْنِي. ◘ ٤٠ مَاڒَا ذِينْ حذْ إِخْسْ أَذْ كِيكْ إِڭّْ شّْرعْ ؤُشَا نتَّا أَذْ خَاكْ إِكّسْ ثْشَامِيرْ نّشْ، أجّْ إِ-ث أَذْ إِكْسِي ؤُڒَا ذ أَجدْجَابْ. ◘ ٤١ ونِّي خَاكْ إِڭِّينْ بزّزْ حِيمَا أَذْ كِيذسْ ثُويُورذْ إِجّْ ن كِيلُومِيثْرْ، ؤُيُورْ أَكِيذسْ ثْنَاينْ. ◼ ٤٢ مَانْ ونْ ذ أَشْ إِ غَا إِتَّارنْ شَا ن ڒْْحَاجّثْ، أوْشْ أَسْ ت، ؤُ ونِّي يَارزُّونْ أَذْ خَاكْ يَارْضڒْ، وَارْ ذ ث تَّارَّا أَمنِّي.“ ◘

٤٣ ”أَقَا ثسْڒِيمْ بلِّي إِتّْوَانَّا: ’أَذْ ثخْسذْ جَّارْ نّشْ، أَذْ ثْشَارْهذْ ڒعْذُو نّشْ!‘ ◘ ٤٤ مَاشَا نشّْ أَذْ أَومْ إِنِيغْ: خْسمْ ڒْْعذْيَانْ نْومْ ؤُ بَارْكمْ إِنِّي كنِّيوْ إِنعّْڒنْ، ڭّمْ ثْشُونِي إِ يِينِّي كنِّيوْ إِشَارّْهنْ، ژَتدْجمْ إِ يِينِّي كنِّيوْ إِتَّاوْينْ ذ إِمحْبَاسْ ذ يِينِّي خَاومْ إِتّْذَارَّاشنْ، ◘ ٤٥ حِيمَا أَذْ ثِيڒِيمْ ذ ثَارْوَا ن بَابَاثْومْ إِ إِدْجَانْ ذڭْ إِجنْوَانْ، مِينْزِي نتَّا إِسّْنقَّارْ ثَافُوشْثْ نّسْ خْ إِصبْحَاننْ ذ إِعفَّاننْ، ؤُشَا نتَّا يَارخُّو-د إِ ونْژَارْ، حِيمَا أَذْ إِوّثْ خْ إِمْسڭَّاذنْ ؤُ خْ يِينِّي وَارْ إِسڭّْذنْ. ٤٦ مِينْزِي مَاڒَا ثخْسمْ إِنِّي كنِّيوْ إِتّخْسنْ، مَانْ أَرْبحْ إِ غَارْومْ؟ مَا وَارْ تّڭّنْ أَيْثْ ن ضَّارِيبَا ؤُڒَا أَمُّو؟ ◼ ◘ ٤٧ مَاڒَا ثْسدْجْممْ خْ وَاوْمَاثنْ نْومْ وَاهَا، مِينْ إِ ثتّڭّمْ كْثَارْ خْ ونّغْنِي؟ مَا وَارْ تّڭّنْ أَيْثْ ن ضَّارِيبَا ؤُڒَا أَمُّو؟ ٤٨ س ؤُيَا إِڒِيمْ نِيشَانْ قَاعْ أَمْ مَامّشْ ؤُڒَا ذ بَابَاثْومْ إِ إِدْجَانْ ذڭْ إِجنْوَانْ إِدْجَا نِيشَانْ قَاعْ.“ ◘

◘٥:١ 5:‏1 [مك. 9‏:‏50؛ لك. 6‏:‏20‏-‏23؛ 14‏:‏34‏-‏35]

◘٥:٣ 5:‏3 إِشا. 57‏:‏15؛ 66‏:‏2؛ لك. 6‏:‏20.

◘٥:٤ 5:‏4 إِشا. 61‏:‏2؛ 66‏:‏10، 13؛ لك. 6‏:‏21.

◘٥:٥ 5:‏5 إِزهد. 37‏:‏11.

◘٥:٦ 5:‏6 إِشا. 55‏:‏1

◘٥:٨ 5:‏8 إِزهد. 15‏:‏2؛ 24‏:‏4؛ عبر. 12‏:‏14.

◘٥:١٠ 5:‏10 2 كُور. 4‏:‏10؛ 2 تِيم. 2‏:‏12؛ 1 بُط. 3‏:‏14.

◘٥:١١ 5:‏11 1 بُط. 4‏:‏14.

◘٥:١٢ 5:‏12 لك. 6‏:‏23.

◘٥:١٥ 5:‏15 مك. 4‏:‏21؛ لك. 8‏:‏16؛ 11‏:‏33.

◘٥:١٦ 5:‏16 1 بُط. 2‏:‏12.

◼٥:١٧ 5:‏17 ’شَّارِيعَا ن مُوسَا‘ - إِخْسْ أَذْ يِينِي تَّاوْرَاثْ أَمْ مَامّشْ ذ أَسْ قَّارنْ وُوذَاينْ.

◘٥:١٨ 5:‏18 لك. 16‏:‏17.

◘٥:١٩ 5:‏19 يَاع. 2‏:‏10.

◘٥:٢١ 5:‏21 ؤُف. 20‏:‏13؛ أَعَوذ. 5‏:‏17.

◼٥:٢٢ 5:‏22 جْمَاعثْ ثَامقّْرَانْثْ‘ - نِيغْ: ’جْمَاعثْ ن ڒْْحُوكَّامْ إِمقّْرَاننْ ن وُوذَاينْ‘.

◘٥:٢٥ 5:‏25 لك. 12‏:‏58؛ أَفا. 4‏:‏26.

◘٥:٢٧ 5:‏27 ؤُف. 20‏:‏14؛ أَعَوذ. 5‏:‏18.

◘٥:٢٨ 5:‏28 أَيُوبْ 31‏:‏1؛ إِزهد. 119‏:‏37.

◘٥:٢٩ 5:‏29 مت. 18‏:‏8؛ مك. 9‏:‏43.

◘٥:٣١ 5:‏31 [مت. 19‏:‏9؛ مك. 10‏:‏11‏-‏12؛ لك. 16‏:‏18] — ڒخْڒ. 30‏:‏2؛ أَعَوذ. 23‏:‏20‏-‏22؛ 24‏:‏1؛

◘٥:٣٢ 5:‏32 مت. 19‏:‏7؛ مك. 10‏:‏4، 11؛ لك. 16‏:‏18؛ 1 كُور. 7‏:‏10.

◘٥:٣٣ 5:‏33 ؤُف. 20‏:‏7؛ لَاوِي 19‏:‏12؛ أَعَوذ. 5‏:‏11؛ 23‏:‏22

◘٥:٣٤ 5:‏34 إِشا. 66‏:‏1؛ يَاع. 5‏:‏12.

◘٥:٣٥ 5:‏35 إِزهد. 48‏:‏3؛ إِشا. 66‏:‏1.

◘٥:٣٨ 5:‏38 [لك. 6‏:‏29‏-‏30] — ؤُف. 21‏:‏24؛ لَاوِي 24‏:‏20؛ أَعَوذ. 19‏:‏21؛

◘٥:٣٩ 5:‏39 أَوڒن. 24‏:‏29؛ لك. 6‏:‏29؛ رُوم. 12‏:‏17؛ 1 كُور. 6‏:‏7؛ 1 تس. 5‏:‏15؛ 1 بُط. 3‏:‏9.

◘٥:٤٠ 5:‏40 لك. 6‏:‏29

◼٥:٤١ 5:‏41 ’إِجّْ ن كِيلُومِيثْرْ‘ - س ثْرَامِيثْ ’إِجّْ ن مَايْلْ‘.

◘٥:٤٢ 5:‏42 أَعَوذ. 15‏:‏8؛ لك. 6‏:‏35.

◘٥:٤٣ 5:‏43 [لك. 6‏:‏27‏-‏28، 32‏-‏36] — لَاوِي 19‏:‏18

◘٥:٤٤ 5:‏44 لك. 6‏:‏27؛ 23‏:‏34؛ ڒخ. 7‏:‏60؛ رُوم. 12‏:‏20؛ 1 كُور. 4‏:‏13؛ 1 بُط. 2‏:‏23.

◼٥:٤٦ 5:‏46 ’أَيْثْ ن ضَّارِيبَا‘ - نِيغْ ’إِعشَّارنْ‘. أَيْثْ ن ضَّارِيبَا نِيثْنِي ذ ؤُذَاينْ إِ إِخدّْمنْ أَكْ-ذ ڒْْمخْزنْ ن إِرُومَانِييّنْ، جمّْعنْ ضَّارِيبَا. شَا زَّايْسنْ كْسِينْ زِي ضَّارِيبَا إِ يِيخفْ نْسنْ.

◘٥:٤٦ 5:‏46 لك. 6‏:‏32.

◘٥:٤٨ 5:‏48 أَمز. 17‏:‏1