أَذْلِيسْ إِقدّْسنْ أَوَاڒنْ إِوزْننْ ١٩

١٩

١ إِحْڒَا إِجّْ ن ؤُمزْڒُوضْ

إِڭُّورنْ ذِي ڒصْفَايثْ نّسْ،

خْ ونِّي غَارْ إِدْجَانْ إِينْشِيشنْ فَارْغنْ،

ؤُ أَقَا ث ذ أَبُوهَاڒِي إِ يدْجَا. ◘

٢ بْڒَا ثُوسّْنَا ؤُڒَا ذ ڒعْمَارْ وَارْ إِدْجِي شَا مْلِيحْ،

ونِّي إِتّْقدْجْقنْ س إِضَارنْ نّسْ، أَذْ إِخْضَا.

٣ ثُوبُّوهڒْيَا ن بْنَاذمْ

إِسّْفَارَّاغْ أَبْرِيذْ نّسْ،

ؤُ خنِّي ؤُڒْ نّسْ أَذْ إِسْعَارْ خْ سِيذِي. ◘

٤ أَڭْڒَا إِتَّاوِي-د أَطَّاسْ ن إِمدُّوكَّاڒْ،

مَاشَا أَمزْڒُوضْ إِسمّحْ ذَايسْ

ؤُمدُّوكّڒْ نّسْ.◘

٥ أَشهَّاذْ إِسّْخَارِّيقنْ

وَارْ إِتّْوَاحسّبْ شَا ذ أَمزْذَاڭْ،

ونِّي د-يَارخُّونْ إِ إِخَارِّيقنْ،

وَارْ إِنجّمْ. ◘

٦ أَطَّاسْ تّْزَاوْڭنْ زَّاثْ إِ وُوذمْ ن ؤُمْشنّعْ،

كُوڒْ إِجّْ إِتّخْسْ أَذْ يِيڒِي ذ أَمدُّوكّڒْ

ن ورْيَازْ إِ غَارْ إِدْجَا ثرْزِيفِينْ.

٧ مَارَّا أَيْثْمَاسْ ن ؤُمزْڒُوضْ شَارّْهنْ ث،

مشْحَاڒْ تِّيڭّْوجّنْ خَاسْ

إِمدُّوكَّاڒْ نّسْ!

نتَّا إِضفَّارْ أَوَاڒنْ

نِّي وَارْ إِسكّْوِينْ وَالُو. ◘

٨ ونِّي إِطّْفنْ ؤُڒْ أَمِيغِيسْ،

إِتّخْسْ ڒعْمَارْ نّسْ،

ونِّي إِحطَّانْ ڒفْهَامثْ،

أَذْ يَافْ مِينْ إِشْنَانْ.

٩ إِجّْ ن ؤُشهَّاذْ إِسّْخَارِّيقنْ

وَارْ إِتّْوَاحسّبْ شَا ذ أَمزْذَاڭْ،

ونِّي يَارخُّونْ إِ إِخَارِّيقنْ،

أَذْ إِتّْوَاهلّكْ.

١٠ أَفيّشْ وَارْ د-يُوسِي خْ ؤُبُوهَاڒِي،

مَامّشْ عَاذْ خْ ؤُمْسخَّارْ

مَاحنْذْ أَذْ إِسلّطْ خْ ڒْْحُوكَّامْ. ◘

١١ ڒعْقڒْ ن بْنَاذمْ إِتَّارَّا إِ-ث

أَذْ إِڭّْ س تَّاسِيعْ ن ڒْْخَاضَارْ

ثُوسَا-د خَاسْ مَاحنْذْ أَذْ إِميّكْ

خْ ؤُخطُّو نّسْ.

١٢ أَسْخضْ ن ؤُجدْجِيذْ

أَمْ زّْهِيرْ ن ويْرَاذْ ذِي ثمْژِي نّسْ،

مَاشَا أَرْضَا نّسْ أَمْ نّْذَا خْ أَرْبِيعْ. ◘

١٣ مِّيسْ أَبُوهَاڒِي ذ أَرْژِييّثْ إِ بَابَاسْ،

أَمْشُوبّشْ ن ثمْغَارْثْ إِڭَّا

أَمْ ثُوذِّيمْثْ ن ثْزقَّا وَارْ إِقطِّينْ. ◘

١٤ ثَادَّارْثْ ذ وَاڭْڒَا

أَقَا أَثنْ ذ ڒْْوَارْثْ ن ڒجْذُوذْ

مَاشَا إِشْثْ ن ثمْغَارْثْ إِفهّْمنْ

أَقَا-ت ن سِيذِي. ◘

١٥ ڒعْڭزْ يَارَّا بْنَاذمْ

أَذْ إِوْضَا ذڭْ إِضصْ يُودْجْغنْ،

ؤُ ڒعْمَارْ إِشُّورْ س ڒْْغشّْ أَذْ إِدْجَاژْ. ◘

١٦ ونِّي إِحطَّانْ ثَاوْصيّثْ،

إِحطَّا ڒعْمَارْ نّسْ،

ونِّي وَارْ إِحطِّينْ إِبْرِيذنْ نّسْ،

أَذْ إِمّثْ. ◘

١٧ ونِّي إِتّْحِينَّانْ خْ ؤُمزْڒُوضْ،

يَارطّڒْ إِ سِيذِي.

نتَّا أَذْ أَسْ إِخدْجصْ ڒْْخذْمثْ نّسْ.

١٨ وبّخْ مِّيشْ، مَاڒَا عَاذْ ذِينْ شَا ن ڒَْايَاسْ،

مَاشَا وَارْ ث نقّْ شَا،

وَارْ تّجِّي شَا أَذْ إِكْسِي أَيَا ڒعْمَارْ نّشْ. ◘

١٩ ونِّي إِسْعَارنْ أَطَّاسْ،

أَذْ إِتّْوَاخدْجصْ إِ مَانَاينِّي،

مَاغَارْ مَاڒَا ثخْسذْ أَذْ ث ثْمنْعذْ،

خنِّي أَذْ ذَايسْ ثَارنْيذْ وَاهَا.

٢٠ سڒْ شكْ غَارْ ؤُشَاوَارْ

ؤُشَا قْبڒْ تَّارْبِييّثْ،

مَاحنْذْ أَذْ ثْذوْڒذْ ذ أَمِيغِيسْ

غَارْ ؤُنڭَّارْ.

٢١ أَقَا ذِينْ أَطَّاسْ ن إِخمِّيمنْ

ذڭْ وُوڒْ ن ورْيَازْ،

مَاشَا شّْوَارْ ن سِيذِي إِتّْغِيمَا إِبدّْ. ◘

٢٢ ثَامخْسِيوْثْ إِشوَّارنْ ن بْنَاذمْ

ذ ڒضْرَافثْ نّسْ،

أَمُّو إِ إِدْجَا إِجّْ ن ؤُمزْڒُوضْ حْسنْ

خْ إِجّْ ن بُو-إِخَارِّيقنْ.

٢٣ ثِيڭّْوُوذِي ن سِيذِي ثْندّهْ غَارْ ثُوذَارْثْ،

مَاغَارْ إِتّطّصْ إِجِّيونْ،

وَارْ غَارسْ د-إِتَّاسْ شَا

مِينْ وَارْ إِحْڒِينْ. ◘

٢٤ أَمعْڭُوزْ إِسّْنُوفَّارْ أَفُوسْ نّسْ ذِي طّبْصِي،

وَارْ ث-إِ-د-إِتَّارِّي عَاوذْ

غَارْ ؤُقمُّومْ نّسْ. ◼ ◘

٢٥ وّثْ أَمسْثهْزِييْ،

أَمُّو إِ غَا إِفْثنْ

ونِّي وَارْ غَارسْ بُو ڒفْهَامثْ،

ؤُ عَاقبْ أَفهَّامْ،

خنِّي أَذْ إِكْسبْ ڒفْهَامثْ. ◘

٢٦ ونِّي إِتّڭّنْغزُّو ذِي بَابَاسْ

نِيغْ ونِّي إِسُّوفُّوغنْ يمَّاسْ،

أَقَا ذ مِّيسْ نْ ڒفْضِيحثْ

نِّي يَارَّانْ بْنَاذمْ أَذْ إِسضْحَا.

٢٧ سْبدّْ-د، أَ مِّي،

مَاحنْذْ أَذْ ثسْڒذْ غَارْ ؤُوبّخْ،

مَاڒَا ثخْسذْ أَذْ ثْحيّْذذْ

خْ وَاوَاڒنْ إِشُّورنْ س ثُوسّْنَا.

٢٨ إِجّْ ن ؤُشهَّاذْ إِ وَارْ إِسكّْوِينْ

إِغطّڒْ زِي ڒْْحقّْ،

ؤُشَا أَقمُّومْ ن إِعفَّاننْ

إِصَارّضْ ڒْْغشّْ.

٢٩ إِمسْثهْزَاينْ ثتّْرَاجَا أَثنْ ڒحْكَامثْ،

ؤُ ثِييِيتَّا ذڭْ وعْرُورْ إِ إِبُوهَاڒِييّنْ.

◘١٩:١ 19:‏1 أَوڒن. 28‏:‏6

◘١٩:٣ 19:‏3 يَاع. 1‏:‏13، 14، 15

◘١٩:٤ 19:‏4 أَوڒن. 14‏:‏20

◘١٩:٥ 19:‏5 أَعَوذ. 19‏:‏19؛ أَوڒن. 21‏:‏28

◘١٩:٧ 19:‏7 أَوڒن. 14‏:‏20

◘١٩:١٠ 19:‏10 أَوڒن. 30‏:‏22

◘١٩:١٢ 19:‏12 أَوڒن. 16‏:‏14، 15؛ 20‏:‏2

◘١٩:١٣ 19:‏13 أَوڒن. 10‏:‏1؛ 15‏:‏20؛ 17‏:‏25؛ 21‏:‏19؛ 27‏:‏15

◘١٩:١٤ 19:‏14 أَوڒن. 18‏:‏22

◘١٩:١٥ 19:‏15 أَوڒن. 6‏:‏9؛ 10‏:‏4؛ 20‏:‏13

◘١٩:١٦ 19:‏16 أَوڒن. 3‏:‏21، 22؛ لك. 11‏:‏28

◘١٩:١٨ 19:‏18 أَوڒن. 13‏:‏24؛ 23‏:‏13؛ أَفا. 6‏:‏4

◘١٩:٢١ 19:‏21 أَيُوبْ 23‏:‏13؛ إِزهد. 33‏:‏11؛ 115‏:‏3؛ إِشا. 46‏:‏10

◘١٩:٢٣ 19:‏23 إِزهد. 34‏:‏10

◼١٩:٢٤ 19:‏24 ’أَحْسِينْ‘ - نِيغْ ’أَبحْرُورْ‘.

◘١٩:٢٤ 19:‏24 أَوڒن. 26‏:‏15

◘١٩:٢٥ 19:‏25 أَوڒن. 21‏:‏11