أَذْلِيسْ إِقدّْسنْ إِزهِّيذنْ ١٠٤

١٠٤

١ بَاركْ سِيذِي، أَ ڒعْمَارْ إِنُو!

أَ سِيذِي، أَربِّي إِنُو،

مَامّشْ ذ أَمقّْرَانْ شكْ!

شكْ ثْيَارْضذْ س لْعَاضَامَا ذ ڒْْعزّْ.

٢ نتَّا إِڒحّفْ إِخفْ نّسْ س ثْفَاوْثْ

أَمْ س إِجّْ ن ؤُپَارْثسُّو،

نتَّا إِتّْبزّعْ أَجنَّا

أَمْ ثْجَارْثِيڒْثْ ن ؤُقِيضُونْ. ◘

٣ أَقَا نتَّا ذ ونِّي إِسَّارْسنْ

ثِيحنْيَا ن وسْقفْ

سَاذُو إِخَّامنْ نّسْ خْ وَامَانْ،

ذ ونِّي إِڭِّينْ إِسيْنُوثنْ

ذ أَكَارُّو نّسْ،

ذ ونِّي إِڭُّورنْ

خْ وَافْرِيونْ ن ؤُسمِّيضْ، ◘

٤ ذ ونِّي إِڭِّينْ لْمَالَاكَاثْ نّسْ

أَمْ يِيسمِّيضنْ

ؤُ إِمْسخَّارنْ نّسْ

ذ إِشْثْ ن ثْمسِّي إِتّحْذُوذُوقنْ. ◘

٥ نتَّا إِسّْبدّْ ثَامُّورْثْ خْ ذْسُوسَا نّسْ،

وَارْ ثتّنْهزِّيعمَّارْصْ إِ ڒبْذَا. ◘

٦ شكْ ثْڒحّْفذْ أَسْ س وَامَانْ إِهوْڒنْ

أَمْ س يِيجّْ ن وَارُّوضْ،

أَمَانْ بدّنْ ثِيوَا إِ إِذُورَارْ.

٧ نِيثْنِي أَروْڒنْ زڭْ ؤُسِيڭّْوذْ نّشْ،

قدْجْقنْ أَذْ فّْغنْ زِي ثْمِيجَّا ن وَاجَّاجْ نّشْ.

٨ تّْوَاسّْڭعّْذنْ إِذُورَارْ،

هكّْوَانْثْ ثيْسَارِينْ

ذڭْ ومْشَانْ إِ ذ أَسنْ ثڭِّيذْ.

٩ شكْ ثڭِّيذْ أَيْمِيرْ إِ وَامَانْ

نِّي وَارْعدُّونْ،

وَارْ د-ذكّْوِيڒنْ

مَاحنْذْ أَذْ ذْڒنْ ثَامُّورْثْ.

١٠ شكْ ذ ونِّي إِندّْهنْ

ثَاڒَاوِينْ ذِي ثغْزُورِينْ،

أَقَا تَّازّْڒنْثْ ذِينْ جَارْ إِذُورَارْ.

١١ أَقَا وَارّْذنْثْ مَارَّا ڒْْمَاڒْ ن ييَّارْ،

إِغْيَاڒْ ن ڒخْڒَا تّكّْسنْ أَفَاذِي نْسنْ زَّايْسنْثْ.

١٢ إِجْضَاضْ ن ؤُجنَّا زدّْغنْ

غَارْ ثمَّاوِينْ نْسنْ،

زِي جَارْ ڒفْرُوعْ ثتّكّْ-د ثْمِيجَّا نْسنْ.

١٣ نتَّا أَقَا ذ ونِّي إِتّسُّونْ إِذُورَارْ

زڭْ إِخَّامنْ نّسْ ذڭْ ؤُجنَّا،

ثَامُّورْثْ ثتّْيَاوَانْ

زِي ڒْْغِيدْجثْ إِ د-إِفّْغنْ زِي مِينْ ثڭِّيذْ شكْ. ◼

١٤ نتَّا إِڭَّا أَرْبِيعْ إِغمِّي إِ ڒْْمَارْ،

ؤُڒَا ذ أَغمُّويْ ذِي طّْوعْ ن بْنَاذمْ.

إِڭَّا إِ-ت مَاحنْذْ أَذْ د-يَاوِي

أَغْرُومْ زِي ثمُّورْثْ

١٥ ؤُ بِينُو نِّي إِسّْفَارَّاحنْ ؤُڒْ ن بْنَاذمْ.،

أَڒَامِي إِغمْبَابْ أَذْ زَّايسْ وسّْڭنْ

مَاهُو زِي زّشْثْ،

ؤُڒَا ذ أَغْرُومْ نِّي إِسّجْهذْ ؤُڒْ ن بْنَاذمْ.

١٦ ثِيشجِّيرَا ن سِيذِي تّْيَاوَاننْثْ،

ثِيشجِّيرَا ن ثنْڭلْثْ ن لُوبْنَانْ

نِّي إِژُّو نتَّا،

١٧ مَانِي تّڭّنْ إِجْضَاضْ ڒْْعُوشّْ نْسنْ،

مَانِي إِ ثدْجَا ثَادَّارْثْ ن ؤُبلَّارْجْ

ذِي ثْشجِّيرَا ن ؤُمرْزِي. ◼

١٨ إِذُورَارْ يُوعْڒَانْ أَقَا أَثنْ

إِ إِغَايْضنْ ن ثْصُوضَارْ،

ڒجْرُوفْ ذ أَمْشَانْ ن ثَاروْڒَا

إِ إِكَاوْكَاونْ ن ثصْضَارْثْ.

١٩ نتَّا إِڭَّا ثَازِيرِي ذ ڒعْبَارْ

إِ ڒوْقَاثْ إِتّْوَاڭّنْ،

ثَافُوشْثْ ثسّنْ مڒْمِي إِ غَا ثغْڒِي.

٢٠ شكْ ثسّكِّيذْ-د ثَادْجسْثْ

ؤُ ثوْضَا-د دْجِيڒثْ

إِ ذِي تّخْثُوثْينْ

مَارَّا ڒوْحُوشْ ن وزْغَارْ. ◼

٢١ أَيْرَاذنْ إِمژْيَاننْ

زهَّارنْ خْ زَّارْذثْ،

أَرزُّونْ خْ مَاشَّا نْسنْ زِي أَربِّي. ◘

٢٢ مَاڒَا ثفّغْ-د خنِّي ثْفُوشْثْ،

تّشْرُورُوذنْ غَارْ ڒْْمَارْڭحْ،

تّْغمَّارنْ ذڭْ إِفْرَانْ نْسنْ.

٢٣ خنِّي إِتّفّغْ بْنَاذمْ

غَارْ ڒْْخذْمثْ نّسْ،

غَارْ ثوُّورِي نّسْ أَڒْ ثَامذِّيثْ.

٢٤ مَامّشْ أَطَّاسْ إِ ثڭِّيذْ، أَ سِيذِي،

س ثِيغِيثْ إِ ثڭِّيذْ مَارَّا ثِيمسْڒَايِينْ،

ثَامُّورْثْ ثتّْوَاشُّورْ س وَاڭْڒَا نّشْ.

٢٥ أَقَا ذِينْ ڒبْحَارْ إِمْغَارْ،

يِيرِيوْ غَارْ مَارَّا إِغزْذِيسنْ نّسْ،

مَانِي إِسّْفُوفّيْ مَارَّا س إِمُودَّارنْ

إِمقّْرَاننْ ذ إِمژْيَاننْ،

بْڒَا ڒحْسَابْ،

٢٦ مَانِي ڭُّورنْ إِغَارُّوبَا،

ؤُڒَا ذ ’لِيبِييَاثَانْ‘ نِّي ثڭِّيذْ

حِيمَا أَذْ ذَايسْ إِتِّيرَارْ.

٢٧ نِيثْنِي مَارَّا تّْرَاجَانْ شكْ،

أَذْ أَسنْ ثوْشذْ مَاشَّا نْسنْ

ذِي ڒْْوقْثْ نّسْ. ◘

٢٨ مَاڒَا ثوْشِيذْ أَسنْ، يَارّْونْ نِيثْنِي،

مَاڒَا ثَارْزْمذْ أَفُوسْ نّشْ،

دَّاكّْوَاڒنْ جِّيوْننْ س ڒْْخَارْ.

٢٩ مَاڒَا ثفَّارذْ ؤُذمْ نّشْ،

أَقَا تّْنخْڒَاعنْ،

مَاڒَا ثْكسِّيذْ أَسنْ نّفْسْ،

أَذْ سُّوفّْغنْ بُوحْبڒْ

ؤُشَا أَذْ د-ذوْڒنْ غَارْ ؤُشَاڒْ نْسنْ. ◘

٣٠ مَاڒَا ثسّكّذْ-د أَرُّوحْ نّشْ،

خنِّي تّْوَاخڒْقنْ-د نِيثْنِي،

أَذْ ثَارِّيذْ أَغمْبُوبْ ن ثمُّورْثْ ذ أَمَايْنُو.

٣١ أَعُودْجِي ن سِيذِي أَذْ يِيڒِي إِ ڒبْذَا،

سِيذِي أَذْ إِفَارْحْ إِ مَارَّا مِينْ إِڭَّا.

٣٢ مَاڒَا نتَّا إِخزَّارْ

ذِي ثمُّورْثْ، ثتَّارْجِيجِي،

مَاڒَا إِحَاذَا إِذُورَارْ، أَذْ ذُوخّْننْ.

٣٣ نشّْ خْسغْ أَذْغنّْجغْ إِ سِيذِي

مِينْ غَا كّغْ دَّارغْ،

أَذْ زهّْذغْ إِ أَربِّي إِنُو

مِينْ ذَا إِ غَا كّغْ دْجِيغْ. ◘

٣٤ أَخمّمْ إِنُو أَذْ د-يَاسْ

خْ ڒْْخَاضَارْ نّسْ،

أَذْ فَارْحغْ ذِي سِيذِي.

٣٥ إِمذْنَابْ أَذْ تّْوَاثحَّانْ قَاعْ

زِي ثمُّورْثْ،

إِعفَّاننْ وَارْ تِّيڒِينْ عَاذْ.

بَاركْ سِيذِي، أَ ڒعْمَارْ إِنُو. هَالِّيلُو-يَاهْ!

◘١٠٤:٢ 104:‏2 أَمز. 1‏:‏6؛ أَيُوبْ 26‏:‏7

◘١٠٤:٣ 104:‏3 إِزهد. 18‏:‏11؛ إِشا. 19‏:‏1؛ أَسَا. 14‏:‏14

◘١٠٤:٤ 104:‏4 عبر. 1‏:‏7

◘١٠٤:٥ 104:‏5 أَيُوبْ 26‏:‏7؛ 38‏:‏4، 5، 6؛ إِزهد. 24‏:‏2؛ 78‏:‏69

◼١٠٤:١٣ 104:‏13 ’إِخَامّنْ نّسْ ذڭْ ؤُجنَّا‘ - س ثْعِيبْرَانِيثْ ’إِخَامّنْ نّسْ ن نّجْ‘.

◼١٠٤:١٧ 104:‏17 ’أَمرْزِي‘ - نِيغْ ’أَمضْزِي‘.

◼١٠٤:٢٠ 104:‏20 ’أَزْغَارْ‘ - نِيغْ ’ڒْغَابثْ‘ نِيغْ ’ثَازْڭَانْثْ‘.

◘١٠٤:٢١ 104:‏21 أَيُوبْ 38‏:‏39،40؛ إِشا. 31‏:‏4

◘١٠٤:٢٧ 104:‏27 إِزهد. 145‏:‏15

◘١٠٤:٢٩ 104:‏29 إِزهد. 30‏:‏8

◘١٠٤:٣٣ 104:‏33 إِزهد. 63‏:‏5؛ 146‏:‏2