1 ؤُشَا نتَّا إِسّْشنْ أَيِي إِجّْ ن إِغْزَارْ إِزْذِيڭْ ن وَامَانْ إِدَّارنْ، ذ أَمزْذَاڭْ، إِصْفَا أَمْ ؤُكْرِيسْثَالْ، إِ د-إِتّفّْغنْ زِي ڒْعَارْشْ ن أَربِّي ؤُ ن يزْمَارْ. ◘22:‏1 حِز. 47‏:‏1؛ زَاك. 14‏:‏8. 2 ذِي ڒْوسْطْ ن وَازَّايْ نّسْ، خْ ثْمَا-يَا ؤُ خْ ثْمَا نِّي ن إِغْزَارْ، ثُوغَا ثَاشجَّارْثْ ن ثُوذَارْثْ ثنِّي ثسّنْضَايْ ڒْغِيدْجثْ ثنْعَاشْ ن ثْوَاڒَاوِينْ. ذِي مْكُوڒْ أَيُورْ ثتِّيشْ ڒْغِيدْجثْ نّسْ ذ ثِيفْرَايْ نّسْ إِ ؤُسْڭنْفُو ن ڒڭْنُوسْ. ◘22:‏2 حِز. 47‏:‏1‏-‏12؛ أَسَا. 2‏:‏7. 3 وَارْ ذَايسْ ثتِّيڒِي عَاذْ نّعْڒثْ. أَذْ ذَايسْ يِيڒِي ڒْعَارْشْ ن أَربِّي ؤُ ن يزْمَارْ ؤُشَا إِمْسخَّارنْ نّسْ أَذْ خَاسْ سخَّارنْ. 4 نِيثْنِي أَذْ ژَترنْ ؤُذمْ نّسْ، إِسمْ نّسْ أَذْ يِيڒِي خْ ثنْيَارِينْ نْسنْ. ◘22:‏4 أَسَا. 3‏:‏12. 5 وَارْ ذِينْ ثتِّيڒِي دْجِيڒثْ ؤُشَا نِيثْنِي وَارْ تّحْذِيجنْ عَاذْ طّْيَا ن ڒفْنَارَاثْ نِيغْ ن ثْفَاوِينْ نِيغْ ن ثْفَاوْثْ ن ثْفُوشْثْ، مِينْزِي سِيذِي أَربِّي أَذْ أَسنْ إِڭّْ ثَافَاوْثْ ؤُشَا أَذْ يِيڒِي ذ أَجدْجِيذْ نْسنْ إِ ڒبْذَا قَاعْ. ◘22:‏5 إِشا. 60‏:‏19؛ زَاك. 14‏:‏7؛ أَسَا. 21‏:‏23.

6 خَاسْ ؤُشَا إِنَّا أَيِي:

”أَوَاڒنْ-أَ ذَايْسنْ ڒَامَانْ ذ ثِيذتّْ!

سِيذِي، أَربِّي ن أَرُّوحْ ن إِنَابِييّنْ إِقدّْسنْ،

أَقَا إِسّكّْ لْمَالَاكْ نّسْ،

حِيمَا أَذْ إِسّْشنْ إِ إِمْسخَّارنْ نّسْ

مِينْ إِ غَا يِيڒِينْ ذغْيَا.“ ◘22:‏6 أَسَا. 1‏:‏1؛ 19‏:‏9؛ 21‏:‏5.

7 ”خْزَارْ نشّْ أَذْ د-أَسغْ ذغْيَا!

سّعْذْ ن ونِّي إِتّطّْفنْ

ذڭْ وَاوَاڒنْ ن نُّوبُووَاثْ

ن وذْلِيسْ-أَ إِتّْوَانْضنْ.“ ◘22:‏7 أَسَا. 1‏:‏3.

8 نشّْ، يُوحَانَّا، أَقَا ژْرِيغْ ؤُ سْڒِيغْ ثِيمسْڒَايِينْ-أَ. ؤُشَا ڒَامِي ثنْثْ ژْرِيغْ ؤُ سْڒِيغْ، وْضِيغْ غَارْ إِضَارنْ ن لْمَالَاكْ ونِّي ذ أَيِي إِسّشْننْ ثِيمسْڒَايِينْ-أَ، حِيمَا أَذْ أَسْعبْذغْ. 9 مَاشَا نتَّا إِنَّا أَيِي:

”حْضَا، لَّا، وَارْ تّڭّْ مَانْ أَيَا،

مَاغَارْ نشّْ ذ أَمْسخَّارْ أَمْعَاشَارْ نّشْ،

ؤُ ن أَيْثْمَاشْ، إِنَابِييّنْ، ؤُڒَا ن يِينِّي إِتّطّْفنْ

ذڭْ وَاوَاڒنْ ن وذْلِيسْ-أَ إِتّْوَانْضنْ.

عبْذثْ أَربِّي!“ ◘22:‏9 ڒخ. 10‏:‏26؛ 14‏:‏14؛ أَسَا. 19‏:‏10.

10 خَاسْ ؤُشَا إِنَّا أَيِي:

”وَارْ تّڭّْ أَشمِّيعْ خْ وَاوَاڒنْ إِ إِتّْوَانَابّن

ذڭْ وذْلِيسْ-أَ إِتّْوَانْضنْ،

مِينْزِي ڒْوقْثْ أَقَا ثِيوضْ-د.“ ◘22:‏10 دَان. 8‏:‏26؛ 12‏:‏4؛ أَسَا. 1‏:‏3.

11 ”ونِّي إِتّڭّنْ مِينْ وَارْ إِسڭّْذنْ،

أَذْ إِڭّْ مِينْ وَارْ إِسڭّْذنْ كْثَارْ،

أَمنْڭُوسْ أَذْ إِذْوڒْ ذ أَمنْڭُوسْ كْثَارْ،

أَمْسڭَّاذْ أَذْ إِڭّْ ثَاسڭْذَا كْثَارْ

ؤُشَا أَمْقدَّاسْ أَذْ إِذْوڒْ ذ أَمْقدَّاسْ كْثَارْ.“

12 ”خْزَارْ، نشّْ أَذْ د-أَسغْ ذغْيَا

ؤُشَا ڒْمُونثْ إِنُو أَقَا-ت أَكِيذِي،

حِيمَا أَذْ خدْجْصغْ كُوڒْ إِجّنْ

أَنشْثْ ن ڒْخذْمثْ نّسْ. ◘22:‏12 إِزهد. 62‏:‏13؛ إِرْم. 17‏:‏10؛ 32‏:‏19؛ مت. 16‏:‏27؛ رُوم. 2‏:‏6؛ 14‏:‏12؛ 1 كُور. 3‏:‏8؛ 2 كُور. 5‏:‏10؛ ڭال. 6‏:‏5؛ أَسَا. 2‏:‏23.

13 نشّْ ذ أَلِيفْ ؤُ نشّْ ذ ثَاوْ،

ذ أَمزْوَارُو ذ أَنڭَّارُو،

ذ بدُّو ذ أَكمّڒْ.“ ◘22:‏13 إِشا. 41‏:‏4؛ 44‏:‏6؛ 48‏:‏12؛ أَسَا. 1‏:‏8؛ 21‏:‏6.

14 ”سّعْذْ نْسنْ إِ يِينِّي إِتّڭّنْ ثِيوصَّا نّسْ.

أَذْ غَارْسنْ ثِيڒِي صُّولْطَا خْ ثْشجَّارْثْ ن ثُوذَارْثْ

ؤُشَا أَذْ د-أَذْفنْ غَارْ ثنْذِينْثْ

زِي ثوُّورَا نّسْ.

15 بَارَّا إِدْجَانْ إِنِّي إِتّڭّنْ فَارْقْ-شّْغڒْ

ذ يِينِّي إِنقّنْ

ذ يِينِّي إِعبّْذنْ لْ-أَصْنَامْ

ذ يِينِّي ذَايْسنْ ڒخْمجْ

ذ يِينِّي إِتّْسحَّارنْ ذ مَارَّا إِمْوَاڒَاونْ

ذ إِنِّي إِتّڭّنْ مِينْ إِ د-إِتّفّْغنْ

زڭْ ؤُخَارِّيقْ.“ ◘22:‏15 1 كُور. 6‏:‏10؛ أَفا. 5‏:‏5؛ كُول. 3‏:‏5، 6.

16 ”نشّْ، يَاسُوع، أَقَا سّكّغْ لْمَالَاكْ إِنُو

مَاحنْذْ أَذْ خَاومْ إِشْهذْ مَانْ أَيَا

زَّاثْ إِ ثْمسْمُونِينْ.

أَقَا ذ نشّْ، ذ أَژْوَارْ ذ زَّارِيعثْ ن ذَاوُوذْ،

ذ ونِّي أَكِيذسْ،

ذ إِثْرِي ن ڒفْجَارْ يَارقّنْ.“ ◘22:‏16 إِشا. 11‏:‏10؛ رُوم. 15‏:‏12؛ 2 بُط. 1‏:‏19؛ أَسَا. 1‏:‏1؛ 5‏:‏5.

17 أَرُّوحْ ذ ثسْڒِيثْ قَّارنْ:

”أَسْ-د!“

ؤُشَا أجّْ ونِّي ث إِسْڒِينْ، أَذْ يِينِي:

”أَسْ-د!“

”ذ ونِّي إِفُوذنْ، أجّْ إِ-ث أَذْ د-يَاسْ،

أَذْ إِسُو أَمَانْ إِدَّارنْ بَاطڒْ.“ ◘22:‏17 إِشا. 55‏:‏1؛ يُوح. 7‏:‏37

18 ”نشّْ شهّْذغْ إِ مَارَّا إِنِّي إِتّسْڒَانْ

إِ وَاوَاڒنْ ن نُّوبُووَا ن وذْلِيسْ-أَ إِتّْوَانْضنْ:

مَاڒَا ذِينْ حذْ ونِّي خَاسنْ إِ غَا يَارْنِينْ،

أَربِّي أَذْ خَاسْ يَارْنِي جّْرَايحْ،

ثِينِّي إِتّْوَازمّمنْ ذڭْ وذْلِيسْ-أَ.

19 مَاڒَا شَا ن إِجّنْ إِكّسْ زڭْ وَاوَاڒنْ

ن وذْلِيسْ إِتّْوَانْضنْ ن نُّوبُووَا-يَا،

أَذْ أَسْ إِكّسْ أَربِّي ثَاسْغَارْثْ نّسْ

زِي ثْشجَّارْثْ ن ثُوذَارْثْ ؤُ زِي ثنْذِينْثْ إِقدّْسنْ.“ ◘22:‏19 أَعَوذ. 4‏:‏2؛ 12‏:‏32؛ أَوڒن. 30‏:‏6؛ أَسَا. 13‏:‏8؛ 17‏:‏8.

20 خْمِي نتَّا إِشْهذْ خْ مَانْ أَيَا، إِنَّا:

”وَاهْ، نشّْ أَذْ د-أَسغْ ذغْيَا!“

”أَسْ-د، أَ سِيذِي يَاسُوع!“

21 أَرْضَا ن سِيذِيثْنغْ يَاسُوع لْمَاسِيحْ أَقَا-ث أَكْ-ذ مَارَّا إِمْقدَّاسنْ نّسْ. ”أَمِينْ!“

أَنڭَّارْ ن ڒْعَاهْذْ ن جْذِيذْ.

أَعُودْجِي إِ يِيسمْ ن أَربِّي،

بَابَاثْنغْ ذ سِيذِيثْنغْ يَاسُوع لْمَاسِيحْ

ذ أَرُّوحْ إِقدّْسنْ.