Ambarreḥ
1
Aqa kuřci di řbaṭeř
1 Awařen n Umbarreḥ, mmis n Dawud, ajeǧid di Urcalim.
2 D ibeṭṭařen qaɛ, iqqar Umbarreḥ, d ibeṭṭařen qaɛ, aqa kuřci di řbaṭeř. ◘1:2 Izhd. 62:10; 144:4 3 Man řefḍeř i iǧan ɣar bnadem di marra arber i zi ittmarret sadu tfuct? ◘1:3 Amb. 2:22; 3:9 4 Jjiř iggur, ijj n jjiř nneɣni ittas-dd, maca tammurt ad teqqim tbedd i řebda. ◘1:4 Izhd. 104:5 5 Tneqqar-dd tfuct u tɣeǧi tfuct ɛawed, xenni ad dd-tedweř deɣya ɣar manis i dd-tneqqar. 6 Iggur usemmiḍ ɣar ljanub u ittenneḍ ɛawed ɣar ccamal. Am iggur ittenneḍ, ittenneḍ usemmiḍ, uca ittɣima usemmiḍ iddakkwař-dd ɣar uduwwar nnes. 7 Marra iɣezran ttkebban di řebḥar, maca war ittccuri řebḥar. Ɣar manis dd-ttazzřen iɣezran, dinni ttɣimen ttazzřen ɛawed. ◘1:7 Ayub 38:8, 9, 10; Izhd. 104:9, 10 8 Marra timesřayin ssaḥařent břa qeṭṭu, uřa d ijjen war izemmar ad xas yini ca. Ɛemmarṣ tiṭṭ ad tejjawen zeg weẓri uca amezzuɣ ɛemmarṣ ad ijjawen zeg utesři. 9 Min tuɣa iǧan ad yiři, min ittwaggen ad ittwagg ɛawed. War din iǧi jdid sadu tfuct. ◘1:9 Amb. 3:15 10 Ma aqa din ca n řḥajjet qqaren xas: “Xzar, man aya d jdid!”?, aqa-tt din di zzmanat nni tuɣa iǧan qbeř i neccin. 11 War din ǧin d ixarriṣen x yinni tuɣa d imezwura, uca uřa x yinni i ɣa yiřin d ineggura, war xasen ttiřin ixarriṣen ɣar yinni dd ɣa yasen awarni asen ɛad.
Tarezzut n Umbarreḥ
12 Necc, Ambarreḥ, tuɣa ayi d ajeǧid x Israil, di Urcalim. 13 Necc tuɣa kkseɣ deg wuř inu ad arzuɣ u ad beqqceɣ s tiɣit di marra min imsaren sadu ujenna. Man aya d ijj n ccɣeř iwɛar, iwca i-t AREBBI i tarwa n bnadem ḥima ad dayes řhan. 14 Necc ẓriɣ marra timegga i ittwaggen sadu tfuct, u xzar, marra aya tuɣa-t di řbaṭeř d weḍfar n usemmiḍ. 15 Min ifarɣen war izemmar ad ittwaseggem, u min ittxeṣṣan war izemmar ad ittwaḥseb. 16 Necc nniɣ deg wuř inu: “Xzar, necc ssemɣareɣ tiɣit inu uca arniɣ dayes, mahu marra inni tuɣa izeddɣen di Urcalim qbeř inu. Uř inu iẓra aṭṭas n tiɣit d tussna. 17 Necc ggiɣ uř inu, maḥend ad dd-awyeɣ tiɣit, maḥend ad ssneɣ tubbuheřya d jjheř. Necc ufiɣ uřa d man aya aqa d aḍfar n usemmiḍ. 18 Maɣar deg waṭṭas n tiɣit, dayes aṭṭas n řhemm, u wenni yarennin di tussna, yarenni deg wemnus.