1 Yusa-dd ɣari wawař n SIDI deg useggʷas wiss ɛecra, deg uyur wiss ɛecra, deg wass wiss tenɛac n uyur, inna: 2 “A mmis n bnadem, arr udem nnec ɣar firɛun, ajeǧid n Miṣra uca nabb xas u x marra tammurt n Miṣra. 3 Siweř, ini:

‘Ammu i iqqar Sidi inu, SIDI:

Xzar, Necc ḍidd nnec,

a firɛun, ajeǧid n Miṣra,

cek d řhaycet tameqqrant

nni izzřen di řwesṭ n iɣezran nnes,

tenni iqqaren: Iɣzar inu,

necc ggiɣ t i yixef inu! ◘29:3 Izhd. 74:13, 14; Ica. 27:1; 51:9

4 Necc ad ggeɣ tisennarin deg uɣesmar nnec,

ad ssřesqeɣ iseřman n iɣezran nnec

ɣar teqcurin nnec.

Ad cek dd-jebdeɣ zi řwesṭ n iɣezran nnec

uca marra iseřman n iɣezran nnec

ad řesqen ɣar teqcurin nnec. ◘29:4 Ḥiz. 38:4

5 Necc ad cek nḍareɣ barra di řexřa,

cek d marra iseřman n iɣezran nnec.

X wudem n yeyyar ad tewḍid.

War din wenni cek i ɣa yawyen

niɣ cek i ɣa iṭṭfen.

Necc ad cek wceɣ d macca

i řewḥuc n temmurt

u i ijḍaḍ n ujenna.

6 Marra imezdaɣ n Miṣra ad ssnen

belli Necc d SIDI,

maɣar nitni tuɣa aten d azeǧaḍ n uɣanim

i x tuɣa tsenned taddart n Israil. ◘29:6 2 Ij. 18:21; Ica. 36:6

7 Mařa nitni ksin cek s ufus nnec,

tfeǧqed uca tessnuqqbed ɣarsen

taɣruḍt nsen marra,

u mařa xak ssenden,

tarẓid uca tessarjijed

tijɛinnatin nsen marra.’ ”

8 “S uya, ammu i iqqar Sidi inu, SIDI: ‘Xzar, Necc ad xak sseɛduɣ ssif uca ad qesseɣ zzayek bnadem d řmař. 9 Tammurt n Miṣra ad tedweř i ureddeǧ u i řxirbet uca nitni ad ssnen belli Necc d SIDI, minzi netta inna: ‘Iɣzar inu u necc ggiɣ t!’ ”

10 “S uya, xzar, Necc xak u x iɣezran nnec u Necc ad ggeɣ tammurt n Miṣra d řexrabi, wah, d ict n řxirbet n wareddeǧ zi Majdal ař Aswan, ař aymir n temmurt n Kuc. 11 Uřa d ijj n bnadem war zzayes iẓekkwi x uḍar u uřa d ijj n uḍar n řmař ad xas iẓwa. War dayek ttiřin imezḍaɣ i yijj n řmijar n arebɛin n iseggʷusa. 12 Minzi Necc ad ggeɣ tammurt n Miṣřa d areddeǧ di řwesṭ n temmura ttwaredǧent uca tineddam ad iřint d areddeǧ di řwesṭ n tneddam nneɣni nni idewřen d řxirbat, řmijar n arebɛin n iseggʷusa, u Necc ad ssuyseɣ Imiṣriyyen jar řegnus uca ad ten bezzɛeɣ x temmura.”

13 “Maca ammu i iqqar Sidi inu, SIDI: ‘Awarni řami i ɣa ɛdun arebɛin n iseggʷusa Necc ad ssmuneɣ Imiṣriyyen zi řegnus nni mani tuɣa ttwabezzɛen. 14 Necc ad beddřeɣ tameḥbast n Imiṣriyyen uca ad ten ssɛeqbeɣ di temmurt n Fatrus, di temmurt i zzayes dd-iffɣen, uca dinni ad iřin d ict n tgeldit tameɛnanuct. 15 Tageldit nsen ad tiři d tameɛnanuct zi tgeldatin nneɣni u war tessgeɛɛad ixef nnes ɛad x řegnus, minzi Necc ad ten ssmeẓyeɣ ařami war ttṣellṭen ɛad x řegnus. 16 War tᵉttiři ɛad i taddart n Israil d atecři nni ten i ɣa issidar řmuɛṣiyyet, řami dewřen ɣarsen, ḍeffaren ten. Nitni ad ssnen belli Necc d Sidi, d SIDI i ǧiɣ.’ ” ◘29:16 Igjd. 4:17

17 Deg useggʷas wiss sebɛa u-ɛicrin, deg uyur wiss amezwaru, deg wass amezwaru n uyur imsar belli yusa-dd ɣari wawař n SIDI, inna:

18 “A mmis n bnadem, Nabuxadraṣṣar, ajeǧid n Babil, yarra řɛeskar nnes ad yegg ict n řxedmet tameqqrant ḍidd i Ṣur. Marra azeǧif iqqim d aqeccar u marra taɣřuḍt tarkec, maca war ɣares tuɣi řexřaṣ zi tendint n Ṣur, i netta u i řɛeskar nnes x řxedmet i yegga ḍidd nnes.

19 S uya, ammu i iqqar Sidi inu, SIDI: ‘Xzar, Necc ad wceɣ tammurt n Miṣra i Nabuxadraṣṣar, ajeǧid n Babil. Netta ad zzayes dd-yawi afeyyeḍ n wagřa nnes uca ad ikecceḍ takeccaḍt nnes uca ad ikkes tukkarḍa. Aya ad yiři d řexřaṣ nnes i řɛeskar nnes. 20 X řxedmet nni yegga ḍidd Ṣur wciɣ as tammurt n Miṣra d řexřaṣ, minzi nitni ggin tt di ṭṭweɛ inu, ammu i iqqar Sidi inu, SIDI. 21 Deg wass nni ad arreɣ icc n Israil ad dd-iffeɣ uca ad arzmeɣ aqemmum nnec di řwesṭ nsen. Xenni ad ssnen belli Necc d SIDI.’ ”