1 Xenni qarrben-dd marra ikumandaren n řɛeskar, Yuḥanan, mmis n Qariyaḥ, d Yazanya, mmis n Hucaɛya, d marra řgens, zeg umeẓyan ař ameqqran. 2 Nitni nnan i unabi Irmya: “Iři ad yaf tutra nneɣ arḍa zzat i wudem nnec. Ttar aneɣ ɣar SIDI, AREBBI nnec, di ṭṭweɛ n marra min iqqimen, minzi neccin neqqim ɛad s drus zeg waṭṭas, am mammec tzemmared ad tᵉtwarid s tiṭṭawin nnec umi ɣarneɣ txezzared. 3 Iři SIDI, AREBBI nnec, ad aneɣ isscen man abrid i ɣa neḍfar d min ɣa negg.” 4 Inna asen unabi Irmiya: “Necc sřiɣ t. Xzar, necc ad ttareɣ di ṭṭweɛ nwem ɣar SIDI, AREBBI nwem, ɛlaḥsab awařen nwem. Necc ad awem iniɣ marra awař nni zi dd xawem i ɣa yarr SIDI, war zzaywem ssnuffareɣ uřa d ijj n wawař.” 5 Nitni nnan i Irmiya: “SIDI ad yiři d Ccahed d amtiqqi d aṣdiq jar aneɣ, mařa war nᵉttegg ɛlaḥsab kuř awař nni kidek ɣarneɣ dd ɣa issekk SIDI, AREBBI nnec! 6 D aṣebḥan niɣ d aɛeffan, ad nseř ɣar tmijja n SIDI, AREBBI nneɣ, i umi cek i ɣa nessekk maḥend ad niři mliḥ xmi ɣa nseř ɣar tmijja n SIDI, AREBBI nneɣ.” ◘42:6 Irm. 7:23

7 Awarni řami ɛdun ɛecra n wussan, imsar aqa iffeɣ wawař n SIDI ɣar Irmiya. 8 Xas uca iřaɣa netta x Yuḥanan, mmis n Qariyaḥ, u x marra ikumandaren n řɛeskar nni tuɣa ɣares iǧan, uřa x marra řgens, zeg umeẓyan ař ameqqran. 9 Inna asen: “Ammu i iqqar SIDI, AREBBI n Israil, ɣar wenni d ayi tessekkem, ḥima ad as ssiwḍeɣ tutra nwem zzat i wudem nnes: 10 ‘Mařa kenniw teqqimem tzeddɣem di temmurt-a, ammu kenniw i ɣa ssbeddeɣ u war kenniw heddmeɣ, ad kenniw ẓẓuɣ u war kenniw qeřɛeɣ, maɣar Necc neddmeɣ x řɣar i daywem ggiɣ. ◘42:10 Irm. 24:6; 31:4; 33:7 11 War tteggʷdem ca zeg ujeǧid n Babil, wenni zi tᵉtteggʷedem. War zzayes tteggʷdem, ammu i iqqar SIDI. Maɣar Necc akidwem ḥima ad kenniw ssnejmeɣ u ad kenniw fekkeɣ zeg ufus nnes. 12 Necc ad kenniw areḥmeɣ maḥend netta ad kenniw yarḥem u ad kenniw yarr ad tdewřem ɣar temmurt nwem.

13 Maca mařa kenniw teqqarem: Neccin war nettɣimi ca di temmurt-a, u mařa kenniw war tᵉttesřim ca ɣar tmijja n SIDI, AREBBI nwem, 14 ad tinim: Lla, nexs ad nuyur ɣar Miṣra mani war nẓarr amenɣi u war nᵉttesři i usuḍi deg uyicc n icarri u war nettřiẓi aɣrum. Aqa dinni i nexs ad neqqim!’, 15 xenni sřem řexxu ɣar wawař n SIDI, kenniw min iqqimen n Yahuda. Ammu i iqqar SIDI n řɛeskarat, AREBBI n Israil: ‘Mařa kenniw tɛemmdem ad tuyurem ɣar Miṣra uca ad dd-tawḍem ḥima ad din tzedɣem am yibarraniyyen, 16 xenni ssif i zi tᵉtteggʷedem ad kenniw iřqef dinni di Miṣra u řaẓ i zi tᵉtteggʷedem ad kenniw dd-iḍfar dinni di Miṣra u ad dinni temmtem. 17 Xenni marra iryazen nni ixsen ad uyuren ɣar Miṣra ḥima ad din zedɣen am yibarraniyyen ad mmten s ssif d řaẓ d ṭṭaɛun. War zzaysen inejjem niɣ ittarekkwař uřa d ijjen zi řɣar i xasen dd ɣa ɣeḍřeɣ.’ 18 Maɣar ammu i iqqar SIDI, AREBBI n Israil: ‘Am mammec aɣḍab inu d wesɛar inu ttwazeǧɛen x imezdaɣ n Urcalim, ammu i ɣa ittwazeǧeɛ uřa d asɛar inu xawem mařa tiwḍem ɣar Miṣra. Kenniw ad tdewřem d řqecɛet n wexzi d unexřiɛ d tseḍḥact, uřa d nneɛřet d řḥegra. Amcan-a ɛemmarṣ ad tt tẓarem ɛad.’ ◘42:18 Ica. 65:15; Irm. 7:20; 18:16; 19:8; 24:9; 25:9, 18; 26:6; 29:18 19 SIDI issiweř ɣarwem, a min iqqimen n Yahuda! War ttidfem ɣar Miṣra. Snem mliḥ aqa necc ɛeřmeɣ awem ass-a. 20 Maɣar kenniw tɣeccem x yixef nwem. Kenniw simant nwem tessekkem ayi-dd ɣar SIDI, AREBBI nwem, tennam: ‘Ẓaǧ aneɣ ɣar SIDI, AREBBI nneɣ. Ini aneɣ marra min ɣa yiři ad yini SIDI, AREBBI nneɣ, uca neccin ad t negg!’ 21 Ass-a nniɣ awem, maca kenniw war tesřim ca ɣar tmijja n SIDI, AREBBI nwem, ɣar marra s min zi i d ayi ɣarwem dd-issekk. 22 Xenni řexxu, snem mliḥ aqa ad temmtem s ssif d řaẓ d ṭṭaɛun deg wemcan mani texsem ad tuyurem ḥima ad dinni teqqimem am yibarraniyyen.”