1 Awařen n Naḥamya, mmis n Ḥakalya.

Imsar deg uyur n Kisluw, deg useggʷas wiss ɛicrin, umi d ayi tuɣa di řeqṣar di Cucan, 2 aqa yusa-dd Ḥanani, ijjen zeg aytma, jmiɛ ak-d ca n yeryazen zi Yahuda, uca sseqsiɣ ten x Wudayen nni innejmen, inni iqqimen zi tmeḥbast, u x Urcalim. 3 Nitni nnan ayi: “Inni iqqimen, inni din iqqimen di lɛamala zi tmeḥbast, aqa aten di řeɣben d ameqqran u di řefḍiḥet u řḥiḍ n Urcalim ittwarẓ u tiwwura nnes ttwasscemḍent.”

4 Umi sřiɣ awařen-a, imsar, aqa qqimeɣ ɣar temmurt, ruɣ u ceḍneɣ ca n wussan, ẓummeɣ u ẓuǧeɣ zzat i wudem n AREBBI n ijenwan. 5 Nniɣ: “A SIDI, AREBBI n ijenwan, Cek d Arebbi d ameqqran issaggʷaden, wenni iṭṭfen di Řɛahd d tmexsiwt icewwaren di ṭṭweɛ n yinni Cek ittexsen u n yinni iṭṭfen di tweṣṣa nnec, ◘1:5 Uf. 20:6; 34:7; Řxř. 14:18; Aɛwd. 5:10; Izhd. 86:15; 103:8; 145:8; Dan. 9:4 6 ejj ad yiři umezzuɣ nnec iften u tiṭṭawin nnec arzment, ḥima ad tesřed i tẓaǧit n umsexxar nnec nni ẓuǧeɣ ass-a zzat i wudem nnec, ass d ǧiřet, di ṭṭweɛ n ayt n Israil, imsexxaren nnec. Neɛmeɣ ɛawed s ddnub n ayt n Israil i zi xak xḍan. Necc d taddart n baba, aqa nexḍa akidek. 7 Negga akidek s waṭṭas n řeɣdar u war neṭṭif ca di řumurat d tweṣṣa d lfarayiḍ i zi tumured i umsexxar nnec Musa. 8 Idar awař i tumured i umsexxar nnec Musa umi tennid: “Mařa kenniw d iɣeddaren, aqa ad kenniw sszeǧɛeɣ jar řegnus, ◘1:8 Aɛwd. 4:25, 26, 27; 30:2, 3, 4 9 maca mařa tdewřem-dd ɣari, ad ṭṭfem di řumurat inu u ad tent teggem, waxxa din zzaywem inni x yuẓẓřen ɣar ṭṭarf aneggar n ujenna, Necc ad ten ssmuneɣ ssenni, ad ten awyeɣ ɣar wemcan i ixḍareɣ Necc ḥima ad dinni ssezdɣeɣ Isem inu. 10 Nitni wah, d imsexxaren nnec d řgens nnec nni tfekked s jjehd nnec ameqqran u s ufus nnec ijehden. 11 A, Sidi inu, ejj ad iften umezzuɣ nnec ɣar tẓaǧit n umsexxar nnec u ɣar tẓaǧit n imsexxaren nni ittexsen ad tteggʷeden zeg Yisem nnec. Ejj amsexxar nnec ad yaweḍ ass-a u ewc as arreḥmet zzat i wudem n weryaz-a.” Necc tuɣa ayi d awarrad n ujeǧid.