30
ⴰⵢⵓⴱ ⵉⵙⵙⵉⵡⴻⵍ ⵅ ⵍⴻⵎⵃⴰⵢⴻⵎ ⵏⵏⴻⵙ ⵏ ⵢⵉⴹⴰ
1 ⵍⴻⵅⵅⵓ ⵎⴰⵛⴰ ⵜⵓⵖⴰ ⴹⴻⵃⵃⵛⴻⵏ ⵅⴰⴼⵉ ⵉⵃⵓⴷⵔⵉⵢⵢⴻⵏ
ⵏⵏⵉ ⵉⴵⴰⵏ ⴷ ⵉⵎⴻⵥⵢⴰⵏⴻⵏ ⵅⴰⴼⵉ ⴷⴻⴳ ⵡⵓⵙⵙⴰⵏ,
ⵉⵏⵏⵉ ⴱⴰⴱⴰⵜⵙⴻⵏ ⵡⴰⵔ ⵖⴰⵔⵉ ⵙⴻⴽⴽⵡⵉⵏ
ⵎⴰⵃⴻⵏⴷ ⴰⴷ ⵜⴻⵏ ⴳⴳⴻⵖ
ⵖⴰⵔ ⵢⵉⵟⴰⵏ ⵉ ⵉⴵⴰⵏ ⵅ ⵡⵓⴵⵉ ⵉⵏⵓ.
2 ⵎⵉⵏ ⵖⴰ ⴳⴳⴻⵖ ⵅⴻⵏⵏⵉ ⵙ ⵊⵊⴻⵀⴷ ⵏ ⵉⴼⴰⵙⵙⴻⵏ ⵏⵙⴻⵏ?
ⴰⵇⴰ ⵉⴼⵏⴰ ⵊⵊⴻⵀⴷ ⵏⵙⴻⵏ ⵣⵉ ⵙⵙⵉⴱⴱⴻⵜ ⵏ ⵜⴻⵡⵙⴰⵔ.
3 ⵣⵉ ⵍⵇⵉⴵⴻⵜ ⵓ ⵣⵉ ⵍⴰⵥ ⴷⴻⵡⵍⴻⵏ ⵉⵙⵔⵉⵡⴻⵏ,
ⵜⵜⵎⴻⵖⵣⴰⵣⴻⵏ ⴷⵉ ⵍⵡⴰⵟⴰ ⵢⵓⵥⵖⴻⵏ
ⴷⵉ ⵜⵓⴱⴱⴰⵔⵛⴻⵏⵜ ⵜⴻⵛⵛⵓⵔ
ⵙ ⵓⵔⴻⴷⴷⴻⴵ ⴷ ⵓⵔⴻⴱⴱⴻⵊ.
4 ⵏⵉⵜⵏⵉ ⵍⴻⵇⵇⴹⴻⵏ ⵍⴻⴱⵣⴰⵔ ⴰⵎⴻⴵⴰⵃ ⵊⴰⵔ ⵛⴱⴰⵔⵇ,
ⵉⵥⴻⵡⵔⴰⵏ ⵏ ⵓⵣⴻⵣⵣⵓ ⴷ ⴰⵖⵔⵓⵎ ⵏⵙⴻⵏ.
5 ⵓⵥⵥⵍⴻⵏ ⵅⴰⵙⴻⵏ ⵣⵉ ⵜⵎⵓⵏⴻⵜ ⵏ ⵉⵡⴷⴰⵏ,
ⴽⴽⵡⴰⵔⴻⵏ ⵜⴻⵏ ⴰⵎ ⵢⵉⵅⴻⵡⵡⴰⵏⴻⵏ,
6 ⵃⵉⵎⴰ ⴰⴷ ⵣⴻⴷⵖⴻⵏ ⴷⵉ ⵜⴻⵖⵣⵓⵔⵉⵏ ⵉⵙⵙⴰⴳⴳⵯⴰⴷⴻⵏ,
ⴷⴻⴳ ⵉⴼⵔⴰⵏ ⵏ ⵓⵛⴰⵍ ⵓ ⴷⵉ ⵍⴻⵊⵔⵓⴼ.
7 ⵙⵖⵓⵢⵢⵓⵏ ⵊⴰⵔ ⵛⴱⴰⵔⵇ,
ⵙⴰⴷⵓ ⵜⵉⵣⴻⴳⴳⵡⴰⵔⵉⵏ ⵙⵙⵎⵓⵏⴰⵏ.
8 ⵜⴰⵔⵡⴰ ⵏ ⵉⴱⵓⵀⴰⵍⵉⵢⵢⴻⵏ ⴷ ⵜⴰⵔⵡⴰ ⴱⵍⴰ ⵉⵙⴻⵎ,
ⴷ ⵉⵏⵏⵉ ⵓⵥⵥⵍⴻⵏ ⵅⴰⵙⴻⵏ ⵣⵉ ⵜⴻⵎⵎⵓⵔⵜ ⵙ ⵓⵣⴻⴵⴰⴹ.
9 ⵍⴻⵅⵅⵓ ⵎⴰⵛⴰ ⴰⵇⴰ ⴰⵢⵉ
ⴷⴻⴳ ⵉⵣⵍⵉ ⵏⵙⴻⵏ ⵏ ⵜⵥⴰⵡⴰⵔⵜ,
ⴷⴻⵡⵍⴻⵖ ⴰⵙⴻⵏ ⵉ ⵍⵀⴰⵔⴷ. ◼30:9 ⵉⵥⵍⵉ ⵏⵙⴻⵏ ⵜⵥⴰⵡⴰⵔⵜ-ⵙ ⵜⵄⵉⴱⵔⴰⵏⵉⵜ ‘ⴰⵥⴻⵏⵥⵓⵏ ⵏⵙⴻⵏ’. ◘30:9 ⴰⵢⵓⴱ 17:6; ⵉⵥⵀⴷ. 69:13; ⵉⴳⵊⴷ. 3:14, 63
10 ⵛⴰⵔⵔⵀⴻⵏ ⴰⵢⵉ, ⵜⵜⴰⴳⴳⵯⴰⵊⴻⵏ ⵅⴰⴼⵉ,
ⵡⴰⵔ ⵜⵜⵙⴻⴹⵃⵉⵏ ⵛⴰ
ⵎⴰⵃⴻⵏⴷ ⴰⴷ ⵙⵙⵓⵙⴼⴻⵏ ⵅ ⵓⵖⴻⵎⴱⵓⴱ ⵉⵏⵓ. ◘30:10 ⴰⵢⵓⴱ 19:19
11 ⵎⴰⵖⴰⵔ ⵏⴻⵜⵜⴰ ⵉⵙⵙⴻⴼⵙⵉ ⴰⵙⵖⵓⵏ ⵏ ⵜⵇⵉⴹⵓⵏⵜ ⵉⵏⵓ
ⵓⵛⴰ ⵉⵙⵙⴻⵀⵡⴰ ⴰⵢⵉ.
ⵏⵉⵜⵏⵉ ⵏⴹⴰⵔⴻⵏ ⵙⵙⵔⵉⵎⴻⵜ ⵏⵙⴻⵏ ⵣⵣⴰⵜⵉ. ◼30:11 ⵥⵥⴰⵜⵉ-ⵙ ⵜⵄⵉⴱⵔⴰⵏⵉⵜ ‘ⵥⵥⴰⵜ ⵉ ⵓⵖⴻⵎⴱⵓⴱ ⵉⵏⵓ’.
12 ⵖⴰⵔ ⵓⵖⴻⵣⴷⵉⵙ ⴰⴼⵓⵙⵉ ⵉⵏⵓ
ⴽⴽⴰⵔⴻⵏ-ⴷⴷ ⵅⴰⴼⵉ ⵉⵖⴻⴷⴷⵉⵡⴻⵏ ⵏ ⵜⴰⵔⵔⴰⵡⵜ,
ⵄⴰⵔⵔⵏⴻⵏ ⵉⴹⴰⵔⴻⵏ ⵉⵏⵓ,
ⵙⵙⴳⴻⵄⵄⴰⴷⴻⵏ ⵅⴰⴼⵉ ⵉⵎⴻⵙⵔⴰⵇ ⵏ ⴰⵔⵥⵉⵢⵢⴻⵜ ⵏⵙⴻⵏ.
13 ⴰⴱⵔⵉⴷ ⵉⵏⵓ ⴰⵔⵥⵉⵏ ⵜ,
ⴰⵔⴻⵏⵏⵢⴻⵏ ⵜⴰⵎⴰⵔⴰ ⵅ ⵜⴰⵎⴰⵔⴰ ⵉⵏⵓ
ⵡⴰⵅⵅⴰ ⵏⵉⵜⵏⵉ ⵙⵉⵎⴰⵏⵜ ⵏⵙⴻⵏ
ⵡⴰⵔ ⵖⴰⵔⵙⴻⵏ ⵉⴵⵉ ⵡⵉ ⴷ ⴰⵙⴻⵏ ⵖⴰ ⵉⵡⵛⴻⵏ ⴰⴼⵓⵙ.
14 ⴰⵅⵎⵉ ⴷⴷ-ⵜⵜⴰⵙⴻⵏ
ⵣⴻⴳ ⵉⵊⵊ ⵏ ⵓⵏⵓⵇⵇⵉⴱ ⴷ ⵎⵉⵔⵉⵡ,
ⵜⵜⴰⴽⴽⵡⴰⴹⴻⵏ ⴰⵎ ⵍⴻⵎⵡⴰⵊ ⵢⴰⵔⴻⴷⴷⴵⴻⵏ.
15 ⵜⵜⵡⴰⴽⴻⴱⴱⴻⵏ-ⴷⴷ ⵅⴰⴼⵉ ⵉⵏⴻⵅⵍⵉⵄⴻⵏ,
ⴰⵎ ⵓⵙⴻⵎⵎⵉⴹ ⴹⴻⴼⴼⴰⵔⴻⵏ ⵏⵉⵜⵏⵉ ⵛⵛⴰⵏ ⵉⵏⵓ,
ⵉⴹⵡⴰ ⵣⵣⵀⴰⵔ ⵉⵏⵓ ⴰⵎ ⵢⵉⵊⵊ ⵏ ⵓⵙⴻⵢⵏⵓ.
16 ⵙ ⵓⵢⴰ ⵉⴼⴻⵙⵙⵉ ⵍⴻⵅⵅⵓ ⵍⴻⵄⵎⴰⵔ ⵉⵏⵓ ⴷⴰⵢⵉ,
ⵓⵙⵙⴰⵏ ⵏ ⵍⴻⵖⴱⴻⵏ ⵎⴻⵏⵏⵄⴻⵏ ⴰⵢⵉ.
17 ⴷⵉ ⴵⵉⵍⴻⵜ ⵉⵙⵙⵏⵓⵇⵇⵓⴱ ⴰⵢⵉ
ⵉⵖⵙⴰⵏ ⵉⵏⵓ ⵉ ⴷⴰⵢⵉ ⵉⴵⴰⵏ,
ⵍⴻⵃⵔⵉⵇ ⵉ ⴷ ⴰⵢⵉ ⵉⵜⵜⵖⴻⵣⵣⴰⵏ ⵡⴰⵔ ⵢⴰⵔⴻⵙⵙⵉ.
18 ⵉⵜⵜⵡⴰⴱⴻⴷⴷⴻⵍ ⵡⴰⵔⵔⵓⴷ ⵉⵏⵓ
ⵙ ⵊⵊⴻⵀⴷ ⵏⵏⴻⵙ ⴰⵎⴻⵇⵇⵔⴰⵏ
ⴰⵍⴰⵎⵉ ⵡⴰⵔ ⵅⴰⴼⵉ ⵜⵜⴻⵄⵇⵉⵍⴻⵏ ⵄⴰⴷ.
ⵉⵛⴰⵔⴼ ⴰⵢⵉ ⴰⵎ ⵜⵎⴰ ⵉ ⵉⵏⵏⴹⴻⵏ
ⵉ ⵡⴰⵔⵣⴻⵎ ⵏ ⵢⵉⵔⵉ ⴷⴻⴳ ⵡⴰⵔⵔⵓⴹ.
19 ⵉⵏⴹⴰⵔ ⴰⵢⵉ ⴷⴻⴳ ⵓⴱⴻⴵⴰⵄ,
ⴷⴻⵡⵍⴻⵖ ⴰⵎ ⵓⵛⴰⵍ ⴷ ⵢⵉⵖⵖⴻⴹ.
20 ⵙⵖⵓⵢⵢⵓⵖ ⵖⴰⵔⴻⴽ,
ⵎⴰⵛⴰ ⵛⴻⴽ ⵡⴰⵔ ⵅⴰⴼⵉ ⴷⴷ-ⵜᵉⵜⵜⴰⵔⵔⵉⴷ,
ⵏⴻⵛⵛ ⴱⴻⴷⴷⴻⵖ ⴷⴰ
ⵓⵛⴰ ⵛⴻⴽ ⵜᵉⵇⵇⵉⵎⴻⴷ ⵜⵃⴻⵟⵟⵉⴷ ⴷⴰⵢⵉ.
21 ⵛⴻⴽ ⵜⴷⴻⵡⵍⴻⴷ ⴰⵢⵉ ⴰⵎ ⵢⵉⵊⵊ ⵏ ⴱⵓ-ⵍⴻⵅⵛⵓⵏⴻⵜ,
ⵜᵉⵜⵜⴷⴰⵔⵔⴰⵛⴻⴷ ⵅⴰⴼⵉ ⵙ ⵓⴼⵓⵙ ⵏⵏⴻⵛ ⵉⵊⴻⵀⴷⴻⵏ.
22 ⵛⴻⴽ ⵜⴻⵙⵙⴳⴻⵄⵄⴰⴷⴻⴷ ⴰⵢⵉ
ⵓ ⵜⵏⴻⴷⴷⵀⴻⴷ ⴰⵢⵉ ⴷⴻⴳ ⵓⵙⴻⵎⵎⵉⴹ,
ⵜⴻⵙⵙⴻⴼⵔⴰⵖⴻⴷ ⵇⴰⵄ ⴰⴷⴷⵓⴷ ⵉⵏⵓ.
23 ⵎⴰⵖⴰⵔ ⵏⴻⵛⵛ ⵙⵙⵏⴻⵖ
ⴰⵇⴰ ⵛⴻⴽ ⴰⴷ ⴰⵢⵉ ⵜⵏⴻⴷⵀⴻⴷ ⵖⴰⵔ ⵍⵎⴻⵡⵜ,
ⵖⴰⵔ ⵜⴰⴷⴷⴰⵔⵜ ⵎⴰⵏⵉ ⵜⵜⵎⵓⵏⴻⵏ
ⵎⴰⵔⵔⴰ ⵉⵏⵏⵉ ⵉⴷⴷⴰⵔⴻⵏ. ◘30:23 ⵄⴱⵔ. 9:27
24 ⵎⴰ ⵡⴰⵔ ⵉⵏⴻⵟⵟⴰⵔ ⴱⵏⴰⴷⴻⵎ ⴰⴼⵓⵙ ⵏⵏⴻⵙ
ⵎⴰⵍⴰ ⵉⵡⴹⴰ ⵃⴻⴷ,
ⵎⴰ ⵡⴰⵔ ⵉⵙⵖⵓⵢⵢⵓ ⵡⴰⵍⵓ ⵇⴰⵄ
ⵖⴰⵔ ⴰⵔⵥⵉⵢⵢⴻⵜ ⵏⵏⴻⵙ?
25 ⵎⴰ ⵡⴰⵔ ⵔⵓⵖ ⵅ ⵡⴻⵏⵏⵉ ⵜⵓⵖⴰ ⵖⴰⵔ ⵉⴵⴰ
ⵡⵓⵙⵙⴰⵏ ⵏ ⵜⴰⵎⴰⵔⴰ,
ⵎⴰ ⵡⴰⵔ ⵉⵛⴹⵉⵏ ⴱⵓⵃⴱⴻⵍ ⵉⵏⵓ ⵅ ⵓⵎⴻⵣⵍⵓⴹ? ◘30:25 ⵉⵥⵀⴷ. 35:13, 14; ⵔⵓⵎ. 12:15
26 ⵓⵎⵉ ⵙⵙⵉⵜⵎⴻⵖ ⵖⴰⵔ ⵎⵉⵏ ⵉⵚⴻⴱⵃⴻⵏ,
ⴰⵇⴰ ⵢⵓⵙⴰ-ⴷⴷ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ,
ⵓⵎⵉ ⵔⴰⵊⵉⵖ ⵜⴰⴼⴰⵡⵜ, ⵜⵓⵙⴰ-ⴷⴷ ⵜⴰⴵⴻⵙⵜ.
27 ⴰⴷⴰⵏ ⵉⵏⵓ ⵜⵜⵏⴻⵏⵏⴰⵏ, ⵡⴰⵔ ⴰⵔⵙⵉⵏ,
ⵉⵡⴹⴻⵏ-ⴷⴷ ⵡⵓⵙⵙⴰⵏ ⵏ ⵜⴰⵎⴰⵔⴰ ⵖⴰⵔⵉ.
28 ⵏⴻⵛⵛ ⴰⴷ ⵓⵢⵓⵔⴻⵖ ⴷⴻⴳ ⵡⴻⵛⴹⴰⵏ,
ⴱⵍⴰ ⵍⴻⵀⵎⵓ ⵏ ⵜⴼⵓⵛⵜ.
ⴰⴷ ⴽⴽⴰⵔⴻⵖ ⴷⴻⴳ ⵡⴻⴳⵔⴰⵡ ⵏ ⵍⴳⴻⵏⵙ
ⵓⵛⴰ ⴰⴷ ⵇⵇⵉⵎⴻⵖ ⵙⵖⵓⵢⵢⵓⵖ ⴷⴻⴳ ⵓⵊⴻⵏⵏⴰ.
29 ⵉ ⵡⵓⵛⵛⴰⵏⴻⵏ ⵏ ⵍⴻⵅⵍⴰ
ⴷⴻⵡⵍⴻⵖ ⴷ ⵓⵎⴰⵜⵙⴻⵏ ⵣⵣⴰⵢⵙⴻⵏ,
ⵉ ⵢⴻⵙⵙⵉⵙ ⵏ ⵏⵏⵄⴰⵎⴻⵜ ⴷ ⴰⵎⵄⴰⵛⴰⵔ. ◘30:29 ⵉⵥⵀⴷ. 102:7
30 ⵜⵉⵍⵎⴻⵛⵜ ⵉⵏⵓ ⵜⴻⴷⵡⴻⵍ ⵅⴰⴼⵉ
ⴷ ⴰⴽⴰⵔⴽⵓⵛ ⴰⴱⴰⵔⵛⴰⵏ,
ⵣⵉ ⵜⵎⴻⵙⵙⵉ ⵛⴻⵎⵎⴹⴻⵏ ⵉⵖⵙⴰⵏ ⵉⵏⵓ. ◘30:30 ⵉⵥⵀⴷ. 119:83; ⵉⴳⵊⴷ. 4:8; 5:10
31 ⵜⴻⴷⵡⴻⵍ ⵜⵉⵔⴰⵔⵜ ⵏ ⵍⴳⴰⵎⴱⵔⵉ ⵉⵏⵓ ⵉ ⵡⴻⵛⴹⴰⵏ,
ⵜⴰⵎⵊⴰ ⵉⵏⵓ ⵉ ⵍⵃⴻⵙⵙ ⵏ ⵉⵎⴻⵟⵟⴰⵡⴻⵏ.
◼30:9 30:9 ⵉⵥⵍⵉ ⵏⵙⴻⵏ ⵜⵥⴰⵡⴰⵔⵜ-ⵙ ⵜⵄⵉⴱⵔⴰⵏⵉⵜ ‘ⴰⵥⴻⵏⵥⵓⵏ ⵏⵙⴻⵏ’.
◘30:9 30:9 ⴰⵢⵓⴱ 17:6; ⵉⵥⵀⴷ. 69:13; ⵉⴳⵊⴷ. 3:14, 63
◘30:10 30:10 ⴰⵢⵓⴱ 19:19
◼30:11 30:11 ⵥⵥⴰⵜⵉ-ⵙ ⵜⵄⵉⴱⵔⴰⵏⵉⵜ ‘ⵥⵥⴰⵜ ⵉ ⵓⵖⴻⵎⴱⵓⴱ ⵉⵏⵓ’.
◘30:25 30:25 ⵉⵥⵀⴷ. 35:13, 14; ⵔⵓⵎ. 12:15
◘30:29 30:29 ⵉⵥⵀⴷ. 102:7
◘30:30 30:30 ⵉⵥⵀⴷ. 119:83; ⵉⴳⵊⴷ. 4:8; 5:10