19
ⵜⴰⵎⵡⴰⵔⵔⵉⵜ ⵏ ⴰⵢⵓⴱ ⵅ ⴱⵉⵍⴷⴰⴷ ⵅ ⵓⵙⵉⵜⴻⵎ ⵏⵏⴻⵙ ⴷⵉ ⴰⵔⴻⴱⴱⵉ
1 ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ:
2 ⵎⴻⵛⵃⴰⵍ ⵄⴰⴷ ⵉ ⵖⴰ ⵜⴻⴽⴽⴻⵎ
ⵜⵛⴻⴹⵏⴻⵎ ⵍⴻⵄⵎⴰⵔ ⵉⵏⵓ,
ⴰⴷ ⴰⵢⵉ ⵜⵍⴻⴱⵣⴻⵎ ⵙ ⵡⴰⵡⴰⵍⴻⵏ?
3 ⵍⴻⵅⵅⵓ ⵄⴰⴷ ⵡⵉⵙⵙ ⵄⴻⵛⵔⴰ ⵏ ⵜⵡⴰⵍⴰⵡⵉⵏ
ⵜⵜⴻⴽⴽⵡⴰⵔⴻⵎ ⴰⵢⵉ,
ⵡⴰⵔ ⵜᵉⵜⵜⵙⴻⴹⵃⵉⵎ
ⵓⵎⵉ ⴷ ⴰⵢⵉ ⴷⴷ-ⵜⵖⴻⵟⵟⵍⴻⵎ ⴰⵡⴰⵍ.
4 ⵎⴰⵍⴰ ⵙ ⵜⵉⴷⴻⵜⵜ ⵡⴻⴷⴷⴰⵔⴻⵖ,
ⴰⴷ ⵉⵇⵇⵉⵎ ⵓⵡⴻⴷⴷⴰⵔ ⵉⵏⵓ ⵉ ⵉⵅⴻⴼ ⵉⵏⵓ.
5 ⵎⴰⵍⴰ ⵙ ⵜⵉⴷⴻⵜⵜ ⵜⴻⵅⵙⴻⵎ ⴰⴷ ⵅⴰⴼⵉ ⵜⴻⵙⵙⴳⴻⵄⵄⴷⴻⵎ
ⵉⵅⴻⴼ ⵏⵡⴻⵎ ⵙ ⵛⵛⵉⴽⵉ,
ⴰⴷ ⴰⵢⵉ ⵜⴻⵙⵙⵇⴻⵏⵄⴻⵎ ⵙ ⵍⴻⴼⴹⵉⵃⴻⵜ ⵉⵏⵓ, ◼19:5 ⴰⴷ ⵅⴰⴼⵉ ⵜⴻⵙⵙⴳⴻⵄⵄⴷⴻⵎ ⵉⵅⴻⴼ ⵏⵡⴻⵎ ⵙ ⵛⵛⵉⴽⵉ-ⵏⵉⵖ: ‘ⴰⴷ ⵅⴰⴼⵉ ⵜⴻⴳⴳⴻⵎ ⴰⵢⴰⵥⵉⴹ’.
6 ⵙⵏⴻⵎ ⵅⴻⵏⵏⵉ, ⴰⵇⴰ ⴰⵔⴻⴱⴱⵉ ⵉⵏⵏⴻⵇⵍⴻⴱ ⵅⴰⴼⵉ,
ⵓⵛⴰ ⵉⵏⵏⴻⴹ ⴰⵢⵉ-ⴷⴷ ⵙ ⵜⵔⴰⵛⵛⴰ ⵏⵏⴻⵙ.
7 ⵅⵣⴰⵔ, ⵙⵖⵓⵢⵢⵓⵖ: ‘ⵍⴻⵅⵛⵓⵏⴻⵜ!’,
ⵎⴰⵛⴰ ⵡⴰⵔ ⵅⴰⴼⵉ ⴷⴷ-ⵢⴰⵔⵔⵉ ⵓⵍⴰ ⴷ ⵉⵊⵊ,
ⵜⵜⵍⴰⵖⵉⵖ ⵉ ⵜⵡⵉⵣⴰ,
ⵎⴰⵛⴰ ⵍⵃⴻⵇⵇ ⵡⴰⵔ ⴷⵉⵏ ⵉⴵⵉ.
8 ⴰⴱⵔⵉⴷ ⵉⵏⵓ ⵉⵇⵇⴻⵏ ⵉ-ⵜ,
ⴰⵍⴰⵎⵉ ⵡⴰⵔ ⵣⴻⵎⵎⴰⵔⴻⵖ ⴰⴷ ⵄⴷⵓⵖ,
ⵜⴰⴵⴻⵙⵜ ⵉⵙⵙⵓ ⵜⵜ ⵅ ⵉⵎⴻⵙⵔⴰⵇ ⵉⵏⵓ.
9 ⵍⵄⴻⵣⵣ ⵉⵏⵓ ⵉⴽⴻⵛⵛⴻⴹ ⵉ-ⵜ ⵣⵣⴰⵢⵉ,
ⵓ ⵜⵜⴰⵊ ⵉ ⵉⴵⴰⵏ ⵅ ⵓⵣⴻⴵⵉⴼ ⵉⵏⵓ ⵉⴽⴽⴻⵙ ⵉ-ⵜ.
10 ⵏⴻⵜⵜⴰ ⵢⴰⵔⴻⴷⴷⴻⴵ ⴰⵢⵉ ⵣⵉ ⵎⴰⵔⵔⴰ ⵉⵖⴻⵣⴷⵉⵙⴻⵏ,
ⴰⴷ ⵜⵜⵡⴰⵀⴻⵍⵍⴽⴻⵖ!
ⵉⵇⵍⴻⵄ ⵍⴰⵢⴰⵙ ⵉⵏⵓ ⴰⵎ ⵢⵉⵛⵜ ⵏ ⵜⵛⴻⵊⵊⴰⵔⵜ. ◼19:10 ⵜⴰⵛⴻⵊⵊⴰⵔⵜ-ⵏⵉⵖ ‘ⴰⴷⴷⴰⴳ’ (‘ⵉⴷⴷⴰⴳⴻⵏ’).
11 ⴰⵖⴹⴰⴱ ⵏⵏⴻⵙ ⵢⴰⵔⵖⴰ ⴷⴰⵢⵉ,
ⵏⴻⵜⵜⴰ ⵉⵃⴻⵙⵙⴻⴱ ⴰⵢⵉ
ⴰⵎ ⵉⵊⵊ ⵣⴻⴳ ⵉⵖⵔⵉⵎⴻⵏ ⵏⵏⴻⵙ. ◘19:11 ⴰⵢⵓⴱ 13:24; 16:9; 33:10; ⵉⴳⵊⴷ. 2:5
12 ⵎⵓⵏⴻⵏⵜ ⴼⴼⵖⴻⵏⵜ-ⴷⴷ ⴱⴰⵏⴷⵉⵢⵢⴰⵜ ⵏⵏⴻⵙ,
ⵙⵙⵡⴻⵊⴷⴻⵏⵜ-ⵉ-ⴷⴷ ⴰⴱⵔⵉⴷ ⵏⵙⴻⵏⵜ ⵖⴰⵔⵉ
ⵓⵛⴰ ⵇⵓⵡⵡⴰⵔⴻⵏⵜ ⵉ ⵜⵇⵉⴹⵓⵏⵜ ⵉⵏⵓ.
13 ⴰⵢⵜⵎⴰ ⵉⵙⵙⵉⴳⴳⵯⴻⵊ ⵉ-ⵜⴻⵏ ⵅⴰⴼⵉ,
ⵉⵏⵏⵉ ⴷ ⴰⵢⵉ ⵉⵙⵙⵏⴻⵏ ⴷⴻⵡⵍⴻⵏ ⴷ ⵎⵉⴷⴷⴻⵏ ⵅⴰⴼⵉ. ◘19:13 ⵉⵥⵀⴷ. 31:12; 38:12; 69:9; 88:9
14 ⵉⵏⵏⵉ ⴷ ⴰⵢⵉ ⵉⵜⵜⴻⵄⵏⴰⵏ ⵊⵊⵉⵏ ⴰⵢⵉ,
ⵉⵏⵏⵉ ⴷ ⴰⵢⵉ ⵉⵙⵙⵏⴻⵏ ⵜⵜⵓⵏ ⴰⵢⵉ.
15 ⵉⵎⵙⴻⵅⵅⴰⵔⴻⵏ ⵏ ⵜⴰⴷⴷⴰⵔⵜ ⵉⵏⵓ ⴷ ⵜⵉⵢⵢⴰ ⵉⵏⵓ
ⵃⴻⵙⵙⴱⴻⵏ ⴰⵢⵉ ⴷ ⵍⴱⴰⵔⵔⴰⵏⵉ,
ⵏⴻⵛⵛ ⴷ ⴰⵖⵔⵉⴱ ⵊⴰⵔ ⵜⵉⵟⵟⴰⵡⵉⵏ ⵏⵙⴻⵏ.
16 ⵍⴰⵖⵉⵖ ⵉ ⵓⵎⵙⴻⵅⵅⴰⵔ ⵉⵏⵓ,
ⵎⴰⵛⴰ ⵡⴰⵔ ⵅⴰⴼⵉ ⴷⴷ-ⵢⴰⵔⵔⵉ,
ⵜⵓⵖⴰ ⵉⵜⵜⵅⴻⵚⵚⴰ ⴰⴷ ⵜ ⵃⴻⵛⵛⵎⴻⵖ
ⵙ ⵓⵇⴻⵎⵎⵓⵎ ⵉⵏⵓ.
17 ⵍⴻⵄⵡⵉⵏ ⵏ ⵜⴻⵎⵡⴰⵔⵔⵉⵜ ⵏ ⵏⵏⴻⴼⵙ ⵉⵏⵓ
ⵉⵙⵙⵄⵉⴼⴼ ⵜⴰⵎⵖⴰⵔⵜ ⵉⵏⵓ,
ⴰⵔⵚⵓⴹⴻⵖ ⵉ ⴰⵢⵜⵎⴰ.
18 ⵄⴰⴷ ⵉⵃⵔⴰⵎⴻⵏ ⵉⵎⴻⵥⵢⴰⵏⴻⵏ ⵙⵙⴻⵃⵇⴰⵔⴻⵏ ⴰⵢⵉ.
ⵎⴰⵍⴰ ⴽⴽⴰⵔⴻⵖ ⴱⴻⴷⴷⴻⵖ, ⵜⵜⴻⵎⵄⴰⵔⵔⴰⵏ ⵅⴰⴼⵉ
ⵙ ⵡⴰⵡⴰⵍⴻⵏ ⵏⵙⴻⵏ. ◘19:18 ⴰⵢⵓⴱ 30:1
19 ⵎⴰⵔⵔⴰ ⵉⵎⵎⴻⴷⴷⵓⴽⴽⴰⵍ ⵉⵏⵓ ⵉⵄⵉⵣⵣⴻⵏ
ⵛⴰⵔⵔⵀⴻⵏ ⴰⵢⵉ,
ⵉⵏⵏⵉ ⵜⵜⴻⵅⵙⴻⵖ, ⵏⵏⵇⴻⵍⴱⴻⵏ ⵅⴰⴼⵉ. ◘19:19 ⵉⵥⵀⴷ. 41:10; 55:14, 15
20 ⵖⴰⵔ ⵜⴻⵍⵎⴻⵛⵜ ⴷ ⵡⴻⵢⵙⵓⵎ ⵉⵏⵓ
ⵍⴻⵙⵙⵇⴻⵏ ⵉⵖⵙⴰⵏ ⵉⵏⵓ.
ⵏⴻⵛⵛ ⵏⴻⵊⵎⴻⵖ
ⴰⴽ-ⴷ ⵜⵉⵍⵎⴻⵛⵜ ⵏ ⵜⴻⵖⵎⴰⵙ ⵉⵏⵓ ⵡⴰⵀⴰ. ◘19:20 ⴰⵢⵓⴱ 30:30; ⵉⵥⵀⴷ. 102:6; ⵉⴳⵊⴷ. 4:8
21 ⵃⵉⵏⵏⴻⵎ ⵅⴰⴼⵉ, ⵃⵉⵏⵏⴻⵎ ⵅⴰⴼⵉ, ⴰ ⴽⴻⵏⵏⵉⵡ,
ⵉⵎⴻⴷⴷⵓⴽⴽⴰⵍ ⵉⵏⵓ!
ⵎⴰⵖⴰⵔ ⴰⴼⵓⵙ ⵏ ⴰⵔⴻⴱⴱⵉ ⵉⵍⵇⴻⴼ ⴰⵢⵉ.
22 ⵎⴰⵢⴻⵎⵎⵉ ⴷ ⴰⵢⵉ ⵜⴹⴰⴼⴼⴰⵔⴻⵎ
ⴰⵎ ⵜⵜ ⵉⵜⵜⴻⴳⴳ ⴰⵔⴻⴱⴱⵉ,
ⵓ ⵎⴰⵢⴻⵎⵎⵉ ⵡⴰⵔ ⵜⵜⵊⵉⵡⵉⵏⴻⵎ ⴰⵢⵙⵓⵎ ⵉⵏⵓ?
23 ⵎⵍⵉ ⵓⵔⴰⵏ ⴰⵡⴰⵍⴻⵏ ⵉⵏⵓ,
ⵎⵍⵉ ⵜⵜⵡⴰⵣⴻⵎⵎⴻⵎⴻⵏ ⴷⴻⴳ ⵉⵊⵊ ⵏ ⵡⴻⴷⵍⵉⵙ!
24 ⵎⵍⵉ ⵜⵜⵡⴰⵏⴻⵇⵛⴻⵏ
ⵙ ⴱⵍⵓⵎⴰ ⵏ ⵡⵓⵣⵣⴰⵍ ⵓ ⵙ ⵍⴻⵅⴼⵉⴼ
ⴷⵉ ⵊⵊⴰⵔⴼ ⵉ ⵍⴻⴱⴷⴰ.
25 ⵏⴻⵛⵛ ⵙⵙⵏⴻⵖ: ‘ⴰⵎⴻⴼⴷⵉ ⵉⵏⵓ ⵉⴷⴷⴰⵔ
ⵓ ⵏⴻⵜⵜⴰ ⴰⴷ ⴷⴷ-ⵉⴽⴽⴰⵔ ⴷ ⴰⵏⴻⴳⴳⴰⵔ ⵅ ⵓⵛⴰⵍ.’
26 ⵓ ⴰⵡⴰⵔⵏⵉ ⵍⴰⵎⵉ ⵉ ⵖⴰ ⵜᵉⵜⵜⵡⴰⵍⴱⴻⵣ
ⵜⴻⵍⵎⴻⵛⵜ ⵉⵏⵓ ⴰⵎⵎⵓ,
ⴰⴷ ⵥⴰⵔⴻⵖ ⴰⵔⴻⴱⴱⵉ ⵣⵉ ⴰⵔⵔⵉⵎⴻⵜ ⵉⵏⵓ.
27 ⴰⴷ ⵜ ⵥⴰⵔⴻⵖ ⵣⵣⴰⵜⵉ,
ⵜⵉⵟⵟⴰⵡⵉⵏ ⵉⵏⵓ ⴰⴷ ⵜ ⵥⴰⵔⴻⵏⵜ,
ⵡⴰⵔ ⵉⴵⵉ ⵎⵉⴷⴷⴻⵏ.
ⵖⴰⵔⴻⵙ ⵉ ⵜⵜⵎⴻⵥⵔⴻⵏⵜ ⵜⵉⵥⵥⴰⵍ ⵉⵏⵓ
ⵖⴰⵔ ⴷⴰⵅⴻⵍ ⵉⵏⵓ. ◼19:27 ⵜⵉⵥⵥⴰⵍ-ⵏⵉⵖ ‘ⵜⵉⴳⴻⵥⵍⵉⵏ’.
28 ⵡⴰⵅⵅⴰ ⴰⵎⴻⵏⵏⵉ ⴽⴻⵏⵏⵉⵡ ⴰⴷ ⵜⵉⵏⵉⵎ:
‘ⵎⴰⵎⵎⴻⵛ ⵉ ⵏⵣⴻⵎⵎⴰⵔ ⴰⴷ ⵜ ⵏⴻⴹⴼⴰⵔ?’
ⵎⴰⵖⴰⵔ ⴰⵥⵡⴰⵔ ⵏ ⵜⵎⴻⵙⵍⴰⵛⵜ ⵉⵜⵜⵡⴰⴼ ⴷⴰⵢⵉ.
29 ⴳⴳⵯⴻⴷⴻⵎ ⵣⵉ ⵙⵙⵉⴼ,
ⵎⴰⵖⴰⵔ ⵙ ⵙⵙⵉⴼ ⴰⴷ ⴷⴷ-ⵢⴰⵙ ⵡⴻⵙⵄⴰⵔ
ⵅ ⴷⴷⵏⵓⴱ ⵉⵏⴻⵇⵇⴻⵏ,
ⵎⴰⵃⴻⵏⴷ ⴰⴷ ⵜⴻⵙⵙⵏⴻⵎ ⴰⵇⴰ ⴰⴷ ⵢⵉⵍⵉ ⵍⵃⵓⴽⵎ.
◼19:5 19:5 ⴰⴷ ⵅⴰⴼⵉ ⵜⴻⵙⵙⴳⴻⵄⵄⴷⴻⵎ ⵉⵅⴻⴼ ⵏⵡⴻⵎ ⵙ ⵛⵛⵉⴽⵉ-ⵏⵉⵖ: ‘ⴰⴷ ⵅⴰⴼⵉ ⵜⴻⴳⴳⴻⵎ ⴰⵢⴰⵥⵉⴹ’.
◼19:10 19:10 ⵜⴰⵛⴻⵊⵊⴰⵔⵜ-ⵏⵉⵖ ‘ⴰⴷⴷⴰⴳ’ (‘ⵉⴷⴷⴰⴳⴻⵏ’).
◘19:11 19:11 ⴰⵢⵓⴱ 13:24; 16:9; 33:10; ⵉⴳⵊⴷ. 2:5
◘19:13 19:13 ⵉⵥⵀⴷ. 31:12; 38:12; 69:9; 88:9
◘19:19 19:19 ⵉⵥⵀⴷ. 41:10; 55:14, 15
◘19:20 19:20 ⴰⵢⵓⴱ 30:30; ⵉⵥⵀⴷ. 102:6; ⵉⴳⵊⴷ. 4:8
◼19:27 19:27 ⵜⵉⵥⵥⴰⵍ-ⵏⵉⵖ ‘ⵜⵉⴳⴻⵥⵍⵉⵏ’.