1 ⴷⵉ ⵍⵡⴻⵇⵜ ⵏⵏⵉ ⵓⵙⵉⵏ-ⴷⴷ ⵖⴰⵔⴻⵙ ⵛⴰ ⵏ ⵉⵡⴷⴰⵏ, ⵅⴻⴱⴱⴰⵔⴻⵏ ⵜ ⵅ ⵉⵊⴰⵍⵉⵍⵉⵢⵢⴻⵏ ⵉⵏⵏⵉ ⵉⵅⴻⴵⴻⴹ ⴱⵉⵍⴰⵟⵓⵙ ⵉⴷⴰⵎⵎⴻⵏ ⵏⵙⴻⵏ ⴰⴽ-ⴷ ⵜⵖⴰⵔⵚⵉⵏ ⵏⵙⴻⵏ. 2 ⵢⴰⵔⵔⴰ-ⴷⴷ ⵢⴰⵙⵓⵄ, ⵉⵏⵏⴰ ⴰⵙⴻⵏ: “ⵎⴰ ⵉⵜⵜⵖⵉⵍ ⴰⵡⴻⵎ ⴱⴻⵍⵍⵉ ⵉⵊⴰⵍⵉⵍⵉⵢⵢⴻⵏ-ⴰ ⴷ ⵉⵎⴻⴷⵏⴰⴱ ⴽⵜⴰⵔ ⵣⴻⴳ ⵉⵊⴰⵍⵉⵍⵉⵢⵢⴻⵏ ⵏⵏⴻⵖⵏⵉ ⵓⵎⵉ ⴷ ⴰⵙⴻⵏ ⵉⵎⵙⴰⵔ ⵓⵡⴻⴷⴷⴻⴱ-ⴰ? 3 ⴰⴷ ⴰⵡⴻⵎ ⵉⵏⵉⵖ, ⵍⵍⴰ! ⵎⴰⵛⴰ ⴽⴻⵏⵏⵉⵡ ⴰⴷ ⵜᵉⵜⵜⵡⴰⵀⴻⵍⵍⴽⴻⵎ ⵎⴰⵔⵔⴰ ⴰⵎ ⵏⵉⵜⵏⵉ, ⵎⴰⵍⴰ ⵡⴰⵔ ⵜᵉⵜⵜⵓⴱⴻⵎ. 4 ⵓ ⵣⵉ ⵊⵊⵉⵀⴻⵜ ⵏ ⵜⵎⴻⵏⵟⴰⵛ ⵏ ⵉⵡⴷⴰⵏ ⵉ ⵅⴻⴼ ⴷⴷ-ⵜⴻⵡⴹⴰ ⵚⵚⵓⵎⵄⴻⵜ ⴷⵉ ⵙⵉⵍⵓⵡⴰⵎ ⵓⵛⴰ ⵎⵎⵓⵜⴻⵏ ⵣⵣⴰⵢⴻⵙ, ⵎⴰ ⵉⵜⵜⵖⵉⵍ ⴰⵡⴻⵎ ⴰⵇⴰ ⴰⵜⴻⵏ ⴷ ⵉⵎⴻⴷⵏⴰⴱ ⴽⵜⴰⵔ ⵣⴻⴳ ⵉⵡⴷⴰⵏ ⵏⵏⴻⵖⵏⵉ ⵉ ⵉⵣⴻⴷⴷⵖⴻⵏ ⴷⵉ ⵓⵔⵛⴰⵍⵉⵎ? 5 ⴰⴷ ⴰⵡⴻⵎ ⵉⵏⵉⵖ, ⵍⵍⴰ! ⵎⴰⵛⴰ ⴽⴻⵏⵏⵉⵡ ⴰⴷ ⵜᵉⵜⵜⵡⴰⵀⴻⵍⵍⴽⴻⵎ ⵎⴰⵔⵔⴰ ⴰⵎ ⵏⵉⵜⵏⵉ, ⵎⴰⵍⴰ ⵡⴰⵔ ⵜᵉⵜⵜⵓⴱⴻⵎ!”

6 ⵉⵏⵏⴰ ⴰⵙⴻⵏ ⴰⵎⴻⴷⵢⴰ-ⵢⴰ: “ⵜⵓⵖⴰ ⵖⴰⵔ ⵉⵊⵊ ⵏ ⵡⴻⵔⵢⴰⵣ ⵉⵊⵊ ⵏ ⵡⴰⵔⵜⵓ ⵉ ⵉⵜⵜⵡⴰⵥⵥⵓⵏ ⴷⴻⴳ ⵓⵎⴰⵔⵊⴻⵄ ⵏⵏⴻⵙ ⵏ ⵓⴹⵉⵍ, ⵓⵛⴰ ⵏⴻⵜⵜⴰ ⵢⵓⵙⴰ-ⴷⴷ, ⵢⴰⵔⴻⵣⵣⵓ ⴷⴰⵢⴻⵙ ⵜⴰⵣⴰⵔⵜ, ⵎⴰⵛⴰ ⵡⴰⵔ ⵜⵜ ⵢⵓⴼⵉ. 7 ⵉⵏⵏⴰ ⵉ ⴱⴰⴱ ⵏ ⵓⵎⴰⵔⵊⴻⵄ ⵏ ⵓⴹⵉⵍ: ‘ⴰⵇⴰ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ ⵜⵜⴰⵙⴻⵖ-ⴷⴷ, ⴰⵔⴻⵣⵣⵓⵖ ⵜⴰⵣⴰⵔⵜ ⴷⴻⴳ ⵡⴰⵔⵜⵓ-ⵢⴰ, ⵡⴰⵔ ⵜⵜ ⵓⴼⵉⵖ. ⵇⴻⵙⵙ ⵉ-ⵜⵜ ⵅⴻⵏⵏⵉ, ⵎⴰⵢⴻⵎⵎⵉ ⵜⴻⵙⵙⴰⵃⴰⵍ ⵄⴰⴷ ⵜⴰⵎⵎⵓⵔⵜ?’ 8 ⵢⴰⵔⵔⴰ-ⴷⴷ ⵅⴰⵙ ⵓⴼⴻⴵⴰⵃ: ‘ⴰ ⵙⵉⴷⵉ, ⴻⵊⵊ ⵉ-ⵜⵜ ⴰⴷ ⵜⴱⴻⴷⴷ ⵄⴰⴷ ⴰⵙⴻⴳⴳⵯⴰⵙ-ⴰ. ⴰⴷ ⵜⵜ ⵖⵣⵉⵖ, ⵓ ⴰⴷ ⴰⵙ ⴳⴳⴻⵖ ⵍⴻⵖⴱⴰⵔ. 9 ⴰⴷ ⵜⴰⵖ ⴰⴷ ⵜⴰⵔⵔ ⵍⵖⵉⴵⴻⵜ, ⵎⴰⵍⴰ ⵍⵍⴰ, ⵅⴻⵏⵏⵉ ⵇⴻⵙⵙ ⵉ-ⵜⵜ ⴷⴻⴳ ⵓⵙⴻⴳⴳⵯⴰⵙ ⵉ ⴷⴷ ⵖⴰ ⵢⴰⵙⴻⵏ.’ ”

10 ⵍⴰⵎⵉ ⵜⵓⵖⴰ ⵉⵙⵙⴻⵍⵎⴰⴷ ⵢⴰⵙⵓⵄ ⴷⴻⴳ ⵉⵛⵜⴻⵏ ⵣⵉ ⵜⴻⵎⵣⵉⴷⴰⵡⵉⵏ ⴷⵉ ⵙⵙⴻⴱⵜ, 11 ⵜⵓⵖⴰ ⴷⵉⵏ ⵉⵛⵜ ⵏ ⵜⴻⵎⵖⴰⵔⵜ ⵉ ⵉⴹⵄⴻⴼ ⴱⵓⵃⴱⴻⵍ ⵏⵏⴻⵙ ⵍⵎⵉⵊⴰⵍ ⵏ ⵜⵎⴻⵏⵟⴰⵛ ⵏ ⵉⵙⴻⴳⴳⵯⵓⵙⴰ. ⵜⵓⵖⴰ ⵜⴻⵇⵡⴻⵙ, ⵡⴰⵔ ⵜⵣⴻⵎⵎⴰⵔ ⴰⴷ ⵜⵙⴻⴳⴳⴻⵎ ⴰⵄⵔⵓⵔ. 12 ⵓⵎⵉ ⵜⵜ ⵉⵥⵔⴰ ⵢⴰⵙⵓⵄ, ⵉⵍⴰⵖⴰ-ⴷⴷ ⵅⴰⵙ ⵖⴰⵔⴻⵙ, ⵉⵏⵏⴰ ⴰⵙ: “ⴰ ⵜⴰⵎⵖⴰⵔⵜ, ⴰⵇⴰ ⵛⴻⵎ ⵜⴻⵏⴼⴻⴽⴽⴻⴷ ⵣⵉ ⵜⵓⴹⵄⴻⴼⵜ ⵏⵏⴻⵎ!” 13 ⵉⵙⵙⴰⵔⵙ ⵅⴰⵙ ⴰⴼⵓⵙ ⵏⵏⴻⵙ ⵓⵛⴰ ⵏⴻⵜⵜⴰⵜ ⵜⴻⴷⵡⴻⵍ ⵜⵙⴻⴳⴳⴻⵎ ⵍⴻⵅⴷⴻⵏⵏⵉ, ⵜⴻⴱⴷⴰ ⵜⴻⵙⵙⴻⵎⵖⴰⵔⴰ ⴷⵉ ⴰⵔⴻⴱⴱⵉ! 14 ⵎⴰⵛⴰ ⴰⵎⴻⵇⵇⵔⴰⵏ ⵏ ⵜⴻⵎⵣⵉⴷⴰ, ⵓⵎⵉ ⵉⵅⴻⵢⵢⴻⵇ, ⵎⵉⵏⵣⵉ ⵢⴰⵙⵓⵄ ⵉⵙⵙⴳⴻⵏⴼⴰ ⵉⵊⵊⴻⵏ ⴷⵉ ⵙⵙⴻⴱⵜ, ⵉⵟⵟⴻⴼ ⴷⴻⴳ ⵡⴰⵡⴰⵍ, ⵉⵏⵏⴰ ⵉ ⵍⵖⴰⵛⵉ: “ⴰⵇⴰ ⴷⵉ ⵙⴻⵜⵜⴰ ⵏ ⵡⵓⵙⵙⴰⵏ ⵉⵜⵜⵅⴻⵚⵚⴰ ⵍⵅⴻⴷⵎⴻⵜ, ⴰⵙⴻⵎ-ⴷⴷ ⴷⴻⴳ ⵡⵓⵙⵙⴰⵏ ⵏⵏⵉ ⵎⴰⵃⴻⵏⴷ ⴰⴷ ⵜᵉⵜⵜⵡⴰⵙⵙⴳⴻⵏⴼⴰⵎ, ⵡⴰⵔ ⵉⴵⵉ ⴷⴻⴳ ⵡⴰⵙⵙ ⵏ ⵙⵙⴻⴱⵜ!” ◘13:14 ⵓⴼ. 20:9; ⴰⵄⵡⴷ. 5:13; ⵃⵉⵥ. 20:12. 15 ⵎⴰⵛⴰ ⵢⴰⵔⵔⴰ-ⴷⴷ ⵢⴰⵙⵓⵄ, ⵉⵏⵏⴰ ⴰⵙ: “ⴰ ⵛⴻⴽ, ⴰⵎⵏⴰⴼⴻⵇ! ⵎⴰ ⵡⴰⵔ ⵉⴼⴻⵙⵙⵉ ⴽⵓⵍ ⵉⵊⵊⴻⵏ ⵣⵣⴰⵢⵡⴻⵎ ⴷⵉ ⵙⵙⴻⴱⵜ ⵉ ⵓⴼⵓⵏⴰⵙ ⵏⵏⴻⵙ ⵏⵉⵖ ⵉ ⵡⴻⵖⵢⵓⵍ ⵏⵏⴻⵙ ⵣⵉ ⵍⵎⴻⴷⵡⴻⴷ, ⵅⴻⵏⵏⵉ ⴰⴷ ⵜ ⵉⵏⴷⴻⵀ ⵎⴰⵃⴻⵏⴷ ⴰⴷ ⵜ ⵉⵡⴰⵔⴷ? ◘13:15 ⵓⴼ. 23:5; ⴰⵄⵡⴷ. 22:4; ⵍⴽ. 14:5. 16 ⵎⴰⵛⴰ ⵜⴰⵎⵖⴰⵔⵜ-ⴰ ⴰⵇⴰ-ⵜⵜ ⴷ ⵢⴻⴵⵉⵙ ⵏ ⵉⴱⵔⴰⵀⵉⵎ, ⵜⴻⵏⵏⵉ ⵉⵛⴻⴷⴷ ⵉⴱⵍⵉⵙ, ⵅⵣⴰⵔ, ⵄⴰⴷ ⵍⵎⵉⵊⴰⵍ ⵏ ⵜⵎⴻⵏⵟⴰⵛ ⵏ ⵉⵙⴻⴳⴳⵯⵓⵙⴰ, ⵎⴰ ⵡⴰⵔ ⴷ ⴰⵙ ⴷⴷ-ⵢⵓⵙⵉ ⴰⴷ ⵜᵉⵜⵜⵡⴰⴼⴻⴽⴽ ⵣⴻⴳ ⵓⵛⴻⴷⴷⵉ-ⵢⴰ ⴷⴻⴳ ⵡⴰⵙⵙ ⵏ ⵙⵙⴻⴱⵜ?” 17 ⴰⵎ ⵉⵏⵏⴰ ⵎⴰⵏ ⴰⵢⴰ, ⵙⴻⴹⵃⴰⵏ ⵎⴰⵔⵔⴰ ⵉⵏⵏⵉ ⵜⵓⵖⴰ ⴰⴽⵉⴷⴻⵙ ⵉⵜⵜⴻⵎⵄⴰⵍⴰⵏ, ⵎⴰⵛⴰ ⵎⴰⵔⵔⴰ ⵍⵖⴰⵛⵉ ⵉⴼⴰⵔⵃ ⵣⵉ ⵍⵎⵓⵄⵊⵉⵣⴰⵜ ⵏⵏⵉ ⵜⵓⵖⴰ ⵉⵜⵜⵡⴰⴳⴳⴻⵏ ⵙ ⵓⴼⵓⵙ ⵏⵏⴻⵙ.

18 ⵢⴰⵙⵓⵄ ⵉⵏⵏⴰ: “ⵎⵉⵏ ⴷⵉ ⵜⴰⵔⵡⴻⵙ ⵜⴳⴻⵍⴷⵉⵜ ⵏ ⴰⵔⴻⴱⴱⵉ ⵓⵛⴰ ⵎⵉⵏ ⵣⵉ ⵜⵜ ⵖⴰ ⵙⵙⴻⵎⵇⵓⴷⴷⴻⵖ? ◘13:18 [ⵎⵜ. 13:31-33; ⵎⴽ. 4:30-32] — ⵎⵜ. 13:31; ⵎⴽ. 4:30. 19 ⴰⵇⴰ-ⵜⵜ ⴰⵎ ⵢⵉⵛⵜ ⵏ ⵜⵃⴻⴱⴱⵓⵛⵜ ⵏ ⵣⵣⴰⵔⵉⵄⴻⵜ ⵏ ⵓⵅⴻⵔⴷⴻⵍ ⵉⴽⵙⵉ ⵜⵜ ⵉⵊⵊ ⵏ ⵡⴻⵔⵢⴰⵣ, ⵉⵏⴹⴰⵔ ⵉ-ⵜⵜ ⴷⵉ ⵜⴻⵃⵡⵉⵛⵜ ⵏⵏⴻⵙ, ⵓⵛⴰ ⵜⴻⵖⵎⵉ-ⴷⴷ, ⵜⴻⴷⵡⴻⵍ ⴷ ⵜⴰⵛⴻⵊⵊⴰⵔⵜ ⵜⴻⵎⵖⴰⵔ ⵓⵛⴰ ⴳⴳⵉⵏ ⵉⵊⴹⴰⴹ ⵏ ⵓⵊⴻⵏⵏⴰ ⵍⴻⵄⵡⴰⵛⵛ ⵏⵙⴻⵏ ⴷⵉ ⵍⴻⴼⵔⵓⵄ ⵏⵏⴻⵙ.” ◼13:19 ⵜⴰⵛⴻⵊⵊⴰⵔⵜ-ⵏⵉⵖ ‘ⴰⴷⴷⴰⴳ’ (‘ⵉⴷⴷⴰⴳⴻⵏ’). ⴰⵅⴻⵔⴷⴻⵍ-ⵙ ⵜⴰⴼⵔⴰⵏⵙⵉⵙⵜ: ‘ⵎⵓⵜⴰⵔⴷⵉ’.

20 ⵢⴰⵙⵓⵄ ⵉⵏⵏⴰ ⵄⴰⵡⴻⴷ: “ⵙ ⵎⵉⵏ ⵣⵉ ⵖⴰ ⵙⵙⴻⵎⵇⵓⴷⴷⴻⵖ ⵜⴰⴳⴻⵍⴷⵉⵜ ⵏ ⴰⵔⴻⴱⴱⵉ? ◘13:20 ⵎⵜ. 13:33. 21 ⴰⵇⴰ-ⵜⵜ ⴰⵎ ⵡⴻⵏⵜⵓⵏ, ⵜⴻⵢⵙⵉ ⵜ ⵜⴻⵎⵖⴰⵔⵜ, ⵜⴻⴼⴼⴰⵔ ⵉ-ⵜ ⴷⵉ ⵜⵍⴰⵜⴰ ⵏ ⵍⴻⵎⴷⵓⴷ ⵏ ⵡⴰⵔⴻⵏ, ⴰⵍⴰⵎⵉ ⵉⵙⵙⵎⴻⵎⵎ ⵎⴰⵔⵔⴰ!”

22 ⵉⵥⵡⴰ ⵜⵉⵏⴻⴷⴷⴰⵎ ⴷ ⴷⵛⵓⵔⴰⵜ, ⴰⵎ ⵜⵓⵖⴰ ⵉⵙⵙⴻⵍⵎⴰⴷ, ⵉⴳⴳⵓⵔ ⵖⴰⵔ ⵓⵔⵛⴰⵍⵉⵎ. ◼13:22 ⴷⵛⵓⵔⴰⵜ-ⵏⵉⵖ ‘ⵍⴻⴷⵛⵓⵔ’ ⵏⵉⵖ ‘ⵉⴱⵉⵍⴰⵊⴻⵏ’.  ◘13:22 [ⵎⵜ. 7:13-14, 21-23] — ⵎⵜ. 9:35; ⵎⴽ. 6:6. 23 ⵉⵊⵊⴻⵏ ⵉⵙⵙⴻⵇⵙⴰ ⵉ-ⵜ, ⵎⴰ ⴰⵇⴰ ⴷⵉⵏ ⴷⵔⵓⵙ ⵏ ⵢⵉⵏⵏⵉ ⵉ ⵖⴰ ⵟⵟⴼⴻⵏ ⵜⵓⴷⴰⵔⵜ. 24 ⵢⴰⵔⵔⴰ-ⴷⴷ ⵢⴰⵙⵓⵄ, ⵉⵏⵏⴰ ⴰⵙⴻⵏ: “ⴳⴳⴻⵎ ⵊⵊⴻⵀⴷ ⵏⵡⴻⵎ, ⵃⵉⵎⴰ ⴰⴷ ⵜⴰⴷⴼⴻⵎ ⵣⵉ ⵜⴻⵡⵡⴰⵔⵜ ⵉⵃⵚⴰⵔⴻⵏ, ⴰⵇⴰ ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⴰⵟⵟⴰⵙ ⴰⴷ ⴰⵔⵣⵓⵏ ⴰⴷ ⴷⴷ-ⴰⴷⴼⴻⵏ, ⵎⴰⵛⴰ ⵡⴰⵔ ⵣⴻⵎⵎⴰⵔⴻⵏ. ◘13:24 ⵎⵜ. 7:13. 25 ⵣⴻⴳ ⵡⴰⵎⵉ ⵉ ⵖⴰ ⵉⴽⴽⴰⵔ ⴱⴰⴱ ⵏ ⵜⴰⴷⴷⴰⵔⵜ ⵎⴰⵃⴻⵏⴷ ⴰⴷ ⵉⴱⴻⵍⵍⴻⵄ ⵜⴰⵡⵡⴰⵔⵜ, ⵅⴻⵏⵏⵉ ⴰⴷ ⵜⴱⴻⴷⴷⴻⵎ ⴷⵉ ⴱⴰⵔⵔⴰ, ⴰⴷ ⵜⴻⵙⵙⵇⴰⵔⴻⵇⴱⴻⵎ, ⴰⴷ ⵜⴻⴱⴷⴰⵎ ⴰⴷ ⵜⵉⵏⵉⵎ: ‘ⴰ ⵙⵉⴷⵉⵜⵏⴻⵖ, ⴰ ⵙⵉⴷⵉⵜⵏⴻⵖ, ⴰⵔⵣⴻⵎ ⴰⵏⴻⵖ!’ ⵎⴰⵛⴰ ⵏⴻⵜⵜⴰ ⴰⴷ ⴷⴷ-ⵢⴰⵔⵔ, ⴰⴷ ⵢⵉⵏⵉ: ‘ⵏⴻⵛⵛ ⵡⴰⵔ ⴽⴻⵏⵏⵉⵡ ⵙⵙⵉⵏⴻⵖ, ⵎⴰⵏⵉⵙ ⴽⴻⵏⵏⵉⵡ?’ ◘13:25 ⵎⵜ. 25:11, 12; ⵍⴽ. 6:46. 26 ⴰⴷ ⵜⴻⴱⴷⴰⵎ ⴰⴷ ⵜⵉⵏⵉⵎ: ‘ⵏⴻⵛⵛⵉⵏ ⴰⵃⴻⵇⵇⴰ ⵜⵓⵖⴰ ⵏⴻⵛⵛⴰ ⵏⴻⵙⵡⴰ ⵇⵉⴱⴰⵍⵜ ⵏⵏⴻⵛ, ⵓⵛⴰ ⵛⴻⴽ ⵜⵓⵖⴰ ⵜⴻⵙⵙⴻⵍⵎⴰⴷⴻⴷ ⴷⴻⴳ ⵉⵎⴻⵙⵔⴰⵇ ⵏⵏⴻⵖ!’ 27 ⵎⴰⵛⴰ ⵏⴻⵜⵜⴰ ⴰⴷ ⵢⵉⵏⵉ: ‘ⵡⴰⵔ ⴽⴻⵏⵏⵉⵡ ⵙⵙⵉⵏⴻⵖ, ⵡⴰⵔ ⵙⵙⵉⵏⴻⵖ ⵎⴰⵏⵉⵙ ⴽⴻⵏⵏⵉⵡ! ⴰⴳⴳⵯⴻⵊⴻⵎ ⵅⴰⴼⵉ, ⴽⴻⵏⵏⵉⵡ ⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ!’ ◘13:27 ⵉⵥⵀⴷ. 6:9; ⵎⵜ. 7:23; 25:12,41. 28 ⴰⴷ ⴷⵉⵏ ⵜⵉⵍⵉ ⵜⵖⵓⵢⵢⵉⵜ ⴷ ⵓⵖⴻⵣⵣⵉ ⵏ ⵜⴻⵖⵎⴰⵙ, ⵅⵎⵉ ⵖⴰ ⵜⵥⴰⵔⴻⵎ ⵉⴱⵔⴰⵀⵉⵎ ⴷ ⵉⵙⵃⴰⵇ ⴷ ⵢⴰⵄⵇⵓⴱ ⴷ ⵎⴰⵔⵔⴰ ⵉⵏⴰⴱⵉⵢⵢⴻⵏ ⴷⵉ ⵜⴳⴻⵍⴷⵉⵜ ⵏ ⴰⵔⴻⴱⴱⵉ, ⵎⴰⵛⴰ ⴽⴻⵏⵏⵉⵡ ⴰⴷ ⵜⴻⵎⵎⴻⵏⴹⴰⵔⴻⵎ ⴱⴰⵔⵔⴰ. ◘13:28 ⵎⵜ. 8:11, 12; 13:42; 24:51. 29 ⴰⴷ ⴷⴷ-ⴰⵙⴻⵏ ⵣⵉ ⵎⴰⵏⵉⵙ ⴷ ⵜⵏⴻⵇⵇⴰⵔ ⵜⴼⵓⵛⵜ ⵓ ⵣⵉ ⵎⴰⵏⵉ ⵜⵖⴻⴵⵉ ⵜⴼⵓⵛⵜ ⵓⵍⴰ ⵣⵉ ⵛⵛⴰⵎⴰⵍ ⵓⵍⴰ ⵣⵉ ⵍⵊⴰⵏⵓⴱ, ⴰⴷ ⵇⵇⵉⵎⴻⵏ ⵖⴰⵔ ⵟⵟⴰⴱⵍⴰ ⴷⵉ ⵜⴳⴻⵍⴷⵉⵜ ⵏ ⴰⵔⴻⴱⴱⵉ. ◘13:29 ⵉⵛⴰ. 2:2; ⵎⴰⵍ. 1:11; ⵎⵜ. 8:11. 30 ⵅⵣⴰⵔ, ⴰⵇⴰ ⴷⵉⵏ ⵉⵏⴻⴳⴳⵓⵔⴰ ⵉⵏⵏⵉ ⵉ ⵖⴰ ⵢⵉⵍⵉⵏ ⴷ ⵉⵎⴻⵣⵡⵓⵔⴰ, ⵓ ⴰⵇⴰ ⴷⵉⵏ ⵉⵎⴻⵣⵡⵓⵔⴰ ⵉⵏⵏⵉ ⵉ ⵖⴰ ⵢⵉⵍⵉⵏ ⴷ ⵉⵏⴻⴳⴳⵓⵔⴰ.” ◘13:30 ⵎⵜ. 19:30; 20:16; ⵎⴽ. 10:31.

31 ⴷⴻⴳ ⵡⴰⵙⵙ ⵏⵏⵉ ⵇⴰⵔⵔⴱⴻⵏ-ⴷⴷ ⵛⴰ ⵏ ⵉⴼⴰⵔⵉⵙⵉⵢⵢⴻⵏ, ⵏⵏⴰⵏ ⴰⵙ: “ⴼⴼⴻⵖ, ⵔⵓⵃ ⵙⵙⴰ, ⵎⵉⵏⵣⵉ ⵀⵉⵔⵓⴷⵓⵙ ⵉⵅⵙ ⴰⴷ ⵛⴻⴽ ⵉⵏⴻⵖ!” ◘13:31 [ⵎⵜ. 23:37-39] 32 ⵢⴰⵙⵓⵄ ⵉⵏⵏⴰ ⴰⵙⴻⵏ: “ⵔⵓⵃⴻⵎ, ⵉⵏⵉⵎ ⴰⵙ ⵉ ⵡⴻⵛⵄⴻⴱ-ⴰ: ‘ⵅⵥⴰⵔ, ⴰⵇⴰ ⵏⴻⵛⵛ ⵙⵙⵓⴼⴼⵓⵖⴻⵖ ⵛⵛⵡⴰⵟⴻⵏ, ⵙⵙⴳⴻⵏⴼⵉⵖ ⴰⵙⵙ-ⴰ ⴷ ⵜⵉⵡⴻⵛⵛⴰ, ⵓⵛⴰ ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⴰⴷ ⵉⵡⴹⴻⵖ ⵖⴰⵔ ⵍⴻⴽⵎⴰⵔⴻⵜ.” ◼13:32 ⴰⴷ ⵉⵡⴹⴻⵖ ⵖⴰⵔ ⵍⴻⴽⵎⴰⵔⴻⵜ-ⵉⵅⵙ ⴰⴷ ⵢⵉⵏⵉ ‘ⴰⴷ ⵇⴹⵉⵖ ⵍⵅⴻⴷⵎⴻⵜ ⵉⵏⵓ’. ⵅⵥⴰⵔ ⵎⴰⵜ. 5:17. 33 ⵎⴰⵛⴰ ⵉⵜⵜⵅⴻⵚⵚⴰ ⴰⵢⵉ ⴰⴷ ⵅⴻⴷⵎⴻⵖ ⴰⵙⵙ-ⴰ ⴷ ⵜⵉⵡⴻⵛⵛⴰ, ⵓⵛⴰ ⴷⴻⴳ ⵡⴰⵙⵙ ⴰⵡⴰⵔⵏⵉ ⴰⵙ ⴰⴷ ⵔⴰⵃⴻⵖ, ⵎⵉⵏⵣⵉ ⵡⴰⵔ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵏⴻⵖ ⵉⵊⵊ ⵏ ⵓⵏⴰⴱⵉ ⴱⴰⵔⵔⴰ ⵉ ⵓⵔⵛⴰⵍⵉⵎ. 34 ⴰ ⵓⵔⵛⴰⵍⵉⵎ, ⴰ ⵓⵔⵛⴰⵍⵉⵎ, ⵜⴻⵏⵏⵉ ⵉⵏⴻⵇⵇⴻⵏ ⵉⵏⴰⴱⵉⵢⵢⴻⵏ ⴷ ⵜⴻⵏⵏⵉ ⵢⴰⵔⴻⵊⵊⵎⴻⵏ ⵉⵏⵏⵉ ⵉ ⵖⴰⵔⴻⵎ ⴷⴷ-ⵉⵜⵜⵡⴰⵙⵙⴻⴽⴽⴻⵏ, ⵎⴻⵛⵃⴰⵍ ⵏ ⵜⵡⴰⵍⴰⵡⵉⵏ ⵜⵓⵖⴰ ⵅⵙⴻⵖ ⴰⴷ ⵙⵙⵎⵓⵏⴻⵖ ⵜⴰⵔⵡⴰ ⵏⵏⴻⵎ ⴰⵎ ⵎⴰⵎⵎⴻⵛ ⵜⴻⵙⵙⵎⵓⵏⴰ ⵜⵢⴰⵥⵉⴹⵜ ⵉⴼⵉⴵⵓⵙⴻⵏ ⵏⵏⴻⵙ ⵙⴰⴷⵓ ⵡⴰⴼⵔⵉⵡⴻⵏ ⵏⵏⴻⵙ, ⵎⴰⵛⴰ ⴽⴻⵏⵏⵉⵡ ⵡⴰⵔ ⵜⴻⵅⵙⴻⵎ. ◘13:34 ⵉⵥⵀⴷ. 17:8; 91:4; ⵎⵜ. 23:37. 35 ⵅⵣⴰⵔ, ⵜⴰⴷⴷⴰⵔⵜ ⵏⵡⴻⵎ ⴰⴷ ⴰⵡⴻⵎ ⵜⴻⵇⵇⵉⵎ ⴷ ⵍⵅⴰⵔⴱⴻⵜ. ⵎⴰⵖⴰⵔ ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⴰⵇⴰ ⵡⴰⵔ ⴷ ⴰⵢⵉ ⵜⵥⴰⵔⵔⴻⵎ ⴰⵍ ⴷⴷ ⵖⴰ ⵜⴰⵙ ⵍⵡⴻⵇⵜ ⵉ ⴷⵉ ⵉ ⵖⴰ ⵜⵉⵏⵉⵎ: ‘ⵍⴱⴰⵔⴰⴽⴰ ⵉ ⵡⴻⵏⵏⵉ ⴷⴷ ⵖⴰ ⵢⴰⵙⴻⵏ ⵙ ⵢⵉⵙⴻⵎ ⵏ ⵙⵉⴷⵉ’.” ◘13:35 ⵉⵥⵀⴷ. 69:26; 118:26; ⵉⵛⴰ. 1:7; ⵉⵔⵎ. 7:34; ⵎⵉⵅⴰ 3:12; ⵎⵜ. 23:38; ⵍⴻⵅ. 1:20.