1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ.

ⵣⴻⴳ ⴰⵢⵜ ⵏ ⵇⵓⵔⴰⵃ. ⴰⵣⴻⵀⵀⴻⴷ.

2 ⵛⴻⴽ ⵜⴰⵔⴹⵉⴷ ⵅ ⵜⴻⵎⵎⵓⵔⵜ, ⴰ ⵙⵉⴷⵉ,

ⵜⴻⵙⵙⴻⵏⵇⴻⵍⴱⴻⴷ ⵜⴰⵎⴻⵃⴱⴰⵙⵜ ⵏ ⵢⴰⵄⵇⵓⴱ.

3 ⵜⴻⴽⴽⵙⴻⴷ ⵍⵎⵓⵄⵚⵉⵢⵢⴻⵜ ⵅ ⵍⴳⴻⵏⵙ ⵏⵏⴻⵛ,

ⵜⴻⴷⵍⵉⴷ ⵎⴰⵔⵔⴰ ⴷⴷⵏⵓⴱ ⵏⵏⴻⵙ. ⵙⵉⵍⴰⵀ.

4 ⵛⴻⴽ ⵜⵎⴻⵏⵄⴻⴷ ⵎⴰⵔⵔⴰ ⴰⴼⵓⴳⴻⵎ,

ⵜⴻⵙⵙⵜⴻⵡⵡⵊⴻⴷ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵛ.

5 ⴰⵔⵔ ⴰⵏⴻⵖ, ⴰ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵏⵏⴻⵖ,

ⵜⵜⵓ ⴰⵖⴹⴰⴱ ⵏⵏⴻⵛ ⵅⴰⵏⴻⵖ.

6 ⵎⴰ ⵜⴻⵅⵙⴻⴷ ⴰⴷ ⵅⴰⵏⴻⵖ ⵜⴻⵙⵄⴰⵔⴻⴷ ⵉ ⵍⴻⴱⴷⴰ?

ⵎⴰ ⴰⴷ ⵜⴻⴳⴳⴻⴷ ⴰⵖⴹⴰⴱ ⵏⵏⴻⵛ

ⴰⴷ ⵉⵇⵇⵉⵎ ⵣⵉ ⵊⵊⵉⵍ ⴰⵍ ⵊⵊⵉⵍ?

7 ⵎⴰ ⵡⴰⵔ ⴷ ⴰⵏⴻⵖ ⵜⴻⵊⵊⵉⴷ ⴰⴷ ⵏⴻⴷⴷⴰⵔ ⵄⴰⵡⴻⴷ,

ⵃⵉⵎⴰ ⴰⴷ ⴰⵛ ⵉⴼⴰⵔⵃ ⵍⴳⴻⵏⵙ ⵏⵏⴻⵛ? ◘85:7 ⵉⵥⵀⴷ. 71:20

8 ⵙⵛⴻⵏ ⴰⵏⴻⵖ-ⴷⴷ

ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ, ⴰ ⵙⵉⴷⵉ,

ⴻⵡⵛ ⴰⵏⴻⵖ ⴰⵙⴻⵏⵊⴻⵎ ⵏⵏⴻⵛ.

9 ⵏⴻⵛⵛ ⵅⵙⴻⵖ ⴰⴷ ⵙⵍⴻⵖ

ⵎⵉⵏ ⵖⴰ ⵉⵙⵙⵉⵡⴻⵍ ⴰⵔⴻⴱⴱⵉ, ⵙⵉⴷⵉ,

ⵎⴰⵖⴰⵔ ⵏⴻⵜⵜⴰ ⴰⴷ ⵉⵙⵙⵉⵡⴻⵍ ⴰⴽ-ⴷ ⵍⴳⴻⵏⵙ ⵏⵏⴻⵙ

ⵓ ⴰⴽ-ⴷ ⵉⵎⵜⵉⵇⵇⴰⵏ ⵏⵏⴻⵙ ⵅ ⵍⴻⵀⵏⴰ.

ⵖⴰⵔⵡⴻⵎ, ⵎⴰⵍⴰ ⵏⵉⵜⵏⵉ ⴰⴷ ⴷⴷ-ⴷⴻⵡⵍⴻⵏ

ⵜⵜⵛⴰⵍⴰⵏ ⵅ ⵢⵉⵅⴻⴼ ⵏⵙⴻⵏ.

10 ⵏⵉⵛⴰⵏ, ⴰⵇⴰ ⵢⵓⴷⴻⵙ-ⴷⴷ ⵓⵙⴻⵏⵊⴻⵎ ⵏⵏⴻⵙ

ⵉ ⵢⵉⵏⵏⵉ ⵣⵣⴰⵢⴻⵙ ⵉⵜⵜⴻⴳⴳⵯⴻⴷⴻⵏ,

ⵃⵉⵎⴰ ⴰⵄⵓⴵⵉ ⵏⵏⴻⵙ

ⴰⴷ ⵉⵣⴷⴻⵖ ⴷⵉ ⵜⴻⵎⵎⵓⵔⵜ ⵏⵏⴻⵖ.

11 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ

ⴰⴷ ⵎⵎⵙⴰⴳⴰⵔⴻⵏ,

ⵜⴰⵙⴻⴳⴷⴰ ⴷ ⵍⴻⵀⵏⴰ ⴰⴷ ⵎⵎⵙⵓⴷⵓⵎⴻⵏ. ◘85:11 ⵄⴱⵔ. 7:2

12 ⵜⵉⴷⴻⵜⵜ ⴰⴷ ⵜⴻⵖⵎⵉ ⵣⵉ ⵜⴻⵎⵎⵓⵔⵜ,

ⵜⴰⵙⴻⴳⴷⴰ ⴰⴷ ⵜⴻⵙⵙⵉⵊⵊ ⵖⴰⵔ ⵙⵡⴰⴷⴷⴰⵢ

ⵣⴻⴳ ⵓⵊⴻⵏⵏⴰ.

13 ⵙⵉⴷⵉ ⴰⴷ ⵉⵡⵛ ⵓⵍⴰ ⴷ ⵎⵉⵏ ⵉⵚⴻⴱⵃⴻⵏ,

ⵜⴰⵎⵎⵓⵔⵜ ⵏⵏⴻⵖ ⴰⴷ ⵜⴻⵡⵛ ⵍⵖⵉⴵⴻⵜ ⵏⵏⴻⵙ. ◘85:13 ⵉⵥⵀⴷ. 67:7

14 ⵜⴰⵙⴻⴳⴷⴰ ⴰⴷ ⴰⵙ ⵜⵉⵣⵡⴰⵔ

ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ,

ⴰⴷ ⵜⴻⵃⴹⴰ ⵊⵊⵓⵔⵔⴻⵜ ⵏ ⵉⵚⵓⵔⴰⴼ ⵏⵏⴻⵙ.