1 Orait, mi na Pol, en mi speshalwan mesinja blanga Jisas Krais, dumaji God bin wandim mi blanga jidan speshalwan mishanri, en im na bin pikimat mi.

Wal mi raidimdan dijan leda langa ol yumob Kristjan pipul deya langa det taun gulum Korinth, en det braja blanga wi neim Sosanis im iya garram mi weya mi raidimdan dijan leda.

2 Wal yumob na det tjetj blanga God, dumaji God bin pikimat yumob blanga jidan im ronwan pipul, en yumob blanga im na, dumaji yumob bin joinap garram Jisas Krais. En yumob jidan mijamet garram ol detlot najalot pipul ebriweya hu bilib en weship langa Jisas Krais det Bos blanga wi. Im Bos blanga detlot najalot pipul, en im Bos blanga wi du.✡Eks 18:1

3 Wal God det Dedi blanga wi en Jisas Krais det Bos blanga wi garra brabli kainbala langa yumob en lukaftumbat yumob en meigim yumob jidan gudbalawei.

4 Wal mi oldei gibit theingks langa God blanga yumob, dumaji imbin brabli kainbala langa yumob, en imbin gibit yumob olkain gudbala ting, dumaji yumob bin joinap garram Jisas Krais.

5 Yu si? Yumob bin joinap garram Jisas Krais, en blanga tharran na God bin meigim yumob jidan brabli ritjwan. Bat mi nomo toktok blanga jidan ritjwan atsaidwei. Mi toktok blanga jidan ritjwan insaidwei.

Yumob sabi? Yumob brabli ritjwan, dumaji yumob sabi det wed blanga God brabliwei, en yumob sabi toktok blanga det wed gudbalawei du.

6 Wal yumob jidan brabli ritjwan, dumaji wen aibin dalimbat yumob det gudnyus blanga Jisas Krais, yumob bin bilib langa det gudnyus brabli strongbalawei, 7 en blanga tharran na yumob bin gedim ol detlot speshalwan pawa weya God bin wandi gibit wi, en imbin gibit yumob ol detlot gudbala ting blanga yusum raidap det taim weya Jisas Krais det Bos blanga wi garra kambek en shoum miselp.

Wal ai sabi yumob wandim det taim garra kaman, 8 en ai sabi God garra meigim yumob bilib strongbalawei raidap det dei weya Jisas Krais det Bos blanga wi garra kambek, en im garra meigim yumob bilib strongbalawei, dumaji wen Jisas Krais garra kambek, yumob kaan abum enijing rong langa yumob laif.

9 Yumob sabi na? God bin pikimat yumob blanga jidan gulijap garram Jisas Krais det san blanga im, en wi sabi God garra dum wanim imbin pramis.

10 Wal main braja en sista olabat, yumob irrim mi na. Jisas Krais det Bos blanga wi bin gibit mi det rait blanga tok blanga im, en ai dalim yumob. Yumob garra jidan garram wanbala main en tok wanwei, en yumob kaan kadimat miselp en meigimbat miselp difrin.

11 Main braja en sista olabat, mi tok lagijat langa yumob, dumaji sambala pipul brom det femili blanga det gel neim Klowi bin dalim mi yumob oldei agamin gija.

12 Wal yumob sabi wanim mi toktok, dumaji sambala pipul brom yumob tok, “Melabat bulurrum Pol.” En najalot pipul tok, “Melabat bulurrum Apalas.” En najalot pipul tok, “Melabat bulurrum Pida.” En najalot pipul tok, “Melabat bulurrum Jisas Krais.” Lagijat na yumob oldei agamin gija.✡Eks 18:24

13 Wal yumob dalim mi na. Jisas Krais bin kadimat miselp en meigim miselp blendibala? Nomo! Im oni wanbala. En wotabat mi? Aibin dai langa det kros blanga yumob? Nomo! Ai nomo bin dai blanga yumob. En yumob nomo bin beptais garram main neim du. Yumob bin beptais garram det neim blanga Jisas Krais.

14 Wal mi gibit theingks langa God, dumaji ai nomo bin beptaisim yumob. Oni Krispas en Gaiyas aibin beptaisim.✡Eks 18:8; 19:29; Rom 16:23

15 Yu si? Nobodi kaan tok imbin beptais garram main neim, dumaji ai nomo bin beptaisim enibodi.

16 Aibin foget blanga dalim yumob bifo blanga Stefanas en im femili olabat. Aibin beptaisim olabat du. Bat ai kaan jinggabat enibodi mowa.✡1 Karin 16:15

17 Wal ai nomo bin oldei beptaisimbat enibodi, dumaji Jisas Krais nomo bin jandim mi blanga beptaisimbat ola pipul. Imbin jandim mi blanga dalimbat olabat det gudnyus. En ai nomo bin oldei dalimbat det gudnyus garram olkainaba bigwan wed weya pipul kaan gajimap, dumaji if ai bina yusum detkain bigwan wed, wal detkain wed na bina deigidawei det pawa brom det trubala wed blanga det kros weya Jisas Krais bin dai.

18 Yumob sabi wanim mi tok blanga det kros? Detlot pipul hu garra go langa det helfaiya oldei toktok garram detkain bigwan wed, dumaji dei reken det trubalawan wed im siliwan. Bat blanga ol detlot pipul weya God garra seibum olabat, det trubalawan wed im det pawa blanga God. 19 Wi sabi tharran, dumaji langa oltestaman God bin tok, “Ai garra binijimap ola bigwan wed blanga ol detlot pipul hu reken miselp, en ai garra tjakidawei ola stori blanga ol detlot pipul hu reken dei sabi ebrijing.”✡Aisai 29:14

20 Wal wotabat ola pipul hu klebabala langa olabat main? En wotabat ol detlot pipul hu oldei ridimbat buk? En wotabat ol detlot pipul hu sabi toktok brabliwei langa dijan wel? Ai dalim yumob. Detlot wed weya detlot pipul oldei jinggabat miselp, wal God bin meigim ol detlot wed jidan nomo garram eni mining, dumaji nobodi kaan sabi God thru langa detkain wed weya pipul oldei jinggabat miselp.✡Job 12:17; Aisai 19:12; 33:18; 44:25 21 God im sabi ebrijing, en im na nomo larram enibodi sabi im thru langa olabat ronwan wed.

Yu si? God bin meigim im ronwan plen blanga seibum pipul thru langa det wed weya loda pipul reken im siliwan. Det wed na det gudnyus weya wi oldei dalimbat pipul, en God im gudbinji blanga seibum detlot pipul hu bilib langa det wed na. 22 Bat detlot Juwish pipul kaan bilib langa det wed, dumaji dei wandi luk klebabala ting garra hepin. En detlot Jintail pipul kaan bilib langa det wed du, dumaji dei wandi irrim bigwan klebabala wed. 23 Bat wi nomo gibit olabat wanim dei wandim. Wi jis dalimbat olabat det wed blanga Jisas Krais weya imbin dai langa det kros. Bat detlot Juwish pipul kaan bilib langa det wed, dumaji olabat jinggabat det Boswan King blanga olabat kaan dai langa kros. Tharran na stapam olabat blanga bilib langa det wed. En detlot Jintail pipul kaan bilib langa det wed du, dumaji dei reken det wed im brabli siliwan. 24 Bat God bin pikimat sambala pipul blanga bilib langa im. Imbin pikimat sambala Juwish pipul en sambala Jintail pipul, en olabat sabi Jisas Krais na det wei blanga God, en im det pawa blanga God du.

25 Yu si? Loda pipul reken det pawa blanga God nomo enijing. Bat det pawa blanga im mowa strongbala langa enibodi pawa. En dei reken det plen blanga God im brabli siliwan. Bat God im sabi mowa langa enibodi.

26 Wal main braja en sista olabat, yumob jinggabat hau yumob bin jidan longtaim bifo God bin pikimat yumob, en yumob jinggabat wanim ola pipul bin reken blanga yumob. Bigmob pipul brom yumob nomo bin sabi ebrijing. Oni lilbit pipul bin sabi. En bigmob pipul brom yumob nomo bin abum eni pawa. Oni lilbit pipul bin abum pawa. En bigmob pipul brom yumob nomo bin jidan haibala pipul. Oni lilbit pipul bin jidan haibala.

27 Yu si? God nomo bin pikimat ola sabibala pipul en ola strongbala pipul. Imbin pikimat detlot pipul hu nomo sabi enijing en detlot pipul hu nomo garram eni pawa. En imbin pikimat olabat blanga meigim detlot sabibala pipul en detlot strongbala pipul sheim miselp.

28 Yumob sabi na? God bin pikimat detlot pipul hu jidan lobala en detlot pipul weya nobodi laigim. Imbin pikimat ol detkain pipul weya pipul reken olabat nomo enijing. En imbin pikimat ol detkain pipul na blanga meigim detlot pipul hu reken miselp haibala sheim miselp, en dei garra jinggabat dei nomo sabi enijing.

29 Yu si? Yumob kaan reken miselp en tok praudbalawei langa God, dumaji God na bin meigim yumob joinap garram Jisas Krais, 30 en Jisas Krais na det wei blanga wi blanga sabi God. Im na meigim wi jidan raitwei langa God, en im na meigim wi jidan ronwan pipul blanga God, en im na larramgo wi fri brom ola nogudbala ting weya wi oldei dumbat.

31 Yumob sabi na? If enibodi wandi reken miselp en tok praudbalawei, wal im kaan tok blanga im ronselp. Im garra tok blanga Jisas Krais det Bos blanga wi. Lagijat na im dalim wi langa oltestaman.✡Jera 9:24