1 Wal YAWEI det trubala God bin kipgon tok, 2 “Isikiyel, yu garra tok adbalawei langa detlot pipul langa Idam. 3 En yu garra dalim olabat dijan na wanim mi na YAWEI det boswan God tok, ‘Mi na det enami blanga yumob, en ai garra meigim yumob kantri jidan brabli rabishwan, 4 en ai garra bitsimap ola taun blanga yumob. En detlot kantri blanga yumob garra jidan wulijim deset kantri na. En yumob garra sabi mi na YAWEI det trubala God.

5 “ ‘Ol yumob pipul langa Idam, brom longtaim yumob bin jidan enami blanga detlot Isreil pipul, en yumob bin oldei wotjimbat wen najalot pipul bin oldei kaman blanga bidim en binijimap olabat, dumaji deibin abum panishmen blanga olabat nogudbalawei. 6 Wal mi na YAWEI det boswan God, en trubala ai dalim yumob. Yumob brabli giltiwan, dumaji yumob bin oldei medrimbat enibodi. Wal yumob garra dai na. 7 Ai garra binijimap ola kantri blanga yumob, en ai garra kilim enibodi hu trai blanga wok thru langa det kantri. 8 Ola dedwan bodi garra jidan ebriweya langa ola hil kantri. 9 En yumob kantri garra jidan brabli rabishwan olagijawan. Nomo eni pipul kaan jidan langa ola taun blanga yumob enimo, en yumob garra sabi mi na YAWEI det trubala God.

10 “ ‘Yumob bin reken det dubala kantri gulum Juda en Isreil bin blanga yumob. Bat mi na blanga olabat God, 11 en trubala ai dalim yumob. Mi na YAWEI det boswan God, en ai garra panishim yumob, dumaji yumob bin oldei wail en heidimbat main pipul olabat. En olabat garra sabi mi na YAWEI bin panishimbat yumob. 12 En yumob garra sabi aibin irrim yumob laflafbat wen main pipul olabat bin abumbat bigiswan trabul, en yumob bin reken yumob gin teikoba det dubala kantri. 13 Yumob bin mokimbat mi du, bat aibin irrim wanim yumob bin toktokbat. Ai sabi ebrijing yumob bin tok.

14 “ ‘Ebribodi langa dijan wel garra brabli gudbinji wen ai garra binijimap yumob, 15 jis laik yumob bin gudbinji wen ola Isreil pipul bin binijap. Blanga yumob kantri Idam garra jidan rabishwan, nomo garram enijing. Afta tharran ebribodi garra sabi mi na YAWEI det boswan God.’ ”✡Aisai 34:5-17; 63:1-6; Jera 49:7-22; Isik 25:12-14; Eimos 1:11,12; Oba 1:1-14; Mel 1:2-5