Eimos
God Bin Gibit Woning Langa Ola Isreil Pipul
Wal dijan stori im blanga det speshalwan mesinja blanga God neim Eimos. Imbin jidan stakmen langa det sauthwan kantri gulum Juda, bat God bin jandim im langa det nowathwan kantri gulum Isreil blanga wonim detlot pipul. God bin gibit im sambala speshalwan drim blanga shoum im wanim garra hepin langa ola Isreil pipul weya God garra panishim olabat. Loda Isreil pipul bin brabli ritjwan en deibin reken God bin gudbinji langa olabat en garra kipgon lukaftumbat olabat. Bat God bin jandim Eimos blanga dalim olabat God nomo bin laigim olabat dumaji deibin kipgon tenim miselp brom det lowa blanga God, en dei nomo bin oldei maindimbat ola powan pipul. Deibin oldei jinggabat olabat ronselp. Blanga tharran na God bin tok im garra panishim olabat.
1
1 Wal longtaim, 2 yiya bifo det graun bin sheik, God bin gibit im wed langa mi na Eimos blanga dalim detlot Isreil pipul. Wal det taim na aibin jidan bos blanga loda ship langa det taun gulum Tekowa en Yusaiya bin jidan king langa Juda en Jerabowam det san blanga Jehowesh bin jidan king blanga Isreil.✡2 King 14:23-29; 15:1-7; 2 Kran 26:1-23
2 Wal aibin tok,
“YAWEI det trubala God im jingat brabli adbala brom det hil gulum Saiyan,
jis laik det laiyan weya im jingat adbala wen im redi blanga kilim samting blanga dagat.
Im jingat brabli adbala brom Jerusalem,
en ola pedik bin draiyap en ola grin gras ontop langa det hil gulum Kamul bin ol draiyap du.”✡Jowal 3:16
God garra panishim ola najalot pipul
3 Wal blanga detlot pipul langa det kantri gulum Siriya YAWEI det trubala God im tok, “Detlot pipul langa det taun gulum Dameskas oldei dumbat nogudbala ting en blanga tharran na ai garra panishim olabat. Deibin kilimbat ola pipul brom det kantri gulum Giliyad brabli krulbalawei. 4 Wal blanga tharran na ai garra jandim faiya blanga barnimap det haus weya det king gulum Heiseiyel bin bildimap en ai garra barnimap ol detlot strongwan haus blanga det king gulum Benaded. 5 En ai garra breigimap ol detlot geit blanga det taun gulum Dameskas en ai garra deigidawei ola pipul brom det fletwan kantri gulum Eiben en ai garra deigidawei det boswan blanga det taun gulum Betheden en ai garra jandim solja langa det kantri gulum Siriya en dei garra deigidawei ola pipul prisana langa det longweiwan kantri gulum Kira.” Lagijat na YAWEI bin tok blanga detlot pipul brom det kantri gulum Siriya.✡Aisai 17:1-3; Jera 49:23-27; Sek 9:1
6 Blanga detlot pipul langa det kantri gulum Filastain YAWEI bin tok, “Detlot pipul langa det taun gulum Gasa oldei dumbat nogudbala ting en blanga tharran na ai garra panishim olabat. Deibin deigidawei ol main pipul brom wan pleis en deibin selim olabat langa detlot pipul brom det kantri gulum Idam. 7 En blanga tharran na ai garra barnimap ola wol blanga det taun gulum Gasa en ai garra barnimap ola strongbala haus deya du. 8 En ai garra deigidawei ola boswan brom det dubala taun gulum Eshdad en Eshkalan, en ai garra panishim ola pipul langa det najawan taun gulum Ekran en ola najalot pipul deya langa det kantri gulum Filastain garra ol dai du.” Lagijat na YAWEI bin tok blanga ola pipul brom det kantri gulum Filastain.✡Aisai 14:29-31; Jera 47:1-7; Isik 25:15-17; Jowal 3:4-8; Sef 2:4-7; Sek 9:5-7
9 Blanga detlot pipul langa det taun gulum Taya YAWEI bin tok, “Detlot pipul langa det taun gulum Taya oldei dumbat nogudbala ting en blanga tharran na ai garra panishim olabat. Deibin deigidawei ola pipul prisana, en deibin selim olabat langa detlot pipul brom det kantri gulum Idam, en wen deibin dum lagijat dei nomo bin kipum det pramis weya deibin dalim miselp longtaim blanga jidan braja gija. 10 En blanga tharran na ai garra barnimap ola wol blanga det taun gulum Taya, en ai garra barnimap ola strongbala haus deya du.” Lagijat na YAWEI bin tok blanga ola pipul brom det taun gulum Taya.✡Aisai 23:1-18; Isik 26:1—28:19; Jowal 3:4-8; Sek 9:1-4; Meth 11:21,22; Luk 10:13,14
11 Blanga detlot pipul langa det kantri gulum Idam YAWEI bin tok, “Detlot pipul langa det kantri gulum Idam oldei dumbat nogudbala ting en blanga tharran na ai garra panishim olabat. Yumob ol jidan braja gija bat detlot pipul brom det kantri gulum Idam bin ranimapbat yumob brom yumob kantri garram bigwan naif en deibin tridimbat yumob krulbalawei, dumaji longtaim deibin abum nogud filing langa yumob en dei kipgon lagijat tudei. 12 En blanga tharran na ai garra barnimap ola wol blanga det taun gulum Teman en ai garra barnimap ola strongbala haus blanga olabat taun gulum Bosra.” Lagijat na YAWEI bin tok blanga ola pipul brom det kantri gulum Idam.✡Aisai 34:5-17; 63:1-6; Jera 49:7-22; Isik 25:12-14; 35:1-15; Oba 1:1-14; Mel 1:2-5
13 Blanga detlot pipul langa det kantri gulum Eman YAWEI bin tok, “Detlot pipul langa det kantri gulum Eman oldei dumbat nogudbala ting en blanga tharran na ai garra panishim olabat. Wen olabat bin abum det fait blanga gajim mowa kantri olabat bin kadimbat binji nogudwei blanga detlot wuman weya bin jidan femiliwei deya langa det kantri gulum Giliyad. 14 Ai garra jandim bigwan faiya langa det wol langa det taun gulum Reiba, en ai garra barnimap detlot najalot strongwan haus du. En afta langa det bigbala fait loda pipul garra jinginatbat brabli adbala, en ebriweya dei garra kilimbat miselp en dei garra meigim bigbala nois laik bigwan win kaman langa rein. 15 Wal det king brom det kantri gulum Eman en ola boswan wekinmen en ola boswan solja blanga im garra ol jidan prisana langa najawan kantri.” Lagijat na YAWEI bin tok blanga ola pipul brom det kantri gulum Eman.✡Jera 49:1-6; Isik 21:28-32; 25:1-7; Sef 2:8-11
✡1:1 2 King 14:23-29; 15:1-7; 2 Kran 26:1-23
✡1:5 Aisai 17:1-3; Jera 49:23-27; Sek 9:1
✡1:8 Aisai 14:29-31; Jera 47:1-7; Isik 25:15-17; Jowal 3:4-8; Sef 2:4-7; Sek 9:5-7
✡1:10 Aisai 23:1-18; Isik 26:1—28:19; Jowal 3:4-8; Sek 9:1-4; Meth 11:21,22; Luk 10:13,14
✡1:12 Aisai 34:5-17; 63:1-6; Jera 49:7-22; Isik 25:12-14; 35:1-15; Oba 1:1-14; Mel 1:2-5
✡1:15 Jera 49:1-6; Isik 21:28-32; 25:1-7; Sef 2:8-11