Luk
Luk Bin Dalim Ola Stori Blanga Jisas Langa Wan Jintail Men
Wal dijan stori im det gudnyus blanga Jisas Krais. Wan dokta neim Luk bin raidimdan dijan gudnyus. Luk nomo bin luk Jisas garram im ron ai. Bat imbin album det mishanri neim Pol, en imbin go ebriweya garram im, en brom im na imbin irrim ola stori blanga Jisas, en afta imbin raidimdan dijan gudnyus. Wal Luk bin raidimdan dijan leda langa wan bosmen neim Thiyafalas blanga meigim im sabi det stori blanga Jisas brabli streitbalawei.
1
Luk bin raidimdan leda langa Thiyafalas
1 Wal loda pipul bin raidimdan stori blanga Jisas Krais en ol detlot ting weya bin hepin iya langa dijan kantri Judiya. 2 Sambala pipul bin luk detlot ting hepin brom stat, en deibin spredimat det gudnyus, en afta bigmob pipul bin irrim detlot stori, en deibin raidimdan.
3 Wal aibin jinggabat ol detlot stori brabliwei, en aibin go raitbek en tjekoba ol detlot stori brom stat. En blanga tharran na aibin jinggabat blanga raidimdan ol detlot stori blanga streitinimap olabat blanga yu, Thiyafalas. 4 En aibin raidimdan ol detlot stori blanga album yu sabi brabliwei ol detlot ting weya deibin lenimbat yu.
Wal iya na ol detlot stori blanga Jisas Krais.
Einjul bin tok langa Sekaraiya
5 Orait, det taim wen Herod bin jidan king langa Judiya, wan serramonimen neim Sekaraiya bin jidan deya du. Imbin blanga det kampani blanga det boswan serramonimen neim Abaija, en imbin abum waif neim Elisabeth hubin rileishan blanga det brabli haibala serramonimen neim Eran.✡1 Kran 24:10 6 Dubala bin jidan brabli gudbala langa Godwei, en dubala bin kipum ol detlot lowa blanga God brabliwei. 7 Bat dubala nomo bin abum eni biginini, dumaji Elisabeth kaan abum, en dubala bin brabli ol pipul na.
8-9 Wal wandei Sekaraiya bin go langa det Serramoni Pleis blanga ola Juwish pipul, en detlot serramonimen bin pikimat im blanga gowin insaid langa det Serramoni Pleis en barnim det gudsmelwan medisin langa det teibul blanga ofring, dumaji deibin oldei pikimat wanbala serramonimen blanga dum det wek.
Wal wen imbin taim blanga barnim det gudsmelwan medisin, Sekaraiya bin gowin insaid langa det Serramoni Pleis miselp, 10 en ola pipul bin prei atsaid.
11 Wal wen Sekaraiya bin deya insaid langa det haus, wan einjul brom God bin kamat langa im, en det einjul bin jandap raidensaid langa det teibul blanga ofring weya dei oldei barnim det gudsmelwan medisin, 12 en wen Sekaraiya bin luk det einjul, imbin hatjamp, en imbin bradin du.
13 Wal det einjul bin dalim Sekaraiya, “Yu nomo bradin, Sekaraiya. God bin irrim yu preya, en yu waif Elisabeth garra abum san blanga yu, en yu garra gulum im neim Jon. 14 Im garra meigim yu hepi, en yu garra jidan brabli gudbinji, en loda pipul garra gudbinji en hepi wen im bon du.
15 “Wal det san blanga yu garra jidan brabli haibala langa Godwei, en im kaan dringgim eni wain en strongwan dringk. En det Holi Spirit garra jidan langa im brom det taim bifo im garra bon,✡Nam 6:3 16 en im garra meigim loda pipul iya langa dijan kantri Isreil kambek langa God. Det san blanga yu garra meigim olabat kambek langa det Boswan blanga olabat, 17 en im garra go lida langa det boswan garram det Spirit en pawa brom God seimwei laik det speshalwan mesinja neim Ilaija bin dum, en im garra meigim ola dedi jinggabat olabat biginini en laigim olabat, en im garra tenimran detlot pipul hu nomo oldei duwit langa God lowa en meigim olabat jinggabat det gudbalawei, en im garra meigim detlot pipul jidan redi blanga det Boswan hu garra kaman.” Lagijat na det einjul bin tok langa Sekaraiya.✡Mel 4:5,6
18 Wal Sekaraiya bin askim det einjul, “Hau ai garra sabi dijan weya yu dalimbat mi im trubala? Dumaji mi olmen en main waif im olgamen na.”
19 Wal det einjul bin tok, “Main neim Geibriyal, en mi oldei jandap deya wansaid langa God, en im na bin jandim mi blanga tok langa yu en dalim yu dijan gudnyus.✡Den 8:16; 9:21 20 Trubala ai dalim yu. Wen im det rait taim, yu waif garra abum det beibi. Bat yu kaan tok na, dumaji yu nomo bin bilib langa mi. Yu garra jidan kwaitbala raidap det beibi garra bon.”
21 Wal Sekaraiya bin jidan longtaim deya insaid langa det Serramoni Pleis, en detlot pipul hubin weidabat atsaid bin stat askimbat miselp blanga im.
22 Bambai na wen Sekaraiya bin kamat, im nomo bin tok enijing, en ol detlot pipul bin sabi imbin luk samting deya insaid langa det Serramoni Pleis, en imbin tok langa olabat garram im bingga, dumaji im nomo bin tok garram im mawus na.
23 Wal wen det taim blanga Sekaraiya bin binij weya imbin dumbat det wek langa det Serramoni Pleis, imbin gobek langa im ron kemp.
24-25 Bambai na Elisabeth det waif blanga Sekaraiya bin jidan femiliwei, en imbin tok, “Aibin oldei sheim, dumaji ai nomo bin abum eni biginini. Bat God bin deigidawei det sheim na. Nomeda imbin deigim im longtaim, bat stil God bin album mi.”
Einjul bin tok langa Meri
26 Bambai na wen det olgamen Elisabeth bin jidan femiliwei 6 mants, God bin jandim det einjul neim Geibriyal langa wanbala taun gulum Nesareth deya langa det kantri gulum Gelali, dumaji imbin abum wed blanga wan gel deya neim Meri. 27 Det gel bin pramis langa wan men neim Josef hubin grengrensan blanga King Deibid. Bat dubala nomo bin merrit yet, en det gel nomo bin kemp garram eni men.✡Meth 1:18
28 Wal wen det einjul bin kamat langa Meri, imbin tok, “Meri, God im laigim yu brabli, en im jidan garram yu.”
29 Wal wen Meri bin irrim det wed, imbin gida shok, en imbin bradin du, en im nomo bin sabi wotfo det einjul bin tok langa im lagijat.
30 Wal det einjul bin tok, “Yu nomo bradin, Meri, dumaji God im brabli gudbinji langa yu, 31 en yu garra abum boiwan beibi en yu garra gulum im neim Jisas.✡Meth 1:21 32 Im garra jidan brabli haibala, en dei garra gulum im S an blanga det brabli haibala God, en God garra meigim im jidan brabli bigbala Bos jis laik im grengrenfatha Deibid bin jidan king, 33 en im garra lidimbat ola pipul langa Isreil olagija, en im garra jidan Bos olagijawan.”✡2 Sem 7:12,13,16; Aisai 9:7
34 Wal Meri bin tok langa det einjul na, “Mi yanggel dijan. Ai nomo bin go garram men. Ai nomo bin silip garram eni men. Hau ai garra abum beibi?”
35 Wal det einjul bin tok, “Det Holi Spirit garra kaman, en God pawa garra jidan langa yu. Lagijat na yu garra faindim det beibi, en blanga tharran na det beibi im speshalwan, en dei garra gulum im God san.
36 “Wal yu jinggabat Elisabeth yu rileishan na. Im kaan abum beibi, dumaji im brabli olgamen. 37 Bat imbin jidan femiliwei 6 mants na, dumaji God gin dum enijing.” Lagijat na det einjul bin tok.✡Jen 18:14
38 En Meri bin tok, “Wal mi wekingel blanga God. Im na main Bos, en mi wandim det ting garra hepin langa mi lagijat gin weya yubin dalimbat mi.” Lagijat na Meri bin tok, en afta det einjul bin gowei.
Meri bin go en luk Elisabeth
39 Afta na Meri bin go langa det taun weya det olgamen Elisabeth bin jidan. Det taun bin deya langa det hil kantri langa Judiya, 40 en Meri bin go streit langa det haus blanga Sekaraiya, en wen imbin kamat deya, imbin tok gudei langa det olgamen.
41 Wal wen det olgamen bin irrim Meri bin tok gudei, det beibi insaid langa det olgamen binji bin jamp, en det Holi Spirit bin gowin langa det olgamen, 42 en det olgamen bin jingat adbala langa Meri, “God im laigim yu, en imbin pikimat yu brom ola najalot gel, en det beibi weya yu garra abum, im brabli speshalwan.
43 “Wal yubin meigim mi brabli gudbinji wen yu kaman iya, dumaji yu na mami blanga det brabli haibala Bos. 44 En wen aibin irrim yubin tok gudei, det beibi insaid langa mi bin jamp, dumaji imbin gudbinji. 45 En yu garra jidan gudbinji du, dumaji yubin bilib langa God, en ebrijing weya imbin dalim yu garra hepin truwan.” Lagijat na det olgamen bin tok.
Meri bin preisim God
46 Wal Meri bin tok na,
“Mi preisimbat God det brabliwan Bos,✡1 Sem 2:1-10
47 en mi brabli gudbinji langa im,
dumaji im na bin seibum mi.
48 Nomeda mi nomo haibala gel,
bat stil God bin jinggabat mi.
Nomeda mi oni wekingel blanga im,
bat stil imbin pikimat mi,
en brom tudei na ola pipul ebriweya garra gulum mi Blesidwan.✡1 Sem 1:11
49 Dei garra tok lagijat dumaji God bin dum loda gudbala ting blanga mi.
God im brabli haibala,
en im garram loda pawa.
Im na det brabli Holiwan,
50 en im brabli kainbala langa ol detlot pipul brom ebri jinareishan hu rispek im.
51 God bin shoum im pawa langa ol detlot pipul hubin reken miselp haibala en meigimbat olabat ronwan plen.
Imbin shoum im pawa wen imbin deigidawei ola enijing brom olabat en meigim olabat lobala.
52 God bin meigim ola haibala king jidan lobala,
en imbin lidimap ola lobala pipul langa haibala pleis.✡Job 5:11; 12:19
53 Imbin lukaftumbat ola hanggribala pipul garram olkain gudbala ting,
en imbin jandimwei ola ritj pipul nomo garram enijing langa olabat bingga.
54 God bin kipum det pramis weya imbin meigim langa wi grengrenfatha Eibrahem,
en imbin albumbat ol detlot pipul langa dijan kantri Isreil hubin bulurrum im.
55 Imbin jinggabat det pramis weya imbin meigim langa Eibrahem en langa ola biginini blanga im en langa olabat biginini du.
Imbin tok im garra kain langa olabat olagija,
en imbin duwit na.”
Lagijat na Meri bin tok.✡Jen 17:7
56 Wal Meri bin jidan deya garram Elisabeth thrimants, en afta imbin gobek langa im ron kemp.
Jon Beptis bin bon
57 Bambai na det taim bin kaman blanga det olgamen Elisabeth blanga abum det beibi, en imbin abum lilboi, 58 en wen ola fren en ola femili blanga det olgamen bin irrim det gudnyus weya God bin gud langa im, deibin ol brabli gudbinji.
59 Wal wen det beibi bin wan wik ol, imbin taim blanga sekamsais im en gibit im neim, en detlot pipul bin wandi gibit det lilboi im dedi neim Sekaraiya.✡Labid 12:3 60 Bat im mami bin tok, “Nomo. Wi garra gulum im neim Jon.”
61 Wal detlot pipul bin dalim det olgamen, “Yu kaan gulum im Jon, dumaji nobodi langa yu femili garram det neim.” 62 En deibin askim det lilboi dedi, “Olmen, wanim neim yu wandi gibit det lilboi?”
63 Wal det olmen bin dalim olabat garram im bingga blanga gibit im samting blanga raidimdan det lilboi neim, en wen deibin gibit im, imbin raidimdan, “Im neim Jon.”
Wal ol detlot pipul bin hatjamp wen det olmen bin gibit det neim, 64 en seimtaim God bin opinimap det mawus blanga det olmen, en streidawei imbin stat toktok en jinginat gudbinjiwei langa God.
65 Wal ol detlot fren blanga det olmen bin gida shok wen deibin irrim wanim bin hepin, en det nyus bin spredat ebriweya langa det hil kantri weya deibin jidan, 66 en ol detlot pipul hubin irrim det nyus bin jinggabat wanim bin hepin, en deibin tok, “Wotkain men dijan lilboi garra jidan wen im growap?” Lagijat na deibin tok, dumaji deibin ol sabi God bin pikimat im blanga meigim im jidan speshalwan.
67 Wal det Holi Spirit bin gowin langa det lilboi dedi Sekaraiya, en imbin meigim im tok wanim God bin wandim im blanga tok. Imbin tok,
68 “Wi garra preisim God det brabliwan Bos blanga dijan kantri Isreil,
dumaji imbin kaman blanga album ola pipul blanga im en meigim wi fri.
69 God garra jandim det grengrensan blanga King Deibid.
Det grengrensan im brabli strongbala,
en im na garra seibum wi.
70 God bin meigim det pramis langa wi longtaim wen imbin dalim detlot speshalwan mesinja blanga im.
71 Imbin tok im garra seibum wi brom ola bedfren blanga wi en brom detlot pipul hu nomo laigim wi,
72 en imbin tok im garra jinggabat ola grengrenfatha blanga wi.
En im garra kipum det pramis weya imbin meigim garram olabat.
73 Strongbalawei imbin meigim det pramis langa wi grengrenfatha Eibrahem,
74 en imbin pramis blanga gajim wi brom ola bedfren blanga wi wulijim wi garra wek blanga im en nomo bradin blanga enijing.
75 Im garra gajim wi wulijim wi garra jidan gudbalawei.
Wi garra jidan raitwei langa im olagija.”
Lagijat na Sekaraiya bin tok.
76 Wal det Holi Spirit bin meigim det olmen Sekaraiya tok langa det lilboi na,
“Main lilboi, dei garra gulum yu det speshalwan mesinja blanga det brabli haibala God.
God garra jandim det Boswan gulum Masaiya,
en yu garra go lida langa im,
en yu garra meigim det roud redi blanga im.✡Mel 3:1
77 Yu garra dalim ola pipul God garra larramgo olabat brom olabat nogudbalawei,
en im garra meigim olabat jidan fri,
dumaji det God blanga wi im brabli kainbala en soribala.
78-79 Wal detlot pipul hu nomo garram lait kaan luk det roud weya dei garra pudum olabat fut,
en dei garra dai.
Bat God garra gibit det lait brom hebin blanga shoum olabat det roud wulijim dei garra jidan laibala olagijawan.”
Lagijat na Sekaraiya bin tok.✡Aisai 9:2
80 Wal wen det lilboi bin growap, imbin brabli gudbala men, en imbin jidanbat langa bush kantri raidap det taim blanga im bin kaman blanga shoum miselp langa ola Juwish pipul.