1 Sandei ailibala bifo det san bin gidap, detlot gel bin go langa det keibwan greib garram detlot gudsmelwan medisin blanga rabum Jisas bodi, 2 en deibin faindim det ston dowa langa det keib bin opin, 3 en deibin gowin insaid. Bat dei nomo bin luk det bodi blanga Jisas. 4 En wen deibin jandap deya lukinatbat det keib, dubala einjul bin kamat langa olabat. Det dubala einjul bin abum brabli braitwan shainiwan klos, 5 en detlot gel bin brabli bradin, en wen det dubala einjul bin tok langa olabat, deibin baudan garram olabat feis langa graun.

Wal det dubala einjul bin tok, “Wotfo yumob lukabat det laibalawan weya ola dedbala oldei jidan? 6 Im nomo iya! Imbin gidap! Yumob jinggabat wanim imbin dalim yumob deya langa Gelali. 7 Imbin tok dei garra hendimoba im langa nogudbala pipul, en dei garra neilimap im langa kros. Bat thrideistaim im garra gidap laibala.”✡Meth 16:21; 17:22,23; 20:18,19; Mak 8:31; 9:31; 10:33,34; Luk 9:22; 18:31-33

8 Wal wen detlot gel bin irrim dubala tok lagijat, deibin jinggabat wanim Jisas bin dalimbat olabat bifo, 9-10 en deibin gowei brom det keib, en deibin gobek en dalimbat det nyus. Detlot gel bin Meri Megdalin, Jowena, en Meri det mami blanga Jeims. En deibin go en dalim detlot najalot gel, en afta deibin ol go en dalim detlot lebenbala speshalwan mishanri en ola najalot pipul wanim bin hepin deya langa det keib. 11 Bat detlot speshalwan mishanri nomo bin bilib langa detlot gel, dumaji deibin reken deibin dalimbat laiya.

12 Wal Pida bin gidap, en imbin ran langa det keib, en wen imbin kamat langa det keib, imbin jandap atsaid, en im nomo bin luk enijing deya insaid. Oni detlot bendij weya deibin repdimap Jisas bodi imbin luk.

Wal Pida bin hatjamp, en imbin gobek langa im kemp, en imbin jinggabat wanim bin hepin.

13 Wal det seim dei dubala men hubin bulurrum Jisas bin go langa det lilwan taun gulum Imeiyas. Det lilwan taun nomo bin longwei. Imbin oni 11 kilomita brom Jerusalem, 14 en wen dubala bin wokwok langa roud, dubala bin toktok blanga ol detlot ting weya bin hepin deya langa Jerusalem.

15 Wal wen dubala bin toktok blanga detlot ting, Jisas bin kamat langa dubala, en imbin wok garram dubala, 16 en dubala bin luk im. Bat dubala nomo bin sabi hu im. 17 En imbin askim dubala, “Wanim yunbala toktok?”

Wal wen Jisas bin askim dubala lagijat, dubala bin stap, en dubala bin luk langa im brabli sedwei, 18 en det wan men neim Kliyapas bin dalim Jisas, “Yu nomo sabi? Nomeda yu streinja langa Jerusalem, bat stil oni yu na nomo sabi wanim bin hepin deya las wik!”

19 Wal Jisas bin tok, “Wanim bin hepin deya?”

En dubala bin tok, “Det men neim Jisas brom Nesareth bin speshalwan mesinja blanga God, en ola pipul bin reken imbin oldei tok brabli strongbalawei garram pawa, en imbin dumbat ebrijing garram pawa du, en God bin brabli gudbinji langa im. 20 Bat ol detlot haibala serramonimen en kaunsala blanga melabat bin hendimoba im langa detlot solja blanga neilimap im langa det kros, en deibin kilim im ded deya. 21 Melabat bin ol reken im na garra meigim ola pipul iya langa dijan kantri Isreil jidan fri.

“Wal im thrideistaim na brom det taim wen deibin kilim im ded, 22 en sambala gel blanga melabat bin meigim melabat hatjamp, dumaji ailibala deibin go langa det keib, 23 en dei nomo bin faindim im bodi deya. Deibin kambek, en deibin dalim melabat deibin luk sambala einjul deya, en detlot einjul bin dalim olabat Jisas im laibala. 24 En sambala men bin go langa det keib, en deibin faindim im lagijat gin weya detlot gel bin tok, en dei nomo bin luk im bodi.” Lagijat na det men bin tok.

25 Wal Jisas bin tok, “Yunbala granggibala! Wotfo yunbala kaan bilib ebrijing detlot speshalwan mesinja blanga God bin tok? 26 Deibin tok det Boswan gulum Masaiya garra go thru langa ol detlot trabul na weya bin hepin langa Jisas, en im garra go thru langa detlot trabul bifo im garra jidan brabliwan bos garram det shainiwan lait blanga im.”

27 Brom deya Jisas bin dalim dubala ebrijing wanim det oltestaman bin tok blanga im brom Jenasis raidap langa Melakai.

28 Afta na wen deibin kaman gulijap langa det lilwan taun, Jisas bin wandi kipgon. 29 Bat dubala bin askim im, “Yu jidan garram minbala, dumaji det san im godan na, en im gulijap dakbala.”

Wal Jisas bin stap garram dubala, 30 en wen deibin jidan blanga abum daga, Jisas bin gajim det damba, en imbin gibit theingks langa God, en afta imbin breigim det damba, en imbin gibit langa dubala. 31 En wen imbin dum lagijat, streidawei dubala bin sabi imbin Jisas. En seimtaim Jisas bin jis gowei bifo dubala bin luk im, 32 en afta dubala bin tok, “Deya langa det roud wen imbin dalim yunmi ebrijing det oltestaman bin tok blanga im, yunmi bin abum brabli gudwan filing insaid langa yunmi jis laik yunmi bin womim miselp langa faiya.”

33 Wal streidawei dubala bin gidap, en dubala bin gobek langa Jerusalem, en wen dubala bin kamat langa det lebenbala wekinmen blanga Jisas en detlot najalot pipul, detlot pipul bin dalim dubala. 34 Deibin tok, “Trubala det bos bin gidap! Imbin shoum miselp langa Saiman!”

35 En afta dubala bin dalim olabat wanim bin hepin langa dubala langa det roud en hau dubala bin sabi Jisas wen imbin breigim det damba.

36 Wal wen dubala bin dalimbat olabat, Jisas bin kamat langa olabat deya gin, en imbin tok, “Gudei main braja olabat.”

37 Wal deibin ol bradin detmatj, dumaji deibin reken imbin dibuldibul. 38 Bat imbin dalim olabat, “Wotfo yumob bradin? Wotfo yumob kaan bilib langa mi? 39 Yumob luk main bingga en main fut. Trubala mi dijan! Yumob tatjim mi en yu garra sabi mi dijan, dumaji dibuldibul nomo garram bif en boun wulijim mi.” 40 Lagijat na Jisas bin tok langa olabat.

En imbin shoum olabat im bingga en im fut. 41 Bat olabat stil nomo bin bilib, dumaji olabat bin hatjamp en gudbinji detmatj.

Wal Jisas bin askim olabat, “Yumob garram enijing blanga dagat?”

42 Wal deibin gibit im kukwan fish, 43 en imbin dagat en deibin lukinat langa im.

44 Afta na imbin dalim olabat, “Blanga dislot ting na aibin oldei dalimbat yumob basdam. Ebrijing weya deibin raidimdan langa det oltestaman blanga mi bin hepin trubala. Ebrijing bin hepin trubala weya Mosis bin raidimdan en weya detlot speshalwan mesinja bin raidimdan en weya King Deibid bin raidimdan langa detlot song du.”

45 Wal Jisas bin meigim olabat sabi brabliwei wanim det oltestaman bin tok blanga im, 46 en Jisas bin dalim olabat, “Dijan na wanim im tok langa oltestaman. Im tok det Boswan gulum Masaiya garra dai, en im garra gidap laibala thrideistaim.

47-48 “Wal mi na det Masaiya, en yumob bin luk dislot ting bin hepin garram yumob ron ai, en yumob garra dalimbat det gudnyus blanga mi langa ebri kantri. Yumob garra stat iya langa Jerusalem, en yumob garra dalim ola pipul blanga libum det nogudbalawei en bulurrum mi wulijim God garra larramgo olabat fri brom det nogudbalawei. 49 En mi na garra jandim det Holi Spirit weya main Dedi bin pramisim yumob. Bat yumob garra weit iya langa dijan taun blanga det taim wen det pawa brom hebin garra kamdan langa yumob.” Lagijat na Jisas bin tok.✡Eks 1:4

50 Brom deya Jisas bin deigim im wekinmen olabat atsaid brom det taun Jerusalem, en deibin go langa det lilwan taun gulum Bethani, en deya na imbin lidimap im bingga, en imbin gibit olabat im laswan wed, 51 en afta imbin gowei brom olabat, en imbin gowap langa hebin,✡Eks 1:9-11 52 en deibin weship langa im, en afta deibin gobek langa Jerusalem brabli gudbinji, 53 en ebridei deibin oldei gibitbat theingks langa God deya langa det Serramoni Pleis.

Binij na.